កាលពីម្សិលមិញ លោកនាយករដ្ឋមន្ត្រី ហ៊ុន សែន បានបង្ហាញសេចក្តីលម្អិតកាន់តែច្រើននៅក្នុងផែនការរបស់លោក សម្រាប់ដាក់ចេញនូវកម្មវិធីកែទម្រង់នយោបាយជាច្រើន បន្ទាប់ពីគណបក្សប្រជាជនកម្ពុជាបានទទួលជ័យជម្នះមិនច្រើន ក្នុងព្រឹត្តិការណ៍បោះឆ្នោតកាលពីថ្ងៃទី២៨ ខែកក្កដាឆ្នាំមុន ក្នុងនោះមានដូចជា ការបង្កើតក្រុមការងារថ្នាក់ជាតិថ្មីមួយ និងការបង្កើតវេទិកាសាធារណៈ ដើម្បីប្រមូលធនធាននៅក្នុងខេត្តនីមួយៗ ដោយចាប់ផ្តើមចាប់ពីខែក្រោយ។
លោក ហ៊ុន សែន បានពង្រីកសកម្មភាពក្នុងផែនការរបស់លោក អំឡុងកិច្ចប្រជុំរយៈពេលបីម៉ោងកន្លះ ជាមួយមន្ត្រីជាន់ខ្ពស់នានា ដែលមកពីក្រសួងនីមួយៗនៅក្នុងអគារការិយាល័យរបស់លោកគឺទីស្តីការគណៈរដ្ឋមន្ត្រី (វិមានសន្តិភាព) ក្នុងរាជធានីភ្នំពេញ។
ក្រោយកិច្ចប្រជុំ លោក សក់ សេដ្ឋា រដ្ឋលេខាធិការក្រសួងមហាផ្ទៃ បានឲ្យដឹងថា កិច្ចប្រជុំនេះគឺជាកិច្ចប្រជុំពិភាក្សាតាមដានសកម្មភាពរបស់មន្ត្រីរដ្ឋាភិបាល បន្ទាប់ពីលោក ហ៊ុន សែន បានថ្លែងសុន្ទរកថារយៈពេលប្រាំមួយម៉ោង នៅក្នុងខុទ្ទកាល័យថ្មីរបស់លោក កាលពីចុងខែកញ្ញាឆ្នាំមុន។ អំឡុង ពេលកំពុងតែថ្លែងសុន្ទរកថា ដែលត្រូវបានផ្សព្វផ្សាយតាមកញ្ចក់ទូរទស្សន៍ លោកនាយករដ្ឋមន្ត្រី ហ៊ុន សែន ដែលបានមើលទៅហាក់ដូចជាអស់កម្លាំងក្នុងរយៈពេលតែពីរខែក្រោយពេលមានការប្រកាសលទ្ធផលបោះឆ្នោតដ៏អាក្រក់ បំផុតសម្រាប់គណបក្សប្រជាជនកម្ពុជារបស់លោក សម្រាប់រយៈពេល២០ឆ្នាំកន្លងមកនេះ បានសន្យាអនុវត្តកម្មវិធីកំណែទម្រង់មិនមានភាពច្បាស់លាស់ និងបានជំរុញដោយប្រើន័យធៀបឲ្យមន្ត្រីពុករលួយទាំងឡាយ “ដុសខ្លួនឯងឲ្យស្អាត” និង “ព្យាបាលជំងឺរបស់យើងឲ្យជា”។
លោក សក់ សេដ្ឋា បានមានប្រសាសន៍ថា“ ក្រុមការងារថ្នាក់ជាតិរបស់យើង នឹងចុះមូលដ្ឋាន ដើម្បីធ្វើការជាមួយអាជ្ញាធរថ្នាក់ខេត្ត ដោយចាប់ផ្តើមក្នុងខែកុម្ភៈ។ យើងនឹងរៀបចំវេទិកាសាធារណៈដើម្បីពិភាក្សាជាមួយប្រជាជន នៅតាមបណ្តាខេត្ត។ យើងគិតថា នេះគឺជាយុទ្ធសាស្ត្រមួយក្នុងការកែទម្រង់រដ្ឋាភិបាល”។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានលើកឡើងថា លោកមិនទាន់អាចផ្តល់បញ្ជីរាយនាមសមាជិកក្នុងក្រុមការងារថ្មីនេះបានទេ ក៏ប៉ុន្តែ សមាជិកម្នាក់ៗត្រូវបានដាក់បន្ទុកឲ្យទទួលខុសត្រូវក្នុងខេត្តរបស់ខ្លួន។ លោកបានឲ្យដឹងបន្ថែមទៀតថា លោក ស ខេង រដ្ឋមន្ត្រីក្រសួងមហាផ្ទៃ នឹងទទួលខុសត្រូវលើការប្រមូលធនធានពីខេត្តបាត់ដំបង និងខេត្តព្រៃវែង លោក ទៀ បាញ់ រដ្ឋមន្ត្រីក្រសួងការពារជាតិ នឹងទទួលខុសត្រូវលើការប្រមូលធនធានពីខេត្តសៀមរាប និងលោកឧបនាយករដ្ឋមន្ត្រី សុខ អាន នឹងទទួលខុសត្រូវលើការប្រមូលធនធានពីខេត្តតាកែវ។លោកបានឲ្យដឹងបន្ថែមបន្តទៀតថា ក្រុមការងារនេះនឹងមានអាណត្តិពេញរយៈពេលប្រាំឆ្នាំរបស់រដ្ឋាភិបាលជ្រើសតាំងថ្មី។លោកបានមានប្រសាសន៍ថា “ ក្រុមការងារថ្នាក់ជាតិនេះ នឹងចុះមូលដ្ឋានដើម្បីធ្វើការងារជាមួយអាជ្ញាធរមូលដ្ឋាន នៅក្នុងសប្តាហ៍ទី២នៃខែកុម្ភៈខាងមុខ ហើយយើងនឹងធ្វើការរហូតដល់ដំណាច់អាណត្តិថ្មីនេះ”។
ទោះជាយ៉ាងណា អាណត្តិថ្មីនេះក្នុងពេលបច្ចុប្បន្ន ត្រូវបានបង្កើតឡើងដោយមានតែគណបក្សប្រជាជនកម្ពុជា និងតែតំណាងរាស្ត្រលើសពាក់កណ្តាលបន្តិចនៃចំនួនតំណាងរាស្ត្រទាំង១២៣រូប ដែលត្រូវបានជ្រើសតាំងតាមរយៈការបោះឆ្នោតកាលពីខែកក្កដា។
តំណាងរាស្ត្រជាប់ឆ្នោត៥៥រូបមកពីគណបក្សសង្គ្រោះជាតិ ដែលជាគណបក្សប្រឆាំង កំពុងបដិសេធមិនទទួលយកអាសនៈរបស់ខ្លួន រហូតទាល់តែវិវាទជុំវិញបញ្ហាបោះឆ្នោតត្រូវបានដោះស្រាយ។ គួរបញ្ជាក់ថា តំណាងរាស្រ្តទាំងនេះចោទប្រកាន់គណបក្សប្រជាជានកម្ពុជាដែលជាគណបក្សកាន់អំណាច ថា បានលួចបន្លំសន្លឹកឆ្នោតយ៉ាងច្រើន។
ដោយសារតែគណបក្សប្រឆាំងកំពុងធ្វើពហិការសភា លោក ផៃ ស៊ីផាន បានលើកឡើងថា វាជារឿងធម្មតាទេ ដែលសមាជិកគណបក្សប្រឆាំងត្រូវបានដាក់ឲ្យនៅក្រៅក្រុមការងារថ្មី ដែលនឹងធ្វើការងារក្នុងកម្មវិធីកែទម្រង់រដ្ឋាភិបាលនេះ។ លោកបានមានប្រសាសន៍អំពីមូលហេតុដែលគណបក្សសង្គ្រោះជាតិមិនពាក់ព័ន្ធក្នុងរឿងនេះថា “ នេះគឺជារឿងរបស់ពួកគេ។ នេះគឺជារដ្ឋាភិបាលស្របច្បាប់មួយដែលត្រូវបានបង្កើតឡើងដោយរដ្ឋសភាស្របច្បាប់ ហើយរដ្ឋសភានេះត្រូវបានបង្កើតឡើងដោយព្រះមហាក្សត្រ”។
លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានលើកឡើងថា រដ្ឋាភិបាលដែលបានប្រើប្រាស់ទាហាន និងនគរបាលរបស់ខ្លួន ក្នុងការបង្ក្រាបដោយហិង្សាទៅលើសកម្មភាពតវ៉ាជាច្រើន ក្នុងរយៈពេលប៉ុន្មានសប្តាហ៍ចុងក្រោយនេះ នឹងមិនទទួលបានការស្វាគមន៍ក្នុងអារម្មណ៍ពិតរបស់សាធារណជនអំឡុងវេទិកាពិភាក្សាដែលនឹងត្រូវបានរៀបចំឡើងនាពេលខាងមុខទេ។
អ្នកនាំពាក្យគណបក្សប្រឆាំងរូបនេះបានមានប្រសាសន៍ថា “ ខ្ញុំយល់ឃើញថា ពួកគាត់[ប្រជាជនខ្មែរ] នឹងមិនហ៊ានផ្តល់យោបល់របស់ពួកគាត់ទេ ពីព្រោះពួកគាត់មានអារម្មណ៍ភ័យខ្លាច”។ លោក យ៉ែម បុញ្ញឫទ្ធិ បានមានប្រសាសន៍បន្ថែមដូច្នេះថា “ ប្រសិនបើពួកគេ[គណបក្សប្រជាជនកម្ពុជាគ្រប់គ្រងអំណាច] ចង់កែទម្រង់រដ្ឋាភិបាលនោះ អ្វីដែលពួកគេត្រូវធ្វើគឺត្រូវទទួលស្គាល់ការពិតគ្រប់យ៉ាងទាក់ទងនឹងអ្វីដែលពួកគេធ្វើ”៕សុធា