ក្រសួងសុខាភិបាលបានចាត់វិធានការបញ្ឈប់ការភ័យខ្លាចជាសាធារណៈចំពោះសុវត្ថិភាពនៃវ៉ាក់សាំងបង្ការជំងឺកញ្ជ្រឹល និងស្អូចដែលត្រូវបានផ្ដល់ឲ្យកុ មារកម្ពុជាចំនួន៤,៥លាននាក់ក្នុងរយៈពេលបីខែចុងក្រោយនៃឆ្នាំ២០១៣ បន្ទាប់ពីមានពាក្យចចាមអារ៉ាមថា វ៉ាក់សំាងនេះបង្កផលប៉ះពាល់ដល់សុខភាព នេះបើយោងតាមសេចក្ដីប្រកាសព័ត៌មានរបស់ក្រសួងដែលបានចេញកាលពីសប្ដាហ៍មុននេះ។
កាលពីខែមករា មន្ត្រីកម្មវិធីជាតិផ្ដល់់ថ្នាំបង្ការបានប្រកាសថា ខ្លួនបានផ្ដល់វ៉ាក់សាំងបង្ការជំងឺកញ្ជ្រឹល និងស្អូចដល់កុមារ៤,៥លាននាក់ ដែលមានអាយុចន្លោះពី៩ខែទៅ១៥ឆ្នាំក្នុងខែតុលា វិច្ឆិកា និងធ្នូ គឺលើសគោលដៅដែលបានកំណត់ត្រឹមតែ៤លាននាក់។នេះជាកម្មវិធីចាក់ថ្នាំបង្ការទូទាំងប្រទេសធំបំផុតមិនធ្លាប់មាននៅកម្ពុជា។
ក្រសួងសុខាភិបាល អង្គការសុខភាពពិភពលោក និងមូលនិធិកុមារអង្គការសហប្រជាជាតិបានចេញសេចក្ដីថ្លែងការណ៍រួមមួយដែលមានខ្លឹមសារថា “ថ្មីៗនេះមានពាក្យចចាមអារ៉ាមគ្មានមូលដ្ឋានមួយចំនួនដែលបានបង្កឲ្យមានការភាន់ច្រឡំ និងការភ័យខ្លាចនៅក្នុងសហគមន៍មួយចំនួន ដោយបានសួររកប្រភពនិងគុណភាពវ៉ាក់សាំងដែលត្រូវបានប្រើយ៉ាងជោគជ័យក្នុងយុទ្ធនាការផ្ដល់វ៉ាក់សាំងបង្ការជំងឺកញ្ជ្រឹល និងស្អូចនៅចុងឆ្នាំ២០១៣”។
សេចក្ដីថ្លែងការណ៍នេះមានការធានាអះអាងចំពោះសាធារណជនថា វ៉ាក់សាំងនេះមានសុវត្ថិភាព និងមានប្រភពត្រឹមត្រូវ ប៉ុន្តែពុំមានការបរិយាយល្អិតល្អន់អំពីពាក្យចចាមអារ៉ាមនោះទេ។ សេចក្ដីថ្លែងការណ៍នេះមានខ្លឹមសារថា “យើងសូមបញ្ជាក់សាជាថ្មីថា រាល់វ៉ាក់សាំងទាំងអស់ដែលត្រូវបានប្រើដោយក្រសួ ងសុខាភិបាលក្នុងកម្មវិធីជាតិ គឺត្រូវបានផ្ដល់ដោយអង្គការយូនីសេហ្វ (UNICEF) ដែលបានមកពីក្រុមហ៊ុននានាដែលត្រូវបានទទួលស្គាល់ដោយអង្គការសុខភាពពិភពលោក…ដើម្បីធានាថា កុមារទទួលបានតែវ៉ាក់សំាងណាដែលមានគុណភាពល្អបំផុត” ដោយមានការបន្ថែមថា វាជារឿងចំាបាច់ដែលឪពុកម្ដាយ និងអាណាព្យាបាលត្រូវជឿជាក់លើរដ្ឋាភិបាល និងស្វែងរកដំបូន្មានពីបុគ្គលិកសុខាភិបាលក្នុងមូលដ្ឋានពាក់ព័ន្ធនឹងផលប្រយោជន៍នៃវ៉ាក់សាំងទាំងនេះ។
លោក រីឆាដ ដាន់ឃិន (Richard Duncan) មន្ត្រីបច្ចេកទេសនៃកម្មវិធីពង្រីកការផ្ដល់ថ្នាំបង្ការរបស់អង្គការសុខភាពពិភពលោកបានលើកឡើងថា លោកមិនអាចធ្វើអត្ថាធិប្បាយអំពីពាក្យចចាមអារ៉ាមនេះបានទេ គឺអាចនិយាយបានត្រឹមតែថា វាពាក់ព័ន្ធនឹងគុណភាព និងប្រភពនៃវ៉ាក់សាំងប៉ុណ្ណោះ។ លោកបានមានប្រសាសន៍ថា “រាល់ពាក្យចចាមអារ៉ាមដែលយើងបានឮរហូតមកទល់នឹងពេលនេះ គឺមិនពិតទេ។ វ៉ាក់សាំងទាំងនោះបានមកពីអង្គការយូនីសេ ហ្វ និងត្រូវបានទទួលស្គាល់ដោយអង្គការសុខភាពពិភពលោក ហើយយើងមានទំនុកចិត្តទាំងស្រុងលើវា” ដោយបន្ថែមថា ពាក្យលេចឮក្រោយមានកម្មវិធីចាក់វ៉ាក់សាំងបង្ការនេះ គឺមិនមែនមានតែនៅកម្ពុជាទេ។
លោក ដាន់ឃិន បានលើកឡើងថា ការទទួលបានព័ត៌មានរឹតតែងាយស្រួលតាមរយៈប្រព័ន្ធអ៊ីនធើណិត និងការកើនឡើងនូវការប្រើប្រាស់បណ្ដាញភ្ជាប់ទំនាក់ទំនងសង្គម ដូចជាហ្វេសប៊ុកជាដើម បានរួមចំណែកដល់ការផ្សព្វផ្សាយពាក្យចចាមអារ៉ាមបែបនេះនៅកម្ពុជា ប៉ុន្តែលោកបានបញ្ជាក់ថា វានឹងមិនប៉ះពាល់ដល់យុទ្ធនាការផ្ដល់វ៉ាក់សាំងទេ ព្រោះគោលដៅទាំងអស់ត្រូវបានសម្រេចរួចរាល់ហើយ។ លោកបានមានប្រសាសន៍ថា “ទោះជាយ៉ាងណា យើងក៏មានការព្រួយបារម្ភដែរថា វាអាចធ្វើឲ្យខូចកម្មវិធីផ្ដល់វ៉ាក់សាំងបង្ការដែលធ្វើរៀងរាល់ឆ្នាំបាន៕ សេរីវុធ