យោងតាមសេចក្តីប្រកាសមួយដែលចេញផ្សាយកាលពីថ្ងៃសុក្រដោយអង្គភាពព័ត៌មាននិងប្រតិកម្មរហ័សនៃទីស្តីការគណៈរដ្ឋមន្ត្រីបានឲ្យដឹងថា លោក ប្រាជ្ញ ច័ន្ទ អភិបាល ខេត្តបាត់ដំបងបច្ចុប្បន្នត្រូវបានតែងតាំងជាអភិបាលខេត្តត្បូងឃ្មុំដែលទើបបង្កើតថ្មី។
សេចក្តីប្រកាសនេះឲ្យដឹងថា “ រដ្ឋាភិបាលកម្ពុជាបានទូលថ្វាយព្រះមហាក្សត្រនូវសំណើតែងតាំងឯកឧត្តម ប្រាជ្ញ ច័ន្ទ ដែលជាអភិបាលខេត្តបាត់ដំបងបច្ចុប្បន្ន ជាអភិបាលខេត្តត្បូងឃ្មុំ”។
សេចក្តីប្រកាសនេះលើកឡើតទៀតថា លោក ចាន់ សុផល ដែលបច្ចុប្បន្ន ជាប្រធានក្រុមប្រឹក្សាខេត្តសៀមរាបនោះ នឹងឡើងកាន់តួនាទីជំនួសលោក ប្រាជ្ញ ច័ន្ទ ជាអភិបាលខេត្តបាត់ដំបង។
ព្រះមហាក្សត្រ នរោត្តម សីហមុនី បានអនុម័តយល់ព្រមឲ្យបង្កើតខេត្តត្បូងឃ្មុំនេះកាលពីខែធ្នូ។ ខេត្តថ្មីនេះនឹងមានស្រុកចំនួនប្រាំមួយ និងក្រុងមួយដែលស្ថិតនៅភាគខាងកើតទន្លេមេគង្គក្នុងខេត្តកំពង់ចាម។
លោក ប្រាជ្ញ ច័ន្ទ ដែលជាសមាជិកគណបក្សប្រជាជនកម្ពុជាបានមានប្រសាសន៍កាលពីម្សិលមិញថា លោកមិនអាចធ្វើអត្ថាធិប្បាយ អំពីផែនការរបស់លោកសម្រាប់ខេត្តនេះនៅឡើយទេ លុះណាតែលោកចូលកាន់តួនាទីនេះនៅចុងឆ្នាំនេះសិន។លោកបានមានប្រសាសន៍ថា “ ខ្ញុំនឹងចូលកាន់ត្ទនាទីរបស់ខ្ញុំ បន្ទាប់ពីការបោះឆ្នោត ជ្រើសរើសក្រុមប្រឹក្សាស្រុកខណ្ឌ និងក្រុមប្រឹក្សាឃុំសង្កាត់ដែលគ្រោងធ្វើនៅខែឧសភា និងមិថុនា។
ខេត្តថ្មីនេះនឹងមានតែប្រាំស្រុកប៉ុណ្ណោះនៅក្នុងខេត្តកំពង់ចាម ជាស្រុកដែលគណបក្សប្រជាជនកម្ពុជាទទួលបានសំឡេងឆ្នោតច្រើននៅការបោះឆ្នោតកាលពីខែកក្កដា ដោយបង្កឲ្យមានការចោទប្រកាន់ថា ដើម្បីបំបែកសំឡេងឆ្នោត។
រដ្ឋាភិបាលបានលើកឡើងថា ការបំបែកខេត្តត្បូងឃ្មុំចេញពីខេត្តកំពង់ចាមនេះគឺដើម្បីគ្រប់គ្រងឲ្យបានដិតដល់ដោយសារខេត្តនេះធំពេក ហើយដើម្បីផ្តល់សេវាសាធារណៈ ឲ្យកាន់តែប្រសើរជាងមុន៕ សារុន