32 C
Phnom Penh

អង្គការ​មិនមែន​រដ្ឋាភិបាល​បន្ត​​ដាក់ញត្តិ​ទាម​ទារឲ្យ​ដោះ​លែង​អ្នក​តវ៉ា​២៣នាក់​ដែល​​កំពុង​ជាប់ឃុំ

ដោយ ឌឹ ខេមបូឌា ដេលី

បទវិភាគ

បន្ទាប់​ពីការ​ចាប់​ខ្លួន​សកម្មជន​១១​នាក់​កាលពី​ថ្ងៃ​អង្គារ​ ខណៈដែល​ពួកគេ​ព្យាយាម​យក​ញត្តិ​ទៅ​ដាក់​ជូន​ស្ថានទូត​អា​មេរិក​ និងស្ថាន​ទូត​បារាំង​ ស្វះ​ស្វែង​ឲ្យ​​មាន​ការ​ដោះ​លែង​អ្នក​តវ៉ាទាំង​​២៣នាក់​ដែល​ត្រូ​វ​បាន​ឃុំ​ខ្លួន​នោះ តំណាង​អង្គការ​មិន​មែន​រដ្ឋាភិបាល​ក៏បាន​យក​ញត្តិ​ស្រដៀង​គ្នា​នេះ​ទៅ​ដាក់​ជូន​ស្ថានទូត​ជប៉ុន​ និង​ទីស្នាក់​ការ​កណ្តាល​សហ​ភាព​អឺរ៉ុបដោយ​​ស្ងាត់​ៗ​ផង​ដែរ​​កាល​ពី​ម្សិល​មិញ។

អ្នក​​ធ្វើ​​ញត្តិ​ ​ដែល តំណាង​ឲ្យ​អង្គការ​មិន​មែន​រដ្ឋា​ភិ​បាល​ និង​អង្គការ​សង្គម​ស៊ីវិល​ចំនួន​១៨១​​នេះ ​គ្រោង​ហែ​ក្បួន​ទៅកាន់​ស្ថានទូត​អាល្លឺ​ម៉ង់​ កូរ៉េ​ខាង​ត្បូង​ អូស្ត្រាលី និង​ស្ថាន​ទូត​ថៃនៅ​ព្រឹក​នេះ អំពាវ​នាវ​ឲ្យ​ដាក់​សម្ពាធ​លើ​រដ្ឋាភិបាល​ឲ្យ​ដោះ​លែង​អ្នក​តវ៉ា​​ទាំង​២៣នាក់​ដែល​ត្រូវ​បាន​ឃុំ​ខ្លួន​បន្ទាប់​ពី​ការ​ប៉ះ​ទង្គិច​គ្នា​ជាមួយ​នគរបាល​កាល​ពី​ថ្ងៃ​ទី២ និង​ទី៣ ខែ​មករា។

នៅ​សប្តាហ៍​នេះ​ សាលា​ដំបូង​រាជធានី​ភ្នំពេញ​បាន​បដិសេធ​មិន​ដោះ​លែង​អ្នក​តវ៉ា​ទាំង​២៣នាក់​ឲ្យ​នៅ​ក្រៅ​ឃុំ​បណ្តោះ​អាសន្ន​ឡើយ​ ដោយ​លើក​ឡើង​ពី​ភាព​ចាំ​បាច់​ក្នុង​ការ​​សាក​សួរ​ពួកគេ និង​​ដើម្បីរក្សា​​សណ្តាប់​ធ្នាប់​សាធារណៈ​ដោយ​យក​ពួកគេ​ទៅ​ឃុំ​ខ្លួន​ក្នុង​ពន្ធនាគារ​ដែលមាន​ការ​យាមកាម​តឹង​រ៉ឹងក្នុង​ខេត្តកំពង់​ចាម​​ស្ថិត​នៅ​ជាប់​ព្រំដែន​វៀតណាម​។ ញត្តិ​នោះ​មាន​ខ្លឹម​សារ​ថា ការ​ដោះ​លែង​មនុស្ស​ទាំង​២៣នាក់​ដោយ​គ្មាន​លក្ខខណ្ឌ “ឥឡូវ​នេះ​​គឺ​ជា​បញ្ហា​បន្ទាន់​របស់​ស្ថាប័ន​​មនុស្ស​ធម៌​អន្តរជាតិ​ និង​ស្រប​តាម​ច្បាប់​របស់​​កម្ពុជា​”។

លោកស្រី ធីតា ឃិះ​​​ នាយិកា​ប្រតិ​បត្តិ​អង្គកា​សីលកា ជា​អង្គការ​ក្រៅ​រដ្ឋា​ភិ​បាល​ផ្នែក​បណ្តុះ​បណ្តាល​ដែល​រៀបចំការ​ហែ​ក្បួន​នៅ​ថ្ងៃ​នេះ​បាន​មាន​ប្រសាសន៍​ថា អ្នក​ដាក់​ញត្តិ​​ដែល​មាន​គ្នា​ពី​​៤០​ទៅ​៥០នាក់​មាន​គម្រោង​ជួប​ជុំ​គ្នា​នៅ​ម៉ោង​៨និង​៣០នាទី​ព្រឹក​ ហើយ​ដើរ​រួមគ្នា​ទៅកាន់​ស្ថានទូត​ចំនួន​​៤​​បើ​ទោះ​ជា​រដ្ឋា​ភិបាលចេញ​បម្រាម​ហាម​ឃាត់​មិន​ឲ្យ​មានការ​ជួប​ជុំ​គ្នា​ជា​សាធា​រណៈ​ចាប់​ពី​១០នាក់​ឡើង​ទៅក៏​ដោយ​។

លោកស្រី ធីតា ឃិះ បាន​មាន​ប្រសា​សន៍​ថា “ យើង​មិន​មែន​ធ្វើ​បាតុកម្ម​ទេ​។ យើង​គ្រាន់​តែ​យក​ញត្តិ​របស់​យើង​ទៅ​ដាក់​ជូន​ស្ថានទូត​នានា​​តែ​ប៉ុណ្ណោះ”​។​លោកស្រី​បន្ថែម​​ថា យើង​មិន​ចាំបាច់​​ស្នើ​សុំ​ការ​យល់​ព្រម​ពី​សាលា​រាជ​ធានី​សម្រាប់​ព្រឹត្តិការណ៍​នេះឡើយ​។

ដោយ​សំដៅ​ដល់​ការ​ហាម​ឃាត់​មិន​ឲ្យ​មាន​ការ​ជួប​ជុំ​គ្នា​ដោយ​មិន​កំណត់​ដែល​សាលា​រាជធានី​ និង​ក្រសួង​មហាផ្ទៃ​បាន​ប្រកាស​កាលពី​ថ្ងៃ​ទី​៤ ខែមករា​ ដែលអ្នក​ជំនាញ​លើក​ឡើង​ថា ជា​រឿង​ខុស​ច្បាប់​នោះ លោកស្រី​បាន​មាន​ប្រសាសន៍​ថា “ សាលា​រាជ​ធានីខ្លួន​ឯង​​ត្រូវ​តែ​គោរព​ច្បាប់​​។ពួក​គេ​កំពុង​​បិទ​សិទ្ធិ​ប្រជាពលរដ្ឋ​ដែល​ធានា​ដោយ​រដ្ឋធម្មនុញ្ញ”។

លោក ឡុង ឌីម៉ង់ អ្នក​នាំ​ពាក្យ​សាលា​រាជ​ធានី​បាន​មាន​ប្រសាសន៍​ថា អាជ្ញាធរ​មិន​ទទួល​​បានការ​​ជូន​ដំណឹង​ផ្លូវការ​​ពីការ​ហែ​ក្បួន​នៅ​ថ្ងៃ​នេះ​ទេ ហេតុ​ដូចនេះ​ហើយ​អាជ្ញាធរ​នឹង​រារាំងមិន​ឲ្យ​មាន​ការ​​ហែ​ក្បួន​ឡើយ​។លោក​បាន​​​បន្ត​​​ថា​“ យើង​នឹង​​រារាំង​ពួកគេ​ ដោយ​សារ​ពួកគេ​មិនបាន​សុំ​​ការ​អនុញ្ញាត​”។
នគរ​បាល​បាន​អនុវត្ត​បម្រាម​មិន​ឲ្យ​មាន​ការ​ជួប​ជុំ​គ្នា​ជាសាធារណៈ​នេះ​​ដោយ​​រើស​មុខ​​ចាប់​តាំង​ពី​បម្រាម​នេះ​ត្រូវ​បាន​ប្រកាស​។ ទោះ​យ៉ាង​ណា សកម្មជន​ប្រឆាំង​ការ​បណ្តេញ​ចេញ​ពី​ដី​​ដែល​បាន​លើក​ឡើង​​ថា ពួកគាត់​មាន​គម្រោង​ទៅ​ចូល​រួម​ការ​ហែ​ក្បួន​នៅ​ថ្ងៃ​ស្អែក​នោះ ត្រូវ​បាន​ចាប់​ខ្លួន​ពីរលើក​មក​ហើយ​នៅ​ខែ​នេះ ដោយ​សារ​ការ​​ហែ​ក្បួន​ដាក់​ញត្តិ​​គ្មាន​ការ​អនុញ្ញាត​។

