27.1 C
Phnom Penh

សាលាដំបូង​រាជ​ធានី​ភ្នំពេញ​ចោទប្រកាន់​អ្នក​បង្ក​បញ្ហា​ម្នាក់​ពីបទប្រើអំពើ​ហិង្សានៅ​ក្បែរ​ស្ពាន​នាគ

ដោយ ឌឹ ខេមបូឌា ដេលី

បទវិភាគ

កាល​ពីម្សិលមិញ សាលាដំបូងរាជ​ធានី​ភ្នំពេញ បាន​ចោទ​ប្រកាន់​បុរស​ម្នាក់​ពី​បទ​ប្រើ​អំពើហិង្សា​មាន​ស្ថាន​ទម្ងន់​ទោស​ ​បន្ទាប់ពី​អ្នក​តវ៉ា​បាន​ឃាត់​ខ្លួន​បុរស​រូប​នេះ​នៅ​កន្លែង​ធ្វើ​បាតុកម្ម​​ស្ថិតនៅ​ក្នុង​រាជ​ធានី​​ភ្នំពេញ កាលពី​ថ្ងៃ​អាទិត្យ ហើយ​​បាន​​ប្រគល់​ទៅ​ឲ្យ​នគរ​បាល ដោយ​​ស​ង្ស័យ​ថា​ បាន​ញុះញង់​ឲ្យ​មាន​អំពើ​ហិង្សា​នៅ​កន្លែង​ប្រមូល​​ផ្ដុំគ្នា​នៅ​ជិត​ទីលាន​ប្រជា​ធិប​តេយ្យ​។

ផេង ផា អាយុ​៣២​ឆ្នាំ ជា​បុរស​ម្នាក់​ក្នុង​ចំណោម​បុរស​ពីរ​នាក់​ដែល​អ្ន​ក​តវ៉ា​បាន​ឃាត់​ខ្លួន​ដោយ​សង្ស័យ​ថា បុរស​រូប​នេះ​ព្យាយាម​បង្ក​បញ្ហា​ ដែល​កម្លាំង​សន្តិ​សុខ​យកជា​លេស​ដើម្បី​ប្រើ​កម្លាំង​ទៅ​លើ​ក្រុម​​អ្នក​គាំទ្រ​សហ​ជីព​អហិង្សានោះ​។ ​បុរស​ដែល​ត្រូវ​ឃាត់​ខ្លួនទី​២​ម្នាក់​ទៀត​​​ឈ្មោះ ហម ហ៊ុត ត្រូវ​នគរ​បាល​ដោះ​​លែង​វិញដោយ​មិន​ធ្វើ​ការ​ចោទ​ប្រកាន់​អ្វី​ឡើយ​កាលពីថ្ងៃ​ច័ន្ទ។

លោក ឡុង លន់ មេធាវី​ការ​ពារ​ក្ដី​ ផេង ផា ​មាន​ប្រសាសន៍​កាលពីម្សិល​មិញ​ថា “ផេង ផា ត្រូវ​បាន​ចោទ​ប្រកាន់​ពី​បទ​បង្ក​ហិង្សា​ដោយ​​​​​​ចេតនា ហើយ​ខ្ញុំ​នឹង​ប្ដឹង​ឧទ្ធរណ៍​​ជំទាស់​​ការ​ចោទ​ប្រកាន់​នេះ​ដើម្បី​ឲ្យ​តុលាការ​ដោះ​លែង​​​គាត់​ឲ្យ​នៅ​ក្រៅ​ឃុំ​”។

លោក ឡុង លន់ បាន​មាន​ប្រសាសន៍​ថា លោក​នឹង​មិន​ធ្វើ​អត្ថាធិប្បាយ​ថា តើ​កូន​ក្ដី​របស់​លោក​ជាអ្នក​បង្កបញ្ហា​ដូច​អ្នក​តវ៉ា​ដែលបាន​ឃាត់​ខ្លួន​គាត់​នៅ​ក​ន្លែង​​​ប្រមូល​ផ្ដុំគ្នា​​​នោះ ចោទ​ប្រកាន់​ឬយ៉ាង​ណាឡើយ។

ក្រុមអ្នក​តវ៉ា​បាន​ចាត់​ទុក​មនុស្ស​ដែល​គេ​ចោទ​ថា បាន​បង្ក​បញ្ហា​នេះជា​ “​បាត​ដៃ​ទី៣” របស់​រដ្ឋាភិបាល​។

ផេង ផា កំពុង​ត្រូវ​ឃុំ​ខ្លួន​បណ្ដោះ​អាសន្ន​នៅ​ពន្ធ​នាគារ​ព្រៃ​ស​។ប្រពន្ធ​របស់​ ផេង ផា ឈ្មោះ ហ៊ិន វុទ្ធី បាន​ជួបជាមួយ​​ប្ដី​របស់​គាត់​កាលពីព្រឹក​ម្សិលមិញ ហើយ​អ្នកស្រី​បាន​និយាយ​ថា ប្ដីរបស់​គាត់​បាន​ប្រាប់​គាត់​ថា គាត់​​ជិះម៉ូតូ​កាត់​កន្លែង​តវ៉ានោះកាល​ពីព្រឹក​ថ្ងៃ​អាទិត្យ ពេល​នោះ​គាត់​គ្រាន់​តែ​ឈប់​មើល​​ពីអ្វីដែលបាន​កើត​ឡើង​តែប៉ុណ្ណោះ​។

អ្នកស្រី ហ៊ិន វុទ្ធី បាន​និយាយ​ថា ​ប្ដី​របស់​គាត់​​ទទួលស្គាល់​ថា គាត់បាន​កាន់​​ចំពាម​កៅស៊ូ​​​នៅពេល​នោះមែន  តែ​អ្នក​ស្រី​មិនអាច​ពន្យល់​​​ ពី​មូលហេតុ​បាន​ទេ​ ហើយ​អ្នកស្រី​អះ​អាង​ថា ប្ដី​របស់​គាត់​គ្មាន​កំហុស​ទេ។

អ្នក​ស្រី​បាន​និយាយ​ទៀត​ថា “ខ្ញុំ​ឆ្ងល់​ថា ហេតុ​អ្វី​បាន​ជា​គេ​ចាប់​ប្ដី​របស់​ខ្ញុំ​ ហើយ​ចោទ​ប្រកាន់​គាត់​ថា បាន​ប្រើ​អំពើ​ហិង្សា​ទៅវិញ ពីព្រោះ​គាត់​បាន​ប្រាប់​ខ្ញុំ​ថា គាត់​មិន​បាន​ប្រើ​អំពើ​ហិង្សា​ទេ​។ ខ្ញុំគិត​ថា គាត់​មិន​មែនជា ‘មនុស្ស​បាត​ដៃ​ទី៣​’ ទេ ហើយ​ខ្ញុំ​បដិ​សេធ​​ការ​ចោទ​ប្រកាន់​នេះ​”។

លោក សុង លី នាយ​នគរ​បាល​ព្រហ្ម​ទណ្ឌ​កម្រិត​ស្រាល​រាជធានី​បាន​មាន​ប្រសា​សន៍​ថា ហម ហ៊ុត និង​បុរស​ផ្សេង​ទៀត​ដែល​អ្នក​តវ៉ាបានឃាត់​ខ្លួន ហើយ​ប្រគល់​ទៅ​ឲ្យ​នគរ​បាល​កាល​ពីថ្ងៃ​អាទិត្យ​នោះ ត្រូវ​បាន​ដោះ​លែង​វិញ​ហើយ ដោយសារ​ខ្វះ​ភ័ស្តុ​តាង​។

ការ​តវ៉ា​កាលពីថ្ងៃ​អាទិត្យ ​រៀប​ចំ​ដោយ​​សហជីព​មួយ​ចំនួន​ទាមទារ​ឲ្យ​ដោះ​លែង​មនុស្ស​២៣​នាក់​ដែល​ត្រូវ​បាន​ចាប់​ខ្លួន​កាល​ពីដើម​ខែ​នេះ អំឡុង​កា​រ​ធ្វើ​បាតុកម្ម​រយៈ​ពេល​​ពីរថ្ងៃ​ទាម​ទារ​ដំឡើង​ប្រាក់​ខែ​គោល​​ខ្ពស់​ជាង​នេះ។

ការ​តវ៉ា​ដែល​ធ្វើ​ឡើង​នៅ​ម្តុំស្ពាន​នាគ​ ​នៅ​ជាប់​សួន​ច្បារ​ដែល​ស្ថិត​នៅ​តាម​មហា​វិថី​ព្រះ​នរោ ត្តមនោះ​ បាន​បន្ត​ធ្វើ​ដដែល​ បើ​ទោះជារដ្ឋាភិបាល​បាន​ចេញ​បម្រាម​ហាម​មិន​​​ឲ្យ​មាន​ការ​តវ៉ា​ និង​ការ​ធ្វើ​បាតុកម្ម​ក៏ដោយ។

បន្ទាប់ពីការ​ប្រឈម​មុខ​ដាក់​គ្នា​រយៈ​ពេល​​​​​ជាង​មួយ​ម៉ោង​កាលពីព្រឹក​ថ្ងៃ​អាទិត្យ​នៅ​កន្លែង​​​​តវ៉ា​រវាង​អ្នក​តវ៉ា​និង​កម្លាំង​សន្តិ​សុខ​ខណ្ឌមក​ មាន​ការ​ប៉ះទង្គិច​គ្នា​នៅ​ជួរ​មុខ​រយៈពេល​ខ្លី​ ប៉ុន្តែ​​ការ​ប៉ះទង្គិច​ដោយ​ហិង្សា​ដោយ​មាន​ការ​គប់​ដុំថ្ម​ រហូត​​ដល់មួក​សុវត្ថិភាព​​ និង​ដប​ទឹក​ ត្រូវ​បាន​គប់​ដាក់​គ្នា​​ទៅវិញ​ទៅមក​។

អ្នក​តវ៉ា​ពី​រ​បីនាក់​បាន​រង​របួស​ហូរ​ឈាម មាន​ស្នាម​ជាំ និង​រត់​ជាន់​គ្នា​ពេល​ប៉ះ​ទង្គិច​ជាមួយ​កម្លាំង​សន្តិ​សុខ​ដែល​គាំទ្រ​ដោយ​​​កម្លាំងស្លៀកពាក់​ស៊ីវិល​ដែល​បាន​ប្រើ​​ប្រាស់​ដំបង និង​បាន​គប់​ដុំថ្ម​ដាក់​បាតុករ​ និង​អ្នក​កាសែត​ដែល​មក​យក​ព័ត៌មាន​អំពី​ហេតុ​ការណ៍​នោះ៕ សារុន​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស