កាលពីព្រឹកម្សិលមិញ មនុស្សមកពីទូទាំង ប្រទេសកម្ពុជា បាននាំគ្នាទៅប្រមូលផ្តុំនៅកោះពេជ្រ ដើម្បីប្រារព្ធពិធីបង្ហោះខ្លែងខ្មែរប្រចាំឆ្នាំលើកទី១៧។ព្រឹត្តិការណ៍ដែលរៀបចំដោយក្រសួងវប្បធម៌នេះ មានអ្នកបង្ហោះខ្លែងចំនួន៦៦នាក់ បានទៅប្រកួតប្រជែងគ្នានៅចំពោះមុខអ្នកទស្សនាជាង៥០០នាក់។
ដោយមានរង្វាន់សម្រាប់អ្នកទទួលបានជ័យជម្នះនៅក្នុងការប្រកួតបង្ហោះខ្លែង អ្នកចូលរួមនីមួយៗ បានព្យាយាមធ្វើយ៉ាងណាទាក់ទាញចំណាប់អារម្មណ៍ចៅក្រម ដោយរចនាខ្លែងរបស់ខ្លួនជារាងបក្សី និងយន្តហោះ ដែលមានចងបូចម្រុះពណ៌ព្រមទាំងមានរូបអង្គរវត្តផ្សេងៗគ្នាផងដែរ។
ក្រុមចៅក្រមមកពីក្រសួងវប្បធម៌ បានឲ្យពិន្ទុទៅលើខ្លែងនីមួយៗ តាមការហោះហើរលើអាកាស រូបរាង និងសំឡេង ហើយប្រាក់រង្វាន់សម្រាប់អ្នកឈ្នះវិញចាប់ពី៥០ដុល្លារ ៧៥ដុល្លារ និង១០០ដុល្លារ។
តែទោះជាយ៉ាងណា លោក រឿង សារ៉ាត់ អនុប្រធានមន្ទីរក្រសួងវប្បធម៌ និងជាសមាជិកក្រុមចៅក្រម បានឲ្យដឹងថា ពិធីបង្ហោះខ្លែងនេះគឺវាមានតម្លៃជាងប្រាក់រង្វាន់ជាលុយ។លោកបានមានប្រសាសន៍ថា “ វាជួយរក្សាបេតិកភណ្ឌរបស់ប្រទេសកម្ពុជា ហើយធ្វើឲ្យសហគមន៍មានការរួបរួមគ្នា”។
លោក ហុង លី អាយុ២៨ឆ្នាំ ដែលជាអ្នកទើបតែចូលរួមប្រកួតប្រជែងជាលើកដំបូងក៏បានយល់ស្របយ៉ាងដូច្នេះដែរ។លោកបាននិយាយថា “ ខ្ញុំបានចូលរួមជាមួយអ្នកបង្ហោះខ្លែងផ្សេងៗទៀត ព្រោះខ្ញុំមិនចង់ឃើញប្រទេសកម្ពុជាបាត់បង់ប្រវត្តិនៃការបង្ហោះខ្លែងរបស់ខ្លួនឡើយ។ ពលរដ្ឋកម្ពុជាត្រូវតែថែរក្សាបេតិកភណ្ឌរបស់ខ្លួន”។ទោះបីជាបានចំណាយពេលអស់រយៈពេលពីរថ្ងៃ ដើម្បីបង្កើតខ្លែងមានរាងដូចយន្តហោះក៏ដោយ ក៏លោក លី នៅតែមិនទទួលបានជ័យជម្នះក្នុងការប្រកួតនេះឡើយ។លោកបានមានប្រសាសន៍ថា “ ខ្ញុំមិនឈ្នះទេ ព្រោះខ្លែងរបស់ខ្ញុំហោះមិនបានល្អ ហើយគ្មានសម្លេង”។ ប៉ុន្តែលោកបានពន្យល់ថា ដោយមានប្រាក់លើកទឹកចិត្តចំនួន៥ដុល្លារសម្រាប់អ្នកចូលរួមគ្រប់គ្នាៗនោះ អ្នកចូលរួមដែលមិនទទួលបានជ័យជម្នះ នៅតែចាកចេញពីការប្រកួតក្នុងនាមជាអ្នកឈ្នះ។
ជាអកុសលអ្នកចូលរួមទាំងអស់មិនមែនសុទ្ធតែពេញចិត្ត ចំពោះលទ្ធផលនៃការឲ្យពិន្ទុលើការបង្ហោះខ្លែងនេះឡើយ។លោក ក្រុង ងួនលី អាយុ៥៨ឆ្នាំជាអ្នកបង្ហោះខ្លែងជើងចាស់ម្នាក់ បានចាកចេញពីកន្លែងប្រកួតបង្ហោះខ្លែងដោយមិនពេញចិត្តនឹងការឲ្យពិន្ទុ។លោកបាននិយាយថា “ តើខ្ញុំអាចឈ្នះបានដោយរបៀបណា?។ គណៈកម្មាធិការនៅក្រសួងវប្បធម៌បាននិយាយថា ខ្លែងរបស់ខ្ញុំមិនល្អទេ។ គេបាននិយាយថា ខ្លែងរបស់ខ្ញុំហោះមិនបានល្អ និងគ្មានសំឡេង”។ លោក ងួនលី ដែលបានមកចូលរួមនៅក្នុងពិធីបង្ហោះខ្លែងនេះជារៀងរាល់ឆ្នាំចាប់តាំងពីពិធីត្រូវបានបង្កើតឡើងមក បាននិយាយថា ក្រសួងវប្បធម៌បដិសេធមិនផ្តល់ជ័យជម្នះមកឲ្យគាត់ដោយអយុត្តិធម៌ ព្រោះគាត់ធ្លាប់បានឈ្នះការប្រកួតនេះពីរលើករួចមកហើយ គឺមួយលើកនៅក្នុងឆ្នាំ២០១១ និងមួយលើកទៀតនៅឆ្នាំ២០១២។ គាត់បានគំរាមថា ឆ្នាំក្រោយប្រហែលជាឆ្នាំចុងក្រោយហើយសម្រាប់ការមកចូលរួមក្នុងការប្រកួតនេះ។
លោកបាននិយាយថា “ ឆ្នាំក្រោយ ប្រសិនបើពួកគេឲ្យពិន្ទុដល់ខ្ញុំដោយអយុត្តិធម៌ ខ្ញុំនឹងមិនមកចូលរួមការប្រកួតនេះម្តងទៀតទេ” ៕
ស៊ុយឈាង