ក្រសួងអប់រំ យុវជន និងកីឡា បានព្រមានអាជីវករលក់សៀវភៅនៅទូទាំងប្រទេសឲ្យឈប់លក់សៀវភៅ ដែលត្រូវបានចែកចាយឲ្យសិស្សសាលាដោយមិនគិតថ្លៃ។
ក្រសួងអប់រំ យុវជន និងកីឡា បានចេញសេចក្តីប្រកាសចុះថ្ងៃសុក្រ ពោលគឺទើបតែមួយខែបន្ទាប់លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា លោកកំពុងស៊ើបអង្កេតលើសេចក្តីអះអាងថា ក្រុមមន្ត្រីរដ្ឋាភិបាលកំពុងលួចសៀវភៅសិក្សាពីស្តុករបស់រដ្ឋាភិបាល និងលក់សៀវភៅទាំងនោះឲ្យអាជីវករ។
សេចក្តីប្រកាសចេញផ្សាយកាលពីថ្ងៃសុក្រ ដែលត្រូវបានផ្សព្វផ្សាយតាមទូរទស្សន៍ និងវិទ្យុផងដែរនោះ មានខ្លឹមសារថា “យើងបានឃើញថា សៀវភៅនៅពេលនេះមានលក់នៅតាមទីផ្សារ បណ្ណាល័យ និងតូបលក់សៀវភៅ ក្នុងរាជធានីភ្នំពេញ និងតាមខេត្ត ហើយបញ្ហានេះនឹងមានផលប៉ះពាល់អវិជ្ជ មានយ៉ាងធំមួយលើវិស័យអប់រំ”។
ក្រសួងអប់រំ យុវជន និងកីឡា បានឲ្យដឹងថា សៀវភៅដែលមានពាក្យថា “ហាមលក់ សម្បត្តិរដ្ឋ” បោះពុម្ពលើគម្រប មានគោលបំណងចែកឲ្យសិស្សសាលាដោយឥតគិតថ្លៃ។ អាជីវករណាដែលត្រូវបានរកឃើញថាលក់សៀវភៅនេះដើម្បីប្រាក់ចំណេញ នឹងត្រូវប្រឈមនឹងការរឹបអូសសៀវភៅទាំងនោះ និងផាកពិន័យ។
សេចក្តីប្រកាសនេះមានខ្លឹមសារបន្តថា “ដូច្នេះអ្នកលក់សៀវភៅ និងសាធារណជនទាំងអស់ត្រូវតែឈប់លក់ និងទិញសៀវភៅដែលមានស្លាកថា ‘សម្បត្តិរដ្ឋ’ ”។
កាលពីក្នុងខែធ្នូ របាយការណ៍មួយចេញផ្សាយដោយអង្គការក្រៅរដ្ឋាភិបាលពីរបានបង្ហាញថា មន្ត្រីក្រសួងអប់រំ យុវជន និងកីឡា ថ្នាក់ស្រុកកំពុងលួចសៀវភៅក្រោមមូលនិធិរបស់ធនាគារអភិវឌ្ឍន៍អាស៊ី (ADB)ជាហេតុជំរុញឲ្យធនាគារនេះ និងក្រសួងអប់រំ យុវជននិងកីឡា បើកប្រតិបត្តិការស៊ើបអង្កេតទង្វើមិនសមរម្យរបស់មន្ត្រីទាំងនោះ។
លោក ចាន់ សុភា ប្រធាននាយកដ្ឋានបឋមសិក្សានៃក្រសួងអប់រំ យុវជននិងកីឡា បានមានប្រសាសន៍កាលពីម្សិលមិញថា ក្រសួងមានបំណងចុះធ្វើអធិការកិច្ចជាទៀងទាត់នៅតាមទីផ្សារ និងតូបលក់សៀវភៅ ដោយចាប់ផ្តើមពីសប្តាហ៍នេះទៅ។ លោកបានថ្លែងថា “យើងបានរៀបចំក្រុមការងាររួចហើយ ដើម្បីស្វែងរកអ្នកដែលលក់សៀវភៅនេះ”។ លោកបានបន្ថែមថា ជួនកាល អ្នកលក់សៀវភៅទិញសៀវភៅពីគ្រូបង្រៀន ដែលមិនព្រមប្រគល់សៀវភៅនៅដំណាច់ឆ្នាំសិក្សា។
ទោះជាយ៉ាងណាក៏ដោយ កាលពីម្សិលមិញ អាជីវករមិនភ្ញាក់ផ្អើលឡើយ ដោយបាននិយាយថា ចាប់តាំងពីមន្ត្រីមកពីក្រសួងអប់រំ គ្រូបង្រៀនលក់សៀវភៅឲ្យពួកគេពួកគេមិនដឹងថាធ្វើអ្វីខុសច្បាប់ទេ។
អ្នកស្រី អ៊ុត សុភាព អ្នកលក់សៀវភៅនៅផ្សារចាស់ ក្នុងខណ្ឌដូនពេញ រាជធានីភ្នំពេញបានមានប្រសាសន៍ថា “យើងបាននិងកំពុងទិញសៀវភៅ នៅពេលបវេសនកាលចាប់ផ្តើម ពីអ្នកដែលបាននិយាយថា ខ្លួនមកពីក្រសួងអប់រំ”។ អ្នកស្រី សុភាព បានលក់សៀវភៅមួយឈុតមានបួនក្បាលសម្រាប់សិស្សថ្នាក់ទី៥ដែលមានពាក្យថា “ហាមលក់។ ទ្រព្យសម្បត្តិ រដ្ឋ” លើគម្រប។ អ្នកស្រីបានឲ្យដឹងថា អ្នកស្រីទិញមួយឈុតតម្លៃបួនដុល្លារលក់ចេញ វិញក្នុងតម្លៃ៤,៥០ដុល្លារ។
ឈ្មោះ បូវិសុទ្ធ វ៉នឌី អ្នកលក់សៀវភៅនៅផ្សារនេះដែរ ក៏កំពុងលក់សៀវភៅដែលគេលួចដែរ នៅតូបរបស់គាត់កាលពីម្សិលមិញ។ អ្នកលក់សៀវភៅរូបនេះបានឲ្យដឹងថា “ពេលខ្លះ ខ្ញុំទិញសៀវភៅបានចំនួន២០ក្បាលក្នុងមួយថ្ងៃ នៅពេលបវេសនកាលចាប់ផ្តើម។ ខ្ញុំដឹងថា មានបម្រាម ពីព្រោះសៀវភៅទាំងនេះសម្រាប់ចែកចាយដោយឥតគិតថ្លៃ ប៉ុន្តែប្រសិនបើខ្ញុំមិនទិញទេ ក៏មានអ្នកឯទៀតនឹងទិញដែរ”៕ ប៊ុននី