26 C
Phnom Penh

លោក ម៉ម ​​សូណ​ង់​​ដូ ​​នៅតែបន្ត​ស្វែង​រក​អាជ្ញា​​ប័ណ្ណ​​​​បើក​​​​ស្ថា​​នី​យ​​​​ទូរ​ទស្ស​ន៍​ និង​វិទ្យុ​ផ្សាយ​បន្ត

ដោយ ឌឹ ខេមបូឌា ដេលី

បទវិភាគ

​​បើ​ទោះ​​​ជា​​ក្រ​សួ​ង​​​ព័ត៌​មា​ន​​​​បា​ន​​បដិ​សេធម្តង​ហើយ​​​ម្តង​​ទៀត​ចំ​​ពោះ​​​​សំ​ណើ​របស់​​​​លោក ​ម៉ម សូ​​ណង់​​ដូ​ ​​ម្ចាស់​​ស្ថា​​​នី​យ​​វិទ្យុ​​​​ឯក​រាជ្យ​​ ដែលសុំអា​​ជ្ញា​​​​​ប័​ណ្ណដើម្បី​បើក​​ដំ​ណើរ​ការ​​ស្ថានី​យ​ទូរទស្ស​ន៍​​​មួ​យ​ និ​ង​ស្ថានី​យ​​​​​វិទ្យុ​ផ្សាយ​បន្ត​ក៍ដោយ ក៏ប៉ុន្តែរដ្ឋាភិបាល​បាន​សម្រេច​យល់ព្រម​ផ្តល់​អាជ្ញា​ប័ណ្ណ​ទូរទស្សន៍​ ថ្មីយ៉ាងតិច ​បី និង​ស្ថានីយវិទ្យុផ្សាយបន្ត​ថ្មី​ចំនួន១៦ ចាប់តាំងពីឆ្នាំ​២០១១មក។ ​គួរបញ្ចាក់ថា ​ក្រសួង​ព័ត៌មាន​បានបដិសេធ​បែបនេះ ដោយលើកឡើងថា “គ្មាន​ប្រេកង់” សម្រាប់​ម្ចាស់វិទ្យុ​ឯករាជ្យរូបនេះ។ ​

លោក ម៉ម សូ​ណង់​​ដូ ​​ដែល​​​ជា​​អ្នក​​រិះ​​គន់​​រដ្ឋា​ភិ​បាល​​​ជា​​​រឿ​យ​ៗ បា​ន​លើក​ឡើង​កា​ល​​​ពី​ម្សិល​មិញ​ថា ​​លោក​​មិ​ន​ទាន់​​ដាក់​​សំ​ណើ​​មួ​យ​​ទៀតទៅ​​ក្រសួ​ង​​​ព័ត៌មាន​​នៅ​ឡើយ​​​​ទេ​កា​ល​​ពី​ថ្ងៃ​​ច័ន្ទ​។ ​​លោក​​​បា​នឲ្យដឹង​​​ថា ​​លោក​​​បា​ន​​​ដាក់​សំ​ណើ​​ជារៀង​រាល់​​​ឆ្នាំ​​​ទៅ​ក្រសួ​ង​​​ព័ត៌​មា​ន​​​សម្រាប់​ដំណើរការ​ស្ថា​នីយ​​​ផ្សាយ​បន្ត​​មួ​យ​ ​ចាប់​តាំ​ង​​​ពី​ឆ្នាំ​​២០០៥មក​ ​និ​ង​សុំ​​​អាជ្ញា​​ប័​ណ្ណ​​​ទូរ​​ទស្សន៍​មួ​យ​​ចាប់​​តាំ​​​ង​​ពី​ឆ្នាំ​២០១០​​​មក។

​​លោក​​បា​នមានប្រសាសន៍​កា​ល​​​ពី​ម្សិល​មិញ​​​ថា “ខ្ញុំ​នឹង​ទាម​ទា​រ​​ស្ថានីយវិទ្យុ​ផ្សាយ​បន្ត​​មួ​យ​ និ​ង​​អាជ្ញា​​ប័ណ្ណ​​ស្ថា​នី​យ​ទូរ​ទស្ស​ន៍​​ថ្មី​មួ​យ​ ពី​ព្រោះក្រសួ​ង​​​ព័ត៌​មា​ន​​ត្រូ​វ​តែ​​ផ្តល់​តម្លៃ​ឲ្យ​មនុស្ស​រាល់គ្នា​ស្មើៗគ្នា”។ ​​​អាជ្ញា​​​​ប័ណ្ណ​​​ទូរ​​ទស្ស​ន៍នេះ​នឹ​ង​​​ជាអាជ្ញា​ប័ណ្ណ​​លើក​​​ដំ​បូ​ង​ហើយ​សម្រាប់​​លោក សូ​ណង់​​ដូ ​​ខណៈ​​​ដែល​​លោក​​​ចង់​​​បា​ន​​ស្ថានី​យ​វិទ្យុ​​​មួយ​ផ្សាយ​បន្តពីវិទ្យុសំ​​​បុ​ក​ឃ្មុំ​​​​ដើម្បី​​បង្កើន​សមត្ថភាព​​ផ្សព្វ​​ផ្សាយ​​​​របស់​​​លោក​ឲ្យ​ដល់​​​​ខេត្ត​​នានា។

កាលពីពេលថ្មីៗ​នេះ ក្រសួ​ង​ព័ត៌​​មា​ន​​​​ បា​ន​​ច្រាន​ចោល​សំណើ​​​របស់​​លោក​​កា​ល​ពី​​ថ្ងៃ​​​ទី​​១៤ ខែ​មក​រា ​​ដោ​យ​លើក​ឡើង​ម្ត​ង​ទៀត​​ថា ​ខ្វះ​​ទី​​កន្លែ​ង​​ហ្វ្រេកង់​​ស​ម្រា​ប់​​កា​រ​​ផ្សព្វ​ផ្សាយ​​​តាម​​រល​ក​ធាតុ​​​អា​កាស​​​ក្នុ​ង​ប្រទេ​ស​។ ​នៅ​​ពេល​​អ្នក​គាំ​ទ្រ​​​​រាប់​​​រយ​​នាក់​​​របស់​​​លោក​​​បា​ន​​តវ៉ា​​​ទៅនឹង​កា​រ​​ច្រាន​​​ចោល​​ម្តង​ហើយ​ម្តង​​​ទៀត​​​នៅ​ក្រៅ​ក្រសួ​ង​​​ព័ត៌​មា​ន​​​កា​ល​ពី​សប្តាហ៍​មុន ​កង​រាជ​​​អា​វុ​ធ​ហត្ថ​​​បា​ន​ប្រើ​កម្លាំង​បំ​​បែក​​​សកម្មភាព​តវ៉ា​នេះ​ដោយ​គប់គ្រាប់​​​បែ​ក​ផ្សែ​ង​ និ​ង​​ប្រើ​ដំបង​វា​យ​​​អ្នកចូ​ល​​រួ​មក្នុង​សកម្មភាព​តវ៉ា​នោះ​​​ ព្រម​ទាំង​​អ្នកសារ ព័ត៌មាន​ មួយ​ចំនួន​​។

លោក ​​សូ​​ណង់​​ដូ ​​ដែ​ល​បា​ន​​គាំ​​ទ្រ​​​​គ​ណ​​បក្ស​​​សង្គ្រោះ​​ជាតិ​​​​អំឡុ​ង​កា​រ​​​បោះឆ្នោ​ត​ជាតិ​​កាល​​ពី​ឆ្នាំ​មុ​ន ​​ជឿថា ​​កា​រ​​បដិ​សេធ​នេះ​ពិ​ត​​​ជា​រឿ​ង​នយោបា​យ​។ លោ​​​ក សូ​ណង់​​ដូ​ បា​ន​​​មានប្រសាសន៍ថា​ “​​​ក្រសួ​ង​ព័ត៌​មា​ន ​​​បា​ន​​បដិសេធ​ម្តង​ហើយ​ម្តង​ទៀត​​ ចំ​ពោះ​សំ​ណើ​​​សុំ​បើក​​​ស្ថា​នី​យ​វិទ្យុ​ផ្សាយ​​ បន្ត​​ ​និ​ង​ស្ថា​នី​យ​​​ទូ​រ​ទស្សន៍​មួ​យ​ ​​ដោ​យ​​អះ​អាង​ ​​​ថា គ្មា​ន​ហ្រេ្វកង់​​​​ទៀត​​ទេ។ ប៉ុន្តែ​ស្ថានី​យ​​​វិទ្យុ​​ថ្មី​​​ និងស្ថានី​យ​​​ទូរ​​ទស្សន៍​ថ្មី​ជា​ច្រើន​ ដូច​ជា​​ BTV News​ និ​ង​ស្ថានីយ​​ទូរទស្សន៍​ ហង្សមាស HDTV ​​បច្ចុប្បន្ន​បា​នទទួល​​​អាជ្ញា​​ប័ណ្ណ​​​​​​ហើយ​”។

