អ្នកភូមិ និងអាជ្ញាធរបានឲ្យដឹងថា កាលពីម្សិលមិញ អាជ្ញាធរស្រុកពេជ្រាដា ខេត្តមណ្ឌលគិរី បានបិទផ្លូវមិនឲ្យអ្នកភូមិជនជាតិដើមភាគតិចធ្វើដំណើរទៅក្រុងសែនមនោរម្យ ដើម្បីទៅចូលរួមសកម្មភាពតវ៉ាឲ្យមានការបញ្ឈប់សកម្មភាពកាប់ឈើខុសច្បាប់ទេ។
យោងតាមសកម្មជនជនជាតិដើមភាគតិចព្នង និងលោក ប្លាង ស៊ីន អ្នករៀបចំសកម្មភាពតវ៉ានេះបានឲ្យដឹងថា អ្នកភូមិជនជាតិដើមភាគតិចប្រហែល៣០០នាក់បានមានផែនការចូលរួមសកម្មភាពតវ៉ានៅភ្នំដោះក្រមុំ នៅក្រុងសែនមនោរម្យ។ក៏ប៉ុន្តែ សកម្មជនទាំងនេះ និងលោក ស៊ីន បានឲ្យដឹងបន្ថែមទៀតថា ដំណើររបស់អ្នកភូមិភាគច្រើនត្រូវបានបង្វែរទិសដោយនគរបាលចរាចរ និងអាជ្ញាធរមូលដ្ឋានដែលបានបិទផ្លូវនៅតំបន់ក្រៅក្រុង។
លោក ប្លាង បានមានប្រសាសន៍ឲ្យដឹងដូច្នេះថា “ សហគមន៍បីមកពីឃុំបីផ្សេងគ្នាត្រូវបានបញ្ឈប់ និងបញ្ជាដោយអាជ្ញាធរឲ្យត្រឡប់ទៅភូមិរបស់ខ្លួនវិញ”។
លោកបានលើកឡើងបន្ថែមទៀតថា ប្រជាជនប្រហែល១០០នាក់បានចូលរួមសកម្មភាពតវ៉ាដែលដំណើរការទៅដោយសន្តិវិធីនេះ។
លោក យិត សារិន មេឃុំប៊ូស្រា ស្រុក ពេជ្រាដា បានបញ្ជាក់កាលពីម្សិលមិញថា អ្នកភូមិត្រូវបានទប់ស្កាត់មិនឲ្យចូលរួមសកម្មភាពតវ៉ា ក៏ប៉ុន្តែ សេចក្តីសម្រេចឲ្យទប់ស្កាត់នេះធ្វើឡើងនៅថ្នាក់ស្រុក។ លោក សារិន បានមានប្រសាសន៍ឲ្យដឹងដូច្នេះថា “ អាជ្ញាធរដែលបានបញ្ឈប់ប្រជាជនមិនឲ្យទៅតវ៉ាគឺជាមន្ត្រី និងនគរបាលថ្នាក់ស្រុក មិនមែនមន្ត្រីឃុំទេ”។
នគរបាល និងមន្ត្រីស្រុកមិនអាចទំនាក់ទំនងធ្វើសេចក្តីអត្ថាធិប្បាយបានទេកាលពីម្សិលមិញ ក៏ប៉ុន្តែ កាលពីថ្ងៃអង្គារ លោក យឹម លុច អភិបាលរងខេត្តមណ្ឌលគិរីបានឲ្យដឹងថា បទបញ្ជានេះត្រូវបានប្រគល់ឲ្យអាជ្ញាធរថ្នាក់ស្រុក ឲ្យទប់ស្កាត់អ្នកភូមិមិនឲ្យចូលរួមសកម្មភាពតវ៉ានេះ ពីព្រោះវាអាច “ ប៉ះពាល់វិស័យទេសចរណ៍”។
លោក គ្រិស ឃ្វីន អាយុ៤១ឆ្នាំ បានបញ្ជាក់ថា បទបញ្ជាទាំងនោះ ត្រូវបានធ្វើឡើង ខណៈដែលគាត់ និងអ្នកភូមិប្រាំពីរនាក់ទៀតត្រូវបាននគរបាលចរាចរ និងនគរបាលស្រុកបញ្ឈប់ ខណៈដែលពួកគេចូលជិតដល់ក្រុងមនោរម្យ។លោក ឃ្វីន បានមានប្រសាសន៍ថា “នៅពេលខ្ញុំនិយាយប្រាប់ពួកគេថា យើងនឹងទៅចូលរួមការជួបជុំដោយសន្តិវិធីមួយ ដើម្បីគាំទ្រការបញ្ចប់ការកាប់បំផ្លាញព្រៃឈើ និងរបាំប្រពៃណីមួយ ពួកគេនៅតែនិយាយថា
ពួកគេទទួលបទបញ្ជាពីថ្នាក់ដឹកនាំខេត្ត ឲ្យបញ្ឈប់យើង”។
យោងតាមលោក សុខ រដ្ឋា អ្នកសម្របសម្រួលអង្គការសិទ្ធិមនុស្សអាដហុក ប្រចាំខេត្តនេះបានឲ្យដឹងថា ព្រៃនៅខេត្តមណ្ឌលគិរី ដែលភាគច្រើនការពារដោយប័ណ្ណកម្មសិទ្ធិដីសហគមន៍ កំពុងស្ថិតក្រោមការគំរាមកំហែងកាន់តែកើនឡើងពីអ្នកកាប់ឈើ។លោករដ្ឋាបានឲ្យដឹងថា “តំបន់ព្រៃឈើដែលត្រូវបានចុះឈ្មោះសម្រាប់ប័ណ្ណសហកម្មសិទ្ធិ កំពុងត្រូវគេកាប់…”។អ្នកសម្របសម្រួលអង្គការអាដហុករូបនេះបានមានប្រសាសន៍ឲ្យដឹងដូច្នេះទៀតថា “ នៅប៉ុន្មានឆ្នាំខាងមុខ ព្រៃទាំងអស់នឹងត្រូវសាបសូន្យ ប្រសិនបើគ្មានយន្តការបញ្ឈប់ពេលនេះទេ”៕ប៊ុននី