កាលពីម្សិលមិញ នាយកដ្ឋានព្រហ្មទណ្ឌក្រសួងមហាផ្ទៃ បានសាកសួរតំណាងសហជីពកម្ពុជាពីររូបជុំវិញការអះអាងដែលថា ពួកគេបានញុះញង់ឲ្យមានការប្រើអំពើហិង្សាអំឡុងការតវ៉ានៅរោងចក្រកាត់ដេរមួយក្នុងខេត្តកណ្ដាល កាលពីចុងខែធ្នូ។
លោក ជែក លី អគ្គនាយករោងចក្រ Tainan Enterprises (Cambodia) Co. Ltd បានដាក់ពាក្យបណ្ដឹងប្ដឹងសមាជិកសម្ព័ន្ធសហជីពកម្ពុជាប្រាំមួយរូបបន្ទាប់ពីកម្មករបានធ្វើការតវ៉ាកាលពីថ្ងៃទី២៦ និង៣១ ខែធ្នូ នៅរោងចក្ររបស់លោកស្ថិតក្នុងស្រុកអង្គស្នួល ទាមទារដំឡើងប្រាក់ខែគោលដល់១៦០ដុល្លារ។
នៅក្នុងលិខិតចុះថ្ងៃព្រហស្បតិ៍ លោក អ៊ិន បូរ៉ា ប្រធាននាយកដ្ឋានព្រហ្មទណ្ឌក្រសួងមហាផ្ទៃ បានកោះហៅចុងចោទទាំងបីនាក់ឈ្មោះ ខឹម ណាត ឈឹម និមល និង ង៉ែត មុនីរ័ត្ន មកសាកសួរកាលពីម្សិលមិញ។
លោក ខឹម ណាត ប្រធានសាខាសម្ព័ន្ធសហជីពកម្ពុជានៅរោងចក្រ Tainan និងអ្នកស្រី មុនីរ័ត្ន តំណាងសម្ព័ន្ធសហជីពកម្ពុជា បានបង្ហាញខ្លួនកាលពីម្សិលមិញ ប៉ុន្តែការសាកសួរលោក និមល ត្រូវបានពន្យារពេលរហូតដល់ថ្ងៃពុធ ដោយសារលោកមានជំងឺ។ លោក ខឹម ណាត បានមានប្រសាសន៍ថា “ នគរបាលបានប្រាប់ខ្ញុំថា ក្រុមហ៊ុនបានចោទខ្ញុំថា បានជេរប្រមាថថៅកែរោងចក្រនិងបង្កភាពចលាចល ហើយបានទាមទារសំណងជាប្រាក់ចំនួន១០០.០០០ដុល្លារ”។
លោក ខឹម ណាត បានមានប្រសាសន៍ថា លោកមិនព្រមបង់ប្រាក់ឲ្យក្រុមហ៊ុននេះទេ ព្រោះលោកមិនបានធ្វើខុសឡើយ។ លោកបានបន្ថែមថា នគរបាលបានបញ្ជាខ្ញុំឲ្យផ្ដិតមេដៃលើរបាយការណ៍មួយដើម្បីបញ្ជាក់ថា ខ្ញុំនឹងមកចូលរួមការសាកសួរលើកទី២ម្ដងទៀតនៅពេលក្រោយ។
អ្នកស្រី មុនីរ័ត្ន ក៏បានបដិសេធការចោទប្រកាន់នេះផងដែរ។ អ្នកស្រីបាននិយាយថា “ ខ្ញុំមិនខ្លាចការចាប់ខ្លួន អំឡុងការសាកសួរទេ ពីព្រោះខ្ញុំមិនបានធ្វើអ្វីខុសឡើយ”។
អ្នកស្រី យ៉ាង សុភ័ណ្ឌ ប្រធានសម្ព័ន្ធសហជីពកម្ពុជា បានរិះគន់ការប្រព្រឹត្តមកលើសមាជិកសហជីព។ អ្នកស្រីបានមានប្រសាសន៍ថា “ ខ្ញុំគិតថា វាជាការបំភិតបំភ័យ និងបំបាក់ស្មារតីកម្មករ ដែលចេញធ្វើកូដកម្មទាមទារដំឡើងប្រាក់ខែគោលថ្មី”។
លោក កែន លូ អគ្គលេខាធិការសមាគមរោងចក្រកាត់ដេរនៅកម្ពុជាមានប្រសាសន៍ថា ការសាកសួរកាលពីម្សិលមិញនេះគ្រាន់តែជាការចាប់ផ្ដើមការស៊ើបអង្កេតលើការប្រើអំពើហិង្សានៅតាមរោងចក្រកាត់ដេរ ប៉ុណ្ណោះ ហើយមានពាក្យបណ្ដឹងរាប់រយទៀត។លោកបានមានប្រសាសន៍ថា នៅសមាគមរោងចក្រកាត់ដេរនៅកម្ពុជា យើងតំណាងឲ្យសមាជិករបស់យើងក្នុងការនាំសហជីពឡើងតុលាការ…។ យើងនឹងនាំសហជីពជាច្រើនរូបទៀតមកសាកសួរនៅពេលឆាប់ៗនេះ”។លោកបន្ថែមថា យើងបានដោះស្រាយបណ្ដឹងប្រហែល៣០រួចហើយ។ លោកបានមានប្រសាសន៍ថា “ ខ្ញុំគ្មានបញ្ហាជាមួយសហជីពដែលរៀបចំធ្វើកូដកម្មឬបាតុកម្មឡើយ ប៉ុន្តែខ្ញុំមានបញ្ហាពាក់ព័ន្ធការពិតដែលថា ពួកគេបានរំលោភច្បាប់”។ លោកបានបន្ថែមថា “ ខ្ញុំមិនគិតថា ភាពចលាចលនេះត្រូវបានរៀបចំទុកជាមុនទេ”។លោក និមល នឹងបង្ហាញខ្លួនសម្រាប់ការសាកសួរនៅថ្ងៃពុធជាមួយតំណាងសម្ព័ន្ធសហជីពកម្ពុជាបីរូប គឺ កុល គឿន អ៊ុក ខេន និង សែម កុសល៕ សារុន
(រាយការណ៍បន្ថែមដោយ Alice Cuddy)