នគរបាលបានឲ្យដឹងកាលពីម្សិលមិញថា មន្ត្រីពន្ធនាគារខេត្តបន្ទាយមានជ័យម្នាក់បានរងរបួសកាលពីថ្ងៃអង្គារនៅពេលអនុប្រធានសន្តិសុខពន្ធនាគារម្នាក់បាញ់គាត់ត្រូវចំជើង។
យោងតាម លោក សិទ្ធិ លួស ស្នងការរងនគរបាលខេត្តបន្ទាយមានជ័យបានឲ្យដឹងថា លោក ឈន ឈឿន ប្រធានការិយាល័យដឹកជញ្ជូនពន្ធនាគារបានផឹកស៊ីជាមួយលោក មឿន រៀន អនុប្រធានសន្តិសុខនៅម៉ោងប្រហែល៧ និង៣០នាទីយប់ថ្ងៃអង្គារ ស្រាប់តែលោក មឿន រៀន បានយកកាំភ្លើងអាកា-៤៧បាញ់គាត់ចំភ្លៅតែម្តង។ លោកបានមានប្រសាសន៍ថា “មិនមានការឈ្លោះគ្នា ឬការសងសឹកអ្វីទេ។ ខ្ញុំគិតថា ពួកគេគ្រាន់តែសម្ញែងកំាភ្លើងដាក់គ្នានៅពេលពួកគេផឹងស៊ីតែប៉ុណ្ណោះ”។ លោក សិទ្ធិ លួស បានមានប្រសាសន៍ថា លោក មឿន រៀន សារភាពថា គាត់បានបាញ់មែន ប៉ុន្តែបានអះអាងថា វាជាការចៃដន្យទេ ពីព្រោះគាត់មិនដឹងថា កាំភ្លើងបញ្ចូលគ្រាប់ហើយទេ។លោកបានបន្ថែមថា លោក មឿន រៀន នឹងត្រូវបញ្ជូនទៅតុលាការនៅថ្ងៃនេះ។
លោក ហ៊ិន សុផល ប្រធានពន្ធនាគារបានមានប្រសាសន៍ថា “លោក ឈន ឈឿន បានរងរបួសត្រង់ភ្លៅស្ដាំ ប៉ុន្តែឥឡូវនេះបានគ្រាន់បើហើយ បន្ទាប់ពីសម្រាកព្យាបាលនៅមន្ទីរពេទ្យ”។នៅពេលសួរថា ហេតុអ្វីបុគ្គលិកមានកាំភ្លើង លោក សុផល បានឆ្លើយថា “ វាជាកំាភ្លើងដែលយើងបានប្រគល់ឲ្យបុគ្គលិកដើម្បីយាមពន្ធនាគារ…។ វាជាកំាភ្លើងរបស់អង្គភាព”៕ សារុន