28 C
Phnom Penh

គ.ជ.ប. កំណត់​​​ថ្ងៃ​​​​បោះ​ឆ្នោតក្រុម​ប្រឹក្សា​រាជ​ធានី​ ខេត្ត​- ក្រុង ស្រុក​-ខណ្ឌ

ដោយ ឌឹ ខេមបូឌា ដេលី

បទវិភាគ

កាល​ពី​ម្សិល​មិញ គណៈកម្មាធិការ​​ជាតិ​រៀប​ចំ​ការ​បោះ​ឆ្នោត​(គ.ជ.ប.) បាន​ឲ្យ​ដឹង​ថា  ការ​បោះ​​ឆ្នោត​ជ្រើសរើស​សមាជិក​ក្រុម​ប្រឹក្ស​រាជ​ធានី ខេត្ត​-ក្រុង​​ស្រុក​​-ខណ្ឌ​ ដែល​មាន​តែ​សមា​​​​​ជិក​​​ក្រុម​ប្រឹក្សា​ឃុំ​-សង្កាត់​ប៉ុណ្ណោះ ​​ត្រូវ​បាន​អនុញ្ញាត​ឲ្យ​បោះ​ឆ្នោតនោះ នឹង​ត្រូវ​ប្រព្រឹត្ត​ទៅ​នៅ​ថ្ងៃ​ទី​១៨​ខែ​ឧសភា​។

លោក​ ទេព​ នីថា អគ្គលេខាធិការគ.ជ.ប. បាន​​ថ្លែង​​ថា “ ការ​បោះឆ្នោត​ក្រុម​ប្រឹក្ស​រាជ​ធានី ខេត្ត​-ក្រុង ​​ស្រុក​​-ខណ្ឌ​ ជា​លើក​ទី​២នេះ​​ នឹង​ត្រូវ​ធ្វើ​ឡើង​នៅ​ថ្ងៃ​ទី​១៨​ ខែ​ឧសភា។ ហើយ​​វា​នឹង​មាន​រយៈ​ពេល​ប្រាំ​ថ្ងៃ ដើម្បី​រៀប​ចំ​ការ​ចុះ​ឈ្មោះ​បោះ​ឆ្នោត​នៅ​ថ្នាក់​ខេត្ត​”។លោកបាន​បន្ត​ថា សមាជិក​ក្រុម​ប្រឹក្សា​ឃុំ​-សង្កាត់​សរុប​ចំនួន​១១​.៤៥៩​រូប​ មាន​សិទ្ធិ​ចូល​រួម​ការ​បោះ​ឆ្នោត​នេះ​។ លោក​​មាន​ប្រសា​សន៍​​ថា ​“ សមាជិក​ក្រុម​ប្រឹក្សា​​​ឃុំ​-​សង្កាត់​នីមួយ​ៗ​ មាន​សិទ្ធិ​បោះ​ឆ្នោត​​ជ្រើស​រើស​សមា​ជិក​​​ក្រុម​ប្រឹក្សា​រាជ​ធានី ខេត្ត​-ក្រុង​ និង​សមាជិក​ក្រុម​ប្រឹក្សា​ ​​ស្រុក​​-ខណ្ឌ​ នៅ​ក្នុង​ពេល​តែ​មួយ​”។លោក​ ទេព​ នី​ថា បាន​លើក​ឡើង​ថា គ្រប់​គណបក្ស​នយោ​បាយ​ទាំង​អស់​ ដែល​បាន​ចុះ​ឈ្មោះ​បោះ​ឆ្នោតនៅ​​ក្រសួង​មហាផ្ទៃ​ អាច​មាន​សិទ្ធិ​ចូល​រួម​កា​រ​បោះ​ឆ្នោត​បាន​ ដោយ​ដាក់​ឯកសារ​ជូន​គណៈកម្មការ​រៀបចំ​ការ​បោះ​ឆ្នោត​ថ្នាក់​ខេត្ត​របស់​ខ្លួន​។

ការ​បោះ​ឆ្នោត​ក្រុមប្រឹក្ស​រាជ​ធានី ខេត្ត​-ក្រុង ​​ស្រុក​​-ខណ្ឌ​ លើក​ដំបូង​ត្រូវ​បាន​ធ្វើ​ឡើង​កាល​ពី​ឆ្នាំ​ពី​២០០៩​​ហើយ​សម្រាប់​ការ​បោះ​ឆ្នោត​លើក​នេះ​ នឹង​មាន​តំណែង​ច្រើន​ជាង​លើក​មុន​ ដោយ​សារ​តែ​ការ​បង្កើត​ខេត្ត​ថ្មី​មួយ​គឺ​ខេត្ត​ត្បូង​ឃ្មុំ​ និង​ខណ្ឌ​ថ្មី​ចំនួន​បី​នៅ​ក្នុង​រាជ​ធានី​ភ្នំ​ពេញ​។លោក​ ទេព​ នី​ថា បាន​​បន្ត​ថា  “ ថ្មីៗ​នេះ​ រដ្ឋាភិបាល​បាន​បង្កើត​ខេត្ត​ត្បូង​ឃ្មុំ​មួយ​ដែល​មាន​សមាជិក​ក្រុម​ប្រឹក្សា​ចំនួន​១៩​រូប​ ហើយ​នៅ​ក្នុង​រាជ​ធានី​ភ្នំពេញ​វិញ​ មាន​ខណ្ឌ​បន្ថែម​ចំនួន​បី​ រួមមាន​ ​ខណ្ឌ​ច្បារ​អំពៅ​ ដែល​មាន​សមាជិក​ក្រុម​ប្រឹក្សា​ចំនួន​១៩រូប​ ខណ្ឌ​ជ្រោយ​ចង្វារ​ ដែល​មានសមាជិក​​ក្រុម​ប្រឹក្សាចំនួន​​១៥​រូប​ និង​ខណ្ឌ​ព្រែក​ព្នៅ​ ដែល​មាន​សមាជិក​ក្រុម​ប្រឹក្សា​ចំនួន​១៥​រូប​ដែរ​នោះ​”៕ ស៊ុយឈាង​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស