30 C
Phnom Penh

រដ្ឋមន្ត្រី​ក្រសួង​ការពារ​ជាតិ៖ កងកម្លាំង​ត្រូវ​តែ​ការពារ​រដ្ឋាភិបាល​

ដោយ ឌឹ ខេមបូឌា ដេលី

បទវិភាគ

ប្រព័ន្ធ​ផ្សព្វ​ផ្សាយ​ក្នុងស្រុក​ និង​មន្ត្រី​យោធា​បាន​លើក​ឡើងថា​ លោក​ ទៀ បាញ់​ រដ្ឋ​មន្ត្រី​ក្រសួង​ការពារ​ជាតិ​បាន​ប្រើ​កិច្ច​ប្រជុំ​ប្រចាំ​ឆ្នាំរបស់​កង​រាជ​អាវុធ​ហត្ថ​ជាតិ​នៅ​ក្នុង​ទីក្រុង​ភ្នំពេញ​កាល​ពីថ្ងៃពុធ ដើម្បី​បញ្ជាក់​សា​ជាថ្មី​ថា កង​កម្លាំង​ប្រដាប់​​អាវុធ​នៅ​តែ​ប្តេ​ជ្ញា​ការពារ​រដ្ឋាភិបាល​របស់​នាយក​រដ្ឋ​មន្ត្រី​ ហ៊ុន សែន នៅក្នុង​ជម្លោះ​នយោបាយ​ជាមួ​យ​គណ​បក្ស​សង្គ្រោះ​ជាតិ​។

វិ​បសាយ​ព័ត៌មាន Cambodia  Express News ​ (CEN) របស់​កាសែត​រស្មី​កម្ពុជា​ បាន​រាយការណ៍​ កាល​ពីម្សិលមិញ​ថា នៅ​ពេល​ថ្លែង​នៅឯ​ទី​​​បញ្ជាការ​ដ្ឋាន​កង​រាជ​អាវុធ​ហត្ថ​ជាតិ​នៅក្នុង​ខណ្ឌ​ទួល​គោក​ ឧត្តម​សេនីយ៍​ ​ទៀ បាញ់​ បាន​ថ្កោល​ទោស​ការ​ធ្វើ​បាតុកម្ម​ និង​ការ​ហែក្បួន​​តាម​ផ្លូវ​របស់​គណបក្ស​សង្គ្រោះ​ជាតិ​កាល​ពីខែ​មុន ដើម្បី​​ទាម​ទារ​ឲ្យលោក ហ៊ុន សែនចុះ​ចេញ​ពី​អំណាច​ ឬ​ឲ្យ​បោះ​ឆ្នោត​ថ្មី។

វិបសាយ​ព័ត៌មាន​ CEN បាន​ចុះ​ផ្សាយ​អំពី​កិច្ច​ប្រជុំ​ដែល​អនុញ្ញាត​ឲ្យតែ​ប្រព័ន្ធ​ផ្សព្វ​​ផ្សាយ​មួយ​ចំនួន​តូច​ចូល​រួ​ម​នេះ​ថា “ លោក​​​ឧត្តម​សេនីយ៍ ទៀ បាញ់​ បានមាន​ប្រសាសន៍​​​ថា គណបក្ស​ប្រឆាំង​កំពុងតែ​​​​ព្យាយាមបង្ខំ​​ឲ្យ​អ្ន​ក​ឈ្នះ​​ធ្វើ​តាម​ពួកគេ​ ដែល​ជា​ការ​ខុស​​​ច្បាប់​ និ​ង​ញុះ​ញង់​ឲ្យ​មាន​​ភាព​ចលាចល​នៅ​​​ក្នុង​សង្គម​ដែល​មិន​អាច​ទទួល​យក​បាន​ឡើយ​ ហើយ​លោក​បាន​មាន​ប្រសាសន៍ថា  គេ​មិន​អាចអនុញ្ញាត​​ឲ្យ​គណ​បក្ស​ប្រឆាំង​ធ្វើ​បែប​នេះ​ទេ​”។

លោក ខេង​ ទីតូ អ្នក​នាំពាក្យ​កង​រាជ​អា​វុធ​​ហត្ថ​ជាតិ​ដែល​បាន​ចូល​រួម​កិច្ច​ប្រជុំ​របស់​​កង​រាជអាវុធ​ហត្ថ​​កាល​ពីថ្ងៃពុធ បាន​បញ្ជាក់​​ថា ឧត្តម​សេនីយ៍​ ទៀ​ បាញ់​ បាន​រិះគន់​ការ​តវ៉ា​អហិង្សា​របស់​គណបក្ស​សង្គ្រោះ​ជាតិ​​ ហើយ​បាន​អំពាវ​នាវ​ឲ្យ​កង​កម្លាំង​ប្រដាប់​អាវុធ​​ការពារ​រដ្ឋាភិបាល​របស់​លោក ហ៊ុន សែន។

ឧត្តម​សេនីយ៍ត្រី ខេង​ ទីតូ បាន​ឲ្យ​ដឹង​ថា “ ឧត្តម​សេនីយ៍ ទៀ បាញ់​​ ​មាន​ប្រសាសន៍ថា គណបក្ស​ប្រឆាំង​កំពុង​បង្ខំ​ឲ្យ​គណបក្ស​ឈ្នះ​ឆ្នោត​ធ្វើ​តាម​ពួកគេ​ ដែល​​ផ្ទុយ​ពី​ច្បាប់​ ហើយ​ពួកគេ​បាន​ញុះ​ញង់​ឲ្យមាន​​ភាព​ចលាចល​នៅក្នុង​សង្គម​”។“ លោក​បានមាន​ប្រសាសន៍ថា យើង​គឺ​ជា​កង​កម្លាំ​ងប្រដាប់​​អាវុធ ដូច្នេះ​ហើយ​យើង​ត្រូវ​តែ​ធ្វើ​តាម​រដ្ឋាភិបាល​។ ប្រសិន​បើ​គណបក្ស​សង្គ្រោះ​ជាតិ​ចង់​តវ៉ា​ ពួកគេ​អាច​តវ៉ា​​នៅក្នុង​រដ្ឋ​សភា​បាន​”។ លោក​ ខេង ទីតូ​ បាន​មាន​​ ប្រសាសន៍ថា លោក​គាំទ្រ​ការ​អំពាវ​នាវ​ឲ្យការ​ពារ​រដ្ឋាភិ​បាល​របស់​​គណបក្ស​ប្រជាជន​កម្ពុជា​ ដែល​គណៈកម្មាធិការ​ជាតិ​រៀបចំការ​បោះឆ្នោត​និយាយ​ថា បាន​ឈ្នះ​ការ​បោះឆ្នោត​ជាតិ​កាល​​ពីថ្ងៃទី​២៨​ខែកក្កដា ។ លោក ខេង ទីតូ បាន​ឲ្យដឹង​ទៀត​ថា “តាម​​​ពិត​បាតុកម្ម​ត្រូវ​បាន​ញុះញង់​ដោយ​គណ​បក្ស​ប្រឆាំង​ ហើយ​ការ​ធ្វើ​បាតុកម្ម​របស់​គណបក្ស​ប្រឆាំង​​មាន​បំណង​ផ្តួល​រំលំ​រដ្ឋាភិបាល​។​ពួកគេ​ចង់​ឲ្យ​សម្តេច​ ហ៊ុន សែន លា​លែង​ពី​​​តួនាទី​”។

ឧត្តម​សេនីយ៍ សៅ សុខា មេបញ្ជាការ​កង​រាជអាវុធ​ហត្ថ​​​លើ​ផ្ទៃ​ប្រទេស​បាន​បដិសេធ​មិន​ធ្វើ​អត្ថាធិប្បាយ​អំពី​ការ​លើក​ឡើងរបស់​​ឧត្តម​សេនីយ៍ ទៀ​ បាញ់​ ទេ ប៉ុន្តែ លោក​បាន​មាន​ប្រសាសន៍​ថា លោក​នឹង​ការ​ពារ​រដ្ឋាភិ​បាល​ និង​រដ្ឋ​ធម្មនុញ្ញ​។ លោក​បានមាន​ប្រសាសន៍​ថា “ ខ្ញុំ​ត្រូវ​តែ​ការពារ​រដ្ឋធម្មនុញ្ញ​”។

កាល​ពីថ្ងៃ​ទី​៣ ខែមករា កង​រាជអាវុធ​ហត្ថ​បាន​បាញ់​សម្លាប់​កម្មកររោង​​​ចក្រ​​​កាត់ដេរ​​​​ដែល​ធ្វើ​ការ​តវ៉ា​ចំនួន​​​ប្រាំនាក់​ បាញ់​​ឲ្យ​រងរបួស​ជាង​៤០​នាក់​ទៀត​ និង​ចាប់​ខ្លួន​កម្មករ​១៣​នាក់​ដាក់​ពន្ធនាគារ​​ ដោយ​​កម្មករ​ជាច្រើន​នាក់​ត្រូវ​បាន​វាយ​ដំ​យ៉ាង​ឃោរ​ឃៅ​ និង​កំពុង​ជាប់​ឃុំ នៅ​ឯពន្ធនា​គារ​​មាន​សន្តិ​​​សុខ​តឹងរ៉ឹង​​នៅ​ជិត​ព្រំ​ដែន​​វៀត​ណាម  ប៉ុន្តែ ពួកគេ​មិន​ទាន់​បាន​នាំ​ទៅ​ជំនុំ​ជម្រះ​​ចំពោះ​បទ​ចោទ​ប្រកាន់​មក​លើ​ពួក​​គេ​ទេ​។ មួ​យ​ថ្ងៃ​មុ​ននោះ​ គឺនៅថ្ងៃទី​២ ខែ​មករា​ទាហាន​ឆត្រយោង​មក​ពី​កង​ពល​លេខ​៩១១​បាន​វាយ​ និង​ឃាត់​ខ្លួន​អ្នក​តវ៉ា​ដែ​ល​ធ្វើ​​កូដកម្ម​១៥​នាក់​យ៉ាង​ឃោរ​ឃៅ​នៅខាង​ក្រៅ​រោង​ចក្រ​កាត់​ដេរ​របស់​ក្រុម​​​ហ៊ុន​​​កូរ៉េ ក្នុង​ទីក្រុង​ភ្នំពេញ​។ ក្នុង​ចំណោម​មនុស្ស​ដែល​ត្រូវ​ឃាត់ខ្លួន​ទាំង​នោះ ​មាន​ព្រះសង្ឃ​ចំនួន​ប្រាំ​អង្គ។ ទាហាន​​ឆត្រយោង​ក៏បាន​វាយ​អ្នក​កាសែត​ផង​ដែរ​។

បន្ទាប់​មក​​នៅថ្ងៃ​ទី​៤ ខែមករា ​នគរបាល​​ប្រឆំា​ង​បាតុកម្ម​ដែ​លគាំទ្រ​ដោយ​កង​រាជ​អាវុធ​​​ហត្ថ​​​ និង​ក្រុម​មនុស្ស​ស្លៀក​ពាក់​ស៊ីវិល​​របស់​រដ្ឋាភិបាល​ជាច្រើន​នាក់​ប្រដាប់​ដោយ​​ដែក​បំពង់​ទីប និង​ដំបង​ បាន​បំបែក​ដោយ​ហិង្សា​លើ​ការ​ជួប​ជុំ​គ្នារបស់​គណបក្ស​ប្រឆាំង​នៅ​ទីលាន​ប្រជាធិបតេយ្យ ដោយ​បាន​វាយ​ព្រះសង្ឃ​ និង​ជនស៊ីវិល​ដែល​បាន​ចូល​រួ​ម​ក្នុង​ការ​ជួប​ជុំ​គ្នានោះ​។

ឧទ្ធម្ភាគចក្រ​យោធា​​ដែល​​​ទិញ​​ពី​ប្រទេស​​​ចិនបី​គ្រឿង​​បាន​ហោះ​ត្រួត​ពិនិត្យ​​ពីលើ​នៅ​ពេល​​ក្រុម​យុវជន​ស្លៀក​ពាក់​ស៊ីវិល​ទាំង​នោះ​បណ្តេញ​មនុស្ស​ចាក​​​ចេញ​ពី​ទីលាន​​​ប្រជា​ធិ​បតេយ្យ​។

ក្រោយ​មក​រដ្ឋាភិបាល​របស់លោក  ហ៊ុន សែន បាន​ព្យួរ​សិទ្ធិជួបជុំគ្នា​ដែល​មាន​ចែង​នៅក្នុង​រដ្ឋធម្មនុញ្ញ​ ដែល​​អ្នក​ជំនាញ​ច្បាប់​និយាយ​ថា ជាការ​ខុស​ច្បាប់​។ ចាប់​តាំង​ពី​នោះ​​មក ​សន្តិសុខ​ខណ្ឌ​ស្លៀ​ក​ពាក់​ស៊ីវិល​បាន​វាយ​និង​ឃាត់​ខ្លួន​សកម្ម​ជន​នៅពេល​ដែល​ពួក​គេ​បន្ត​ប្រើ​ប្រាស់​សិទ្ធិ​របស់ខ្លួន​ដើម្បី​ជួប​ជុំ​គ្នា​ដោយ​អហិង្សា​។

លោក យឹម សុវណ្ណ អ្នក​នាំពាក្យ​គណបក្ស​សង្គ្រោះ​ជាតិ​​​បានមាន​ប្រសាសន៍​កាល​ពី​​ម្សិល​មិញថា វាមិន​ត្រឹម​ត្រូវ​ទេ​ដែល​កង​កម្លាំង​ប្រដាប់​អាវុធ​គំរាម​ការពារ​គណបក្ស​នយោបាយ​​ពេល​មានជម្លោះ​ពាក់​ព័ន្ធ​នឹង​​ភាព​​ស្រប​ច្បាប់​នៃការ​បោះឆ្នោត​។ លោក យឹម សុវណ្ណ បានមាន​ប្រសាសន៍​ថា “ រដ្ឋាភិបាល​ដែល​​បង្កើត​ឡើង​ដោយ​រដ្ឋ​សភា​ខុស​ច្បាប់​នេះគឺជា​រដ្ឋាភិបាល​ខុស​ច្បាប់​ហើយ​កង​ទ័ព​ដែល​បម្រើ​ឲ្យ​រដ្ឋាភិបាល​ខុស​ច្បាប់​​ ក៏ខុស​ច្បាប់​ដែរ​។ កង​កម្លាំង​ប្រដាប់​អាវុធ​មិន​មែន​ជាកម្មសិទ្ធិរបស់ ទៀ បាញ់ និង​គណបក្ស​ប្រជាជន​កម្ពុជា​ទេ​ ព្រោះ​កង​កម្លាំង​ប្រដាប់​អាវុធ​ទទួល​ប្រាក់​ខែ​​ពីកម្លាំង​របស់​ប្រជាជន​”៕​គឹមហឿន​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស