អ្នកភូមិមានកំហឹងមួយក្រុមនៅក្នុងខណ្ឌសែនសុខ រាជធានីភ្នំពេញ ដែលនាំគ្នាអបអរពិធីបុណ្យចូលឆ្នាំចិនកាលពីល្ងាចថ្ងៃសុក្រ បានចាប់ខ្លួនមន្ត្រីនគរបាលពីរនាក់ដែលពួកគាត់ចោទថា បានរំខានភាពស្ងប់ស្ងាត់។
មុនពេលកើតហេតុ មន្ត្រីនគរបាលទាំងពីរនាក់នេះបានជិះម៉ូតូក្រឡឹងជុំវិញកន្លែងមួយដែលមានការរៀបចំពិធីអបអរបុណ្យចូលឆ្នាំចិន និងបានរោទិ៍ម៉ាស៊ីនម៉ូតូឲ្យលាន់ឮខ្លាំង។ឃើញបែបនោះអ្នកភូមិព្រួយបារម្ភខ្លាចពួកគេបុកក្មេងៗ នេះបើតាមការឲ្យដឹងពីលោក វណ្ណ បឿង នាយរងប៉ុស្តិ៍ព្រែកព្នៅ។
ដំបូងឡើយ អ្នកភូមិបានស្រែកដាក់មន្ត្រីនគរបាលទាំងពីរឲ្យឈប់បង្កសំឡេងរំខាន និងឲ្យប្រយ័ត្នប្រយែងបន្តិច។ ភ្លាមនោះមន្ត្រីនគរបាលម្នាក់ក្នុងចំណោមអ្នកទាំងពីរបានយកកាំភ្លើងខ្លីវាយអ្នកភូមិម្នាក់ជាហេតុធ្វើឲ្យអ្នកភូមិមានកំហឹងកាន់តែខ្លាំង។
លោក វណ្ណ បឿង បាននិយាយថា “ពួកគេជិះម៉ូតូធំមួយគ្រឿង និងមានកាំភ្លើងជាប់ខ្លួនមួយដើម។ មនុស្សប្រហែល៥០នាក់បាននាំគ្នាព័ទ្ធចាប់ពួកគេ ធ្វើឲ្យម្នាក់ក្នុងចំណោមមន្ត្រីនគរបាលទាំងពីរនាក់បាញ់កាំភ្លើងពីរគ្រាប់ឡើងលើ”។ បន្ទាប់មកនគរបាលសង្កាត់នៅក្បែរនោះក៏បានមកដល់កន្លែងកើតហេតុ ដោយនាំអ្នកទាំងពីរទៅប៉ុស្តិ៍នគរបាលដើម្បីធ្វើការសាកសួរ។
លោក ហង្ស វណ្ណី នាយប៉ុស្តិ៍រងទី២ មិនព្រមផ្ដល់ឈ្មោះនគរបាលទាំងពីរទេ ប៉ុន្តែបានបញ្ជាក់ថា ពួកគេជានគរបាលមែន។ លោកបាននិយាយថា “ពួកគេគឺជានគរបាលថ្នាក់ទាប ពីព្រោះពួកគេមានកាំភ្លើង” ដោយបានពន្យាល់ថា អ្នកទាំងពីរបានប្រព្រឹត្តមិនគប្បីបែបនោះដោយសារពួកគេស្រវឹង។
លោក សោម លីថុល នាយការិយាល័យនគរបាលព្រហ្មទណ្ឌខណ្ឌសែនសុខបានឲ្យដឹងថា បន្ទាប់មកទៀត នគរបាលសង្កាត់បានបញ្ជូនពួកគេបន្តទៅអធិការដ្ឋាន ហើយពេលនេះមន្ត្រីនគរបាលទាំងពីរកំពុងត្រូវបានសាកសួរនៅស្នងការដ្ឋាននគរបាលរាជធានីភ្នំពេញ៕សេរីរុធ