27 C
Phnom Penh

​ក្រោយ​​​ពី​មាន​ការ​ប៉ះ​ទង្គិច​​ អ្នក​​​​តវ៉ា​ចាប់​ផ្តើ​ម​ធ្វើ​សកម្មភាព​​​​លើ​​​​អ្នក​ដែល​គេ​ស​ង្ស័​យ​ថា​បង្ក​ហេតុ​

ដោយ ឌឹ ខេមបូឌា ដេលី

បទវិភាគ

ក្រុម​អ្នកតវ៉ា​ដែល​ទាមទារ​ឲ្យមានការ​​ដោះលែង​សកម្ម​ជន និង​កម្ម​ករ​​ជាប់ឃុំសរុ​ប​​២៣​នាក់​ បាន​ប៉ះទង្គិច​គ្នា​ ជាមួយ​កម្លាំង​ការ​ពារ​សន្តិសុខ​នៅ​ក្នុង​បាតុកម្ម​មួយ ​ក្នុង​រា​ជ​ធានី​​​ភ្នំពេញ​ កាលពីម្សិលមិញ ​ហើយ​ប​ន្ទា​ប់​​មក​​​ក្រុម​​​​អ្នកតវ៉ា​ទាំងនោះ​បាន​វាយ​បុរស​ស្លៀក​ពាក់​ស៊ីវិល​យ៉ាងតិច​បីនាក់​ ដែល​ពួ​ក​គេ​សង្ស័យ​ថា ​​​បាន​បន្លំខ្លួន​បង្ក​បញ្ហាក្នុងចំណោម​ពួក​គេ​​។

កម្លាំង​សន្តិសុខ​ខណ្ឌដូន​ពេញ​វាយ​ប្រហារ​ក្រុម​អ្នក​តវ៉ា​ អំឡុង​បាតុកម្ម​មួយ​ក្នុង​រាជធានីភ្នំពេញ​កាល​ពីម្សិលមិញ ដើម្បី​​អំពាវ​នាវ​ឲ្យមាន​ការ​ដោះលែង​សកម្មជន​ និង​កម្មករ​សរុប​២៣​នាក់​ ដែល​ត្រូវបាន​ចាប់ខ្លួន​កាល​ពីដើម​ខែនេះ​។សីុវ ចាន់​ណា​
កម្លាំង​សន្តិសុខ​ខណ្ឌដូន​ពេញ​វាយ​ប្រហារ​ក្រុម​អ្នក​តវ៉ា​ អំឡុង​បាតុកម្ម​មួយ​ក្នុង​រាជធានីភ្នំពេញ​កាល​ពីម្សិលមិញ ដើម្បី​​អំពាវ​នាវ​ឲ្យមាន​ការ​ដោះលែង​សកម្មជន​ និង​កម្មករ​សរុប​២៣​នាក់​ ដែល​ត្រូវបាន​ចាប់ខ្លួន​កាល​ពីដើម​ខែនេះ​។សីុវ ចាន់​ណា​

ក្រោយ​មកទៀត​ បុរស​ពីរ​នាក់​ក្នុង​ចំ​ណោម​​​​បុរស​ទាំង​នោះត្រូវបាន​អ្នក​តវ៉ា​មួ​យចំនួន​ដឹក​ចេញ​ពី​​កន្លែង​កើតហេតុទៅ​ប្រ​គល់​ឲ្យ​នគរ​​​បាល​នៅ​សង្កាត់​បឹងកេង​កង​១ ខណ្ឌចំការមន​ ដែល​បាន​បញ្ជូន​បុរស​ទាំង​​នេះ​ទៅស្នងការ​នគរ​បាលរាជធានី។ គួរ​ប​ញ្ជាក់​ថា ​ក្នុង​​​ចំណោម​​​​បុរស​ទាំងពីរ​នោះ​ មា​ន​ម្នាក់​បានរង​របួស​ឈាម​​​​នៅលើក្បាល។

​សហជីព​​ប្រាំបួន​អំពាវ​នាវឲ្យធ្វើ​ស​ក​ម្ម​​​ភាព​​​​តវ៉ា​នេះ ដោយសង្ឃឹមថា ​នឹង​មាន​កា​រ​​​ចូលរួម​ពី​មនុស្ស​១០.០០០​នាក់​ នៅ​ទី​លាន​ប្រជាធិបតេយ្យ​ ក្នុង​រាជធានីភ្នំពេញ​ ដើម្បី​​​ទាមទារ​ទាំង​ឲ្យមានការដំឡើង​ប្រាក់​ឈ្នួល​អប្បបរមា​សម្រាប់​វិស័យ​កាត់ដេរ​ ទាំង​ឲ្យមានការ​ដោះលែង​បុរស​២៣​នាក់​ ដែល​ត្រូវបានចាប់ខ្លួន​កាលពីដើមខែ​នេះ​ អំឡុ​ង​សកម្មភាពតវ៉ារយ:ពេល​ពីរ​ថ្ងៃ​ នៅ​ខាង​​​ក្រៅ​​​រោងចក្រ​នានា​នៅក្នុង​រាជធានីភ្នំ​ពេ​ញ​។​

ក៏ប៉ុន្តែ ​ជំនួស​មុខ​ឲ្យ​អ្នកចូលរួម​ជាច្រើ​ន​ពាន់​នាក់​តាមការរំពឹង​ទុក​ ក្រុមអ្នកតវ៉ា​មា​ន​គ្នា​ប្រហែល​៤០​នាក់​ប៉ុណ្ណោះ​ ដែល​ភាគច្រើន​មើល​ទៅ​ដូច​ជា​អ្នក​រត់​ម៉ូតូឌុប​ និ​ង​សកម្ម​ជន​ប្រឆាំងការ​បណ្តេញ​ចេញ​ ដែ​ល​មក​ពី​សហ​​​គមន៍​បឹងកក។ អ្នកតវ៉ាទាំង​ត្រូវ​បានកម្លាំង​សន្តិសុខ​ខណ្ឌ​ដូន​ពេញប្រ​ហែល​៥០​នាក់ ​ហាម​​​​មិន​ឲ្យ​ចូល​ទៅក្នុង​ទីលាន​​ ដែល​ជា​កន្លែង​ហាម​ឃាត់​ តាំងពី​ថ្ងៃទី៤ខែ​​មករា​ នៅពេល​​​មានបម្រាម​មិន​ឲ្យ​ធ្វើ​បាតុ​កម្ម​។ នគរបាល​​​​​​បង្ក្រាប​​​កុបកម្ម​​​​​​ពីរបី​​​រយ​​​នាក់​​​​​​បាន​​​ឈរ​​​​​​​​​ប្រចាំ​​​ការ​​​នៅ​​​ខាង​​​ក្រោយ​​​ពួក​​​​​​គេ​​​​​​។

រយៈ​​​ពេល​​​ជាង​​​មួយ​​​ម៉ោង​​​​​​ បន្ទាប់ពី​​​​​​មាន​​​ស្ថានភាព​​​តាន​​​តឹង​​​​​​ក៏​​​ប៉ុន្តែ​​​​​មាន​​​សន្ដិភាព​​​​​​ទាំង​​​សង​​​ខាង​​​​​​រវាង​​​កម្លាំង​​​សន្ដិសុខ​​​ និង​​​​​​​​​ក្រុម​​​អ្នក​​​តវ៉ា​​​ទាំង​​​នោះ​​​ អំពើ​​​ហិង្សា​​​ក៏​​​បាន​​​ចាប់​​​ផ្ដើម​​​កើត​​​ឡើង​​​​​​ដោយ​​​មាន​​​​​​ការ​​​​​​រុញ​​​ច្រាន​​​​​​​​​នៅ​​​ជួរ​​​មុខ​​​​​​ ហើយ​​​​​​​​​សកម្មភាព​​​បែប​​​នេះ​​​បា​​​ន​​​​​​រាល​​​ដាល​​​​​​កាន់​​​តែ​​​ខ្លាំងឡើង​​​ៗ​​​។

កម្លាំង​​​សន្ដិសុខ​​​​​​មាន​​​​​​របាំង​​​​​​ដែក​​​ការពារ​​​មួយ​​​​​​​​​ជួរ​​​​​​​​​ ដែល​​​បាន​​​ឈរ​​​​​​​​​នៅ​​​​​​​​​កណ្ដាល​​​រវាង​​​​​​​​​គូបដិបក្ខ​​​ទាំង​​​ពីរ​​​បាន​​​រង​​​​​​នូវ​​​ការ​​​គប់​​​មក​​​លើ​​​​​​ហើយ​​​ភាគី​​​ទាំង​​​ពីរ​​​​​​ក៏​​​បាន​​​​​​វាយ​​​ប្រហារ​​​គ្នា​​​ទៅ​​​​​​វិញ​​​ទៅ​​​មក​​​។​​​ អ្វី​​​ៗ​​​គ្រប់​​​យ៉ាង​​​មាន​​​​​​តាំង​​​ពី​​​​​​មួក​​​ការពារ​​​សុវត្ថិ​​​ភាព​​​ កំប៉ុង​​​ ដបទឹក​​​ និង​​​​​​ស្បែក​​​ជើង​​​​​​ត្រូវ​​​បាន​​​​​​គប់​​​​​​ដាក់​​​គ្នា​​​ទៅ​​​​​​វិញ​​​ទៅ​​​មក​​​។​​​ មនុស្ស​​​មួយ​​​ចំនួន​​​តូច​​​​​​បាន​​​ហូរ​​​ឈាម​​​​​​ជាំ​​​ និង​​​​​​ត្រូវ​​​គេ​​​ជាន់​​​។

​​​ក្នុង​​​ស្ថានភាព​​​ច្រឡំ​​​បល់​​​នេះ បុរស​​​ម្នាក់​​​ក្នុង​​​ចំណោម​​​បាតុករ​​​​​​​​​ត្រូវ​​​បាន​​​គេ​​​ឃើញ​​​គប់​​​​​​​​​សា្នប់​​​ដៃ​​​​​​ទៅ​​​លើ​​​​​​កម្លាំង​​​សន្ដិសុខ​​​​​​ដែល​​​មាន​​​មួក​​​​​​ការពារ​​​។​​​

