27 C
Phnom Penh

ព្រះ​មេរុ​ក្លាយ​ជាកន្លែង​រខេករខាក​ បន្ទាប់​ពី​ថ្វាយ​ព្រះ​ភ្លើងព្រះ​បរម​សព​សម្តេច​ឪ​​​បាន​មួយឆ្នាំ

ដោយ ឌឹ ខេមបូឌា ដេលី

បទវិភាគ

សមាជិក​នៃ​ខុទ្ទកាល័យ​ព្រះ​បរម​រាជ​វាំង​និង​មន្ត្រី​សាលា​រាជ​ធានី​ភ្នំពេញ​ មិន​បាន​ឆ្លើយ​​សំណួរ​អំពី​សភាព​ទ្រុឌ​ទ្រោម​នៃ​ព្រះមេរុ កន្លែង​​​ដែល​មាន​ការ​តុប​តែង​យ៉ាង​ល្អ​ប្រណីត​​សម្រាប់​ថ្វាយ​ព្រះ​ភ្លើង​ព្រះបរម​សព​​សម្តេច​ឪ​ នរោត្តម​ សីហនុ ​ឡើយ​។ ចាប់​តាំង​ពី​ថ្ងៃ​ប្រវត្តិ​សាស្ត្រ​នោះ​មក​ ឥឡូវ​នេះ​ព្រះ​មេរុ​​បាន​ធ្លាក់​ក្នុង​សភាព​យ៉ាង​រខេក​រខាក ​ហើយ​មាន​សុទ្ធតែ​កង​សន្តិសុខ ​ដែល​ទទួល​បន្ទុក​ការ​ពារ​កន្លែង​នេះ​។

ទិដ្ឋភាព​ព្រះ​មេរុ​ពេល​ត្រូវ​បាន​ថត​ពី​ខាង​លើ​ កាល​ពី​ថ្ងៃ​អង្គារ។ ព្រះ​មេរុ​ដែល​ត្រូវ​បាន​រក្សាទុក​និង​ហាម​ឃាត់​មិន​ឲ្យ​សាធារណជន​ចូល​ទៅ​ទស្សនា​ ឥឡូវ​នេះ​មាន​សភាព​យ៉ាង​រខេករខាក​។ស៊ីវ ចាន់ណា
ទិដ្ឋភាព​ព្រះ​មេរុ​ពេល​ត្រូវ​បាន​ថត​ពី​ខាង​លើ​ កាល​ពី​ថ្ងៃ​អង្គារ។ ព្រះ​មេរុ​ដែល​ត្រូវ​បាន​រក្សាទុក​និង​ហាម​ឃាត់​មិន​ឲ្យ​សាធារណជន​ចូល​ទៅ​ទស្សនា​ ឥឡូវ​នេះ​មាន​សភាព​យ៉ាង​រខេករខាក​។ស៊ីវ ចាន់ណា

មុនពេល​ថ្វាយ​ព្រះ​ភ្លើង​ ព្រះ​បរម​សព​សម្តេច​ឪ​ កាល​ពី​ខែ​កុម្ភៈ​ ឆ្នាំ​២០១៣​ ព្រះ​មេរុ​ ត្រូវ​បាន​ប្រែ​ក្លាយ​ពី​សួន​សាធារណៈ​ទៅ​ជា​កន្លែង​ដែល​មាន​ការ​ហាម​ឃាត់​យ៉ាង​តឹង​រ៉ឹង​ ហើយសាធារណ​ជន ត្រូវ​បាន​ហាម​មិន​ឲ្យ​ចូល​​ទៅ​កន្លែង​នោះ​ឡើយមក​ទល់​នឹង​ពេល​នេះ​។

ព្រះ​មេរុ​ជា​កន្លែង​ដែល​ព្រះ​បរម​សព​សម្តេច​ឪ​ត្រូវ​បាន​ថ្វាយ​ព្រះ​ភ្លើង​ ឥឡូវ​នេះ​មាន​សុទ្ធ​តែ​ស្មៅ​ និង​កម្ទេច​កម្ទី​ផ្សេងៗ ហើយ​ក៏​មាន​​ខ្ទម​តូច​ៗ​ ត្រូវ​បាន​សាង​សង់​នៅ​កន្លែង​បី​ដាច់​ដោយ​ឡែក​ពី​គ្នា​ ព្រម​ទាំង​មាន​សម្លៀក​បំពាក់​រហែក​រយេរយៃ​ នៅ​ជាប់​នឹង​​របង​ដែល​ព័ទ្ធ​ជុំ​វិញ​ព្រះ​មេរុ​ផង​ដែរ​។

ព្រះ​អង្គ​ម្ចាស់ ​ស៊ីសុវត្ថិ​​ ធម្មិកោ​ អតីត​ទី​ប្រឹក្សា​​​​សម្តេច​ឪ​ បាន​មាន​បន្ទូល​ កាលពី​ម្សិល​មិញ​ថា សភាព​សព្វ​ថ្ងៃ​នៃ​​កន្លែង​ថ្វាយ​ព្រះ​ភ្លើង​ព្រះ​បរម​សព​សម្តេច​ឪ​ ដែល​ជា​អតីត​សួន​សាធារណៈ​ បាន​ធ្វើ​ឲ្យ​ប្រទេស​កម្ពុជា​អាប់​ឱន​កេរ្តិ៍​ឈ្មោះ​។ព្រះ​អង្គ​ម្ចាស់ ស៊ីសុវត្ថិ ធម្មិកោ​ បាន​មាន​បន្ទូល​ថា “ ភ្ញៀវ​​ទេសចរ​រាប់​ពាន់​នាក់​ដើរ​កាត់​កន្លែង​នេះ​រៀង​រាល់​ថ្ងៃ​ ហើយ​ខ្ញុំ​មិន​ស្រណុកចិត្ត​ទេ​និង​​មាន​ភាព​អាម៉ាស់យ៉ាង​ខ្លាំង​ដោយ​សារ​តែ​កន្លែង​​ថ្វាយ​ព្រះ​ភ្លើង​ព្រះ​បរម​សព​សម្តេច​ឪ​នេះ​។[សភាព​សព្វថ្ងៃ​នៃ​កន្លែង​ថ្វាយ​ព្រះ​ភ្លើង​ព្រះ​បរម​សព​] ប្រហែល​ជា​ឆ្លុះ​បញ្ចាំង​ឲ្យ​ឃើញ​ពី​ កង្វះ​ការ​គោរព​ចំពោះ​​ព្រះ​មហា​ក្សត្រ​” ។

លោក អ៊ំ​​ តារាវុធ​ សមាជិក​ខុទ្ទកា​ល័យ​ព្រះ​បរម​រាជ​វាំង​ បាន​បញ្ជាក់​កាល​ពី​ថ្ងៃ​អង្គារ​ថា ខ្ទម​តូច​ៗ​នៅ​ក្នុង​បរិវេណ​ព្រះ​មេរុ គឺ​សម្រាប់​​​​កង​សន្តិ​សុខ​ព្រះ​បរម​រាជ​វាំង​ស្នាក់​នៅ​ ប៉ុន្តែ​លោក​ បាន​បង្វែ​រសំណួរ​បន្ថែម​ទាំង​អស់​ទៅ​លោក​ គង់ សំអុល​ រដ្ឋ​មន្ត្រី​ក្រសួង​ព្រះ​បរម​រាជ​វាំង​វិញ​។ លោក​ តារាវុធ​ បាន​ថ្លែង​ថា “ លោក​ គង់​ សំអុល​ គឺ​អ្នក​ទទួល​ខុស​ត្រូវ​បញ្ហា​នេះ​ហើយ​មាន​តែ​គាត់​ទេ​ ដែល​អាច​បក​ស្រាយ​​រឿង​នេះ​បាន​។ ខ្ញុំ​មិន​ដឹង​អ្វី​ឡើយ​”។

លោក ឡុង​ ឌី​ម៉ង់​ អ្នក​នាំ​ពាក្យ​សាលា​រាជ​ធានី​និង​សមាជិក​ខុទ្ទកាល័យ​ព្រះ​បរម​រាជ​វាំង​មួយ​ចំនួន​ ក៏​បាន​បង្វែរ​សំណួរ​អំពី​ស្ថានភាព​ដ៏​រខេក​រខាក​នៃ​ព្រះ​មេរុ​ទៅ​លោក​ គង់​ សំអុល​ ផង​ដែរ​។

លោក ផៃ​ ស៊ី​ផាន​ អ្នក​នាំ​ពាក្យ​ទី​ស្តី​ការ​គណៈ​រដ្ឋ​មន្ត្រី​ បាន​ឲ្យ​ដឹង​ថា កន្លែង​ថ្វាយ​ព្រះ​ភ្លើង​ នៅ​តែ​ជា​ “ និមិត្ត​រូប​” របស់​ព្រះ​បរម​រាជ​វាំង​និង​សម្តេច​ឪ។
លោក ផៃ​ ស៊ី​ផាន​ ​មាន​ប្រសាសន៍​ថា “ ខ្ញុំ​ទទួល​បាន​ដំណឹង​ថា ព្រះ​បរម​រាជ​វាំង​បាន​ឲ្យ​រក្សា​ទុក​ [កន្លែង​ថ្វាយ​ព្រះ​ភ្លើង​] នេះ ​ព្រោះ​ធ្វើ​ដូច្នេះ​ ពលរដ្ឋ​ដែល​បាន​ឃើញ​ការ​ថ្វាយ​ព្រះ​ភ្លើង​ តាម​តែ​កញ្ចក់​ទូរទស្សន៍​នៅ​តែ​អាច​ មក​ទស្សនា​កន្លែង​ថ្វាយ​ព្រះ​ភ្លើង​នេះ​​បាន​”។ ទោះ​ជា​យ៉ាងណា​ក៏ដោយ​ កន្លែង​នេះ​នៅ​​​តែ​ត្រូវ​បាន​បិទ​ មិន​ឲ្យ​សាធារណជន​​​​ចូល​មើល​ឡើយ​។

លោក​ កែវ​ នូរ៉ា​ អាយុ​ ៣៩​ឆ្នាំ​​​ជា​កង​សន្តិ​សុខ​ព្រះ​បរម​រាជ​វាំង​ ដែល​ឈរ​ជើង​នៅ​លើ​ផ្លូវ​មួយ​​ចន្លោះ​ព្រះមេរុ និង​ព្រះបរម​រាជ​វាំង​ បាន​លើក​ឡើង​ថា កង​សន្តិសុខ​ ដែល​គេ​បាន​ឃើញ​លាង​ម៉ូតូ​ និង​ដំ​ដែក​គោល​ជាប់​ជញ្ជាំង​នៅ​កន្លែង​ថ្វាយ​ព្រះ​ភ្លើង​នេះ​ គឺ​ជា​អ្នក​ទទួល​ខុសត្រូវ​ក្នុង​ការ​ពារ​ប្រជា​ព​ល​រដ្ឋ​ចូល​ទៅ​ក្បែរ​។លោក​និយាយ​ថា “ កន្លែង​នេះ​ហាក់​បី​​ដូច​ជា​កន្លែង​សម្រាប់​គោរព​បូជា​ព្រះ​មហា​ក្សត្រ​។  ហេតុ​ដូច្នេះ​ហើយ​ ទើប​យើង​ដាក់​កង​ សន្តិ សុខ​នៅ​ខាង​ក្នុង​ ដើម្បី​ការ​ពា​រ​កន្លែង​នេះ​”។លោក​ បន្ថែម​ថា មាន​កង​សន្តិសុខ​ចំនួន​១០​នាក់​បាន​ប្រចំាការ​ជា​អចិន្ត្រៃយ៍​នៅ​ក្នុង​បរិវេណ​ព្រះ​មេរុ៕ ស៊ុយឈាង

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស