កាលពីថ្ងៃអង្គារ សាលាឧទ្ធរណ៍បានបើកសវនាការជំនុំជម្រះរឿងក្ដីគ្រូបង្រៀនម្នាក់ដែលត្រូវបានផ្ដន្ទាទោសឲ្យជាប់ពន្ធនាគាររយៈពេល១០ឆ្នាំ កាលពីឆ្នាំ២០១០ ពីបទចាប់រំលោភក្មេងស្រីអាយុ៩ឆ្នាំម្នាក់នៅក្នុងបន្ទប់ទឹកសាលាគ្រីស្ទាន ដែលគាត់បានបង្រៀននៅទីនោះ។
គាំ កុសល អាយុ៣០ឆ្នាំត្រូវបានកាត់ឲ្យជាប់ទោសពីបទចាប់រំលោភក្មេងស្រីរងគ្រោះកាលពីខែវិច្ឆិកា ឆ្នាំ២០០៩ នៅសាលារៀនមួយស្ថិតនៅក្នុងសង្កាត់ច្បារអំពៅ២ ខណ្ឌមានជ័យ។ គាត់បានប្រាប់តុលាការកាលពីម្សិលមិញថា គាត់មិនបានចាប់រំលោភក្មេងស្រីនោះទេ ហើយបានស្នើសុំឲ្យតុលាការលើកលែងការចោទប្រកាន់។ គាត់បាននិយាយថា “ខ្ញុំមិនបានចាប់រំលោភក្មេងស្រីរងគ្រោះទេព្រោះនៅថ្ងៃកើតហេតុនោះ នាងមិនបានមករៀនទេ”។
លោក អឿង រិទ្ធា មេធាវីការពារលោកគាំ កុសល បានមានប្រសាសន៍ថា ការផ្តល់សក្ខីកម្មពីសាក្សីបានបញ្ជាក់ពីរឿងរា៉វរបស់កូនក្ដីលោកថា ក្មេងស្រីរងគ្រោះមិនបានមករៀនទេ នៅថ្ងៃនោះ។ លោក រិទ្ធា បានបន្ថែមថា ការធ្វើកោសល្យវិច័យបានបង្ហាញថា សន្ទះព្រហ្មចារីយ៍របស់ក្មេងស្រីនោះដាច់រហែកមែន ប៉ុន្តែថា ការដាច់រហែកនេះអាចបណ្ដាលមកពីការដួលកង់ក៏ថាបាន។
លោក អុឹម សុផាន ព្រះរាជអាជ្ញាសាលាឧទ្ធរណ៍ បានមានប្រសាសន៍ថា លោកជឿថា មិនមានភ័ស្តុតាងគ្រប់គ្រាន់ដើម្បីគាំទ្រការកាត់ឲ្យលោក គាំ កុសល ជាប់ទោសទេ ដោយសារមិនមានសាក្សីឃើញបទល្មើសនោះ។ លោកបានមានប្រសាសន៍ថា វាលំបាកជឿណាស់ថា ក្មេងស្រីអាយុ៩ឆ្នាំត្រូវបានចាប់រំលោភ ហើយមិនស្រែកឲ្យគេជួយនោះ”។
លោកចៅក្រម ញួង ថុល មានប្រសាសន៍ថា តុលាការនឹងប្រកាសសាលក្រមនៅថ្ងៃទី១៧ ខែកុម្ភៈ៕ សារុន