គណៈកម្មការ​ក្រុម​អ្នក​ច្បាប់​អន្តរជាតិ​បាន​ចេញ​សេចក្តី​ថ្លែង​ការណ៍​មួយ​កាលពី​ម្សិល មិញ​​ថ្កោល​ទោស​សេចក្តី​សម្រេច​របស់​សាលា​ដំបូង​រាជធានី​ភំ្នពេញ​ដែល​បដិសេធ​មិន​ដោះ​លែង​អ្នក​ជាប់ឃុំទាំង​២៣​នាក់​ដែល​មិន​ទាន់​បាន​បើក​សវនា​ការ​​ជំនុំ​ជម្រះ​​នៅ​ឡើយ​ ប៉ុន្តែ​​បែ​រជា​យក​ទៅ​ឃុំ​ខ្លួន​នៅ​មណ្ឌល ​អប់​រំ​កែ​ប្រែ​ទី​៣​ក្នុង​ខេត្ត​កំពង់​ចាម​នៅ​​ដាច់​ស្រយាល​ទៅ​វិញ​។

​លោក​ សំ ហ្សារីហ្វី (Sam Zarifi) នាយក​ប្រចាំ​តំបន់​អាស៊ី​ប៉ាស៊ីហ្វិក​របស់​គណៈ​កម្មការ ក្រុម​អ្នក​ច្បាប់​​​អន្តរជាតិ​បាន​មាន​​ប្រសាសន៍​ថា “ ច្បាប់​អន្តរជាតិ​ចែង​យ៉ាង​ច្បាស់​ថា ការ​ឃុំ​ខ្លួន​មុន​​ការ​ជំនុំ​ជម្រះ​​ធ្វើ​ឡើង​​តែ​ក្នុង​ស្ថាន​ភាព​ពិសេស​ និង​​ត្រូវ​ចៀស​វាង ប្រសិនបើ​មាន​ជម្រើស​សម​រម្យ​ផ្សេង​​។​ហេតុ​ផល​ដែល​លើក​ឡើង​ដោយ​សាលា​ដំបូង​រាជធានី​ភ្នំពេញ​មិន​​​សម​ហេតុ​ផល​សម្រាប់​​​ឃុំ​ខ្លួន​សកម្មជន​ទាំង​នេះ​ក្នុង​ពេល​នេះ​ទេ”។ លោក ហ្សារីហ្វី បាន​បន្ថែម​ថា ដោយ​គ្មាន​ភ័ស្តុតាងរឹងមាំដែល​បង្ហាញ​ថា អ្នក​ទោស​​​អាច​​រត់​​គេច​ខ្លួន ឬអាចជ្រៀត​ជ្រែក​ដល់​​ការ​ស៊ើប​អង្កេតដែលកំពុង​តែ​បន្ត​នោះ “ ការ​បន្ត​ឃុំ​ខ្លួន​មនុស្ស​​ទាំង​២៣នាក់​​មុន​ការ​​ជំនុំ​ជម្រះស្មើនឹង​ការ​ឃុំ​ខ្លួន​តាម​តែ​អំពើ​ចិត្ត​ ​បំពាន​បទ​ដ្ឋាន​សិទ្ធិមនុស្ស​អន្តរជាតិ​”។

លោកស្រី​ ហេង បុណ្យ មេធារី​តំណាង​អ្នកតវ៉ា​ប្រាំបួន​នាក់​ក្នុង​ចំណោម​អ្នក​តវ៉ា​ដែល​ជាប់​ពន្ធនាគារ​ទាំងនោះបាន​មាន​ប្រសាសន៍​ថា តុលាការ​បាន​ផ្ញើ​លិខិត​មក​លោកស្រី​កាលពី​ថ្ងៃ​ច័ន្ទ និង​ថ្ងៃ​អង្គារ​ ដោយ​បដិសេធ​មិន​ដោះ​លែង​​កូន​ក្តី​របស់​លោក​ស្រី​ឲ្យ​នៅ​ក្រៅ​ឃុំ​ឡើយ ដោយ​លើក​ឡើង​ថា ត្រូវ​ការ​​សាក​សួរ​ចុង​ចោទ​​បន្ថែម​ទៀត​ ព្រម​ទាំង​ទប់​ស្កាត់​មិន​ឲ្យ​មាន​ “ ភាព​ចលាចល” ដែល​អាច​កើត​ឡើង​​ ប្រសិន​បើ​ពួកគេ​ត្រូវ​បាន​ដោះ​លែង​នោះ។

យោង​តាម​លិខិត​ចុះ​ថ្ងៃ​អង្គារ​ និង​​ចុះ​ហត្ថ​លេខា​ដោយ​​ចៅក្រម​ស៊ើប​សួរ​លោក ជា សុខ ហេង​ មាន​ខ្លឹម​សារ​ថា សំណើ​របស់​គណ​​​បក្ស​សង្គ្រោះ​ជាតិ​សុំ​ទៅ​សួរ​សុខទុក្ខ​អ្នក​ជាប់​​​ឃុំ​ទាំង​២៣នាក់​នោះ ត្រូវ​សាលា​ដំបូង​រាជ​​​ធានី​ភ្នំពេញ​បដិសេធ។ លោក បេ ទៀឡេង អគ្គនាយក​នៃ​អគ្គ​នាយកដ្ឋាន​ពន្ធនាគារ​ក្រសួង​មហាផ្ទៃ​បាន​មាន​ប្រសាសន៍​ថា “ យើង​អនុញ្ញាត​ឲ្យ​តែ​មេធាវី​ និង​ក្រុម​គ្រួសារ​ចុង​ចោទ​ [ទៅ​សួរ​សុខ​ទុក្ខ​ពួកគេ​តែប៉ុណ្ណោះ] ពីព្រោះ​នេះ​ជា​បទ​បញ្ជា​ផ្ទៃ​ក្នុង​របស់​តុលាការ​” ។

ទោះ​យ៉ាង​ណា លោក សំ សុគង់ មេធាវី​ការពារ​អ្នក​ជាប់ឃុំប្រាំមួយ​នាក់ក្នុង​ចំណោម​អ្នក​ជាប់​ឃុំ​ទាំង​នោះ​​រួម​ទាំង​លោក វ៉ន ពៅ ប្រធាន​សមាគម​ប្រជា​ធិតេយ្យ​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ​បាន​មាន​ប្រសាសន៍​ថា លោក​ត្រូវ​បាន​អនុញ្ញាត​ដោយ​រឹត​ត្បិត​បំផុត​​ឲ្យ​ទៅ​​ជួប​​កូន​ក្តី​របស់​លោក​​​។ លោក សុគង់ បាន​មាន​ប្រសាសន៍​ថា “ ខ្ញុំ​បាន​​ជួប​តែ​លោក វ៉ន ពៅ​ ប៉ុណ្ណោះ ពីព្រោះ​ប្រធាន​ពន្ធនាគារ​និយាយ​ថា គាត់​ជាប់​ប្រជុំ ប៉ុន្តែ​ខ្ញុំ​គិត​ថា នេះ​ជា…កលល្បិច​​ដើម្បី​រារាំង​យើង​មិន​ឲ្យ​ទៅ​​ជួប​ពួកគេ​​ក្នុង​ពន្ធនាគារ​”។

សូម្បី​ពេល​​និយាយ​ជាមួយ​លោក វ៉ន ពៅ លោក សុគង់ លើកឡើង​ថា សន្តិសុខ​ពន្ធនា គារ​ទាមទារ​​ស្តាប់​ការ​សន្ទនា​នោះ​ដែរ​។លោក​បាន​មានប្រសាសន៍​ថា “ ខ្ញុំ​គិត​ថា នេះ​​ជា​ការ​រំលោភ​សិទ្ធិរបស់មេធាវី​ដែល​ត្រូវ​រក្សា​ការសម្ងាត់ជាមួយ​​កូន​ក្តី​របស់​ខ្លួន​”៕​សារុន​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស