នគរបាលបានឲ្យដឹងថា មេបញ្ជាការកងរាជអាវុធហត្ថស្រុកម្នាក់នៅក្នុងខេត្តក្រចេះបានបន្សល់ទុកមនុស្សបីនាក់រងរបួសធ្ងន់កាលពីរសៀលថ្ងៃច័ន្ទ បន្ទាប់ពីបុរសមានអាការៈស្រវឹងជោកម្នាក់នេះ បានបើករថយន្តបុកស្ត្រីកំពុងជិះម៉ូតូម្នាក់ ហើយក្រោយមកបានជ្រុលទៅបុកឪពុកម្នាក់ និងកូនប្រុសម្នាក់ ខណៈដែលជននេះបានរត់គេចខ្លួនចេញពីកន្លែងកើតហេតុការណ៍លើកទី១។
ឈ្មោះ ហាវ សាវុធ អាយុ៤៤ឆ្នាំ ជាមេបញ្ជាការកងរាជអាវុធហត្ថស្រុកព្រែកប្រសប់ បានចាកចេញភោជនីយដ្ឋានមួយ។ នៅទីនោះជននេះបានផឹកស្រានៅក្នុងឃុំអូរឫស្សីនៅម៉ោងប្រហែល២រសៀល ហើយប៉ុន្មាននាទីក្រោយមក ជននេះក៏បានធ្វើបាបស្ត្រីម្នាក់ឈ្មោះ កាន់ បូរ័ត្ន អាយុ៣៣ឆ្នាំ ដោយបុកស្ត្រីរូបនោះឲ្យខ្ទាតចេញចម្ងាយ១០ម៉ែត្ររហូតទៅដល់លើថ្នល់ នេះបើយោងតាមលោក ថន ទាត់ នាយរងនគរបាលចរាចរខេត្តក្រចេះ។លោកបានមានប្រសាសន៍ថា “ បន្ទាប់ពីបានបើករថយន្តបុកស្ត្រីរូបនោះ ជននោះមិនបានបញ្ឈប់សកម្មភាពទេ។ ជននោះនៅតែបន្តបើករថយន្តទៅមុខទៀត ហើយនៅពេលជននោះគេចខ្លួន ជននោះព្យាយាមប្រើរថយន្តមួយផ្សេងទៀតនៅឃុំរកាកណ្តាល ហើយក៏បានបើកបុកម៉ូតូមួយទៀត”។
នៅក្នុងឧបទ្ទវហេតុទី២ លោក សិន ចន្ធី អាយុ៥០ឆ្នាំ និងកូនប្រុសរបស់លោកបានរងរបួសជាទម្ងន់ នេះបើយោងតាមលោក ថន ទាត់ ដែលបានឲ្យដឹងបន្ថែមទៀតថា មេបញ្ជាការកងរាជអាវុធហត្ថរូបនេះបានគេចខ្លួនចេញពីកន្លែងឧបទ្ទវហេតុទី២នេះ ក៏ប៉ុន្តែ នៅទីបំផុតជននេះត្រូវបានចាប់ខ្លួន នៅពេលប៉ុនប៉ងជិះស្រឡាងឆ្លងទន្លេមេគង្គ ។
ទោះជាយ៉ាងណា នគរបាលមិនបានឃុំខ្លួនមេបញ្ជាការកងរាជអាវុធហត្ថរូបនេះទេ ដោយសារតែជននេះបានហៅទូរស័ព្ទទៅមេបញ្ជាការរងរាជអាវុធហត្ថរបស់ខ្លួន ដែលបាននិយាយថា កងរាជអាវុធហត្ថនឹងដោះស្រាយបញ្ហានេះ បូករួមទាំងបង់សំណងដល់ជនរងគ្រោះ ប្រសិនបើជននេះត្រូវបានដោះលែង។
លោក ទាត់ បានមានប្រសាសន៍ថា “ យើងបានឃាត់ខ្លួនលោក សាវុធ មុនពេលគាត់ឡើងជិះស្រឡាង ក៏ប៉ុន្តែ យើងគ្រាន់តែរក្សាទុករថយន្តប៉ុណ្ណោះ ដោយសារតែមេបញ្ជាការរងរបស់គាត់សម្របសម្រួលជាមួយយើងកុំឲ្យចាប់ខ្លួនគាត់ ហើយបាននិយាយថា ពួកគេនឹងទទួលខុសត្រូវចំពោះករណីនេះ”។ យោងតាមលោក ទាត់ បានឲ្យដឹងថា ជនរងគ្រោះទាំងបីនាក់ដោយសារឧបទ្ទវហេតុបើករថយន្តបុក ហើយរត់គេចខ្លួនទាំងពីរលើកនេះ កំពុងសម្រាកព្យាបាលជំងឺជាទម្ងន់នៅមន្ទីរពេទ្យ។
លោក ទាត់ បានមានប្រសាសន៍ថា “ អ្នកស្រី បូរ័ត្ន បានកំពុងតែពាក់មួកការពារសុវត្ថិភាព ក៏ប៉ុន្តែ សកម្មភាពនេះមិនលឿនទេ ទើបធ្វើឲ្យមួកការពារសុវត្ថិភាពខ្ទាតចេញពីក្បាល និងមុខរបស់អ្នកស្រី”។ លោកបានឲ្យដឹងទៀតថា ជនរងគ្រោះដែលត្រូវបានរថយន្តបុកដោយអចេតនានេះ ត្រូវបានបញ្ជូនទៅប្រទេសវៀតណាមដើម្បីព្យាបាល។ឪពុកដែលរងរបួសជាទម្ងន់ផងដែរនោះ និងកូនប្រុសរបស់លោកកំពុងតែត្រូវបានព្យាបាលនៅខេត្តក្រចេះ។ក្រោយការទំនាក់ទំនងពីម្សិលមិញអំពី ហេតុការណ៍បើករថយន្តបុកហើយរត់គេចខ្លួននេះ លោក ម៉ា ឌឿន មេបញ្ជាការរងកងរាជអាវុធហត្ថខេត្តក្រចេះបានឲ្យដឹងថា វាគឺជាការទទួលខុសត្រូវរបស់កងរាជអាវុធហត្ថក្នុងការដោះស្រាយហេតុការណ៍ដែលពាក់ព័ន្ធនឹងមន្ត្រីរបស់ខ្លួននេះ។
ទោះជាយ៉ាងណា លោក អូ សំអាង នាយនគរបាលក្រុងក្រចេះ បានរិះគន់សេចក្តីសម្រេចរបស់នគរបាលចរាចរ ក្នុងការដោះលែងមេបញ្ជាការកងរាជអាវុធហត្ថរូបនេះ មុនពេលមន្ត្រីរបស់លោកទៅដល់កន្លែង ឆ្លងស្រឡាងនោះ។លោក សំអាង បានមានប្រសាសន៍ថា “ខ្ញុំមិនដឹងថា ហេតុអ្វីបានជាពួកគេមិនចាប់ខ្លួនគាត់ទេ បើទោះជាគាត់ជានរណាក៏ដោយ។ វាជារឿងខុសច្បាប់ ហើយច្បាប់មិនត្រូវការពារជនណាដែលបានបើករថយន្តបុកអ្នកដទៃ ហើយរត់គេចខ្លួន និងមិនគោរពច្បាប់បែបនេះ”។
វប្បធម៌និទណ្ឌភាពតែងតែកើតឡើងជាទូទៅចំពោះករណីបើកបុកហើយរត់។ កាលពីខែវិច្ឆិកា រថយន្ត Lexux SUV របស់លោក ជាម យៀប តំណាងរាស្ត្រគណបក្សប្រជាជន កម្ពុជា បានប៉ះទង្គិចជាមួយម៉ូតូមួយគ្រឿង ជាហេតុបណ្តាលឲ្យអ្នកបើកបរម៉ូតូជាស្ត្រីនោះ បាត់បង់ជីវិត និងបណ្តាលឲ្យស្វាមីរបស់ស្ត្រីរូបនោះរងរបួសជាទម្ងន់។ លោក ជាម យៀប បានណែនាំឲ្យអ្នកបើកបររបស់លោកចាកចេញពីកន្លែងគ្រោះថ្នាក់ ហើយក្រោយមកទៀត ក៏បានឲ្យ មេធាវីរបស់លោកទំនាក់ទំនងជាមួយនគរបាល៕ ប៊ុននី