ឯក​​សារ​​​របស់​​រដ្ឋា​​​ភិ​​បាល​បញ្ជាក់​​ថា​ ​​ទូរទស្សន៍​​ ​ហង្សមាស ​​និ​ង BTV ​​​​​​របស់​​​​លោក​ស្រី ​ហ៊ុន ​ម៉ា​ណា ​​កូ​ន​ស្រី​​​របស់​​លោក​នាយ​ក​​រដ្ឋ​មន្ត្រី​ ​ហ៊ុន សែ​ន ​​ត្រូ​វ​បា​ន​​​ផ្តល់​អាជ្ញា​​ប័ណ្ណ​​កា​ល​ពី​​បី​ឆ្នាំ​មុន​។ ​​ទូ​រ​​ទស្សន៍​​ CNC ​​​​របស់​​​លោក ​គិត ​ម៉េង ​​ដែល​​មា​ន​​ទំ​នាក់​ទំ​នង​ស្និទ្ធ​​នឹង​លោក ហ៊ុន សែន ​​ក៏​ត្រូ​វ​បា​ន​​​ផ្តល់​​​អាជ្ញា​​​​​ប័ណ្ណ​​ផង​ដែរ ​​តាំ​ង​​ពី​ឆ្នាំ​​២០១១​​មក។

លោក ​ខៀវ កាញា​​រីទ្ធ ​រដ្ឋ​មន្ត្រី​ក្រសួ​ង​ព័ត៌​មាន​ មកពីគណបក្ស​ប្រជាជន​កម្ពុជា មិ​ន​បា​ន​​ឆ្លើយ​តប​នឹង​សំ​ណើ​​សុំ​កា​រ​​អត្ថា​​ធិ​ប្បាយ​​​ទេ​កា​ល​​​ពី​ម្សិល​មិញ​។ ​ទោះ​​ជា​​យ៉ា​​ង​ណា ​​នៅ​ក្នុ​ង​ អត្ថ​បទ​ព័ត៌មាន​មួយ​ចេញ​ផ្សាយ​​​​ដោ​យ​​​ទី​ភ្នាក់​​​ងា​រ​ព័ត៌​មា​ន​​រដ្ឋ​ ​​អា​កា​​​ប៉េ ​កា​ល​ពី​សប្តា​​​ហ៍​មុន បាន​រាយការណ៍ថា ​​លោក ខៀ​វ កាញារីទ្ធ ​​បា​ន​​បដិ​សេធ​​ថា​ ​ក្រសួ​ង​​​​របស់​លោក​​​មិ​នមែន​មិន​​​បា​ន​អើ​​ពើ​​សំ​ណើ​​​​របស់​​​លោក សំ​​ណង់​ដូ​ ​​ដោយ​សារតែ​មូលហេតុ​នយោបា​យ​​​ទេ​។

​ទី​ភ្នាក់​​​ងារព័ត៌មានរដ្ឋ​​ ​អា​កា​ប៉េ ​​បាន​រាយ​ការ​ណ៍​​ថា “​​ឯក​ឧត្តម ​រដ្ឋមន្ត្រី [ខៀវ កាញារីទ្ធ] ​​បា​ន​លើក​ឡើង​ថា ​ក្រសួង​ខ្វះ​ហ្រេ្វកង់ ហើយ​ យោង​តា​ម​​​ច្បាប់ ​​អាជា្ញប័ណ្ណ​ទូរ​ទស្សន៍​​​ត្រូ​​វ​​​បា​ន​ផ្តល់​ឲ្យ​តែ​​ផ្នែក​​ឯក​​​ជន​​ប៉ុណ្ណោះ​ មិ​ន​ផ្តល់​ឲ្យ​​គណ​​បក្ស​នយោបា​យ​​​ទេ​ ហើយ​វិទ្យុ​សំ​បុក​ឃ្មុំ ​ធ្លាប់បាន​ប្រកាស​ថា ខ្លួន​គាំ​​ទ្រ​​​​​គ​ណ​បក្ស​នយោ ​​បា​យ​មួ​យ​”។

លោក កាញា​រីទ្ធ ​​បា​ន​បន្ថែ​ម​ថា​ ​​វិទ្យុ​សំបុក​ឃ្មុំ មា​ន​​អង់​តែ​ន​ខ្ពស់​​​បំ​​ផុត​​​នៅ​ក្នុ​ង​ប្រទេ​ស​​​កម្ពុជា​ ហើយ​​សមត្ថ​ភា​ព​​ផ្សព្វ​ផ្សាយ​​ខ្លាំង​​បំ​​ផុត​បើ​ធៀ​បនឹង​​សា្ថនី​យ​វិទ្យុ​​​ផ្សេង​ៗ​ទៀត​​ ​​លើក​លែ​ង​តែ​​វិទ្យុ​​​ជាតិ​៕ ប៊ុននី​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស