31 C
Phnom Penh

អាជ្ញា​ធរ​ប្រើ​ដំបង​ឆក់​ឆក់​អ្នក​​​តវ៉ា​អហិង្សា​នៅ​ក្រសួង​ព័ត៌មាន

ដោយ ឌឹ ខេមបូឌា ដេលី

បទវិភាគ

កង​រាជ​អាវុធ​ហត្ថ​​បាន​ដេញ​វាយ​បាតុករ​អហិង្សា​​យ៉ាង​ឃោរ​ឃៅ​ដែល​បាន​ប្រមូល​ផ្តុំ​គ្នា​នៅ​កណ្តាល​ទីក្រុ​ងភ្នំ​ពេ​ញកាល​ពីម្សិល​មិញ​​ ដើម្បី​ទាម​ទារ​ឲ្យ​រដ្ឋា​ភិ​បាល​អនុញ្ញាត​ឲ្យ​វិទ្យុ​សម្បុក​ឃ្មុំ​បន្ត​​​​កម្លាំង​ផ្សាយ​​ និង​ផ្តល់​​អាជ្ញា​ប័ណ្ណ​ទូរទស្សន៍​ដល់​លោក ម៉ម សូណង់​ដូ ​ម្ចាស់​ស្ថានីយ​វិទ្យុ​​ឯករាជ្យ​​​ដែល​​រិះគន់​រដ្ឋា​ភិ​​​បាល​ជាញឹក​ញាប់​។

នគរបាល​បាន​គប់​គ្រាប់​បែក​ផ្សែង​ទៅ​លើ​ផ្លូវ​និង​ប្រើ​ដំបង​ឆក់​ដើម្បី​ឆក់​ និងវាយ​​ក្រុម​​អ្នក​តវ៉ា​ដែល​មិន​​តដៃ​​នៅខាង​ក្រៅ​ក្រសួង​​ព័ត៌មាន​នៅ​តាម​មហាវិថី​ព្រះ​មុនី​វង្ស​។

អង្គការ​សិទ្ធិ​មនុស្ស​បាន​ឲ្យដឹង​ថា យ៉ាង​ហោច​ណាស់​មាន​មនុស្សរង​របួ​ស​១០នាក់​និង​បាន​​ថ្កោល​ទោ​សការ​បង្ក្រាបរបស់​កង​រាជ​អាវុធ​ហត្ថ​​​។ការ​បង្ក្រាប​ដោយ​​ហិង្សា​​​​កាល​ពី​ម្សិល​មិញ​នេះ​គឺ​ជា​ការ​បង្ក្រាប​ដោយ​ឃោរ​ឃៅ​ទៅ​លើ​ការ​តវ៉ា​អហិង្សា​​ចុង​ក្រោយ​​ពី​សំណាក់​​អាជ្ញាធរ​នៅក្នុ​ងទីក្រុង​ភ្នំពេញ​កាល​ពី​​​ម្សិល​​​មិញ​​ ចាប់​តាំង​ពី​រដ្ឋាភិ បាលកាន់​​​អំណាច​​​ដោយ​​​ ​​​គណបក្ស​​​ប្រជា​​​ជន​​​កម្ពុជាបាន​ព្យួ​ររដ្ឋ​​​ធម្មនុញ្ញ​​​​ស្តី​ពី​សិទ្ធិ​ជួប​ជុំ​​កាល​ពីដើម​ខែ​នេះ​​  និង​បាន​ដាក់​ បម្រាម​​មិន​ឲ្យ​មាន​ការ​ជួប​ជុំ​គ្នា​ទាំង​អស់​។

ថ្វី​បើ​មាន​ការ​ដាក់​​បម្រាម​នេះ​​ក៏​ដោយ​ ក៏​លោក ម៉ម សូណង់​ដូ​ បាន​អំពាវ​ឲ្យមាន​ការ​​ជួប​ជុំគ្នា​កាល​ពីម្សិលមិញ ដើម្បីទាម​ទារ​ឲ្យ​ក្រសួង​ព័ត៌មាន​ផ្តល់​អាជ្ញាប័ណ្ណ​ទូរ​ទស្ស​ន៍ដល់​លោក​ និង​អនុញ្ញាត​ឲ្យ​វិទ្យុ​សម្បុក​ឃ្មុំ​បន្ត​​​​កម្លាំង​​ផ្សាយ ដើម្បី​​ឲ្យ​វិទ្យុ​នេះ​អាច​​ផ្សាយ​ទៅដល់​ខេត្ត​នានា​។

វិទ្យុ​សម្បុក​ឃ្មុំ​  គឺជា​វិទ្យុ​មួយនៅ​​​​ក្នុង​ចំណោម​វិទ្យុ​ចំនួន​ពីរ​បីនៅ​ក្នុង​​​ប្រទេស​​​កម្ពុជា​ដែល​បាន​ផ្សព្វ​​​ផ្សាយ​ព័ត៌​មាន ​និង​បទ​​​អត្ថា​​​ធិប្បាយ​រិះគន់​រដ្ឋាភិបាល​ ហើយ​នៅពេល​ថ្មី​ៗនេះ​បាន​​បង្ហាញ​ពី​ការ​​​គាំទ្រ​របស់​ខ្លួន​ចំពោះ​​គណបក្ស​ប្រឆាំង​។

ដោយ​ធ្វើ​តាម​ការ​អំពាវ​នាយ​របស់​លោក​ ម៉ម សូណង់​ដូ ឲ្យ​ហែក្បួន​ទៅកាន់​ក្រសួង​ព័ត៌​មាន​ អ្នក​គាំទ្រ​រាប់​រយ​នាក់​បាន​ប្រមូល​ផ្តុំ​គ្នា​នៅ​មហា​វិថី​ព្រះ​នរោ​ត្តម​ត្រង់​ស្ពាននាគ​រង់​ចាំ​ការ​មក​ដល់​របស់​លោក ម៉ម សូណង់​ដូ ហើយ​លោក ម៉ម សូណង់​ដូ បាន​ដឹកនាំ​ការ​ហែក្បួន​ពីទីនោះ​ទៅកាន់​ក្រសួង​ព័ត៌មាន​ដែល​នៅមិន​ឆ្ងាយ​ពីទីនោះ​ ដោយ​ដើរ​គេច​ពីវត្ត​មាន​​របស់​កង​កម្លាំង​សន្តិ​សុខ​បន្តិច​បន្តួច​ដែល​បាន​ប៉ុន​ប៉ងមិន​បាន​សម្រេច​ដើម្បី​​បិទ​ផ្លូវ​មិន​ឲ្យ​ហែក្បួន​នៅ​ជិត​វត្ត​ភ្នំ​​។
ពេល​ទៅដល់​ខ្លោង​ទ្វារ​ក្រសួង​ព័ត៌​មាន​ដែល​​បិទជិត​នោះ ក្រុម​អ្នក​តវ៉ា​បាន​​កាន់​កាប់​មហាវិថី​ព្រះ​មុនីវង្ស​ដើម្បី​ជំរុញ​​ការ​ទាម​ទារ​របស់ខ្លួន​​សុំ​ប្រើ​ប្រាស់​​រលក​ធាតុ​អាកាស​នៅ​​​ក្នុង​ប្រទេស​ឲ្យបាន​សម​រម្យ ហើយ​បាន​​បិទ​ផ្លូវ​មិន​ឲ្យធ្វើ​ចរាចរពីទិស​ខាង​ជើង​ និង​ទិសខា​ងត្បូង​។
បន្ទាប់​មក​​កង​រាជ​អាវុធ​ហត្ថ​​រាប់​រយ​នាក់​បាន​ចាត់​វិធាន​ការ។

បន្ទាប់​ពី​កង​រាជ​អាវុធ​ហត្ថ​​មួយក្រុម​តូច​បាន​​តម្រង់​ជួរ​ជាលើក​ដំបូង​​​នៅ​លើ​ផ្លូវ​នោះ​មាន​កង​រាជ​អាវុធ​ហត្ថ​​ជាច្រើន​រយ​នាក់​​ទៀត​ចេញ​មក​ពី​បរិវេណ​សាលា​រាជធានី​ដែល​នៅ​ក្បែ​រ​នោះ​ភ្លាម​ៗ​ ​ហើយ​បាន​ឈរ​តម្រង់​ជួរ​ជាច្រើន​ជួរ​ពេញ​ផ្លូវ​នោះ​តែ​ម្តង​។ ពី​របី​នាទី​ក្រោយ​មក​ ពួកគេ​បាន​ចាប់ផ្តើម​រុល​ទៅ​រក​​អ្នក​តវ៉ា​​ ដេញវាយ​ ​និង​ទាត់​ធាក់​អ្នក​តវ៉ា​មួយ​ចំនួន​ដែល​​មិន​គេ​ច​ខ្លួន​។

មន្ត្រី​កង​រាជ​អាវុធ​ហត្ថ​​បាន​គប់​គ្រាប់​បែក​ផ្សែង​​ជាច្រើន​គ្រាប់​ទៅលើ​ផ្លូវ​​នោះ​មុន​ពេល​​មន្ត្រី​នៅ​ជួរ​មុខ​បាន​សម្រុក​ចូល​ទៅ​ដេញ​វាយ​​មនុស្ស​​នៅ​តាម​ផ្លូវ​នោះ​​រួម​ទាំង​ស្ត្រី និង​មនុស្ស​ចាស់ ​ដែល​គ្មាន​នរណាម្នាក់​អាច​តដៃ​បានទេ ​នៅ​ពេល​ប្រឈម​នឹងការ​វាយដំ​យ៉ាង​ឃោរ​ឃៅ​​នោះ។

កន្លះម៉ោង​បន្ទាប់​ពី​កង​រាជ​អាវុធ​ហត្ថ និង​​​កង​​​កម្លាំង​​​បង្ក្រាប​​​បាតុកម្ម​​​​បាន​ចេញ​មក​បង្ក្រាប​អ្នក​តវ៉ា​​ និង​ផ្សែង​បាត់​អស់​ពី​មហាវិថី​​​ព្រះមុនីវង្ស​នោះ​​​ ហើយ​​កង​រាជ​អាវុធ​ហត្ថ​​បាន​ត្រឡប់​ចូល​ទៅ​ក្នុង​​បរិវេណ​សាលា​​រាជ​​​ធានី និ​ងមាន​ការ​ធ្វើ​ចរាចរ​ជា​ធម្មតា​វិញ​។

យោង​តាម​អង្គការ​សិទ្ធិមនុស្ស​លីកា​ដូ​​​​ អ្នក​តវ៉ា​មួយ​ចំនួន​បាន​ប្រមូល​ផ្តុំ​គ្នា​ឡើង​វិញ​នៅ​ខាង​ក្រៅ​ស្ថានទូតសហ​​​រដ្ឋ​​​​អាមេរិក​ដែល​នៅ​ជិត​នោះ​​ ​ហើយ​នៅ​ទីនោះ​ពួកគេ​ត្រូវ​បាន​នគរ​​​​បាល​បង្ក្រាប​បាតុកម្ម​បណ្តេញ​ចេញ​ និង​បាន​បែក​គ្នា​ជាលើក​ចុង​ក្រោយ​។

អង្គការ​លីកាដូ​បាន​ឲ្យដឹង​ថា មនុស្ស​រង​របួស​ទាំង​១០នាក់​នោះ រួមទាំង​បុរ​ស​ពីរនាក់​ដែល​គេចាប់​បាន​មាន​ចំពាម​កៅស៊ូហើយ​​ត្រូវ​បាន​អ្នក​តវ៉ា​​មួយ​ចំនួន​វាយដំ ​ដោយ​សារ​សង្ស័យ​​ថា​ពួកគេ​ត្រូវ​បាន​រដ្ឋាភិបាល​ដាក់​ឲ្យ​បង្កប់​ខ្លួន​ក្នុង​ក្រុម​អ្នក​តវ៉ា​ដើម្បី​បង្ក​បញ្ហា​។

អង្គការ​អាដហុក​បាន​ឲ្យ​ដឹង​ថា ម៉ូតូ​ប្រាំ​បួន​​គ្រឿង​ និង​រ៉ឺ​ម៉ក​​កង់​បី​បួន​គ្រឿង​ក៏​ត្រូវ​បាន​​នគរ​បាល​រឹប​អូស​ផង​ដែរ។ឧត្តម​សេនីយ៍​ត្រី ខេង​ ទីតូ ​អ្នក​នាំពាក្យ​កង​រាជអាវុធ​ហត្ថ​បាន​អះ​អាង​ថា  មន្ត្រីរបស់​លោក​គ្មាន​ជម្រើស​ក្រៅ​ពី​ការ​ប្រើ​កម្លាំ​ងទេ​ពីព្រោះ​អ្នកតវ៉ា​បាន​បំពាន​បម្រាម​របស់​រដ្ឋា​​ភិ​បាល​មិន​ឲ្យធ្វើ​បាតុកម្ម​ និង​មិន​ស្តាប់​បញ្ជា​ឲ្យ​ចាកចេញ​ពី​ផ្លូវ​នោះ​។

ឧត្តម​សេនីយ៍​ត្រី ខេង​​​​ ទីតូ  បាន​មាន​ប្រសាសន៍ថា “ ពួកគេ​​បំពាន​នឹង​បម្រាម ​របស់​សាលា​រាជធានី​ ហើយ​ពួកគេ​បាន​បិទ​ ផ្លូវ​ និងធ្វើ​ឲ្យប៉ះពាល់​​ដល់​សណ្តាប់​ធ្នាប់​សាធារណៈ​។ យើង​បាន​ប្រាប់​ពួក​គេ​ឲ្យ​ចាក​ចេញ​ ប៉ុន្តែ ពួកគេ​មិន​​ស្តាប់​​ទេ​ ដូច្នេះ​ហើយ​​កង​កម្លាំង​របស់​យើង​​ត្រូវ​ចាត់​វិធានការ​​​បង្ក្រាប​ពួកគេ​”។
លោក​ ម៉ម សូណង់​ដូ ដែល​ត្រូវ​បាន​អ្នក​​គាំទ្រ​ទាញ​ចេញ​ពី​ការ​វាយ​តប់​នោះ​តែ​ប៉ុន្មាន​ជំហាន​ប៉ុណ្ណោះ​នៅ​​ពី​មុខ​កង​រាជ​អាវុធ​ហត្ថ​​​នោះ បាន​ថ្កោល​ទោស​ការ​​វាយ​ដំ​នេះ​។លោក​បានមាន​ប្រសាសន៍ថា “ យើង​មាន​​ការ​រន្ធត់​ពីព្រោះ​ប្រជា​ជ​ន​គ្រាន់​តែ​បញ្ចេញ​ទស្សន​ទាម​ទារ​អា​ជ្ញាប័ណ្ណ​ទូរទស្ស​ន៍​ និ​ង​​​ការ​បន្ត​កម្លាំង​ផ្សា​យ​​របស់​វិទ្យុ​សម្បុក​ឃ្មុំ​​ហើយ​​ពួកគេ​អង្គុយ​ស្ងៀម​ ប៉ុន្តែ កង​រាជ​អាវុធ​ហត្ថ​​ និង​នគរបាល​ប្រឆាំង​បាតុកម្ម​​បាន​​​គប់​គ្រាប់​បែក​ផ្សែង​ និង​វាយ​ប្រជា​ពល​រដ្ឋ​”។

លោក ម៉ម សូណង់​ដូ បាន​ព្រមាន​អំពី​​ការ​តវ៉ា​ពី​ប្រជាជន​កាន់​តែ​ធំ​​​ប្រសិន​បើ​នគរបាល​​បន្ត​បង្ក្រាប​យ៉ាង​ឃោរ​ឃៅ​ទៀត​។លោក​បានមាន​ប្រសាសន៍ថា “ ពួកគេ​​​មិន​បាន​​ដោះស្រាយ​បញ្ហា​ទេ​ ពួកគេ​គ្រាន់​តែ​បង្ក្រាប​។ វា​នឹង​ធ្វើ​ឲ្យ​ប្រជាពល​រដ្ឋ​រងគ្រោះ​និង​សង​សឹក​ទៅលើ​អាជ្ញាធរ​​ ហើយ​​វា​នឹង​  ធ្វើ​ឲ្យ​ផ្ទុះ​ដូច​ភ្នំភ្លើង​”។

លោក សុខ​ នី អ្នក​រត់​ម៉ូតូ​ឌុប​ដែល​បាន​​ចូល​រួ​ម​​នៅ​ក្នុងការ​តវ៉ា​នេះបាន​និយាយ​ថា សន្តិ​សុខ​ខណ្ឌបាន​វាយ​គាត់​នឹង​ដំបង​ចំខ្នង​​ និងចំ​ក្បាល​ បន្ទាប់​ពីបាន​ដោះ​មួក​សុវត្ថិភាព​​របស់​គាត់ចេញ​​​។ គាត់​រង​​​របួស​​​ត្រូវ​ដេរ​បួ​ន​​​ថ្នេរ​លើ​ក្បាល​ផ្នែក​ខាង​ក្រោយ​​​នៅ​មន្ទី​រ​​​ពេទ្យ​​​​មិត្ត​ភាព​ខ្មែរ​-សូវៀត​​។​​គាត់បាន​និយាយថា “ ​វាជាការ​បង្ក្រាប​ដ៏​ឃោរ​ឃៅពីព្រោះ​បាតុករ​មាន​តែ​ដៃទទេ តើ​ពួកគេ​អាច​ត​ដៃ​​យ៉ាង​ម៉េច​កើត​?”។

លោក​ សុខ នី បាន​និយាយថា នេះ​គឺ​​ជា​ការ​​បិទ​​សិទ្ធិ​​​សេរីភាព​នៃការ​បញ្ចេញ​មតិ​។គាត់​បាន​និយាយ​បន្តថា “ ប្រជា​ពល​រដ្ឋ​គ្រាន់​តែ​ធ្វើ​បាតុកម្ម​បញ្ចេញ​មតិ​របស់​ខ្លួន​​។ ឥឡូវ​នេះ​យើង​មិន​អាច​បញ្ចេញ​មតិ​របស់​យើង​បាន​ទៀត​ទេ​។​ ពួកគេ​បាន​បិទ​សិទ្ធិ​របស់​​​​យើង​​ហើយ​”។

ថ្លែង​នៅពេល​ក្រោយ​មក​​ពីកន្លែង​ចាប់​ផ្តើម​ហែក្បួន​ពេល​ព្រឹក​ជិត​ស្ពាន​នាគ​ លោក ស្រី​ មូរ សុខហួរ តំណាង​រាស្ត្រ​ជាប់​ឆ្នោត​មក​ពី​គណបក្ស​ប្រឆាំង​បាន​មាន​ប្រសាសន៍ថា ការ​ប្រើ​កម្លាំង​នគរ​បាល​​បែ​បនេះ​នឹង​ធ្វើ​ឲ្យ​ប៉ះ​ពាល់​​ដល់​​នយោបាយ​របស់​លោក​នាយក​រដ្ឋ​មន្ត្រី​ ហ៊ុន សែន។

លោក​ស្រី មូរ សុខហួរ ​មាន​ប្រសាសន៍​​​ថា “ លោក ហ៊ុន សែន ត្រូវ​យល់ថា ថ្ងៃ​របស់​លោក​ជិត​ចប់​ហើយ​។ ប្រសិន​បើ​លោក​​នៅ​តែ​ធ្វើ​ឲ្យ​ឈាម​របស់​​​ប្រជាជន​ខ្មែរ​ធ្លាក់​លើដី​ខ្មែ​រ​នោះ​​​ ឈាម​មួយ​តំណក់​ៗស្មើ​នឹង​មួយ   ថ្ងៃ​សម្រាប់​លោក​ចុះ​ចេញ​”។
“ នេះគឺជា​ពេល​ដ៏​សំខាន់ណាស់​ដើម្បី​ឲ្យ​លោក​​ ហ៊ុន សែន យល់​ថា ប្រជាពល​រដ្ឋ​កំពុង​និយាយ​​ជា​មួយ​​លោក​។ តើ​លោក​និយាយ​ជាមួយ​ប្រជាពល​រដ្ឋ​ ឬនិយាយ​ប្រាប់​ប្រជា​ពល​រដ្ឋ​វិញទេ​?”។

គណបក្ស​សង្គ្រោះ​ជាតិដែល​ចោទ​លោក​ ហ៊ុន សែន និង​គណបក្ស​ប្រជាជន​កម្ពុជា ដែល​កាន់​អំណាច​យូរ​របស់​លោក​ថា បាន​លួចបន្លំ​ដើម្បី​យក​ជ័យ​ជម្នះនៅក្នុងការ​បោះ​ឆ្នោត​ជាតិ​ដ៏ចម្រូងចម្រាសកាល​ពីឆ្នាំមុន​នោះ ​​​​កំពុង​ទាម​ទារ​ឲ្យ​នាយក​រដ្ឋ​មន្ត្រីរូប​នេះ​ចុះ​ចេញ​ ឬ​រៀបចំ​ការ​បោះឆ្នោតជា​ថ្មី​។

គណបក្ស​ប្រជាជន​កម្ពុជា​បាន​បដិសេធ​​យ៉ាង​ដាច់​អហង្កា​រចំពោះ​ការ​ទាមទារ​ទាំង​ពីរ​ចំណុច​​នេះ​។ដោយ​មិន​រួញ​រា​ចំពោះ​ការ​បង្ក្រាប​ដោយ​​ហិង្សា​លើ​ការ​ជួប​ជុំ​គ្នា​កាល​ពីម្សិលមិញ និង​ការ​ច្រាន​ចោល​ដដែល​ៗ​ពីក្រសួង​ព័ត៌មាន​នោះ​ លោក​ ម៉ម សូណង់​ដូ បានមាន​ប្រសាសន៍​ថា លោក​នឹង​នៅ​តែ​ទាម​ទារ​​កម្លាំង​ផ្សាយ​​បន្ត​ និងអាជ្ញាប័ណ្ណ​ទូរទស្សន៍ដដែល​​ ហើយ​នឹង​ធ្វើ​សំណើផ្លូវការ​មួយ​ទៀត​ជូន​ទៅក្រសួង​នេះ​ ក្រោយពេល​ចូល​ឆ្នាំ​ចិន​។

លោក​បានមាន​ប្រសាសន៍ថា “ ប្រសិន​បើ​គេ​ផ្តល់​អាជ្ញាប័ណ្ណ​ទូរទស្សន៍ និង​​កម្លាំង​ផ្សាយ​បន្តសម្រាប់​វិទ្យុ​យើង​ បញ្ហា​នេះ​នឹង​បញ្ចប់​”។ លោក​បាន​បន្ថែម​ថា បើមិន​ដូច្នោះ​ទេ “ យើង​នឹង​បន្ត​ធ្វើ​បាតុកម្ម​”៕ គឹមហឿន​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស