នៅវេលាម៉ោង១០ព្រឹកនាថ្ងៃទី៣ ខែមករា កងកម្លាំងសន្តិសុខប្រហែល២.០០០នាក់ ដែលភាគច្រើនជាកងរាជអាវុធហត្ថ បានបង្ក្រាបកម្មកររោងចក្រកាត់ដេរ ដែលកំពុងតវ៉ានៅលើផ្លូវវេងស្រេង ដោយប្រើកាំភ្លើង អាកា-៤៧ បាញ់ប្រហារទៅលើអ្នកតវ៉ាប្រហែល១០០នាក់ ដែលគប់ដុំថ្មនិងដបសាំង។
កងរាជអាវុធហត្ថក៏បានបាញ់សំដៅទៅលើអគារនៅជុំវិញនោះដែរ ជាទីដែលបាតុករបានចោលឧបករណ៍ផ្សេងៗ មកលើពួកគេ។ កងរាជអាវុធហត្ថបានបាញ់ប្រហារបណា្តលឲ្យកម្មកររោងចក្រកាត់ដេរ ដែលកំពុងតវ៉ាចំនួនប្រាំនាក់បានស្លាប់ និងយ៉ាងតិច៤០នាក់រងរបួសដោយសារគ្រាប់កាំភ្លើង ហើយ១៣នាក់ផ្សេងទៀតត្រូវរងការវាយដំ រួចបញ្ជូនចូលពន្ធនាគារ ដែលមានការរឹតបន្តឹងសន្តិសុខខ្ពស់បំផុតនៅក្នុងខេត្តកំពង់ចាម ជាទីដែលតុលាការបានបដិសេធមិនដោះលែងពួកគេឲ្យនៅក្រៅឃុំ មុនពេលការបើកសវនាការជំនុំជម្រះរឿងក្តី ដែលមកទល់នឹងពេលនេះនៅមិនទាន់មានកាលបរិច្ឆេទនៅឡើយ។
មកទល់នឹងពេលនេះ វាមានរយៈពេលមួយខែហើយ បន្ទាប់ពីការស្លាប់របស់អ្នកតវ៉ាចំនួនប្រាំនាក់ ដែលត្រូវបានថ្កោលទោសដោយអង្គការសិទ្ធិមនុស្ស និងអង្គការសហប្រជាជាតិ ប៉ុន្តែមន្ត្រីកងរាជអាវុធហត្ថម្នាក់ បាននិយាយកាលពីម្សិលមិញថា ការស៊ើបអង្កេតរបស់ខ្លួន ដើម្បីស្វែងរកថា តើនរណាជាអ្នកបាញ់ប្រហារបណ្តាលឲ្យស្លាប់អ្នកតវ៉ា ឬក៏ថាតើនរណាជាអ្នកចេញបទបញ្ជាឲ្យមានការបាញ់ប្រហារនោះ គ្មានការវិវឌ្ឍឡើយ។
ឧត្តមសេនីយ៍ត្រី ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេស បានមានប្រសាសន៍ថា “ យើងកំពុងតែបន្តការស៊ើបអង្កេត ប៉ុន្តែមិនទាន់ទទួលបានលទ្ធផលណាមួយនៅឡើយទេ”។ ទោះជាយ៉ាងណា ប្រសិនបើការស៊ើបអង្កេតរបស់កងរាជអាវុធហត្ថមិនដែលចេញជាលទ្ធផលបែបនេះ វាទំនងជាមិនឆ្លើយតបទៅនឹងសំណួរ ដែលបានសួរថា នរណាជាអ្នកទទួលខុសត្រូវចំពោះការស្លាប់របស់កម្មកររោងចក្រកាត់ដេរដែលគ្មានអាវុធក្នុងដៃទាំងប្រាំនាក់នោះឡើយ។
កាលពីថ្ងៃទី៧ ខែមករា ឧត្តមសេនីយត្រីខេង ទីតូ បានមានប្រសាសន៍ថា “កងរាជអាវុធហត្ថមិនដែលបាញ់ប្រហារក្នុងគោលបំណងផ្តាច់ជីវិតនរណាម្នាក់ឡើយ”។ លោកបានបន្តថា ការស៊ើបអង្កេតណាមួយលើការស្លាប់នៅថ្ងៃទី៣ ខែមករា មិនមែនជាការស៊ើបអង្កេតលើតួនាទីរបស់កងរាជអាវុធហត្ថនោះទេ ប៉ុន្តែគឺជាការស៊ើបអង្កេតលើតួនាទីរបស់ “អ្នកញុះញង់” ដែលដឹកនាំការតវ៉ានេះ។
ជនរងគ្រោះ និងសាក្សីដែលបានឃើញការបង្ក្រាបដ៏សាហាវនៅលើផ្លូវវេងស្រេង បានរាយការណ៍ថា បានឃើញមន្ត្រីកងរាជអាវុធហត្ថបាញ់កាំភ្លើងវែងរបស់ខ្លួនរំលងក្បាលរបស់អ្នកតវ៉ា មុនពេលងាកមកប្រើវិធីធម្មតាដើម្បីទប់ទល់នឹងអ្នកតវ៉ាវិញ។ បន្ទាប់ពីការស្លាប់របស់អ្នកតវ៉ាទាំងប្រាំនាក់នេះមក មន្ត្រីកងរាជអាវុធហត្ថនៅតែបនទប់ទល់នឹងអ្នកតវ៉ាគប់ដុំថ្ម ដោយប្រើកាំភ្លើងវែងរបស់ខ្លួនម្តងម្កាល។
កញ្ញា អ៊ុក ម៉ារ៉ា អាយុ១៧ឆ្នាំ ជាជនរងគ្រោះដែលក្បាលរបស់នាងត្រូវគ្រាប់កាំភ្លើងមួយខែកន្លងមកហើយ បាននិយាយពីលើគ្រែពេទ្យបន្ទាប់ពីការប្រើអំពើហិង្សាថា “ ខ្ញុំបានឃើញពួកគេបាញ់ប្រហារក្នុងបំណងផ្តាច់ជីវិតតែម្តង។ វាហាក់បីដូចជា កំពុងមើលក្មេងៗលេងកាំជ្រួចអ៊ីចឹង” ។
ជនរងគ្រោះម្នាក់ទៀត ឈ្មោះ ហៀត រ៉ា ឌី អាយុ២០ឆ្នាំ ដែលត្រូវរងរបួសចំទ្រូងដោយសារគ្រាប់កាំភ្លើងអំឡុងការប្រើអំពើហិង្សា បាននិយាយថា “កងរាជអាវុធហត្ថបានរត់ចុះរត់ឡើងជុំវិញនោះ ហើយបាញ់ប្រហារដោយមិនរើសមុខ”។
ចាប់តាំងពីការបង្ក្រាបដ៏ហិង្សានោះរួចមក រដ្ឋាភិបាលបានទទួលរងការរិះគន់យ៉ាងធ្ងន់ៗចំពោះការប្រើកម្លាំងហួសហេតុប្រឆាំងនឹងយុវជនគប់ដុំថ្ម។ សហព័ន្ធសិទ្ធិមនុស្សអន្តរជាតិ និងអង្គការសិទ្ធិមនុស្សក្នុងស្រុក លីកាដូ និងអាដហុក បានចេញសេចក្តីថ្លែងការណ៍មួយកាលពីថ្ងៃទី៦ ខែមករា ដោយលើកឡើងថា “ការសម្លាប់អ្នកតវ៉ាដោយមន្ត្រីរដ្ឋាភិបាល គឺមិនអាចទទួលយកបានទាំងស្រុង” ហើយបានអំពាវនាវ “ ឲ្យមានការស៊ើបអង្កេតដោយឯករាជ្យ ហ្មត់ចត់ និងឆាប់រហ័សមួយលើការស្លាប់នៅថ្ងៃទី៣ ខែមករានេះ”។
មន្ត្រីទទួលបន្ទុកសិទ្ធិមនុស្សរបស់អង្គការសហប្រជាជាតិប្រចាំទីក្រុងហ្សឺណែវ បានចេញសេចក្តីថ្លែងការណ៍ស្រដៀងគ្នានេះមួយដែរពីរថ្ងៃក្រោយមក។ សេចក្តីថ្លែងការណ៍នេះមានខ្លឹមសារថា “ យើងទទូចឲ្យអាជ្ញាធរកម្ពុជាបើកការស៊ើបអង្កេតឲ្យបានហ្មត់ចត់ និងបន្ទាន់មួយលើការស្លាប់អ្នកតវ៉ាទាំងប្រាំនាក់ និងអ្នកតវ៉ាដែលរងរបួសយ៉ាងតិច៤២នាក់ផ្សេងទៀត ដោយសារស្នាដៃកងរាជអាវុធហត្ថនោះ”។
កាលពីថ្ងៃទី១៧ ខែមករា វេទិកា អាស៊ីប៉ាស៊ីហ្វិក ដើម្បីស្ត្រី ច្បាប់ និងការអភិវឌ្ឍន៍ បានប្រកាសយុទ្ធនាការសប្តាហ៍សកម្មភាពពិភពលោកមួយសម្រាប់ប្រទេសកម្ពុជា ដែលសហជីព និងអង្គការសង្គមស៊ីវិលនៅទូទាំងពិភពលោកបានតវ៉ានៅក្នុងរដ្ឋធានី និងរាជធានីមួយចំនួនដោយអំពាវនាវឲ្យមានការបញ្ចប់ការប្រើអំពើហិង្សាលើអ្នកតវ៉ានៅកម្ពុជា និងដើម្បីឲ្យមានការដោះលែងមនុស្សដែលត្រូវឃុំឃាំងទាំង២៣នាក់។
សហព័ន្ធសហជីពអន្តរជាតិចំនួន៣០ និងក្រុមហ៊ុនលក់សម្លៀកបំពាក់យីហោល្បីៗ ដូចជា Wal Mart និង Gap ជាដើម បានផ្ញើលិខិតមួយច្បាប់ទៅកាន់លោកនាយករដ្ឋមន្ត្រី ហ៊ុន សែន ដោយផ្ទាល់កាលពីថ្ងៃទី១៧ ខែមករា ដោយសម្តែង “ក្តីព្រួយបារម្ភយ៉ាងខ្លាំង” ចំពោះការបាញ់ប្រហារនេះ។
លិខិតនេះមានខ្លឹមសារថា “ការប្រើកងកម្លាំងបាញ់ប្រហារលើកម្មករដែលកំពុងតវ៉ា នឹងមិនធ្វើឲ្យវិស័យកាត់ដេរមានសន្តិភាពបានយូរនោះទេ ហើយបានធ្វើឲ្យគ្រោះថ្នាក់ដល់ឈ្មោះរបស់ប្រទេសកម្ពុជា ដែលជាកន្លែងដ៏មានស្ថិរភាពសម្រាប់ក្រុមហ៊ុនអន្តរជាតិយីហោល្បីៗ”។
អំឡុងការមកបំពេញទស្សនកិច្ចចុងក្រោយនៅក្នុងប្រទេសកម្ពុជា កាលពីខែមុនលោក សុរិយា ស៊ូបេឌី ប្រេសិតពិសេសទទួលបន្ទុកសិទ្ធិមនុស្សរបស់អង្គការសហប្រជាជាតិប្រចាំប្រទេសកម្ពុជាបានថ្កោលទោសចំពោះការបាញ់ប្រហារលើកម្មករកាត់រោងចក្រកាត់ដេរ ដែលកំពុងធ្វើកូដកម្មនេះ។
លោក ស៊ូបេឌី បានមានប្រសាសន៍អំឡុងសន្និសីទកាសែតមួយ កាលពីថ្ងៃទី១៧ ខែមករាថា “ខ្ញុំព្រួយបារម្ភយ៉ាងខ្លាំងចំពោះទង្វើរបស់អាជ្ញាធរទាក់ទិននឹងព្រឹត្តិការណ៍នៅសប្តាហ៍ទី១ដើមខែមករា”។
កងរាជអាវុធហត្ថ និងនគរបាលជាតិក៏បានបាញ់សម្លាប់អ្នកនៅតាមចិញ្ចើមផ្លូវចំនួនពីរនាក់ និងធ្វើឲ្យមនុស្សជាច្រើននាក់ផ្សេងទៀតរងរបួសដែរ អំឡុងការតវ៉ានៅក្បែរស្ពានព្រះមុនីវង្ស កាលពីខែកញ្ញានិងការតវ៉ានៅខណ្ឌមានជ័យកាលពីខែវិច្ឆកា។ ការស៊ើបអង្កេតលើការស្លាប់ទាំងនេះ ក៏ទំនងជាគ្មានការរីកចម្រើនដែរ ទោះបីជាកងរាជអាវុធហត្ថ និងនគរបាលអះអាងថា ខ្លួនកំពុងស៊ើបអង្កេតលើករណីស្លាប់ទាំងពីរនេះក៏ដោយ។
ឧត្តមសេនីយ៍ឯក ខៀវ សុភ័គ អ្នកនាំពាក្យក្រសួងមហាផ្ទៃបានបង្វែរសំណួរ កាលពីម្សិលមិញទាក់ទិននឹងការស៊ើបអង្កេតលើការស្លាប់របស់អ្នកតវ៉ាទៅលោក នេត សាវឿន អគ្គស្នងការនគរបាលជាតិ និង លោក សៅ សុខា អគ្គមេបញ្ជាការកងរាជអាវុធហត្ថលើផ្ទៃប្រទេស ដែលលោកបានលើកឡើងថា ពួកគាត់បច្ចុប្បន្នកំពុងដឹកនាំគណៈកម្មការស៊ើបអង្កេតលើការបាញ់ប្រហារនេះវិញ។
ហើយទោះបីជាការស៊ើបអង្កេតរបស់រដ្ឋាភិបាលលើការបាញ់ប្រហារអ្នកតវ៉ា និងអ្នកនៅតាមចិញ្ចើមផ្លូវដោយមិនរើសមុខ និងការធ្វើឲ្យមនុស្សជាច្រើននាក់ផ្សេងទៀតរងរបួសនោះគ្មានការវិវឌ្ឍក៏ដោយ ប៉ុន្តែរដ្ឋាភិបាលបែរជាផ្តល់រង្វាន់ទៅឲ្យនគរបាលនិងកងរាជអាវុធហត្ថ ដែលភាគច្រើនរងរបួសស្រាល អំឡុងការតវ៉ាថ្មីៗនេះទៅវិញ។
យោងតាមកាសែតកោះសន្តិភាពបានឲ្យដឹងថា អំឡុងពិធីមួយ កាលពីថ្ងៃព្រហស្បតិ៍ មន្ត្រីកងរាជអាវុធហត្ថចំនួន២៩នាក់ និងមន្ត្រីនគរបាលជាតិចំនួន១៦នាក់ បានទទួលថវិកាក្នុងម្នាក់ៗចំនួនប្រហែល២០០ដុល្លារសម្រាប់ការបំពេញការងាររបស់ពួកគេអំឡុងការបង្ក្រាបលើអ្នកតវ៉ា ជួសមុខឲ្យលោកនាយករដ្ឋមន្ត្រី ហ៊ុន សែន និងភរិយារបស់លោក គឺលោកស្រី ប៊ុន រ៉ានី។
អត្ថបទមួយនៅលើទំព័ររបស់កាសែតកោះសន្តិភាពមានខ្លឹមសារដូចតទៅ “[សម្តេចហ៊ុន សែន និងលោកជំទាវ ប៊ុន រ៉ានី] បានកោតសរសើរចំពោះជំហរដ៏រឹងមាំរបស់កងរាជអាវុធហត្ថ និងនគរបាលជាតិ ដែលបានខិតខំការពារសណ្ដាប់ធ្នាប់សង្គម និងសន្តិសុខ អំឡុងគណបក្សប្រឆាំងបង្កភាពចលាចលដោយដើរញុះញង់ឲ្យមានការប្រើអំពើហិង្សា”។
ឧត្តមសេនីយ៍ត្រី ខេង ទីតូ បានបដិសេធមិននិយាយអំពីការផ្តល់ប្រាក់រង្វាន់នេះទៅឲ្យកងរាជអាវុធហត្ថ និងនគរបាលជាតិឡើយ។
អ្នកស្រី ឃួន ស្រីឯម ម្តាយរបស់ជនរងគ្រោះ តិច ថេង អាយុ១៨ឆ្នាំ ជាអ្នកតវ៉ាម្នាក់ ដែលត្រូវបានវះកាត់ខួរក្បាល បន្ទាប់ពីរងការវាយដំយ៉ាងសាហាវពីសំណាក់កងរាជអាវុធហត្ថនៅលើផ្លូវវេងស្រេង បានឲ្យដឹងថា ក្រុមគ្រួសាររបស់អ្នកស្រី គ្មានបានទទួលអ្វីពីរដ្ឋាភិបាលឡើយ ចាប់តាំងពីកូនប្រុសរបស់អ្នកស្រីត្រូវបានគេវាយដំស្ទើរបាត់បង់ជីវិតមក។
អ្នកស្រីបាននិយាយថា “ខ្ញុំគ្មានទទួលបានប្រាក់សំណងណាមួយពីរដ្ឋាភិបាលឡើយ ហើយមានការសោកស្តាយណាស់ ដែលមកទល់នឹងពេលនេះអាជ្ញាធរ នៅតែមិនទាន់ចាប់បានជនប្រព្រឹត្តបទឧក្រិដ្ឋណាមួយនោះ”។ អ្នកស្រីបានបន្ថែមថា អ្នកស្រីខ្លាចក្រែងការផ្តល់រង្វាន់ទៅឲ្យសមាជិករបស់អង្គភាពកងរាជអាវុធហត្ថ និងនគរបាលជាតិដែលបានប្រើអំពើហិង្សានោះ អាចនឹងលើកទឹកចិត្តឲ្យពួកគេប្រើអំពើហិង្សាស្រដៀងគ្នានេះនៅលើកក្រោយទៀត។ អ្នកស្រីបាននិយាយបន្តទៀតថា “តាមរយៈការផ្តល់ប្រាក់រង្វាន់នេះ រដ្ឋាភិបាលកំពុងតែលើកទឹកចិត្តឲ្យនគរបាល និងកងរាជអាវុធហត្ថ ប្រើអំពើហិង្សាបន្ថែមទៀតលើកម្មករ”៕ស៊ុយឈាង