បុរស​​​វ័យ​​​ក្មេង​​​ម្នាក់​​​​​​ទៀត​​​​​​ត្រូវ​​​បាន​​​គេ​​​ឃើញ​​​គប់​​​​​​ដុំ​​​ថ្ម​​​មាន​​​ទំហំ​​​​​​ប៉ុន​​​ឥដ្ឋ​​​ក្នុង​​​​​​ទិស​​​​​​ដៅ​​​​​​របស់​​​​​​កម្លាំង​​​សន្ដិសុខ​​​ ក៏​​​ប៉ុន្តែ​​​​​​គាត់​​​មិន​​​បាន​​​វាយ​​​​​​កម្លាំ​​​ង​​​សន្ដិសុខ​​​ទាំង​​​នោះ​​​​​​ទេ​​​​​​។ ភ្លាមៗ​​​នោះ​​​​​​​​​បុរស​​​នោះ​​​ក៏​​​ត្រូវ​​​បាន​​​ក្រុម​​​អ្នក​​​តវ៉ា​​​ដេញ​​​វាយ​​​​​​ដោយ​​​សង្ស័យ​​​ថា គាត់​​​​​​ជា​​​អ្នក​​​បង្ក​​​ហេតុ​​​ ហើយ​​​​​​ក៏​​​បាន​​​វាយ​​​ក្បាល​​​​​​គាត់​​​​​​រហូត​​​ដល់​​​ហូរ​​​ឈាម​​​។​​​ បុគ្គលិក​​​សិទ្ធិមនុស្ស​​​ និង​​​ព្រះ​​​សង្ឃ​​​នៅ​​​​​​កន្លែង​​​កើត​​​​​​ហេតុ​​​​​​ក៏​​​បាន​​​ព័ទ្ធ​​​ជុំ​​​វិញ​​​បុរស​​​រូប​​​នោះ​​​ភ្លាមៗ ព្រម​​​ទាំង​​​បុរស​​​ម្នាក់​​​ទៀត​​​​​​ដែល​​​ក្រុម​​​អ្នក​​​តវ៉ា​​​បាន​​​វាយ​​​​​​ ហើយ​​​ក៏​​​បាន​​​នាំបុរស​​​ទាំង​​​ពីរ​​​នាក់​​​នោះ​​​​​​ជិះរ៉ឺម៉ក​​​ម៉ូតូនាំ​​​ចេញ​​​ទៅ​​​​​​ដោយ​​​មាន​​​ការ​​ឡោម​​​ព័ទ្ធ​​​របស់​​​ព្រះ​​​សង្ឃ​​​មួយ​​​ចំនួន​​​។ក្រោយ​​​មក​​​ទៀត​​​​​​ក្រុម​​​អ្នកតវ៉ា​​​បាន​​​​​​ដេញ​​​វាយ​​​អ្នក​​​ផ្សេង​​​​​​​​​ទៀត​​​ ក៏​​​ប៉ុន្តែ​​​​​​បន្ទាប់ពី​​​វាយ​​​​​​​​​​​​ហើយ​​​​​​ក៏​​​ផ្អាក​​​​​​ការ​​​វាយ​​​ ហើយ​​​ក៏​​​បាន​​​​​​​​​អនុញ្ញាត​​​ឲ្យ​​​បុរស​​​រូប​​​នោះ​​​ចេញទៅ​​​ នៅពេល​​​បុរ​​​ស​​​រូប​​​នោះ​​​បង្ហាញ​​​អត្តសញ្ញាណ​​​ប័ណ្ណ​​​។

លោក​​​ កុល សុផាត​​​ អធិការ​​​​​​នគរបាល​​​សង្កាត់​​​បឹង​​​កេង​​​កង​​​១ បាន​​​បញ្ជាក់ថា បុរស​​​ទាំង​​​ពីរ​​​​​​ដែល​​​ជិះ​​​​​​រ៉ឺម៉ក​​​ម៉ូតូ​​​​​​នោះ​​​​​​ត្រូវ​​​បាន​​​ដឹក​​​​​​យក​​​ទៅ​​​​​​ប៉ុស្ដិ៍​​​នគរបាល​​​បឹង​​​កេង​​​កង​​​១។លោក​​​បាន​​​មាន​​​ប្រសាសន៍​​​​​ថា “យើង​​​បាន​​​បញ្ជូន​​​ពួក​​​គេ​​​​​​ទៅ​​​ស្នង​​​ការ​​​​​​នគរ​​​បាល​​​​​​រាជធានី​​​។ យើង​​​មិន​​​អាច​​​​​​ទុក​​​ពួក​​​​​​គេ​​​នៅ​​​ទីនេះ​​​យូរ​​​បាន​​​ទេ​​​”។ លោក​​​បាន​​​បង្វែរ​​សំណួរ​​​​​​ផ្សេង​​​ៗ​​​ទៀ​​​ត​​​ទៅ​​​​​​​​​ស្នង​​​ការ​​​នគរ​​​បាល​​​​​​រាជធានី​​​ដែល​​​មិន​​​អាច​​​ទាក់ទង​​​​​​​​​ធ្វើ​​​សេចក្ដី​​​អត្ថាធិប្បាយ​​​បាន​​​​​​។

លោក​​​ ចន​​​ ចាន់​​​រ៉េន​​​ មន្ត្រី​​​​​​គណៈកម្មាធិការ​​​​​​ដើម្បី​​​​​​ការបោះឆ្នោត​​​​​​ដោយ​​​សេរី​​​និង​​​យុត្តិ​​​ធម៌​​​នៅ​​​កម្ពុជា​​​​​​ ដែល​​​បាន​​​​​​ទៅ​​​អង្កេត​​​​​​សកម្មភាព​​​បាតុកម្មនោះ​​​​​​បាន​​​ឲ្យ​​​ដឹង​​​ថា លោក​​​​​​ត្រូវ​​​កម្លាំង​​​សន្ដិសុខ​​​គប់​​​​​​ដុំ​​​ថ្ម​​​ចំ​​​កែង​​​​​​ដៃ​​​។​​​ លោក​​​បាន​​​បន្ទោស​​​កម្លាំង​​​​​​សន្ដិសុខ​​​ទាំង​​​នោះ​​​​​​ថា បាន​​​​​​ចាប់​​​ផ្ដើម​​​​​​នាំ​​​ឲ្យ​​​មាន​​​ការ​​​​​​ប៉ះទង្គិច​​​គ្នា​​​នេះ​​​។លោក​​​បាន​​​មានប្រសាសន៍​​​ថា “ប្រតិបត្តិ​​​ការ​​​បង្ក្រាប​​​របស់​​​ពួក​​​គេ​​​ទៅ​​​លើ​​​មនុស្ស​​​ទាំង​​​នោះ​​​មើល​​​ទៅ​​​ឃោរឃៅ​​​ណាស់ ពីព្រោះ​​​ពួក​​​គេ [បាតុករ​​​] មិន​​​មាន​​​អ្វី​​​នៅ​​​ក្នុង​​​ដៃ​​​ទេ​​​ ហើយ​​​កម្លាំង​​​សន្ដិសុខ​​បាន​​​​ប្រើកម្លាំង​​​។ មនុស្សបាន​​​ចាប់​​​​​​បុរសទាំង​​​ពីរ​​​ ពីព្រោះ​​​ពួក​​​គេ​​​សង្ស័យ​​​ថា បុរស​​​ទាំង​​​ពីរ​​​នាក់​​​​​​នោះ​​​បាន​​​ប្រើ​​​ចំពាម​​​ និង​​​​​​វាយ​​​​​​អ្នក​​​តវ៉ា​​​”។

លោ​​​ក​​​ឋស្រី​​​ ស៊ុង​​​ ស្រីលាភ សកម្មជន​​​​​​ប្រឆាំង​​​​​​ការបណ្ដេញ​​​ចេ​​​ញ​​​​​​ដ៏​​​ល្បី​​​ឈ្មោះ​​​មួយ​​​រូប​​​​​​ដែល​​​បាន​​​ចូល​​​រួម​​​ក្នុង​​​សកម្មភាព​​​តវ៉ា​​​នេះ​​​ បុរសដែល​​​ត្រូវ​​​បាន​​​ឃុំ​​​ខ្លួន​​​នោះ​​​​​​​​មាន​​​ការ​​​​ពាក់​​​ព័ន្ធ​​​​​​ក្នុង​​​បាត​​​ដៃ​​​ទី​​​៣​​​របស់​​​​​​រដ្ឋាភិបាល​​​។លោក​​​ស្រីបាន​​​មានប្រសាសន៍​​​ថា “ពួក​​​គេ​​​បាន​​​ប្រើ​​​បាតដៃ​​​ទី៣ ដើម្បី​​​បង្ក​​​អំពើ​​​ហិង្សា​​​ ដោយ​​​សារ​​​តែ​​​​​​ប្រជាជន​​​​​​កំពុង​​​​​​តវ៉ា​​​ដោយ​​​​​​សន្ដិ​​​វិធី​​​។​​​ យើង​​​ត្រូវ​​​ចាប់​​​ពួក​​​គេ​​​ ពីព្រោះ​​​ពួក​​​គេ​​​បាន​​​ប្រើ​​​ចំពាម​​​ និង​​​ស្នាប់​​​ដៃ​​​។ នេះ​​​គឺ​​​ជា​​​​​​បាត​​​ដៃ​​​ទី៣របស់​​​រដ្ឋាភិបាល​​​”។

លោក​​​ យឹម សុវណ្ណ តំណាង​​​រាស្ត្រ​​​ជាប់​​​ឆ្នោត​​​​​​មក​​​ពី​​​គណបក្ស​​​សង្គ្រោះជាតិ​​​ដែល​​​បាន​​​ទៅ​​​អង្កេត​​​សកម្មភាព​​​តវ៉ា​​​នេះ​​​ដែរ​​​ ក៏​​​ត្រូវ​​​របួស​​​​​​ជើង​​​ផង​​​ដែរ​​​​​​។​​​ លោក​​​បាន​​​ឲ្យ​​​ដឹង​​​ថា លោក​​​ត្រូវ​​​ដុំថ្ម ដែល​​​ចេញពី​​​ទិស​​​ដៅ​​​របស់​​​កម្លាំង​​​សន្ដិសុខ​​​។​​​

លោក​​​​​​ ចាន់​​​ សុវេត អ្នក​​​ស៊ើប​​​អង្កេត​​​ជាន់​​​ខ្ពស់​​​​​​​​​សមាគមសិទ្ធិ​​​មនុស្ស​​​អាដហុក​​​ ដែល​​​​​​មាន​​​វត្តមាន​​​​​​នៅ​​​កន្លែង​​​​​​កើត​​​ហេតុ​​​នោះ​​​ដែរ​​​​​​​​​បាន​​​ឲ្យ​​​ដឹង​​​ថា មនុស្ស​​​យ៉ាង​​​តិច​​​១០​​​នាក់​​​បាន​​​រង​​​របួស​​​ ក្នុង​​​ថ្ងៃ​​​មាន​​​ការ​ប៉ះទង្គិច​​​គ្នា​​​នោះ​​​​​​ ក្នុង​​​នោះ​​​ក៏​​​មាន​​​​​​អ្នក​​​សារព័ត៌មាន​​​​​​ពីរ​​​នាក់​​​ផង​​​ដែរ​​​។

កម្លាំ​​​ង​​​សន្ដិសុខ​​​​​​បាន​​​រង​​​​​​សំឡេង​​​​​​រិះគន់​​​​​​​​​យ៉ាង​​​ខ្លាំង​​​​​​ពីសំណាក់​​​អ្នក​​​តវ៉ា​​​និង​​​អង្គការ​​​សិទ្ធិ​​​មនុស្ស​​​ ដែល​​​បាន​​​លើកឡើ​​​ងថា កម្លាំង​​​សន្ដិ​​​សុខ​​​​​​មិន​​​មាន​​​អំណាច​​​​​​ស្រប​​​ច្បាប់​​​ក្នុង​​​ការ​​​ប្រើ​​​អំពើហិង្សា​​​ ឬ​​​ក៏​​​ឃុំ​​​ខ្លួន​​​ប្រជាជន​​​ទេ​​​។

លោក​​​ អំ សំអាត​​​ អ្នកគ្រប់គ្រង​​​បច្ចេក​​​ទេស​​​​​​នៃ​​​អង្គការ​​​​សិទ្ធិ​​​មនុស្ស​​​ លីកា​​​ដូ​​​ ដែល​​​​​​បាន​​​​​​មាន​​​វត្តមាន​​​អំឡុង​​​​​​ការ​ប៉ះទង្គិ​​​ចគ្នា​​​នោះ​​​​​ដែរ​​​​​​បាន​​​មាន​​​ប្រសាសន៍​​​ថា “ការ​​​ប្រើ​​​កម្លាំង​​​សន្ដិសុខ​​​ក្នុង​​​ការ​​​បង្ក្រាប​​​​​​ប្រជាជន​​​ គឺ​​​ជា​​​ទង្វើ​​​ខុស​​​ច្បាប់​​​ក្នុង​​​ប្រទេស​​​យើង​​​។ ពួក​​​គេ​​​មិន​​​អនុវត្ត​​​ច្បាប់​​​​​​ឲ្យ​​​បាន​​​ត្រឹម​​​ត្រូវ​​​ទេ ពីព្រោះ​​​ពួក​​​គេ​​​មិន​​​បាន​​​ទទួល​​​​​​កា​​​របណ្ដុះបណ្ដាល​​ទាក់ទង​​​​​​​​​​នឹង​​​​ការ​​​ដោះស្រាយ​​​​​​បញ្ហា​​​ជាមួយ​​​បាតុករ​​​ទេ​​”។

សាលា​​​រាជធានី​​​បាន​​​ការពារ​​​​​​ការ​​​ប្រើ​​​កម្លាំង​​​សន្ដិសុខ​​​ ដោយ​​​លើក​​ឡើង​​​ថា ការ​​​​​​ធ្វើ​​​បែប​​​នេះ​​​ជា​​​វិធាន​​​ការ​​​ចាំ​​​បាច់​​​ក្នុង​​​ការ​​​​​​គ្រប់​​​គ្រង​​​អ្នក​​​តវ៉ា​​​មិន​​​ពិត​​​ដែល​​​ប្រើ​​​អំពើ​​​ហិង្សា​​​។ លោក​​​ ឡុង​​​ ឌីម៉ង់ អ្នក​​​នាំពាក្យ​​​សាលា​​​រាជ​​​ធានីភ្នំពេញ​​​បាន​​​​​​បន្ទោស​​​​​​បាតុករ​​​​​​ថា បាន​​​បង្ក​​​ឲ្យ​​​មាន​​​​​​ការ​​​ប៉ះទង្គិចគ្នា​​​នេះ​​​។​​​ លោក​​​បានមានប្រសាសន៍​​​ថា “បាតុករ​​​​​​បាន​​​គប់​​​ដុំ​​​ថ្ម​​​ទៅ​​​លើ​​​កម្លាំង​​​សន្ដិសុខ​​​មុន​​​ អ៊ីចឹង​​​​​​ហើយ​​​​​​បាន​​​ជា​​​​​​កម្លាំង​​​សន្ដិសុខ​​​ត្រូវ​​​ចាត់​​​វិធាន​​​ការ​​​ការពារ​​​ខ្លួន​​​។​​​ ហើយ​​​បាតុករ​​​​​​មិន​​​អនុវត្ត​​​តាមសេចក្ដី​​​ប្រកា​​​ស​​​​​​របស់​​​​​​ក្រសួង​​​មហា​​​ផ្ទៃ​​​ ឬ​​​ក៏​​​សាលា​​​រាជធានីភ្នំពេញ​​​ទេ​​​។

ទាំង​​​សាលា​​​រាជធានីភ្នំពេញ​​​ ទាំង​​​ក្រសួង​​​មហាផ្ទៃ​​​បាន​​​បដិសេធ​​​សំណើ​​​របស់​​​​​​សហជីព​​​​​​​​​ដែល​​​សុំ​​​ធ្វើ​​​បាតុកម្ម​​​នៅ​​​​​​ទីលាន​​​ប្រជាធិប​​​តេយ្យ​​​ ដែល​​​សាលា​​​រាជធានី បាន​​​បើក​​​ក្នុង​​​ឆ្នាំ​​​២០១០​​​សម្រាប់​​​​​​ព្រឹត្តិការណ៍​​​​​​បែប​​​នេះ​​​៕ សុធា

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស