យោងតាមអនុក្រឹត្យដែលទទួលបានកាលពីម្សិលមិញបានឲ្យដឹងថា រដ្ឋាភិបាលគណបក្សប្រជាជនកម្ពុជាបានបង្កើតគណៈកម្មការកំណែទម្រង់ការបោះឆ្នោតអន្តរក្រសួងដែលមានសមាជិក១០រូបដឹកនាំដោយលោក ស ខេង រដ្ឋមន្ត្រីក្រសួងមហាផ្ទៃមកពីគណបក្សប្រជាជនកម្ពុជា។
គណបក្សសង្គ្រោះជាតិនិងអង្គការសិទ្ធិមនុស្សបានអំពាវនាវឲ្យធ្វើកំណែទម្រង់ការបោះឆ្នោត ដោយសារការបោះឆ្នោតជាតិកាលពីខែកក្កដា មានការចោទប្រកាន់ជាច្រើនអំពីការបន្លំសន្លឹកឆ្នោត ប៉ុន្តែមិនមែនជាគណៈកម្មាធិការចម្រុះស្ថាប័នឡើយ ហើយអនុក្រឹត្យនេះស្តែងឲ្យឃើញថា គណបក្សប្រជាជនកម្ពុជាមានបំណងធ្វើកំណែទម្រង់ការបោះឆ្នោតតែម្នាក់ឯងប៉ុណ្ណោះ។
យោងតាមឯកសារចុះថ្ងៃទី៩ខែធ្នូ និងចុះហត្ថលេខាដោយលោកនាយករដ្ឋមន្ត្រី ហ៊ុន សែន បានឲ្យដឹងថា គណៈកម្មការដែលមានសមាសភាពជារដ្ឋលេខាធិការក្រសួងមហាផ្ទៃ ក្រសួងយុត្តិធម៌ និងក្រសួងពាណិជ្ជកម្មមកពីគណបក្សប្រជាជនកម្ពុជានេះ គឺដើម្បីស្រាវជ្រាវការបោះឆ្នោតនៅក្នុងប្រទេសផ្សេងៗទៀត ប៉ុន្តែការវាយតម្លៃពីការអនុវត្តរបស់ប្រទេសណាមួយនោះមិនត្រូវបានបញ្ជាក់ឲ្យដឹងទេ។ “ដើម្បីបង្កើតក្របខណ្ឌកំណែទម្រង់ការបោះឆ្នោតឲ្យស្របតាមគោលការណ៍ពហុបក្ស ប្រជាធិបតេយ្យសេរី និងនីតិរដ្ឋនោះ” គណៈកម្មការនេះត្រូវរៀបចំសិក្ខាសាលា ថ្នាក់ជាតិមួយដើម្បីស្តាប់ការផ្តល់អនុសាសន៍ ពីគណៈកម្មាធិការជាតិរៀបចំការបោះឆ្នោត គណបក្សនយោបាយ អង្គការមិនមែនរដ្ឋាភិបាលដែលបានចុះបញ្ជីត្រឹមត្រូវ តំណាងស្ថាន ទូតនានា មន្ត្រីរដ្ឋាភិបាល សមាជិកសភា និងភាគីដែលមានការចាប់អារម្មណ៍ដទៃទៀត។
អនុសាសាន៍ដែលទទួលបានពីសិក្ខាសាលា បន្ទាប់មកត្រូវដាក់ជូនទៅលោក ហ៊ុន សែន ដែលត្រូវបញ្ជូនបន្តទៅទីស្តីការគណៈរដ្ឋមន្ត្រីដើម្បីធ្វើការពិចារណា។
លោក គល់ បញ្ញា នាយកប្រតិបត្តិគណៈកម្មាធិការដើម្បីការបោះឆ្នោតដោយសេរីនិងយុត្តិធម៌នៅក្នុងប្រទេសកម្ពុជាបានមានប្រសាសន៍ថា សំណើឲ្យរៀបចំសិក្ខាសាលានោះគឺជាការបិទបាំង សម្រាប់ការខិតខំប្រឹងប្រែងកែទម្រង់ពីភាគីតែមួយ។លោកបានមានប្រសាសន៍ថា “ កំណែទម្រង់ការបោះឆ្នោតគឺមិនពាក់ព័ន្ធ នឹងរដ្ឋាភិបាលទេ ប៉ុន្តែជាយន្តការរួមរបស់គណបក្សនយោបាយសំខាន់ៗ ជាពិសេសគណបក្សដែលមានអាសនៈនៅក្នុងសភា”។
លោកបានលើកឡើងថា “ [ភាគីទាំងពីរ] បានព្រមព្រៀងគ្នាកាលពីថ្ងៃទី១៦ខែកញ្ញាថា ពួកគេនឹងបង្កើតយន្តការរួមគ្នា ប៉ុន្តែគណៈកម្មការនេះគឺមានតែគណបក្សប្រជាជនកម្ពុជាប៉ុណ្ណោះ”។លោកបានបន្ថែមថា “ គណបក្សប្រជាជនកម្ពុជាខ្លួនឯងត្រូវគោរពអ្វីដែលមាននៅក្នុងកំណែទម្រង់ការបោះឆ្នោត”។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ ដែលជាសមាជិកសភាមួយរូបដែរនោះបានមានប្រសាសន៍ថា ការបង្កើតគណៈកម្មការដែលមានតែគណបក្សប្រជាជនកម្ពុជានោះគឺជាល្បិចកលដើម្បីពន្យារពេលកំណែទម្រង់ការបោះឆ្នោតពិតប្រាកដមិនឲ្យដំណើរការទៅមុខ ហើយថា នឹងមិនមានការអញ្ជើញគណបក្សប្រឆាំងឲ្យចូលរួមសិក្ខាសាលាថ្នាក់ជាតិ ដែលមានការចូលរួមច្រើនស្ថាប័នឡើយ ប្រសិនបើសិក្ខាសាលានោះរៀបចំដោយគណបក្សប្រជាជនកម្ពុជាម្នាក់ឯងនោះ។
លោក យឹម សុវណ្ណ បានមានប្រសាសន៍ថា “ យើងច្រានចោលគណៈកម្មការនេះ។ វាមិនអាចទទួលយកបានទេ ហើយវាគ្មានន័យឡើយ។ កំណែទម្រង់ច្បាស់លាស់ណាមួយទាក់ទងនឹងការបោះឆ្នោតត្រូវតែមានការចូលរួមពីគណបក្សសង្គ្រោះជាតិ…។ អ្នកដែលបង្កើតបញ្ហាមិនអាចដោះស្រាយបញ្ហាខ្លួនឯងបានឡើយ”។
លោកស្រី ឡូរ៉ា ថនតុន (Laura Thornton) នាយិកាប្រចាំប្រទេសនៃវិទ្យាស្ថានជាតិប្រជាធិបតេយ្យដែលមានមូលដ្ឋាននៅទីក្រុងវ៉ាស៊ីនតោនបានមានប្រសាសន៍ថា លោកស្រី “ ចង់ដឹងថា ហេតុអ្វីបានជាគណៈកម្មការនេះបង្កើតឡើងដោយគ្មានការចូលរួមពីអង្គការសង្គមស៊ីវិល ដែលប្រឹងប្រែងធ្វើការលើបញ្ហានេះ ឬបញ្ហាសំខាន់ៗជាច្រើនទៀតនោះ ពីព្រោះគណបក្សទាំងពីរគឺជាភាគីពាក់ព័ន្ធដ៏សំខាន់នៅទីនេះ”។លោកស្រី ថនតុន បានបន្ថែមថា “ បញ្ហានេះមិនអាចជួយលុបបំបាត់កង្វល់ដែលប្រជាពលរដ្ឋបានលើកឡើងអំពីការខ្វះតម្លាភាពនិងការចូលរួមពីគ្រប់មជ្ឈដ្ឋានទូទៅនៅក្នុងដំណើរការបោះឆ្នោតឡើយ”៕សារុន