កម្មករប្រហែល២០០នាក់នៃក្រុមហ៊ុនប្រមូលសំរាម ស៊ីនទ្រី នៅក្នុងរាជធានីភ្នំពេញបានធ្វើការតវ៉ាកាលពីព្រឹកម្សិលមិញនៅខាងក្រៅទីតាំងចំណតរថយន្តប្រមូលសំរាមរបស់ក្រុមហ៊ុននេះនៅក្នុងខណ្ឌមានជ័យ ដើម្បីទាមទារលក្ខខណ្ឌការងារសមរម្យ និងដំឡើងប្រាក់ខែគោលរបស់ខ្លួន។
លោក ប្រាក់ សុខា តំណាងអ្នកតវ៉ាទាំងនេះបានលើកឡើងថា ពួកគេបានទាមទារប្រាំបួនចំណុចឲ្យគណៈគ្រប់គ្រងក្រុមហ៊ុន ស៊ីនទ្រី កែសម្រួលលក្ខខណ្ឌការងារសម្រាប់កម្មករទាំង១.២២៥នាក់របស់ក្រុមហ៊ុននេះ រួមទាំងការដំឡើងប្រាក់ខែដល់២០០ដុល្លារក្នុងមួយខែ ផ្ដល់ឯកសណ្ឋានដោយឥតគិតថ្លៃ ផ្ដល់ធានារ៉ាប់រងសុខភាព និងផ្ដល់ថ្លៃស្នាក់នៅផងដែរ។
លោកនិយាយថា “យើងចង់បញ្ជាក់ឲ្យបានច្បាស់ថា យើងធ្វើការតវ៉ាដោយសន្ដិវិធីដើម្បីទាមទារលក្ខខណ្ឌការងារល្អប្រសើរសម្រាប់កម្មករនិយោជិត”។ លោកបានលើកឡើងទៀតថា ក្នុងចំណោមការទាមទារប្រាំបួនចំណុចដូចបានលើកឡើង មានពីរចំណុចដែលសំខាន់ជាងគេ គឺការដំឡើងប្រាក់ខែ និងការលុបចោលការបង់ថ្លៃ១៥ដុល្លារសម្រាប់ឯកសណ្ឋាន។
លោក មុំ សារ៉ន ប្រធានសហព័ន្ធសហជីពលើកតម្កើងជីវភាពកម្មករនិយោជិតខ្មែរ បានមានប្រសាសន៍ថា គណៈគ្រប់គ្រងក្រុមហ៊ុន ស៊ីនទ្រី បានយល់ព្រមដំឡើងប្រាក់ខែគោលសម្រាប់កម្មករទូទៅពី៦៥ដុល្លារទៅ៨៥ដុល្លារ និងពី ៧០,៥ដុល្លារ ទៅ៩៥ដុល្លារ សម្រាប់កម្មករប្រមូលសំរាមពេលថ្ងៃ។ ចំណែកឯកម្មករប្រមូលសំរាមពេលយប់ទទួលបានការដំឡើងប្រាក់ខែពី៩៧,៥ដុល្លារ ទៅ១១០ដុល្លារ ហើយអ្នកបើកបររថយន្តប្រមូលសំរាមពេលថ្ងៃទទួលបានការដំឡើងប្រាក់ខែពី១១០ដុល្លារ ទៅ១២០ដុល្លារ និងពី ១២០ដុល្លារទៅ១៣៥ដុល្លារ សម្រាប់អ្នកបើកបរវេនយប់។ តែទោះជាយ៉ាងណា ការដំឡើងប្រាក់ខែនេះមិនគ្រប់គ្រាន់ទេ។
លោក មុំ សារ៉ន បានមានប្រសាសន៍ថា “យើងនឹងបន្តចរចា [នៅថ្ងៃនេះ] រហូតទាល់តែយើងឈានដល់ដំណោះស្រាយសមស្របមួយ យើងមានស្នាមមេដៃរបស់កម្មករចំនួន៣០០នាក់ ហើយយើងនឹងបន្តធ្វើការតវ៉ារហូតទាល់តែរកឃើញដំណោះស្រាយ”។
ក្រុមអ្នកតវ៉ាដែលប្រមូលផ្ដុំគ្នានៅខាងក្រៅទីធ្លារបស់ក្រុមហ៊ុនស៊ីនទ្រី កាលពីម្សិលមិញ បានយល់ស្របតាមលោក មុំ សារ៉ន ដែលយល់ឃើញថា ការដំឡើងប្រាក់ខែនេះមិនគ្រប់គ្រាន់។ កម្មករប្រមូលសំរាមម្នាក់ឈ្មោះ កាន ជ័រ អាយុ៣១ឆ្នាំបាននិយាយថា “រាល់ថ្ងៃខ្ញុំត្រូវពុះពាររស់នៅដោយអាស្រ័យលើប្រាក់ខែតិចតួចរបស់ខ្ញុំ ដូច្នេះខ្ញុំនឹងមិនធ្វើការទេ រហូតទាល់តែក្រុមហ៊ុនរកបានដំណោះស្រាយ”។
លោក ងួន ស៊ីផេង នាយកប្រតិបត្តិការក្រុមហ៊ុន ស៊ីនទ្រី បានទទួលស្គាល់ថា ចាប់តាំងពីដំឡើងប្រាក់ខែរបស់កម្មករមក វាមានរយៈពេល១០ឆ្នាំហើយ ប៉ុន្តែបន្ទាប់ពីការជួបចរចាជាមួយមេដឹកនាំសហជីពនិងតំណាងក្រុមហ៊ុន បានយល់ព្រមដំឡើងប្រាក់ខែទៅតាមលទ្ធភាពដែលក្រុមហ៊ុនអាចផ្ដល់ជូនបាន។
លោកបានមានប្រសាសន៍ថា “យើងបានយល់ព្រមដំឡើងប្រាក់ខែរបស់ពួកគាត់ហើយ ប៉ុន្តែពួកគាត់មិនយល់ព្រមទេ ហើយនៅតែធ្វើការតវ៉ា។ យើងពិតជាចង់ដំឡើងប្រាក់ខែរបស់ពួកគាត់ទៀតណាស់ ប៉ុន្តែយើងគ្មានលទ្ធភាពដំឡើងឲ្យទេនៅពេលនេះ”។
លោកក៏បានបដិសេធដែរថា កម្មករមិនត្រូវបានតម្រូវឲ្យបង់ប្រាក់ជូនក្រុមហ៊ុនសម្រាប់ថ្លៃអាវយឺតនោះទេ ប៉ុន្តែពួកគាត់ត្រូវបង់ប្រាក់តម្កល់១៥ដុល្លារ ហើយប្រាក់តម្កល់១៥ដុល្លារនោះនឹងប្រគល់ជូនវិញនៅពេលពួកគេប្រគល់អាវយឺតនោះមកវិញ។ លោកបានមានប្រសាសន៍ទៀតថា “យើងនឹងប្រគល់ប្រាក់ឲ្យពួកគាត់វិញ ប្រសិនបើពួកគាត់ប្រគល់អាវយឺតនោះមកក្រុមហ៊ុននោះ មិនថា អាវយឺតនោះចាស់យ៉ាងណានោះទេ”។ លោកបានមានប្រសាសន៍បន្តទៀតថា ក្រុមហ៊ុន ស៊ីនទ្រី នឹងបន្តចរចាគ្នាទៀតនៅថ្ងៃនេះ៕ សុខុម