កាលពីថ្ងៃសុក្រ តុលាការកំពូលបានតម្កល់សាលដីកាផ្តន្ទាទោសលោក ម៉ឹក តារា និងសហចុងចោទ ជា ឡេង ឲ្យជាប់ពន្ធនាគារមួយជីវិត ដោយបញ្ចប់ការសង្ឃឹមដែលថា បុរសទាំងពីរនាក់នេះនឹងត្រូវដោះលែង។
សាលាដំបូងខេត្តបន្ទាយមានជ័យបានសម្រេចដាក់ពន្ធនាគារបុរសទាំងពីរនាក់នេះអស់មួយជីវិតកាលពីឆ្នាំ២០១២ តាមការចោទប្រកាន់ជាង២៥ករណីពីបទជួញដូរគ្រឿងញៀននិងអំពើពុករលួយ ជាទោសមួយត្រូវបានសាលាឧទ្ធរណ៍តម្កល់ទុកជាបានការ កាលពីឆ្នាំមុន។
ជនជាប់ចោទទី៣ ឈ្មោះ ម៉ន ឌឿន បានសារភាពទទួលយកការចោទប្រកាន់ទាំងនេះ ប៉ុន្តែ បានរត់គេចខ្លួនមុនពេលកាត់ទោសគាត់។ ទោសជាប់ពន្ធនាគាររយៈពេល២៥ឆ្នាំរបស់គាត់ត្រូវបានតុលាការស្រូបអស់ប្រាំឆ្នាំកាលពីឆ្នាំមុន ប៉ុន្តែ ពេលនេះគាត់កំពុងរត់គេចខ្លួននៅឡើយ។
លោក ឃឹម ប៉ុណ្ណ ចៅក្រមប្រធានក្រុមប្រឹក្សាជំនំុជម្រះនៃតុលាការកំពូលបានប្រកាសថា “ [តុលាការកំពូល] សម្រេចច្រានចោលពាក្យបណ្តឹងរបស់ មឹុក តារា ជា ឡេង និង គា អ៊ាវ មេធាវីរបស់ ម៉ន ឌឿន” នៅពេលលោកតម្កល់សាលក្រម និងសាលដីកាទាំងនេះទុកជាបានការ។លោកបានមានប្រសាសន៍បន្ថែមទៀតថា “ យើងសម្រេចតម្កល់សាលដីការបស់សាលាឧទ្ធរណ៍ពីថ្ងៃទី១៥ ខែកុម្ភៈ ឆ្នាំ២០១៣ ហើយបង្គាប់ឲ្យបន្តឃុំខ្លួនពួកគេក្នុងពន្ធនាគារ [ព្រៃស]”។
ថ្លែងអំឡុងសវនាការរយៈពេលពីរម៉ោងនេះ ចៅក្រម ហេង ព្រីយ៉ា បានមានប្រសាសន៍ថា ទណ្ឌិតទាំងនេះមិនបានបង្ហាញភ័ស្តុតាងដោះបន្ទុក ឬភ័ស្តុតាងដែលបង្ហាញថា ពួកគេគ្មានទោសនោះទេ។
អំឡុងសវនាការដំបូងកាលពីឆ្នាំ២០១១ សាក្សីរាប់រយនាក់បានឡើងផ្តល់សក្ខីកម្មចោទលោក ម៉ឹក តារា ថា លោកបានដឹកនាំក្រុមឧក្រិដ្ឋជនស្មុគស្មាញមួយ ដែលនៅក្នុងនោះលោកនិងសហចុងចោទរបស់លោកតែងតែទារប្រាក់សូកប៉ាន់ពីជនជួញដូរគ្រឿងញៀនជាប្រចាំ ដែលប្រវត្តិប្រព្រឹត្តបទល្មើសរបស់ពួកគេត្រូវបានលុបចេញពីបញ្ជីជាថ្នូរនឹងប្រាក់។
គេជឿថា លោកម៉ឹក តារា និងអ្នកនៅក្រោមបង្គាប់របស់លោករកប្រាក់បានរាប់សែនដុល្លារនៅពេលពួកគេបានអនុញ្ញាត
ឲ្យឧក្រិដ្ឋជនដើរហើរដោយសេរីក្នុងរយៈពេលបួនឆ្នាំ។
លោក ម៉ៃ វណ្ណាឌី មេធាវីរបស់លោក ម៉ឹក តារា បានមានប្រសាសន៍ថា លោក ម៉ឹក តារា ដែលតែងតែបដិសេធថា មិនបានប្រព្រឹត្តខុសរហូតមកនោះ មិនបានបង្ហាញខ្លួនទេអំឡុងសវនាការកាលពីថ្ងៃសុក្រ ដោយសារតែលោកមានជំងឺ។លោកបានមានប្រសាសន៍ថា “ យើងមិនអាចទទួលយកសេចក្តីសម្រេចរបស់តុលាការកំពូលបានទេ ពីព្រោះតុលាការមិនបានផ្តល់យុត្តិធម៌ដល់លោក មឹុក តារា ទេ មាន២៥ករណី ប៉ុន្តែ ករណីជាច្រើនមានចំណុចគួរឲ្យសង្ស័យ”។
លោក ជា ឡេង និយាយថា សាលដីកាស្ថាពរនេះ “មិនយុត្តិធម៌” ទេ ហើយការចោទប្រកាន់មកលើរូបលោក គឺជាការដាក់ពិន័យលោក ចំពោះការចាប់ខ្លួនឧក្រិដ្ឋជនថ្នាំញៀន និងការរឹបអូសសារធាតុខុសច្បាប់របស់ពួកគេក្នុងរយៈពេលប៉ុន្មានឆ្នាំមកនេះ។
គាត់និយាយថា “ មូលហេតុដែលពួកគេចង់ធ្វើបាបខ្ញុំ គឺដោយសារតែពីមុន យើងធ្លាប់បង្ក្រាបជនជួញដូរគ្រឿងញៀនភាគច្រើន និងរឹបអូសបានគ្រឿងញៀនរាប់តោន ហេតុដូច្នេះមានជនសង្ស័យជាច្រើនដែលស្អប់ខ្ញុំ។ប្រសិនបើគេអនុញ្ញាតឲ្យខ្ញុំបន្តដាក់ពាក្យបណ្តឹង ខ្ញុំនឹងដាក់”។
បន្ថែមពីលើទោសនេះ លោក ម៉ឹក តារា ត្រូវបានតុលាការបង្គាប់ឲ្យបង់ប្រាក់ពិន័យជាង៣០០.០០០ដុល្លារ និងដកហូតទ្រព្យសម្បត្តិរបស់លោក។ លោក ជា ឡេង ត្រូវតុលាការពិន័យជាប្រាក់២១.០០០ដុល្លារ ហើយលោក ម៉ន ឌឿន ពិន័យជាប្រាក់៣៤.០០០ដុល្លារ៕ សុខុម