តួលេខករណីរំលោភដែលអង្គការសិទ្ធិមនុស្សអាដហុកបានកត់ត្រា គឺបានធ្លាក់ចុះប្រហែល២៤ភាគរយក្នុងឆ្នាំ២០១៣ បើធៀបនឹងឆ្នាំ២០១២ ប៉ុន្តែករណីរំលោភកុមារនិងអនីតិជនបានបន្តកើនឡើងច្រើន។
នគរបាលបានលើកឡើងថា តួលេខប្រចាំឆ្នាំត្រូវបានចេញផ្សាយ បន្ទាប់ពីសាលាដំបូងខេត្តកណ្ដាលកាលពីម្សិលមិញបានចោទប្រកាន់បុរសអាយុ២៤ឆ្នាំម្នាក់ជាជាងជួសជុលម៉ូតូ ពីបទចាប់រំលោភក្មេងស្រីអាយុ៦ឆ្នាំម្នាក់កាលពីថ្ងៃអង្គារ នៅក្នុងស្រុកស្អាង។
លោកស្រី ជួន ចំរុង ប្រធានផ្នែកស្ត្រីនៅអង្គការសិទ្ធិមនុស្សអាដហុកមានប្រសាសន៍ថា អង្គការអាដហុកទទួលបានករណីរំលោភ សរុបចំនួន២៤២ករណីក្នុងខេត្តក្រុងចំនួន២៣ កាលពីឆ្នាំមុន រួមទាំងករណីរំលោភហើយសម្លាប់ប្រាំបីករណីផង។ ក្នុងករណីរំលោភចំនួន១៧៧ករណី ជនរងគ្រោះសុទ្ធតែជាកុមារទាំងអស់។
ក្នុងឆ្នាំ២០១២ អង្គការអាដហុកទទួលបានករណីរំលោភចំនួន៣១២ករណី ក្នុងនោះមានករណីរំលោភកុមារ២១៤ករណី។លោកស្រី ចំរុងបានមានប្រសាសន៍ថា វាទំនងជាមានច្រើនករណីដែលអង្គការអាដហុកមិនទទួលបាន។លោកស្រីបន្ថែមថា “ ដោយសារអង្គការអាដហុកបំពេញការងារបានតិចតួចនៅក្នុងឆ្នាំ២០១៣ ដូច្នេះយើងមិនអាចនិយាយថា តួលេខនេះធ្លាក់ចុះពិតប្រាកដ ឬក៏ប្រហាក់ប្រហែលឆ្នាំមុនបានឡើយ”។
លោក សៅ សេនី អ្នកឃ្លាំមើលជាន់ខ្ពស់ផ្នែកសិទ្ធិកុមារនៅអង្គការសិទ្ធិមនុស្សលីកាដូបានមានប្រសាសន៍ថា លោកទទួលបានករណីរំលោភកុមារចំនួន១៧២ករណីនៅ ក្នុងខេត្តក្រុងចំនួន១៤ កាលពីឆ្នាំមុន ដែលអង្គការលីកាដូបានឃ្លាំមើល។ក្នុងចំណោមករណីទាំងនេះ បួនករណីជាការរំលោភបូកនិងពីរករណីជាការរំលោភហើយសម្លាប់។
លោកស្រី មូរ សុខហួរ សមាជិកសភាគណបក្សសង្គ្រោះជាតិ និងជាអតីតរដ្ឋមន្ត្រីក្រសួងកិច្ចការនារី ជាតំណាងរាស្ត្រមណ្ឌលបាត់ដំបង ជាខេត្តដែលអង្គការអាដហុកទទួលបានករណីរំលោភកុមារចំនួន៣១ករណី កាលពីឆ្នាំមុន ជាចំនួនច្រើនបំផុតនៅក្នុងប្រទេសនោះបានមានប្រសាសន៍ងថា ការលុបបំបាត់ករណីរំលោភកុមារត្រូវតែជាអាទិភាពរបស់រដ្ឋាភិបាល។លោកស្រីបានមានប្រសាសន៍ថា “ យើងស្នើឲ្យមានការចាត់វិធានការឲ្យបានខ្លាំងក្លា ដើម្បីទប់ស្កាត់បទល្មើសលើកុមារ”។លោកស្រីបានមានប្រសាសន៍បន្ថែមថា “តែងតែមានការចោទសួរពីវប្បធម៌និទណ្ឌភាពនៅក្នុងប្រព័ន្ធតុលាការ ព្រមទាំងយុត្តិធម៌នៅក្នុងសង្គម។ ចាំបាច់ត្រូវធ្វើការអប់រំឲ្យបានច្រើនស្ដីពីសិទ្ធិនិងការការពារកុមារ ហើយការអប់រំនេះត្រូវការថវិកាជាតិ”។
នៅក្នុងខេត្តកណ្ដាលឯណោះវិញ ជនរង គ្រោះពីការរំលោភក្មេងបំផុតកំពុងសម្រាក ព្យាបាលនៅមន្ទីរពេទ្យ គឺកើតឡើងបីសប្ដាហ៍ បន្ទាប់ពីបុរសអាយុ២៣ឆ្នាំម្នាក់បានចាប់រំលោភក្មេងស្រីអាយុ៥ឆ្នាំនៅក្នុងករណីដាច់ដោយឡែកពីគ្នាក្នុងខេត្តតែមួយ។
លោក ម៉េង សុខណែន មន្ត្រីការិយាល័យនគរបាលព្រហ្មទណ្ឌកម្រិតធ្ងន់ខេត្តបានមានប្រសាសន៍ថា ហាវ ពិសិដ្ឋ អាយុ២១ឆ្នាំត្រូវបានចាប់ខ្លួនកាលពីថ្ងៃពុធនៅក្នុងឃុំស្វាយប្រទាលពីបទចាប់រំលោភក្មេងស្រីអាយុ៦ឆ្នាំ។លោក សុខណែន បានមានប្រសាសន៍ថា “ នគរបាលបានចាប់ខ្លួនជនសង្ស័យរូបនេះបន្ទាប់ពីឪពុកម្ដាយក្មេងស្រីរងគ្រោះបានដាក់ពាក្យបណ្ដឹងកាលពីថ្ងៃអង្គារ”។ក្មេងស្រីរងគ្រោះបានលេងជាមួយមិត្តភក្តិរបស់នាងដែលត្រូវជាក្មួយស្រីរបស់ជនល្មើស។ នាងត្រូវជនល្មើសចាប់អូសដៃចូលក្នុងបន្ទប់បិទទ្វាររំលោភតែម្តង។នៅពេលនគរបាលសាកសួរ ជនល្មើសបានសារភាពថា ខ្លួនពិតជាបានចាប់រំលោភនាងមែន ហើយត្រូវបានឃុំខ្លួនបណ្តោះអាសន្ន៕សារុន
(រាយការណ៍បន្ថែមដោយ Lauren Crothers)