27.5 C
Phnom Penh

អត្តពលិកកម្ពុជា​ឈ្នះ​មេដាយ​បាន​ប្រាំបួន​នៅ​ក្នុងព្រឹតិ្តការណ៍​ប្រកួត​កីឡា​ចម្រុះ​​ ប៉ារ៉ា ហ្គេម នៅ​ប្រទេស​ភូមា 

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ​ អត្តពលិក​កម្ពុជា​បាន​វិល​ត្រឡប់​ពី​ព្រឹត្តិការណ៍​ប្រកួត​កីឡា​ចម្រុះ​​ ប៉ារ៉ា ហ្គេម លើក​ទី​៧នៅ​ទីក្រុង​ណៃពីដោ​ប្រទេស​​ភូមា​ ដោយ​បាន​ឈ្នះ​មេដាយ​ប្រាំ​បួន​គ្រឿង​ ដែលនេះ​ជា​ភាព​រីក​ចម្រើន​មួយ​ បន្ទាប់​ពី​បានឈ្នះ​មេដាយ​ប្រាំពីរគ្រឿង​នៅ​ប្រទេស​ឥណ្ឌូណេស៊ី​ កាលពី​ឆ្នាំ​២០១១។

តារាងមេដាយផ្លូវ​ការ​សម្រាប់​ព្រឹត្តិ​ការណ៍​ប្រកួត​កីឡានេះ​បង្ហាញ​ថា ប្រទេស​កម្ពុជា​ជាប់​ចំណាត់​ថ្នាក់​លេខ​៣​ រាប់​ពី​ក្រោម​ ដោយ​​ទទួល​បាន​មេដាយ​មាស​បី​គ្រឿង​ មេដាយ​​ប្រាក់​បួន​គ្រឿង​ និង​មេដាយ​សំរិទ្ធ​ពីរគ្រឿង​ ក៏​ប៉ុន្តែ​ លោក យី វាសនា អគ្គ​លេខា​ធិការ​គណៈ​កម្មាធិការ​ជាតិ​ប៉ារ៉ា​អូឡាំពិក បាន​ឲ្យ​ដឹង​ថា តារាង​ផ្លូវការ​នោះ​មិន​ត្រឹម​ត្រូវ​ទេ​ ពោល​គឺ​ប្រទេសកម្ពុជា​ឈ្នះ​មេដាយ​​​៣២​គ្រឿង​។​តួលេខ​សរុប​នេះ​បង្ហាញ​ថា លោករាប់​ចំនួន​មេដាយ​របស់​កីឡាករ​ម្នាក់​ៗ​ដែល​ទទួល​បាន​សម្រាប់​កីឡា​ក្នុង​ក្រុម​។ លោក​បាន​មាន​ប្រសាសន៍​ថា “ លទ្ធផល​នេះ​ហួស​ពីការ​រំពឹង​ទុក​របស់​យើង​”។

លោក វ៉ាត់ ចំរើន​ បានលើក​ឡើង​ថា ជោគ​​ជ័យ​របស់​ប្រទេស​កម្ពុជា​នៅ​ក្នុង​ព្រឹត្តិការណ៍​ប្រកួត​កីឡាចម្រុះ​នេះ​ឆ្លុះ​បញ្ចាំង​ឲ្យ​ឃើញ​សមត្ថភាព​របស់​អត្តពលិក​ពិការ​កម្ពុជា​។លោក​បាន​មាន​ប្រសាសន៍​ថា “ អត្តពលិក​ប៉ារ៉ាឡាំពិករបស់​យើង​មាន​ទេព​កោសល្យ​ល្អ​ជាង​អត្តពលិក​ដទៃទៀត​របស់​យើង​ ហើយ​លទ្ធផល​នេះ​ឆ្លុះបញ្ចាំង​ឲ្យ​ឃើញ​វឌ្ឍនភាព​ដ៏​ធំ​នៅ​ក្នុង​ផ្នែក​បច្ចេក​ទេស​”។

កីឡាករ​ឆ្នើមកម្ពុជា​​នៅ​ក្នុង​ព្រឹត្តិការណ៍​ប្រកួត​កីឡា​ចម្រុះ​នេះ​គឺ​កីឡាករជើង​ឯក​​ប្រណាំង​រទេះ​​រុញ វណ្ណ វុន ដែល​ឈ្នះ​មេ​ដាយ​ប្រាំ​ ក្នុង​នោះមាន​មេដាយ​មាស​បី​ផ្នែក​ប្រណាំង​ចម្ងាយ​៤០០ម៉ែត្រ​ ២០០ម៉ែត្រ​ និង​១០០ម៉ែត្រ​ និង​មេដាយ​ពីរទៀត​ ជាមេ​ដាយ​ប្រាក់​ផ្នែក​រុញ​រទេះ​បណ្តាក់​។

កម្មវិធី​ប្រកួត​កីឡា​ផ្សេង​ៗទៀត​ ដែល​ប្រទេសកម្ពុជា​បាន​ចូល​រួម​មាន​ដូចជា កីឡា​ហែលទឹក​ និង​កីឡាបាល់​ទះរទេះ​រុញ​ ក៏​ប៉ុន្តែ លោក វាសនា បាន​លើក​ឡើង​ថា នៅ​ក្នុង​ព្រឹត្តិ​ការណ៍​ប្រកួត​កីឡា​ចម្រុះ​​លើក​ក្រោយ​ ពួកគេ​នឹង​បន្ថែម​កីឡា​លើក​ទម្ងន់​ កីឡា​បាល់​ជន​ពិការ​ និង​កីឡា​អុក នៅ​ក្នុង​បញ្ជី​ប្រកួត​កីឡា​នៅ​ក្នុង​ព្រឹត្តិការណ៍​នេះ។

អត្តពលិកជាច្រើន​ដែល​បាន​ចូល​រួម​ប្រកួត​នៅ​ប្រទេស​ភូមា ប្រាថ្នា​ឲ្យ​ខ្លួន​ឯង​មាន​លក្ខណៈ​សម្បត្តិ​គ្រប់​គ្រាន់​សម្រាប់​ចូល​រួម​ប្រកួត​កីឡា​ចម្រុះ​ ប៉ារ៉ាឡាំពិក​លើក​ក្រោ​យ​ក្នុង​ឆ្នាំ​២០១៦ ក៏​ប៉ុន្តែ ពួកគេ​ប្រឈម​មុខ​បញ្ហា​ជា​ច្រើនដូច​ដែល​ប្រទេសកំពុង​អភិវឌ្ឍន៍​ភាគ​ច្រើន​មិន​មាន​លទ្ធភាព​ទិញ​បាន ដូចជា រទេះ​រុញ​ទំនើប​ៗ​និង​អវយវៈសិប្បនិមិត្តល្អៗសម្រាប់​ប្រកួត​។

ប្រទេស​នាំ​មុខ​​ក្នុង​ព្រឹត្តិការណ៍​ប្រកួត​កីឡា​ចម្រុះ​នេះ​រួមមាន ប្រទេស​ឥណ្ឌូណេស៊ី ដែល​ឈ្នះ​មេដាយ​២១៧គ្រឿង​ ថៃ ដែល​ឈ្នះ​មេដាយ​២៤៨គ្រឿង និង​ប្រទេស​ម៉ាឡេស៊ី ដែល​ឈ្នះ​មេដាយ​១៤០គ្រឿង​៕ សុធា

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស