28 C
Phnom Penh

អង្គការ​ក្រៅ​រដ្ឋាភិបាលបន្ត​ការ​​ហែក្បួន​ទៅកាន់​​ស្ថានទូត​ដើម្បី​ឲ្យ​មាន​ការ​ដោះ​លែង​មនុស្ស​២៣នាក់​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ តំណាង​ក្រុម​អង្គការ​សង្គម​ស៊ីវិល​ បាន​​ហែក្បួន​ទៅកាន់ស្ថានទូត​ចំនួន​ប្រាំ​ពី​រ​ក្នុង​រាជធានី​ភ្នំពេញ ដែល​នេះ​ជា​ថ្ងៃ​ទី៣​ របស់​ពួកគេ​ក្នុងការ​ធ្វើ​ញត្តិ​ជំរុញ​ឲ្យ​មាន​ការ​ដោះ​លែង​សកម្មជន​ និង​កម្មករ​រោង​ចក្រ​កាត់​ដេរ​ដែល​ត្រូវ​បាន​ធ្វើកូដកម្ម​សរុប​២៣នាក់​ បន្ទាប់​ពី​ពួកគេ​ត្រូវ​បាន​ចាប់​ដាក់​ពន្ធនាគារ​កាលពី​ដើម​ខែ​នេះ ក្រោយ​ពេល​ដែល​ពួកគេ​បាន​ចូល​រួម​ក្នុង​បាតុកម្ម​ទាមទារ​ប្រាក់​ឈ្នួល​អប្បបរមា​ខ្ពស់​ជាង​មុន​។

កាល​ពីម្សិលមិញ តំណាង​សង្គម​សីុវិល​ប្រហែល​១០០នាក់​ហែក្បួ​ន​ដាក់​ញត្តិ​ជូន​ស្ថានទូត​បរទេស​ដើម្បី​​ទាម​ទារ​ឲ្យ​ពួកគេ​ជួយ​ឲ្យ​មាន​ការ​ដោះលែង​មនុស្ស​ជាប់​ឃុំ​ទាំង​២៣នាក់​ ដែល​ត្រូវ​បាន​ឃុំ​ខ្លួន​ដោយសារ​ចូល​រួម​ធ្វើ​បាតុកម្ម ​។ ស៊ីវ ចាន់​ណា​
កាល​ពីម្សិលមិញ តំណាង​សង្គម​សីុវិល​ប្រហែល​១០០នាក់​ហែក្បួ​ន​ដាក់​ញត្តិ​ជូន​ស្ថានទូត​បរទេស​ដើម្បី​​ទាម​ទារ​ឲ្យ​ពួកគេ​ជួយ​ឲ្យ​មាន​ការ​ដោះលែង​មនុស្ស​ជាប់​ឃុំ​ទាំង​២៣នាក់​ ដែល​ត្រូវ​បាន​ឃុំ​ខ្លួន​ដោយសារ​ចូល​រួម​ធ្វើ​បាតុកម្ម ​។ ស៊ីវ ចាន់​ណា​

ការហែក្បួន​កាលពីម្សិលមិញ បាន​ចាប់​ផ្តើម​ដោយ​មាន​អ្នក​ចូល​រួម​ប្រហែល​៤០​នាក់​ ហើយ​ក្រោយ​មក​​ទៀត​បាន​កើន​ឡើង​ដល់​ប្រហែល​​១០០នាក់​ដោយ​មាន​ការ​ចូល​រួម​ពី​សំណាក់​តំណាង​សង្គម​ស៊ីវិល​។

លោក ណៃ វ៉ាន់ដា អនុប្រធាន​ផ្នែក​ត្រួត​ពិនិត្យ​សិទ្ធិមនុស្ស​នៅ​សមាគម​សិទ្ធិមនុស្ស​ អាដហុក ដែល​បាន​ជួយ​រៀប​ចំ​ផ្ញើ​ញត្តិ​នេះ​បាន​មាន​ប្រសាសន៍​ថា “ យើង​បាន​ណែនាំ​ឲ្យ​​ប្រជាជន​កុំ​ឲ្យ​ប្រើ​សកម្មភាព​ ឬក៏​ពាក្យ​ពេចន៍​ប្រមាថ​ ដែលប៉ះ​ពាល់​អារម្មណ៍​របស់​ប្រជា​ជន”។ លោក​បាន​បន្ត​ថា “ យើង​គ្រាន់​តែ​ប្រើ​​ពាក្យ​អំពាវ​នាវ​ឲ្យ​មាន​ការ​ដោះ​លែង​អ្នក​ជាប់​ពន្ធនាគារ​”។

ការ​ហែក្បួន​កាលពីម្សិលមិញ ត្រូវ​បាន​ដឹក​នាំ​ដោយ​លោកស្រី ធីតា ឃិះ​ នាយិកា​ប្រតិបត្តិ​អង្គការ​បណ្តុះ​បណ្តាល​ សីលកា​ និង​លោកស្រី រស់ សុភាព នាយិកា​អង្គការ​យេនឌ័រ​​​និង​អភិវឌ្ឍន៍​សម្រាប់​កម្ពុជា​។

ក្រុម​អ្នក​ហែក្បួន​បាន​យក​ញត្តិ​ដែល​មាន​​ចំណារ​របស់​អង្គការ​សង្គម​ស៊ីវិល​ជាតិ និង​អន្តរជាតិ​ចំនួន​១៨១ ដើម្បី​អំពាវ​នាវ​ឲ្យ​ស្ថាន​ទូត​បរទេស​ជំរុញ​ឲ្យ​មាន​ការ​ដោះ​លែង​អ្នក​ជាប់​ពន្ធនាគារ​ទាំង​២៣នាក់​នោះ។

ញត្តិ​នោះ​មាន​ខ្លឹម​សារ​ថា “ ការ​ចាប់​ខ្លួន​ពួកគេ​មិន​ស្រប​តាម​ច្បាប់​ និង​ប​ទប​ញ្ញតិ​នានា​របស់​ប្រទេស​កម្ពុជា​ និង​ត្រូវ​បាន​ធ្វើ​ឡើង​ដោយ​កម្លាំង​ប្រដាប់​អាវុធ​ដែល​មាន​ភាព​កាច​សាហាវ​ខ្លាំង​”។ញត្តិ​ដដែល​នេះ​មាន​ខ្លឹម​សារ​បន្ត​ទៀត​ថា “ មនុស្ស​មួយ​ចំនួន​ត្រូវ​បាន​វាយ​ដំយ៉ាង​អាក្រក់​​ និង​ទុ​ក​មិន​ឲ្យ​ទទួល​បាន​ការ​ព្យាបាល​អស់​រយៈ​ពេល​ជាច្រើន​ថ្ងៃ​ ហើយ​នៅ​តែ​ស្ថិត​ក្នុង​ស្ថាន​ភាព​ធ្ងន់​ធ្ងរ​”។ ខ្លឹម​សារ​នៅ​ក្នុង​ញត្តិ​នេះបាន​បន្ត​ទៀតថា “ ការដោះ​លែង​ពួកគេ​ចេញ​ពី​ពន្ធនាគារ​ដោយ​មិន​មាន​លក្ខខណ្ឌ​ ឥឡូវ​នេះ​ជា​រឿង​បន្ទាន់​ទាក់​ទង​នឹងក្តី​កង្វល់​អំពី​ស្ថាន​ភាពមនុស្ស​ធម៌​អន្តរជាតិ​។ ឥឡូវ​នេះ​យើង​ជំរុញ​ឲ្យ​អ្នក​បង្ហាញ​ក្តី​បារម្ភ​របស់​អ្នក​អំពី​បញ្ហា​នេះ​ ដល់​រាជរដ្ឋាភិបាល​កម្ពុជា​ ប្រសិន​បើ​អ្នក​​មិន​ទាន់​បាន​ធ្វើ​បែប​នេះ​នៅ​ឡើយ​”។

បើទោះ​បី​ជា​មាន​បម្រាម​មិន​ឲ្យ​តវ៉ា​ជា​សាធារណៈ​ក៏​ដោយ​ ​អាជ្ញាធរ​រាជធានី​មិន​បាន​បញ្ឈប់​សកម្មភាព​ហែក្បួន​កាលពី​ម្សិល​មិញ​​ទេ​។ នគរបាល​ចរាចរ​បាន​ធ្វើ​ដំណើរ​នៅ​ខាង​​មុខ​ក្រុម​អ្នក​តវ៉ា​ ដើម្បីនំា​ពួកគេ​ឆ្លង​កាត់​​ផ្លូវ​ខ្វែង​។

លោក ឡុង ឌីម៉ង់ អ្នកនាំ​ពាក្យ​សាលា​រាជ​ធានី​ភ្នំពេញ​បាន​ឲ្យ​ដឹង​ថា​ ការ​ហែក្បួន​នេះ​ត្រូវ​បាន​អនុញ្ញាត​ឲ្យ​ដំណើរការ​ទៅ​មុខ​ ដោយ​​សារ​តែ “ ពួកគេ​មិន​បាន​ធ្វើ​ឲ្យ​មាន​បញ្ហា​ដល់​សណ្តាប់​ធ្នាប់​សាធារណៈ​ទេ​”។

ដោយ​ចាប់​ផ្តើម​នៅ​ម៉ោង​៨និង​៣០នាទី​ព្រឹក​ និង​បញ្ចប់​នៅ​ម៉ោង​ប្រហែល​១១ព្រឹក​ តំណាង​អង្គការ​ក្រៅ​រដ្ឋាភិបាល​ទាំង​នេះ​បាន​យក​ញត្តិ​ទៅ​ឲ្យ​ស្ថានទូត​អាល្លឺម៉ង់​ ស្វ៊ីស កូរ៉េ​ខាង​ត្បូង​ អូស្ត្រាលី រុស្ស៊ី ថៃ និង​ស្ថានទូត​ម៉ាឡេស៊ី​។

នៅ​ថ្ងៃស្អែក​ តំណាង​អង្គការ​ក្រៅ​រដ្ឋា​ភិ​បាល​ចំនួន​ប្រាំពីរ​នឹងយក​ញត្តិ​ទៅ​ឲ្យ​ស្ថានទូត​​ភូមា សិង្ហបុរី​ និង​ស្ថានទូត​ឥណ្ឌា នេះ​បើ​យោង​​តាម​ប្រសាសន៍​របស់​លោក​ ណៃ វ៉ាន់​ដា។

ក្នុង​ចំណោម​អ្នកជាប់​ពន្ធនាគារ​ទាំង​២៣​នាក់​ មាន​១០នាក់​គឺ​ជា​អ្នក​តវ៉ា​ដោយ​សន្តិវិធី​ បន្ទាប់​ពី​មាន​ការ​ប៉ះ​ទង្គិច​ជាមួយ​ក្រុម​ទ័ព​ឆត្រ​យោង​នៅ​ខាង​ក្រៅ​រោងចក្រ​កាត់​ដេរ​ យ៉ាក់​ជីន (YaKjin) កាលពី​ថ្ងៃ​ទី២ ខែមករា ចំណែក​ឯ​​១៣នាក់​ផ្សេង​ទៀត​ត្រូវ​បានចាប់​ខ្លួន​ បន្ទាប់​ពី​មាន​សកម្មភាព​គប់​ដុំ​ថ្ម​ជាមួយ​កម្លាំង​កង​រាជ​អាវុធ​ហត្ថ​នៅ​មុខ​សួន​ឧស្សាហកម្ម​កាណា​ឌីយ៉ា​ កាលពី​ថ្ងៃទី​៣ ខែមករា។

កាលពីថ្ងៃ​ទី​៣ ខែមករា ​​កម្លាំង​កង​រាជអាវុធ​ហត្ថបាន​សម្លាប់​មនុស្ស​ប្រាំ​នាក់​ និង​ធ្វើ​ឲ្យ​ជាង​៤០នាក់​ផ្សេង​ទៀត​រង​របួស​។នៅ​ក្នុង​សប្តាហ៍​នេះ​សាលា​ដំបូង​រាជធានី​ភ្នំពេញ​បាន​បដិសេធ​មិន​ដោះ​លែង​ទណ្ឌិត​ទាំង​២៣រូប​ឲ្យ​នៅ​ក្រៅ​ឃុំ​ ដោយ​លើក​ឡើង​ថា ចាំ​បាច់​ត្រូវ​រក្សា​ទុក​ពួកគេ​ សម្រាប់​ការ​សាក​​សួរ​ និង​រក្សា​សណ្តាប់​ធ្នាប់​សាធារណៈ៕សុធា

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស