27 C
Phnom Penh

​មិន​ដល់​មួយ​សប្តាហ៍​ផ​ងក្មេង​ៗ​ចំនួន​៨នាក់​បាន​ស្លាប់​ដោយ​សារ​ការ​លង់​ទឹកនៅ​ទូទាំង​ប្រទេស

ដោយ ឌឹ ខេមបូឌា ដេលី

បទវិភាគ

កុមារ​ចំនួន​ប្រាំបី​នាក់​​ បាន​លង់​ទឹកស្រះ​​ស្លាប់​ក្នុង​​​​ហេតុ​ការ​ណ៍​បី​ដាច់​ដោយ​ឡែក​ពី​គ្នា ចន្លោះ​​​​​​​ពី​ថ្ងៃ​សុក្រ​ដល់​ថ្ងៃ​អាទិត្យ​ ខណៈ​មូល​និធិ​សង្គ្រោះ​កុមារ​អង្គការ​សហ​ប្រជា​ជាតិ​ហៅ​កាត់​ថា យូនីសេហ្វ​ បាន​ឲ្យ​ដឹង​កាល​ពី​ម្សិល​មិញ​ថា ការ​លង់​ទឹក​ស្លាប់​ គឺ​ជា​ករណី​ស្លាប់​នាំ​មុខ​គេ​ទី​២​ ដែល​កើត​ឡើង​លើកុមារ​អាយុ​លើស​ពី​១២​ខែ​នៅ​ក្នុង​ប្រទេស​កម្ពុជា​។

លោក​ អ៊ិត​ អ៊ុន​ មេ​ភូមិ​អង្គក្អោក​ ដែល​ស្ថិត​​ក្នុង​ឃុំ ព្រៃ​ទទឹង បាន​ឲ្យ​ដឹង​ថា កាលពី​ព្រឹក​​ថ្ងៃ​សៅរ៍​ ក្មេង​ស្រី​ពីរ​នាក់ និង​ក្មេង​ប្រុស​ពីរ​នាក់​ អាយុ​ចន្លោះ​ពី ២ឆ្នាំ​ទៅ៣​ឆ្នាំ​ បាន​នាំ​គ្នា​ទៅ​ហែល​ទឹក​លេង​នៅ​ក្នុង​​ស្រះ​​មួយ​ក្បែរ​ភូមិ​ អង្គ ក្អោក នៅ​ក្នុង​ស្រុក​មេសាង​ ខេត្ត​ព្រៃ​វែង​។ លោក អ៊ិត​ អ៊ុន បាន​លើក​ឡើង​ថា ក្មេង​ៗ​ដែល​អត់​ចេះ​ហែល​ទឹក​ទាំងនេះ​ បានលង់​ទឹក​ស្រះ​ ដែលមាន​ជម្រៅ​ជាង​បីម៉ែត្រ​។​ លោក​បាន​បន្ថែម​ថា ក្មេង​ពីរនាក់​ផ្សេង​ទៀត​ ពេល​ឃើញ​ដូច្នោះ​បាន​រត់​ទៅ​ប្រាប់​អ្នក​ភូមិ​ឲ្យ​មក​ជួយ​។

លោក​បាន​មាន​ប្រសាសន៍​ថា “នៅ​ពេល​ពួក​គេ​បានឃើញ​ថា មិត្តភក្តិ​របស់​ខ្លួន​កំពុង​លង់​ទឹក​ ក្មេង​ប្រុស​អាយុ​៣​ឆ្នាំ​ និង​ក្មេង​ស្រី​អាយុ​៥​ឆ្នាំ​ បាន​រត់​ត្រឡប់​ទៅ​ភូមិ​វិញ​ ហើយ​បាន​ហៅ​គ្រួ សារ​របស់​ពួក​គេ និង​អ្នក​ភូមិ ផ្សេង​ឲ្យ​មក​ជួយ​”។

លោក​ ស៊ឹម ជីវ​ មេ​ឃុំ​ព្រៃ​ទទឹង​ បាន​ឲ្យ​ដឹង​​ថា​ អ្នកភូមិ​បាន​ទៅ​ដល់​កន្លែង​កើត​ហេតុ​យឺត​ពេក​ ទើប​មិន​អាច​ជួយ​ក្មេង​ទាំាង​បួន​នាក់​នោះ​​បាន​។

កាល​ពី​ថ្ងៃ​សុក្រ​និង​ថ្ងៃ​អាទិត្យ​ ក្មេង​បួន​នាក់​ផ្សេង​ទៀត​ ក៏​បាន​លង់​ទឹក​ស្លាប់​នៅ​ក្នុង​ហេតុ​ការណ៍​ពីរ​ដាច់​ឡែក​ពី​គ្នា​ ក្នុង​ខេត្ត​កំពង់​ចាម​ និង​ខេត្ត​កណ្តាល​ផង​ដែរ​។ ក្មេង​ប្រុស​ពីរ​នាក់​ និង​ក្មេង​ស្រី​ពីរ​នាក់​ អាយុ​ចន្លោះ​ពី​១០ឆ្នាំ​ដល់​១៣​ឆ្នាំ​ បាន​លង់​ទឹក​ស្រះ​ដ៏​តូច​នៅ​​​ក្បែរ​ភូមិ​របស់​ពួកគេ​។​ ហើយ​បើ​យោង​តាម​អង្គការ​ យូនីសេហ្វ បាន​ឲ្យ​ដឹង​ថា ក្មេង​ៗ​ដែល​​ស្លាប់​ដោយ​សារ​លង់​ទឹកគឺកើត​មាន​យ៉ាង​ញឹក​ញាប់​បំផុត​។

តំណាង​របស់​អង្គការ​ យូនីសេហ្វ បាន​លើក​​​ឡើង​នៅ​ក្នុងអុីម៉េលមួយ​ថា “ក្មេង​ៗ​ភាគ​ច្រើន​ដែល​ស្លាប់​ដោយ​សារ​លង់​ទឹកនៅ​ក្នុង​ប្រទេស​កម្ពុជា​ គឺ​មាន​អាយុ​ចន្លោះ​ពី​១​ឆ្នាំ​ដល់​៤​ឆ្នាំ​។ ហើយ​នៅ​ក្នុង​ចំណោម​ក្មេង​ៗ​ មាន​អាយុ​ចន្លោះ​ពី​១​ឆ្នាំ​ដល់​៤​ឆ្នាំ​នេះ​ មាន​៨០​ភាគ​​រ​យ​បាន​លង់​ទឹក​ស្លាប់​ ចម្ងាយ​ប្រហែល​២០​​មែត្រ​ពី​ផ្ទះ​របស់​ពួក​គេ​ ដោយ​សារ​តែ​អណ្តូង​​​គ្មាន​របង​ព័ទ្ធ​ជុំ​វិញ​ ឬក៏​គ្មាន​គម្របពាង​ទឹក​ រណ្តៅ​​​​​​ ស្រះ​ និង​អាង​ទឹក​ផ្សេង​ៗ​ជាដើម​”។

យោង​តាម​របាយការណ៍​ស្ទង់មតិ​ថ្នាក់​ជាតិ​មួយ​ស្តី​ពី​ការ​លង់​ទឹក​ដែល​មានឈ្មោះ​ថា “ការស្ទង់​មតិ​ស្តី​ពី​គ្រោះ​ថ្នាក់​ និង​ការ​រង​របួស​នៅក្នុង​ប្រទេស​កម្ពុជា”  (​ Cambodia Accident and Injury Survey) ធ្វើ​ឡើង​ដោយ​រដ្ឋាភិបាល​និង​អង្គការ យូនីសេហ្វ កាល​ពី​ឆ្នាំ​២០០៧​ បាន​​​​បង្ហាញ​ថា ក្មេង​ៗ​ប្រហែល​ប្រាំមួយនាក់​បាន​លង​​់​​ទឹក​​ស្លាប់​ជា​រៀង​រាល់​ថ្ងៃ​នៅ​ក្នុង​ប្រទេស​កម្ពុជា​ ហើយ​តួលេខ​សរុប​នៃ​ការ​ស្លាប់​ប្រចាំ​ឆ្នាំ​វិញ​ មាន​ប្រហែល​២.០០០នាក់​។ ការ​ស្ទង់មតិ​នេះ​ បាន​សន្និដ្ឋាន​ថា​ ក្មេងៗ​មាន​អាយុ​លើស​ពី​១២​ខែ ដែល​​​ស្លាប់​ដោយ​សារ​ការ​លង់ទឹក​ គឺ​មាន​ច្រើន​ជាងការ​ស្លាប់​ដោយ​សារ​​​​មូល​ហេតុ​ផ្សេងៗ​ទៀត​ ​ព្រោះ​​ជនរង​គ្រោះ​ប្រហែល​​​៩៥​ភាគរយ​ ដែល​មាន​អាយុុ​លើស​ពី​៤​ឆ្នាំ​ មិនចេះ​ហែល​ទឹកឡើយ​​។

តំណាង​អង្គការ​ យូនីសេហ្វ ​បាន​សរសេរ​ថា “ ក្មេង​ៗ​ជា​ច្រើន​នៅ​ក្នុង​ប្រទេស​​កម្ពុជា​មិនដែល​រៀន​ហែល​ទឹក​ឡើយ​ ហើយក្មេងៗ​ ដែល​មាន​អាយុ​ចាប់​ពី​៥​ឆ្នាំ​ដល់​៩​ឆ្នាំ​ គឺ​មាន​ភាគ​រយ​តិច​ណាស់​ដែលចេះ​ហែល​ទឹក​។ តែ​ទោះ​ជា​យ៉ាង​ណា​ ក្មេង​ៗ​ដែល​បាន​លង់ទឹក​ស្លាប់​ គឺ​មិនមែន​សុទ្ធតែ​ដោយ​សារ​មិន​ចេះ​ហែល​ទឹក​ទំាង​អស់​នោះ​ទេ​ ប៉ុន្តែ​កង្វះ​ការ​មើល​ថែ​ឲ្យ​បាន​ដិត​ដល់​ និង​កង្វះ​វិធាន​ការ​ការពារ​សុវត្ថិភាព​ ក៏​ជា​ផ្នែក​មួយ​ផង​ដែរ​”៕ស៊ុយឈាង

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស