លោក សម រង្សី ប្រធានគណបក្សសង្គ្រោះ ជាតិបានឲ្យដឹងកាលពីម្សិលមិញថា ការចរចារវាងគណបក្សប្រជាជនកម្ពុជា និងគណបក្សសង្គ្រោះជាតិដើម្បីបញ្ចប់ភាពជាប់គាំងផ្នែកនយោបាយរយៈពេលជិតប្រាំមួយខែក្រោយការបោះឆ្នោតបន្ទាប់ពីគណបក្សប្រជាជនកម្ពុជាបានបដិសេធមិនពិភាក្សាអំពីលទ្ធភាពក្នុងការបោះឆ្នោតពាក់កណ្តាលអាណត្តិ។
លោក សម រង្ស៊ី បានមានប្រសាសន៍ថា “ដំបូង ហាក់ដូចជាមានការព្រមព្រៀងគ្នាថា គណបក្សប្រជាជនកម្ពុជានឹងទទួលយកគំនិតបោះឆ្នោតឡើងវិញ។ យើងបានគិតថា អាចមានការព្រមព្រៀង ក៏ប៉ុន្តែអ្វីដែលយើងទទួលបានថ្មីៗនេះ[ពីគណបក្សប្រជាជន]…ក្លាយជាការអស់សង្ឃឹមទៅវិញ”។
លោក សម រង្ស៊ី បានឲ្យដឹងថា គណបក្សប្រឆាំងត្រូវបានលោក ញឹក ប៊ុនឆៃ អគ្គលេខា ធិការគណបក្សហ៊្វុនស៊ិនប៉ិច ដែលជាឧបនាយករដ្ឋមន្ត្រីផងដែរនៅក្នុងរដ្ឋាភិបាលគណបក្សប្រជាជនរបស់លោក ហ៊ុន សែន ប្រាប់ថា ការបោះឆ្នោតឡើងវិញអាចធ្វើទៅបាន ក៏ប៉ុន្តែក្រោយមក លោកបានទទួលការឆ្លើយតបជាផ្លូវការពីគណបក្សប្រជាជនកម្ពុជាថា ខ្លួននឹងមិនពិចារណាសំណើបែបនេះទេ។
លោក ញឹក ប៊ុនឆៃ បានលើកឡើងកាលពីម្សិលមិញថា លោកគ្មានតួនាទីផ្លូវការណាមួយក្នុងការចរចារវាងគណបក្សទាំងពីរនោះទេ។លោក ញឹក ប៊ុនឆៃ បានមានប្រសាសន៍ថា “រយៈពេលប្រហែលបីសប្តាហ៍មុន ខ្ញុំបានជួបតំណាងរាស្ត្រមកពីគណបក្សសង្គ្រោះជាតិ នៅមជ្ឈមណ្ឌលកោះពេជ្រ នៅក្នុងពិធីអាពាហ៍ពិពាហ៍មួយ។ ខ្ញុំបានសួរសមាជិកសភារបស់គណបក្សសង្គ្រោះជាតិអំពីបញ្ហានយោបាយ ដូចជាថាតើនឹងមានកិច្ចព្រមព្រៀងមួយរវាងគណបក្សសង្គ្រោះជាតិ និងគណបក្សប្រជាជនកម្ពុជា ឬយ៉ាងណា។ វាជាការពិភាក្សាឯកជនមួយ”។
ពេលចុងក្រោយនេះ គណបក្សប្រជាជនកម្ពុជា និងគណបក្សសង្គ្រោះជាតិបានអង្គុយនៅតុចរចាផ្លូវការកាលពីថ្ងៃទី៦ ខែវិច្ឆិកា នៅពេលគណៈប្រតិភូមានសមាជិកចំនួនប្រាំរូបមកពីគណបក្សនីមួយៗ បានជួបគ្នារយៈពេលបីម៉ោងសម្រាប់ការចរចាប្រកបគ្មានផ្លែផ្កា។លោក សម រង្ស៊ី និងលោក ហ៊ុន សែន បានជួបគ្នាកាលពីក្នុងខែកញ្ញា ដើម្បីការចរចាថ្នាក់កំពូលដែលមានតែមួយជុំប៉ុណ្ណោះ ចាប់តាំងពីការបោះឆ្នោតដ៏ចម្រូងចម្រាសមក។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មានមកពីគណបក្សប្រជាជនកម្ពុជា បានមានប្រសាសន៍កាលពីថ្ងៃទី៣០ ខែធ្នូថា ការចរចាថ្នាក់កំពូលជុំទី២ នឹងចាប់ផ្តើមឆាប់ៗនេះ។ ដំបូងឡើយ លោក សម រង្ស៊ី បានមានប្រសាសន៍ថា លោកនឹងបើកចំហឲ្យមានការចរចាថែមទៀត ប៉ុន្តែបានផ្អាកទៅវិញ បន្ទាប់ពីគណបក្សប្រជាជនកម្ពុជាបានចាប់ផ្តើមបង្ក្រាបដោយហិង្សាទៅលើសកម្មភាពតវ៉ានៅទូទាំងរាជធានីកាលពីថ្ងៃទី២ ខែមករា។
លោក សម រង្ស៊ី បានថ្លែងកាលម្សិលមិញថា គណបក្សសង្គ្រាះជាតិនឹងមិនជួបចរចាទេ លុះត្រាតែបម្រាមមិនឲ្យធ្វើបាតុកម្មសាធារណៈត្រូវបានដកចេញ។
លោក ព្រំ សុខា រដ្ឋលេខាធិការក្រសួងមហាផ្ទៃមកពីគណបក្សប្រជាជន ដែលជាអ្នកសម្របសម្រួលរបស់គណបក្សប្រជាជនក្នុងការពិភាក្សាជាមួយគណបក្សសង្គ្រោះជាតិ កាលពីប៉ុន្មានសប្តាហ៍មុន បានឲ្យដឹងថា ការចរចាបានកំពុងបន្ត ប៉ុន្តែលោកបានបដិសេធមិនធ្វើអត្ថាធិប្បាយថែមទៀតឡើយ។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានលើកឡើងថា កិច្ចសន្ទនាតាមទូរស័ព្ទរវាងលោក ព្រំ សុខា មកពីគណបក្សប្រជាជនកម្ពុជា និងលោក គួយ ប៊ុនរឿន តំណាងរាស្ត្រជាប់ឆ្នោតមកពីបក្សប្រឆាំង មិនមែនជាទំនាក់ទំនងផ្លូវការរវាងគណបក្សទាំងពីរកាលពីខែមុនទេ ប៉ុន្តែប្រសិនបើគ្មានគំនិតនៅសល់លើតុចរចាទេ នឹងមិនទំនងជាមានលទ្ធផលជាផ្លែផ្កាឡើយ។
លោក សុវណ្ណ បានមានប្រសាសន៍ថា “ពីមុន យើងចង់…ឲ្យមានគណៈកម្មាធិការមួយដើម្បើធ្វើការស៊ើបអង្កេតទៅលើការបោះឆ្នោតនាពេលកន្លងទៅនេះ ប៉ុន្តែគណបក្សប្រជាជនកម្ពុជាបានបដិសេធ[សំណើនោះ] ។ ពេលនេះ យើងមានគំនិតថ្មីមួយ គឺការបោះឆ្នោតឡើងវិញ។ យើងមិនមានគំនិតអ្វីទៀតទេ”៕ប៊ុននី
(រាយការណ៍បន្ថែមដោយ អូន ភាព)