មួយថ្ងៃបន្ទាប់ពីគណបក្សសង្គ្រោះជាតិលុបចោលការជួបជុំគ្នានៅក្នុងខេត្តកំពង់ចាម ដោយបារម្ភខ្លាចមានអំពើហិង្សាដោយសារតែអ្នកគាំទ្រគណបក្សប្រជាជនកម្ពុជាបានបានធ្វើបាតុកម្មប្រឆាំងនៅក្បែរនោះ លោក កឹម សុខា ប្រធានស្តីទីគណបក្សសង្គ្រោះជាតិកាលពីម្សិលមិញបានបង្ហាញមុខនៅពិធីមួយក្នុងខេត្តកំពង់ធំ ដែលមន្ត្រីគណបក្សបានលើកឡើងថា ជាការជួបជុំដោយអហិង្សា បើទោះជាមានវត្តមាននគរបាលច្រើនក៏ដោយ។
លោក ស៊ុន ចន្ធី ប្រធានគណបក្សប្រចាំខេត្តនេះបានមានប្រសាសន៍ថា លោក កឹម សុខា បានជួបជាមួយអ្នកគាំទ្រប្រហែល១.៥០០ នាក់នៅទីស្នាក់ការគណបក្សប្រឆាំង នៅក្រុងស្ទឹងសែន ដែលមានមន្ត្រីកងរាជអាវុធហត្ថនិងទាហានប្រហែល៣០០នាក់ត្រូវបានដាក់ពង្រាយនៅទីនោះ។
លោក ចន្ធី បានមានប្រសាសន៍ថា “ លោក កឹម សុខា មកចូលរួមព្រឹត្តិការណ៍នោះដោយមិនមានការរំខានពីអ្នកគាំទ្រគណបក្សប្រជាជនកម្ពុជាទេ”។
ទោះជាយ៉ាងណា លោក អ៊ុច សំអន អភិបាលខេត្តកំពង់ធំបានមានប្រសាសន៍ថា អ្នកគាំទ្រគណបក្សប្រជាជនប្រហែល២.៤០០នាក់បានប្រមូលផ្តុំគ្នានៅទីស្នាក់ការគណបក្សរបស់ខ្លួនកាលពីម្សិលមិញដើម្បី “ សម្តែងឆន្ទៈនយោបាយរបស់ខ្លួន”។លោក អ៊ុច សំអន បានមានប្រសាសន៍ថា “ យើង មានការប្រុងប្រយ័ត្នណាស់មិនឲ្យពួកគេប្រឈមមុខដាក់គ្នាឡើយ”។
អំឡុងពេលថ្លែងសុន្ទរកថា លោក កឹម សុខា បាននិយាយទៅកាន់អ្នកចូលរួមថា ក្រុមមន្ត្រី អាមេរិក និងសមាជិកគណបក្សសង្គ្រោះជាតិបានទាក់ទងគ្នាអំពីការព្យាយាមជួបជុំគ្នាមិនបានសម្រេចនៅក្នុងខេត្តកំពង់ចាម កាលពីថ្ងៃអាទិត្យ។លោក កឹម សុខា បានបន្ថែមថា ឥឡូវនេះមេដឹកនាំគណបក្សមានផែនការជួបជាមួយ “ មេដឹកនាំអាមេរិកសំខាន់ៗមួយចំនួន” តែលោកមិនបាននិយាយលម្អិតទេ៕ សារុន