យោងតាមរបាយការណ៍ដែលមជ្ឈមណ្ឌលជាអាកាសចរណ៍អាស៊ីប៉ាស៊ីហ្វិក (Centre for Asia Pacific Aviation) ហៅកាត់ CAPA បានចេញផ្សាយកាលពីថ្ងៃអង្គារ បានបង្ហាញថា ទីផ្សារអាកាសចរណ៍របស់ប្រទេសកម្ពុជាមានសន្ទុះកើនឡើងយ៉ាងលឿនសម្រាប់រយៈពេលពីរឆ្នាំជាប់គ្នាកន្លងមកនេះ ដោយសារក្រុមហ៊ុនអាកាសចរណ៍ជាតិ និងអន្តរជាតិបានបង្កើនផ្លូវហោះហើររបស់ខ្លួនទៅកាន់ប្រទេសចិន ស្របពេលដែលមានប្រជាជនចិនកាន់តែច្រើនមកទស្សនាប្រទេសកម្ពុជា។
ក្នុងឆ្នាំ២០១៣ ប្រទេសកម្ពុជាសម្រេចបានកំណើននៃចំនួនអ្នកដំណើរ១៨ភាគរយ ដោយសារតែអាកាសយានដ្ឋានពាណិជ្ជកម្មបីនៅក្នុងប្រទេសកម្ពុជាទទួលបានអ្នកដំណើរ៥,១លាននាក់ ពីកំណើនចំនួន៤,៣លាននាក់ កាលពីឆ្នាំ២០១២ នេះបើយោងតាមទិន្នន័យទទួលបានពីក្រុមហ៊ុនអាកាសយានដ្ឋានកម្ពុជា ដែលធ្វើប្រតិបត្តិការអាកាសយានដ្ឋានអន្តរជាតិភ្នំពេញ សៀមរាប និងខេត្តព្រះសីហនុ។
របាយការណ៍របស់មជ្ឈមណ្ឌល CAPA បានបង្ហាញថា ទោះបីជាភ្ញៀវទេសចរវៀតណាម ដែលភាគច្រើនមកទស្សនាប្រទេសកម្ពុជាតាមផ្លូវគោកនោះ នៅតែមានចំនួនភាគច្រើនក្នុងចំណោមភ្ញៀវទេសចរដែលមកទស្សនាប្រទេសនេះក៏ដោយ ភ្ញៀវទេសចរចិនបាន “កើនឡើងច្រើនជាងគេបំផុតនៅលើទីផ្សារអាកាសចរណ៍របស់ប្រទេសកម្ពុជា”។
យោងតាមតួលេខទទួលបានពីក្រសួងទេសចរណ៍បានបង្ហាញថា ចំនួនភ្ញៀវទេសចរចិនមកទស្សនាប្រទេសកម្ពុជា ក្នុងរយៈពេល១១ខែដើមឆ្នាំមុន មាន៤១៧.២៦១នាក់ ពោលគឺបានកើនឡើង៤០,១ភាគរយបើធៀបនឹងរយៈពេលដូចគ្នាក្នុងឆ្នាំ២០១២ និងចូលរួមចំណែកបាន១១ភាគរយនៃចំនួនភ្ញៀវទេសចរអន្តរជាតិសរុប។
ចំនួនកៅអីដែលត្រូវបានកក់ទុកសរុបនៅក្រុមហ៊ុនអាកាសចរ ដែលដឹកអ្នកដំណើរ ទៅមករវាងប្រទេសកម្ពុជា និងប្រទេសចិន បានកើនឡើងជាង៥០ភាគរយក្នុងឆ្នាំ២០១៣ បើធៀបនឹងឆ្នាំ២០១២ ដែលនេះគឺជាការឆ្លុះបញ្ចាំងឲ្យឃើញពីកំណើននៃវិស័យអាកាសចរណ៍។
ក្រុមហ៊ុនអាកាសចរណ៍ក្នុងស្រុកកម្ពុជាអង្គរអ៊ែ មានចំណាប់អារម្មណ៍បណ្តាក់ទុនបន្ថែមក្នុងស្ថានភាពដែលមានភ្ញៀវទេសចរចិន ដោយបានប្រតិបត្តិការលើផ្លូវហោះហើរទៅកាន់ប្រទេសចិនចំនួនប្រាំក្នុងរយៈពេលប៉ុន្មានខែកន្លងមកនេះ និងមានផែនការបើកផ្លូវហោះហើរទី៦ទៅកាន់ស្រុក ហ្វូហ៊ូ ខេត្តហ្វូចៀន នៅថ្ងៃស្អែក។
គេហទំព័ររបស់ក្រុមហ៊ុនអាកាសចរណ៍ក្នុងស្រុកមួយនេះបានបង្ហាញថា កំណើនដ៏លឿននេះ “ ផ្អែកលើការព្យាករណ៍អំពីកំណើនភ្ញៀវទេសចរចិនដ៏ច្រើន ក៏ដូចជាអ្នកជំនួញដែលមកប្រទេសកម្ពុជាក្នុងរយៈពេលប៉ុន្មានឆ្នាំខាងមុខ”។
របាយការណ៍របស់មជ្ឈមណ្ឌល CAPA បានបង្ហាញថា “ ក្រុមហ៊ុនកម្ពុជាអង្គរអ៊ែ និងសម្រេចបានចំណែកទីផ្សារអាកាសចរណ៍តាមពេលវេលាគ្រោងទុកបានប្រហែល១៩ភាគរយក្នុងខែមេសា ក្នុងឆ្នាំ២០១៤ ពោលគឺកើនឡើងពីប្រហែល១៤ភាគរយ និងសូន្យភាគរយកាលពីប៉ុន្មានខែមុន”។
ក្នុងខែកុម្ភៈឆ្នាំមុន ក្រុមហ៊ុនអាកាសចរណ៍ប្រ៊ីនអ៊ែឡាញ បានចាប់ផ្តើមសេវាកម្មដឹកអ្នកដំណើរទៅកាន់ទីក្រុងសៀងហៃ ហើយកាលពីខែតុលា ក្រុមហ៊ុន ត្រាហ្គុនអ៊ែ បានចាប់ផ្តើមហោះហើរពីទីក្រុងហុងកុងទៅកាន់ប្រទេសកម្ពុជា ហើយកាលពីខែធ្នូ ក្រុមហ៊ុនអាកាសចរណ៍ អ៊ែឆាយណា បានចាប់ផ្តើមហោះហើរពីទីក្រុងប៉េកាំង។
លោក គង់ សុភា ប្រធាននាយកដ្ឋានផែនការ និងស្ថិតិនៃក្រសួងទេសចរណ៍ រំហូរចូលនៃភ្ញៀវទេសចរកើនឡើងដោយសារតែមានឱកាសវិនិយោគ និងសកម្មភាពភ្ញៀវទេសចរ។ លោកបានមានប្រសាសន៍ថា ក្រសួងទេសចរណ៍សង្ឃឹមថា នឹងទាក់ទាញបានភ្ញៀវទេសចរចិនកាន់តែច្រើន ដោយសារតែពួកគេនាំយកនៅប្រាក់ចំណូលយ៉ាងច្រើនមក”។ យោងតាមសេចក្តីព្រាងផែនការចេញផ្សាយកាលពីខែមិថុនាឆ្នាំមុន បានឲ្យដឹងថា ក្រសួងទេសចរណ៍មានបំណងទាក់ទាញភ្ញៀវទេសចរចិនឲ្យបាន១,៣លាននាក់ យ៉ាងយូរក្នុងឆ្នាំ២០១៨។ ផែនការដែលមាន៣៥ទំព័រនេះមានសំណើឲ្យបង្កើនយុទ្ធនាការផ្សព្វផ្សាយក្នុងប្រទេសចិន និងបង្កើនជើងហោះហើរបន្ថែម ព្រមទាំងបង្កើត “ ឆាណាថោន” ថ្មីនៅក្នុងរាជធានីភ្នំពេញ៕ សុធា