ការចាក់បញ្ចាំងជាសាធារណៈនៅថ្ងៃនេះនូវខ្សែភាពយន្តឯកសារហាមឃាត់មួយ ដែលបង្ហាញថា រដ្ឋាភិបាលពាក់ព័ន្ធនៅក្នុងការធ្វើឃាតលោក ជា វិជ្ជា មេដឹកនាំសហជីពដ៏ល្បីឈ្មោះកាលពីឆ្នាំ២០០៤ ត្រូវប្ដូរទីកន្លែង ដោយសារលោក នីកូឡូស មេស្ទើហាម (Nicolaus Mesterharm) នាយករបស់ Meta House ដែលជាអ្នកជួលទីតាំងចាស់ឲ្យមិនអនុញ្ញាតឲ្យចាក់បញ្ចាំង។
ជម្លោះជុំវិញការចាក់បញ្ចាំងខ្សែភាពយន្តឯកសារដែលទទួលបានពានរង្វាន់ និងដែលទទួលបានការកោតសរសើរយ៉ាងខ្លាំងនេះកើតមានចំពេលអ្នកនាំពាក្យរដ្ឋាភិបាលគំរាមកាលពីម្សិលមិញថា អ្នកដែលព្យាយាមចាក់បញ្ចាំងខ្សែភាពយន្តនេះនឹងប្រឈមការនិរទេសភ្លាមៗសម្រាប់ជនបរទេស ហើយបើប្រជាជនខ្មែរវិញប្រឈមនឹងការជាប់ពន្ធនាគារ។
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រីបានមានប្រសាសន៍ថា “ប្រសិនបើអ្នកឯងបំពានបម្រាមនេះ យើងនឹងបណ្ដេញអ្នកឯងចេញ។ ប្រសិនបើអ្នកឯងជាខ្មែរយើងនឹងបញ្ជូនអ្នកឯងចូលពន្ធនាគារ”។
មជ្ឈមណ្ឌលសិទ្ធិមនុស្សកម្ពុជាមានគម្រោងចាក់បញ្ចាំងខ្សែភាពយន្តឯកសារដែលមានចំណងជើងថា “តើនរណាសម្លាប់ជា វិជ្ជា?” នៅការិយាល័យ Sithi Hub ជាកន្លែងជួបជុំសម្រាប់អ្នកសរសេរព័ត៌មានបង្ហោះតាមអ៊ីនធើណិតនិងសកម្មជន។ Sithi Hub មានទីតំាងស្ថិតក្នុងផ្ទះវីឡាមួយដែលពីមុនជាទីតាំង Meta House ជាមជ្ឈមណ្ឌលសិល្បៈនិងប្រព័ន្ធផ្សព្វផ្សាយដែលផ្ដោតលើការចាក់បញ្ចាំងខ្សែភាពយន្ត និងដែលត្រូវបានផលិតឡើងដោយលោក នីកូឡូស មេស្ទើហាម ផលិតករភាពយន្តជនជាតិអាល្លឺម៉ង់ដែលជួលអគារនេះឲ្យទៅ Sithi Hub ។
កញ្ញា សន រ៉ាម៉ាណា អ្នកសម្របសម្រួលគម្រោងសេរីភាពនៃការបញ្ចេញមតិរបស់មជ្ឈមណ្ឌលអប់រំច្បាប់សម្រាប់សហគមន៍បានមានប្រសាសន៍ថា នៅពេលលោក នីកូឡូស មេស្ទើហាម បានដឹងពីគម្រោងចាក់បញ្ចាំងខ្សែភាពយន្ត ជា វិជ្ជា លោកបានបដិសេធមិនឲ្យចាក់បញ្ចាំងទេ។ កញ្ញាបានលើកឡើងថា “យើងបានផ្លាស់ប្ដូរទីតាំងដោយសារតែយើងមានបញ្ហាខ្លះជាមួយនឹងទីតាំងនៅ Sithi Hub”។ កញ្ញាបានបន្តថា “បញ្ហា” ពាក់ព័ន្ធនឹងការចាក់បញ្ចាំងនេះគឺបង្កឡើងដោយលោក នីកូឡូស មេស្ទើហាម។
គាត់បានលើកឡើងទៀតថា “[កិច្ចសន្យាជួល] គួរតែបង្ហាញច្បាស់ហើយមុនពេលជួលផ្ទះនេះ។ កិច្ចសន្យារបស់យើងគ្រាន់តែលើកឡើងថា យើងអាចប្រើប្រាស់ទីធ្លារបស់ Sithi Hub បានមិនមែនសម្រាប់ការចាក់បញ្ចាំងជាសធារណៈទេ”។
លោក នីកូឡូស មេស្ទើហាម បានប្រាប់មជ្ឈមណ្ឌលអប់រំច្បាប់សម្រាប់សហគមន៍តាមអ៊ីម៉េលមួយកាលពីថ្ងៃពុធថា ពួកគេមិនអាចចាក់បញ្ចាំងខ្សែភាពយន្តនេះនៅ Sithi Hub បានទេ។ លោក នីកូឡូស មេស្ទើហាម បានសរសេរថា “ខ្ញុំសូមជម្រាបអ្នកថា នេះ [ការចាក់បញ្ចាំង] នឹងមិនអាចទៅរួចទេ ដោយសារតែបម្រាមនាពេលបច្ចុប្បន្ន” ដែលរដ្ឋាភិបាលហាមមិនឲ្យចាក់បញ្ចាំងខ្សែភាពយន្តនេះ។លោកបាននិយាយការពារការសម្រេចចិត្តរបស់លោកដោយលើកឡើងថា រដ្ឋាភិបាលជាអ្នកហាមប្រាមចាក់បញ្ចាំងខ្សែភាពយន្តនេះ មិនមែនរូបលោកនោះទេ។លោកបានសរសេរថា “វាត្រូវបានហាមឃាត់ពីព្រោះខ្សែភាពយន្តនេះជាខ្សែភាពយន្តហាមឃាត់។ ខ្ញុំបានត្រឹមតែធ្វើឲ្យគាត់ [ផលិតករខ្សែភាពយន្តនេះ ឈ្មោះ រិច ហ្គារ៉េឡា] ដឹងថា វាត្រូវបានហាមឃាត់”។
ខ្សែភាពយន្តនេះគ្រោងនឹងចាក់ផ្សាយជាភសាខ្មែរនៅថ្ងៃនេះ នៅទីស្នាក់ការរបស់មជ្ឈមណ្ឌលសិទ្ធិមនុស្សកម្ពុជាក្នុងខណ្ឌចំការមននៅ ម៉ោង៥ល្ងាច ហើយនឹងចាក់ផ្សាយម្ដងទៀតជាភាសាអង់គ្លេសនៅម៉ោង៧យប់។
លោក ប្រ៊ែដលី ខក់ (Bradley Cox) ជាអ្នកដឹកនាំថតខ្សែភាពយន្តនេះបានមានប្រសាសន៍ថា កាលពីថ្ងៃព្រហស្បតិ៍ រដ្ឋាភិបាលបានប្រើប្រាស់លេសជាច្រើន ដើម្បីរារាំងមិនឲ្យចាក់បញ្ចាំងខ្សែភាពយន្តស៊ើបអង្កេតរបស់លោកលើការធ្វើឃាត់លោក ជា វិជា្ជ ដែលត្រូវបានឃាតករបាញ់សម្លាប់កាលពី១០ឆ្នាំមុន។
លោកបានមានប្រសាសន៍ពីទីក្រុងបាងកក ប្រទេសថៃថា “រដ្ឋាភិបាលបានប្រើលេសជាច្រើនក្នុងពេលកន្លងមកជាឧទាហរណ៍ថា យើងគ្មានច្បាប់អនុញ្ញាតត្រឹមត្រូវ ឬគ្មានអាជ្ញាប័ណ្ណនាំចូល…។ មានហេតុផលជាច្រើន ដែលមិនអាចចាក់បញ្ចាំងវាបាន ប៉ុន្តែវាហាក់ដូចជា អនុវត្តតែលើភាពយន្តរបស់យើងប៉ុណ្ណោះ រីឯភាពយន្តផ្សេងទៀតគឺអត់ទេ”។
លោក ផៃ ស៊ីផាន បានបញ្ជាក់ថា ខ្សែភាពយន្តឯកសារដែលត្រូវបានចាក់បញ្ចាំងលើកដំបូងកាលពីឆ្នាំ២០០៧នេះ ត្រូវបានហាមឃាត់នៅឡើយ។ លោកមានប្រសាសន៍ថា រដ្ឋាភិបាលព្រួយបារម្ភថា ភាពយន្តដែលគេអាចបើកមើលបានយ៉ាងទូលំទូលាយនៅក្នុងគេហទំព័រយូធូបនេះ នឹងមានឥទ្ធិពលលើទស្សនរបស់សាធារណជន៕ សុខុម