នគរបាលនៅខេត្តព្រះវិហារបានឲ្យដឹង កាលពីម្សិលមិញថា ស្ត្រីអាយុ៣៣ឆ្នាំម្នាក់កាលពីម្សិលមិញបានសារភាពថា ខ្លួនពិតជាបានសម្លាប់កូនប្រុសចុងអាយុ១១ឆ្នាំរបស់ខ្លួនប្រាកដមែន ដើម្បីជាការសងសឹកប្តីដែលធ្វើបាបលើរាងកាយរបស់ខ្លួន។
លោក កែវ ចំរើន ស្នងការនគរបាលខេត្តព្រះវិហារ បានឲ្យដឹងថា ឈ្មោះ រ៉ន សាមីនបានសារភាពថា ខ្លួនពិតជាបានសម្លាប់កុមារ ឈាន ង៉ា ដោយយកដំបងធំមួយវាយក្បាល កុមារនោះ ហើយទម្លាក់កូនប្រុសរូបនេះចូល ក្នុងស្រះមួយ ដើម្បីឲ្យលង់ទឹកស្លាប់។លោកស្នងការរូបនេះថ្លែងថា “ បន្ទាប់ពីត្រូវបានចាប់ខ្លួន ជនសង្ស័យបានសារភាពនូវអ្វីដែលបានកើតឡើងនៅថ្ងៃនោះ”។ យោងតាមលោក ចំរើន បានឲ្យដឹងថា ជនសង្ស័យបាននិយាយថា ខ្លួនមានផែនការធ្វើឃាត និងបានសុំឲ្យកូនប្រុសចុងរបស់ខ្លួនទៅរកត្រីក្នុងស្រះមួយនៅរសៀលថ្ងៃអង្គារ នៅក្នុងភូមិស្រយ៉ូងជើង ឃុំស្រយ៉ូង។
ឪពុករបស់ក្មេងប្រុសរូបនេះបានដាក់ពាក្យបណ្តឹងដែលនាំឲ្យឈានទៅរកការចាប់ខ្លួន។ គិតមកទល់ត្រឹមល្ងាចម្សិលមិញនេះជនសង្ស័យឈ្មោះ សាមីន កំពុងត្រូវបានឃុំខ្លួនជាបណ្តោះអាសន្ននៅស្នងការដ្ឋាននគរបាលខេត្ត ដើម្បីរង់ចាំបញ្ជូនទៅផ្តន្ទា ទោសនៅសាលាដំបូងខេត្ត។
លោក ឡោ ចាន់ អ្នកសម្របសម្រួលរបស់អង្គការសិទ្ធិមនុស្សអាដហុក ប្រចាំនៅខេត្តព្រះវិហារបានឲ្យដឹងថា អង្គការរបស់លោក នឹងស៊ើបអង្កេតករណីនេះ៕ប៊ុននី