នៅក្នុងសេចក្តីថ្លែងការណ៍មួយចេញកាលពីម្សិលមិញ សហព័ន្ធសិទ្ធិមនុស្សអន្តរជាតិ និងអង្គការពិភពលោកប្រឆាំងការធ្វើទារុណកម្ម បានអំពាវនាវឲ្យមានការដោះលែងសកម្មជន និងកម្មកររោងចក្រកាត់ដេរ២៣នាក់ដែលកំពុងជាប់ពន្ធនាគារចំពោះការចូលរួមធ្វើបាតុកម្មទាមទារដំឡើងប្រាក់ខែគោលនោះ ឲ្យនៅក្រៅឃុំបណ្តោះអាសន្ន។
លោក ការីម ឡាហីដជី ប្រធានសហព័ន្ធសិទ្ធិមនុស្សអន្តរជាតិបានមានប្រសាសន៍ថា “ រដ្ឋាភិបាលកម្ពុជាត្រូវតែគោរពតាមកាតព្វកិច្ចរបស់ខ្លួនក្រោមច្បាប់អន្តរជាតិ និងត្រូវធានាថា អ្នកការពារសិទ្ធិមនុស្សអាចធ្វើសកម្មភាពអហិង្សាដោយគ្មានការភ័យខ្លាចចំពោះការយាយី ឬការចាប់ខ្លួនដោយខុសច្បាប់ឡើយ”។លោកបន្ថែមថា “ នេះរួមទាំងការដកបម្រាមមិនឲ្យមានការជួបជុំគ្នាជាសាធារណៈ ដែលផ្ទុយពីមាត្រា២១នៃអនុសញ្ញាអន្តរជាតិស្តីពីសិទ្ធិសីុវិល និងសិទ្ធិនយោបាយ ហើយប្រទេសកម្ពុជាក៏ជាហត្ថលេខីមួយនៅក្នុងអនុសញ្ញានេះដែរ”។
លោក ជឺរ៉ាល់ ស្ទែបប័ររ៉ុក អគ្គលេខាធិការ អង្គការពិភពលោកប្រឆាំងការធ្វើទារុណកម្មបានមានប្រសាសន៍ថា ប្រជាជនគួរតែមានសិទ្ធិជួបជុំគ្នា។
លោក ស្ទែបប័ររ៉ុក បានមានប្រសាសន៍ថា “ គេមិនអាចនិយាយជារឿយៗថា មិនអាច ដោះស្រាយបញ្ហាបាននោះទេ ហើយការបង្ក្រាបអ្នកប្រឆាំងគ្រាន់តែធ្វើឲ្យមានភាពតានតឹងកាន់តែខ្លាំង”៕គឹមហឿន