កាលពីម្សិលមិញ ឯកអគ្គរដ្ឋទូតចិនប្រចាំនៅប្រទេសកម្ពុជាបានរិះគន់ខ្លាំងៗចំពោះសមភាគីជប៉ុនរបស់លោកស្រី ដែលបានការពារ ការទៅទស្សនកិច្ចរបស់លោកនាយករដ្ឋមន្ត្រីជប៉ុននៅទីសក្ការបូជាដ៏ចម្រូងចម្រាសសម្រាប់អ្នកដែលបាត់បង់ជីវិតអំឡុងសង្គ្រាម។ការរិះគន់យ៉ាងខ្លាំងៗនេះបានក្លាយទៅជាការវាយប្រហារផ្នែកការទូតលើកទី៣ តាមរយៈការផ្ញើលិខិតទៅកាន់និពន្ធនាយកកាសែត។
នៅក្នុងលិខិតមួយ ដែលចេញផ្សាយកាលពីម្សិលមិញនៅក្នុងកាសែតខ្មែរដេលី ដែលគ្រប់គ្រងដោយចិន លោកស្រី ពូ ចៀនគ័រ (Bu Jianguo) បានលើកឡើងថា ការទៅទស្សនកិច្ចនៅទីសក្ការបូជានេះ បានធ្វើឲ្យកិច្ចពិភាក្សាផ្ទាល់រវាងប្រទេសទាំងពីរត្រូវបិទទ្វារ។
ការផ្ញើលិខិតទៅកាន់កាសែត រវាងឯកអគ្គរដ្ឋទូតនិងរាជទូតនៃប្រទេសទាំងពីរបានចាប់ផ្តើម ដោយលិខិតមួយច្បាប់របស់លោកស្រី ពូ ចៀនគ័រ ដែលបានចុះផ្សាយ កាលពីសប្តាហ៍មុន នៅក្នុងកាសែតភាសាខ្មែរក្នុងស្រុកដោយចាត់ទុកការទៅទស្សនកិច្ចរបស់លោក ស៊ីនហ្សូ អាបេ (Shinzo Abe) នៅទីសក្ការបូជា Yasukuni កាលពីខែធ្នូថា ជាការ “ បង្កជម្លោះចំៗចំពោះមនុស្សស្រឡាញ់សន្តិភាពនៅទូទាំងពិភពលោក” ហើយបានចោទប្រកាន់លោកថា បានធ្វើឲ្យប៉ះពាល់ដល់សិ្ថរភាពក្នុងតំបន់។
ការទៅទស្សនកិច្ចជាផ្លូវការនៅទីសក្ការបូជានេះ របស់នាយករដ្ឋមន្ត្រីជប៉ុននានា តែងតែធ្វើឲ្យប្រទេសចិនមានការឈឺចាប់ជាខ្លាំង។ នៅក្នុងចំណោមអ្នកស្លាប់ក្នុងសម័យសង្គ្រាមចំនួន២,៥លាននាក់ ដែលត្រូវបានគេគោរពបូជានៅទីសក្ការបូជានោះ ក៏មានឧក្រិដ្ឋជនសង្គ្រាមមួយចំនួនផងដែរ រួមមានឧក្រិដ្ឋជន“ លំដាប់ A” ចំនួន១៤នាក់ ដែលបានស្ថិតនៅពីក្រោយការកាន់កាប់និងការឈ្លានពានយ៉ាងព្រៃផ្សៃរបស់ជប៉ុន លើតំបន់ភាគខាងកើតប្រទេសចិន អំឡុងសម័យសង្គ្រាមលោកលើកទី២។
នៅក្នុងការឆ្លើយតបចំពោះលិខិតរបស់លោកស្រី ពួ ចៀនគ័រ ដែលត្រូវបានចុះផ្សាយនៅក្នុងកាសែតក្នុងស្រុកកាលពីសប្តាហ៍មុន លោក គូម៉ាម៉ារុ យូជី(Kumamaru Yuji) ឯកអគ្គរាជទូតជប៉ុន បានលើកឡើងថា សមភាគីចិនរបស់លោក បានបកស្រាយខុសចំពោះការទៅទស្សនកិច្ចរបស់លោក អាបេ នៅទីសក្ការបូជានេះ។ លោកបានឲ្យដឹងថា លោក អាបេ មិនមែនទៅសម្តែងការគោរពចំពោះឧក្រិដ្ឋជនសង្គ្រាមនោះទេ ប៉ុន្តែកំពុងតែព្យាយាមលើកកម្ពស់់ដល់សន្តិភាពនៅក្នុងតំបន់។
ដោយមិនព្រមបញ្ចប់បញ្ហានេះត្រឹមហ្នឹង លោកស្រី ពូ ចៀនគ័រ បានធ្វើការឆ្លើយតបទៅលោក យូជី វិញកាលពីម្សិលមិញតាមរយៈកាសែតខ្មែរដេលី ដោយចោទប្រកាន់ជប៉ុនថា ជាការលាក់ពុត និងគ្មានសេចក្តីគោរព។លោកស្រីបានសរសេរថា “ អ្នកនយោបាយជប៉ុនមួយចំនួនតែងតែនិយាយអំពីលទ្ធិប្រជាធិបតេយ្យ សេរីភាព និងសិទ្ធិមនុស្ស ប៉ុន្តែពួកគេមិនដែលមានបំណងផ្លាស់ប្តូរឥរិយាបថរបស់ខ្លួនចំពោះប្រវតិ្តសាស្ត្រ សង្គ្រាម និងការឈ្លានពានឡើយ ហើយពួកគេតែងតែបដិសេធចំពោះបញ្ហានេះ។ ទង្វើនេះមិនគ្រាន់តែជាទង្វើខ្វះការគោរពដល់សតិអារម្មណ៍របស់ពលរដ្ឋ ដែលរស់នៅក្នុងប្រទេសរងគ្រោះថ្នាក់ប៉ុណ្ណោះទេ ប៉ុនែ្តវាថែមទំាងជាទង្វើមួយ ដែលប្រឆាំងយ៉ាងខ្លាំងទៅនឹងលទ្ធិប្រជាធិបតេយ្យ សេរីភាពនិងសិទ្ធិមនុស្សទៀតផង” ។
លោកស្រី ពូ ចៀនគ័រ បន្ថែមថា ការទៅទស្សនកិច្ចរបស់លោក អាបេ នេះបានធ្វើឲ្យប៉ះពាល់យ៉ាងខ្លាំងដល់ទំនាក់ទំនងរវាងចិននិងជប៉ុន ដែលកំពុងតែជាប់គាំងស្រាប់នៅក្នុងជម្លោះដែនទឹក ទាក់ទិនប្រជុំកោះ ដែលប្រទេសទាំងពីរអះអាងថាជារបស់ខ្លួន។
លោកស្រីបានសរសេរថា “ ការសម្តែងការគោរពរបស់លោក អាបេ ចំពោះទីសក្ការបូជា Yasukuni នេះបានធ្វើប៉ះពាល់យ៉ាងខ្លាំងដល់ទំនាក់ទំនងនយោបាយជាមូលដ្ឋានរវាងចិននិងជប៉ុន ហើយបានធ្វើឲ្យកិច្ចពិភាក្សាផ្ទាល់ជាមួយប្រទេសចិនត្រូវបិទទ្វារ”។
ដោយពឹងផ្អែកយ៉ាងខ្លាំងលើវិនិយោគទុនចិន និងជំនួយពីប្រទេសជប៉ុន ប្រទេសកម្ពុជា បានដកខ្លួនចេញពីជម្លោះរបស់ប្រទេសទាំងពីរទាក់ទិននឹងទីសក្ការបូជានេះ។ តែទោះជាយ៉ាងណា ប្រទេសកម្ពុជា បានចាត់ទុកភាគីចិនជាភាគីយ៉ាងសំខាន់ ហើយបានប្រឆាំងទៅនឹងប្រទេសជិតខាងខ្លួនទាក់ទិននឹងការអះអាងសិទ្ធិកាន់កាប់ដែនទឹករបស់រដ្ឋាភិបាលក្រុងប៉េកាំងនៅក្នុងសមុទ្រចិនខាងត្បូង៕ ស៊ុយឈាង