មន្ត្រីបានលើកឡើងកាលពីម្សិលមិញថា ក្រសួងមហាផ្ទៃបានផ្អាកប្រតិបត្តិការរបស់មណ្ឌលកុមារកំព្រាមួយ បន្ទាប់ពីខ្លួនបានរកឃើញថា នាយកអង្គការនេះបានឃុបឃិតគ្នាជាមួយទីភ្នាក់ងារជ្រើសរើសពលករមួយដើម្បីបោកប្រាស់ពលករចំណាកស្រុកដោយប្រមូលបានប្រាក់ប្រមាណ៦០០.០០០ដុល្លារ។
ក្រសួងមហាផ្ទៃបានសរសេរនៅក្នុងលិខិតមួយច្បាប់ចុះហត្ថលេខាដោយលោក ប៉ុល លឹម រដ្ឋលេខាធិការក្រសួងមហាផ្ទៃកាលពីថ្ងៃទី១៧ ខែមករា ថា “ក្រសួងមហាផ្ទៃសុំផ្អាកជាប ណ្ដោះអាសន្នរាល់សកម្មភាពទាំងអស់របស់មណ្ឌលកុមារកំព្រាមិត្តយើង” ដែលមានទីតាំងស្ថិតក្នុងស្រុកព្រៃកប្បាស ខេត្តតាកែវ ព្រមទាំងសាខាចំនួនប្រាំមួយរបស់អង្គការនេះ ដែលមាននៅក្នុងខេត្តព្រះសីហនុ ខេត្តបាត់ដំបង ខេត្តសៀមរាប ខេត្តកំពត ខេត្តកំពង់ចាម និងនៅក្នុងរាជធានីភ្នំពេញផងដែរ។
លោក ឆាន់ ចាន់សុភ័ក្រ អនុប្រធាននាយកដ្ឋាននយោបាយនៃក្រសួងមហាផ្ទៃបានមានប្រសាសន៍កាលពីម្សិលមិលថា “សាខាទាំងអស់របស់មណ្ឌលកុមារកំព្រាមិត្តយើងត្រូវបានបិទទ្វារ”។ លោកមានប្រសាសន៍ថា គ្មានកុមារស្នាក់នៅមណ្ឌលកុមារកំព្រាទាំងនេះទេ។
យោងតាមលោក ឆាន់ ចាន់សុភ័ក្រ បានឲ្យដឹងទៀតថា ក្រសួងមហាផ្ទៃបានកោះហៅបុរសឈ្មោះ ធឿន សំណាង ដែលជានាយកមណ្ឌលកុមារកំព្រានេះមកធ្វើការសាកសួរ ប៉ុន្តែលោក ធឿន សំណាង បានគេចខ្លួនបាត់រហូតមកទល់ពេលនេះ។ ពេលទូរស័ព្ទទៅមណ្ឌលកុមារកំព្រាទាំងនេះកាលពីម្សិលមិញ គ្មានអ្នកលើកទូរស័ព្ទទេ។
លោកបានមានប្រសាសន៍បន្តថា លោក ធឿន សំណាង ជាមួយនឹងទីភ្នាក់ងារជ្រើសរើសពលករ យូខេន វីន បានសន្យាជួយប្រជាពលរដ្ឋរាប់រយនាក់ដើម្បីធ្វើចំណាកស្រុកទៅបម្រើការងារនៅប្រទេសកូរ៉េខាងត្បូង ប្រសិនបើពួកគេបានបញ្ចប់វគ្គសិក្សាភាសាមួយវគ្គដំបូង។
លោកថ្លែងថា កាលពីខែធ្នូ ក្រុមពលករបានចាប់ផ្ដើមប្ដឹងទៅក្រសួងការងារដោយលើកឡើងថា ទោះបីជាពួកគេបានបង់ប្រាក់ចន្លោះពី១០០ដុល្លារ ទៅ១៥០ដុល្លារសម្រាប់ការសិក្សាភាសាកូរ៉េក៏ដោយ ក៏ទីភ្នាក់ងារ យូខេន វីន មិនបានផ្ដល់ការងារដល់ពួកគេនៅក្នុងប្រទេសកូរ៉េតាមការសន្យាឡើយ។
លោកបានលើកឡើងថា បុរសឈ្មោះ គឹម សុផាត ជានាយកផ្នែកទីផ្សារនិងលោក អួន សារ៉ាត់ អគ្គនាយកក្រុមហ៊ុន យូខេន វីន ត្រូវបានចាប់ខ្លួនជាបន្តបន្ទាប់ ប៉ុន្តែពួកគេបានទម្លាក់កំហុសទៅលើឈ្មោះ ធឿន សំណាង ចំពោះការឆបោកនេះ ដោយលើកឡើងថា ពួកគាត់ក៏ចាញ់បោកគេដែរ ហើយថា លោក ធឿន សំណាង បានបាត់ខ្លួនជាមួយនឹងប្រាក់ប្រមាណ៦០០.០០០ដុល្លារ។
លិខិតរបស់ក្រសួងមហាផ្ទៃមានខ្លឹមសារដូច្នេះថា “ក្រសួងមហាផ្ទៃទទួលបានពាក្យបណ្ដឹងពីលោកស្រី ណុំ សុខហ៊ុន ជាមេធាវីតំណាងឲ្យភាគីដើមបណ្ដឹងរដ្ឋប្បវេណី គឹម សុផាត និង អួន សារ៉ាត់ ដែលបានអះអាងថា ស្ថាបនិកមណ្ឌលកុមារកំព្រាមិត្តយើង (ធឿន សំណាង) បានប្រមូលប្រាក់ពីពលកររាប់រយនាក់ជាថ្នូរនឹងការបញ្ជូនពួកគេទៅធ្វើការនៅបរទេសដោយខុសច្បាប់”។
បច្ចុប្បន្នលោក គឹម សុផាត និងលោក អួន សារ៉ាត់ កំពុងជាប់ឃុំជាបណ្ដោះអាសន្ននៅពន្ធនាគារព្រៃស៕ សុខុម