កាលពីម្សិលមិញ សាលាដំបូងរាជធានីភ្នំពេញបានផ្តន្ទាទោសបុរសជនជាតិឡាវពីរនាក់ឲ្យជាប់ពន្ធនាគាររយៈពេល២៥ឆ្នាំ និងបុរសជនជាតិខ្មែរពីរនាក់ជាប់ពន្ធនាគាររយៈពេល២០ឆ្នាំ។តុលាការសម្រេចបែបនេះ បន្ទាប់ពីរកឃើញពិរុទ្ធភាពរបស់ពួកគេថា បានរត់ពន្ធគ្រឿងញៀនមេតំហ្វេតាមីន១,៨គីឡូក្រាមពីឡាវ មកកាន់កម្ពុជាក្នុងខែធ្នូឆ្នាំ២០១២។
ឈ្មោះ អំផន កាំភូន អាយុ៣០ឆ្នាំ និងឈ្មោះ វង់ភិន ខំបេ អាយុ៥២ឆ្នាំ ក៏ត្រូវពិន័យជាប្រាក់៥០លានរៀលដែរ[ប្រហែល១២.៥០០ដុល្លារ] ខណះដែលអ្នកសមគំនិតជាជនជាតិខ្មែររបស់ពួកគេ ឈ្មោះ ណាត ថាង អាយុ៣៦ឆ្នាំ និងឈ្មោះ ណាត ស៊ូត អាយុ១៨ឆ្នាំ ត្រូវបានពិន័យម្នាក់ៗជាប្រាក់ចំនួន៤០លានរៀល[ប្រហែល ១០.០០០ដុល្លារ]។
លោក សួស សំអាត ប្រធានក្រុមប្រឹក្សាជំនុំជម្រះ បានប្រាប់បុរសជនជាតិឡាវនេះថា “ តុលាការនឹងរឹបអូសរថយន្តម៉ាក Toyota Vigo ដ៏ប្រណិតរបស់អ្នក ហើយបណ្តេញអ្នកចេញពីប្រទេស នៅពេលអ្នកបញ្ចប់ទោសរបស់អ្នក”។ណាត តាង ជាមនុស្សទី១ ក្នុងចំណោមបួននាក់ ត្រូវបានចាប់ខ្លួនកាលពីថ្ងៃទី២២ ខែធ្នូ ឆ្នាំ២០១២ នៅពេលនគរបាលប្រឆាំងគ្រឿងញៀនរាជធានីភ្នំពេញបានឃើញគាត់ជាមួយនឹងគ្រឿងញៀននៅក្នុងផ្ទះសំណាក់មួយក្នុងខណ្ឌឫស្សីកែវ រាជធានីភ្នំពេញ។
បន្ទាប់ពីឃាត់ខ្លួន ណាត តាង នគរបាលក្រោយនោះបានចាប់ខ្លួនអ្នកសមគំនិតជាមួយគាត់បីនាក់ទៀត ដែលទាំងអស់គ្នានគរបាលបានកំណត់មុខសញ្ញារួចហើយ។កាលពីម្សិលមិញ ជនទាំងបួននាក់នេះ បានអះអាងថា ខ្លួនគ្មានកំហុសទេ ដោយ ណាតតាង អះអាងថា គាត់យួរថង់ដែលមានគ្រឿងញៀនឲ្យនិយោជកសំខាន់ម្នាក់៕ប៊ុននី