យោងតាមឯកសារបង្ហាញនៅផ្សារភាគហ៊ុន NASDAQ បានបង្ហាញថា ក្រុមហ៊ុនកាស៊ីណូ Entertainment Gaming Asia (EGA) បានប្រកាសនៅថ្ងៃអង្គារថា ខ្លួនបានកត់ត្រាការខាតបង់ក្នុងគម្រោងវិនិយោគរបស់ខ្លួនចំនួន២,៥លានដុល្លារតាមរយៈកាស៊ីណូ Dreamworld នៅខេត្តប៉ៃលិន ដោយសារតែចំនួនអ្នកលេងល្បែងឆ្លងកាត់ព្រំដែនថៃមានតិចជាងចំនួនរំពឹងទុក ហើយបានឲ្យដឹងថា ខ្លួនប្រហែលជាត្រូវបិទអាជីវកម្មនេះ។
ក្រុមហ៊ុន EGA ដែលទទួលបានការគាំទ្រពីក្រុមហ៊ុនប្រតិបត្តិករអាជីវកម្មកាស៊ីណូ Melco Internationnal Development មានមូលដ្ឋាននៅទីក្រុងម៉ាកាវ ក៏ប្រើទូរភ្នាល់សម្រាប់អាជីវកម្មរបស់ខ្លួននៅកាស៊ីណូណាហ្គាវើល ក្នុងរាជធានីភ្នំពេញ និងកាស៊ីណូឋានសួគ៌បូកគោក្នុងខេត្តកំពតផងដែរ។ ក្រុមហ៊ុននេះបានបើកកាស៊ីណូ Dreamworld ទី២នៅក្នុងខែមីនា ក្នុងក្រុងប៉ោយប៉ែត ខេត្តបន្ទាយមានជ័យ។
អាជីវកម្មកាស៊ីណូនៅខេត្តប៉ៃលិន ដែលក្រុមនេះបានបើកដំណើរការកាលពីខែឧសភា ឆ្នាំ២០១២ ដោយកំណត់អតិថិជនមកពីប្រទេសថៃជាអ្នកលែងល្បែងនោះ ទទួលបានប្រាក់ចំណូលបានកាន់តិចទៅៗ ហើយក្រុមហ៊ុន EGA បានក្រើនរំឭកវិនិយោគិនកាលពីខែកញ្ញាឆ្នាំមុនថា ខ្លួនត្រូវចាប់ផ្តើមជួលតុចេញ ដើម្បីប៉ះប៉ូវថ្លៃដើមប្រតិបត្តិការ និងបង្កើនប្រាក់ចំណូល។
ទោះជាយ៉ាងណា ថ្លៃជួលឲ្យភាគីទី៣ក៏មិនអាចជួយស្រោចស្រង់ចំនួនប្រាក់ចំណេញរបស់កាស៊ីណូនេះបានដែរ ហើយកាលពីថ្ងៃសុក្រ ក្រុមប្រឹក្សាភិបាលបានសម្រេចចិត្តប្រកាសថា កាស៊ីណូនេះខាតទុនវិនិយោគទាំងស្រុងចំនួន២,៥លានដុល្លារ ឲ្យស្របតាមបទបញ្ញត្តិហិរញ្ញវត្ថុសហរដ្ឋអាមេរិក។
សេចក្តីប្រកាសនោះមានខ្លឹមសារថា“ បច្ចុប្បន្ន ប្រាក់ចំណូលបានពីការជួលឲ្យភាគីទី៣ និងទូរភ្នាល់ មិនបានជំរុញឲ្យមានរំហូរសាច់ប្រាក់វិជ្ជមានទេ ហើយគណៈគ្រប់គ្រងក៏មើលមិនឃើញផ្លូវដែលស្តារឡើងវិញនូវលទ្ធភាពរកប្រាក់ចំណេញ ដោយប្រើគំរូអាជីវកម្មនេះដែរ”។សេចក្តីប្រកាសនេះមានខ្លឹមសារបន្ថែមថា “ ដូច្នេះក្រុមហ៊ុនមានបំណងកត់ត្រាការខាតបង់ប្រាក់សរុបប្រហែល២,៥លានដុល្លារ គិតត្រឹមថ្ងៃទី៣១ ខែ ធ្នូ ឆ្នាំ២០១៣ [ដែល] បង្ហាញពីការចំណាយទុនទាំងមូល ដោយក្រុមហ៊ុនសម្រាប់ទ្រព្យនេះ គិតត្រឹមថ្ងៃទី៣១ ខែធ្នូ ឆ្នាំ២០១៣ ជាមួយនឹងការលើកលែងទ្រព្យសម្បត្តិទាំងនោះ ដែលក្រុមហ៊ុនជឿថា អាចដាក់ពង្រាយឡើងវិញទៅដល់ទ្រព្យសម្បត្តិដែលមានស្រាប់ផ្សេងទៀត”។
ចំណូលពីកាស៊ីណូប៉ៃលិន សម្រាប់រយៈពេលបីខែ ដែលបញ្ចប់កាលពីថ្ងៃទី៣០ ខែកញ្ញា គឺ៤៣២.០០០ដុល្លារ គឺធ្លាក់ចុះជាង៥០ភាគរយ ពី៩០៧.០០០ដុល្លារ ដែលទទួលបានអំឡុងរយៈពេលបីខែ ដែលចប់នៅថ្ងៃទី៣០ ខែមិថុនា ដោយសារការកាត់បន្ថយពន្ធ នេះបើយោងតាមលទ្ធផលដែលចេញ ផ្សព្វផ្សាយថ្មីៗនេះ។ជម្រើសដែលត្រូវបានពិចារណាដោយ EGA រាប់ទាំងការជួលបន្តកាស៊ីណូប៉ៃលិនទាំងមូល ឬការបញ្ចប់ប្រតិបត្តិការ។
លោក សៅ សារ៉ាត ប្រធានមន្ទីរនៅសាលាខេត្តប៉ៃលិន បានមានប្រសាសន៍ថា លោកមិនបានដឹងពីមូលហេតុ ដែលកាស៊ីណូ ឌ្រីម វើល បានកំពុងតែពុះពារ ពីព្រោះចំនួនក្រុមអ្នកលេងល្បែងថៃដែលកំពុងបន្តឆ្លងដែននៅជាធម្មតាទេ។លោកបានមានប្រសាសន៍ថា “បើទោះជាមានបញ្ហានយោបាយនៅក្នុងប្រទេសថៃក៏ដោយ ក៏គ្មានអ្វីប្រែប្រួលឡើយ ហើយប្រជាជនថៃនៅតាមព្រំដែននៅតែមកជាធម្មតា”។ លោកបានបន្ថែមថា របាយការណ៍ថ្មីៗអំពីអ្នកលេងល្បែងដែលជំពាក់ ដែលជាប់ពន្ធនាគារ និងត្រូវបានធ្វើទារុណកម្មដោយការស៊ីណូនៅតាមព្រំដែនរបស់កម្ពុជាមិនប៉ះពាល់ដល់ចំនួនភ្ញៀវឡើយ។
ទោះជាយ៉ាងណា លោក ជ្រុន ដេរ៉ាវុធ ប្រធានការិយាល័យគ្រប់គ្រងកាស៊ីណូ នៅនាយកដ្ឋានឧស្សាហកម្ម របស់ក្រសួងហិរញ្ញវត្ថុបានមានប្រសាសន៍ថា ផលលំបាករបស់EGA នៅប៉ៃលិន អាចត្រូវបានបន្ទោសយ៉ាងច្បាស់ទៅលើវិបត្តិនយោបាយដែលកំពុងកើតឡើងនៅក្នុងប្រទេសថៃ។ លោកបានមានប្រសាសន៍ថា “វិបត្តិនយោបាយបច្ចុប្បន្ននៅក្នុងប្រទេសថៃ គឺជាដើមចមនាំឲ្យមានការធ្លាក់ចុះប្រាក់ចំណូលរបស់កាស៊ីណូនៅតាមព្រំដែន ពីព្រោះគ្មានជនជាតិផ្សេងទៀតមកឡើយ”។លោក ថេរ៉ាវុធ បានមានប្រសាសន៍ថា ការបាញ់សម្លាប់អ្នកតវ៉ាថ្មីៗនេះដោយកងរាជអាវុធហត្ថនៅក្នុងរាជធានីភ្នំពេញនឹងមិនដើរតួនាទីក្នុងការធ្លាក់ចុះប្រាក់ចំណេញរបស់កាស៊ីណូទេ ពីព្រោះច្បាប់មិនអនុញ្ញាតឲ្យពលរដ្ឋកម្ពុជាលេងល្បែងក្នុងកាស៊ីណូទេ។
កាស៊ីណូសរុបរបស់ក្រុមហ៊ុន EGA ដែលទទួលបានពីកៅអីអង្គុយលេងល្បែងចំនួន១៧៥៦ នៅក្នុងប្រទេសកម្ពុជាបានធ្លាក់ចុះ៥៩៥.០០០មក១០.៥លានដុល្លារក្នុងរយៈពេលប្រាំបួនខែដើមឆ្នាំមុន បើធៀបនឹងរយៈពេលដូចគ្នា កាលពីឆ្នាំ២០១២ ដែលក្រុមហ៊ុននេះសម្រេចបានប្រាក់ចំណូល១១,១លានដុល្លារ ភាគច្រើនដោយសារតែប្រាក់ចំណូលនៅកាស៊ីណូណាហ្គាវើលបានធ្លាក់ចុះ ក៏ដូចជានៅកាស៊ីណូឋានសួគ៌បូកគោ នេះបើយោងតាមរបាយការណ៍ខែវិច្ឆិកាឆ្នាំមុនរបស់ក្រុមហ៊ុននេះ៕ ប៊ុននី