កាលពីម្សិលមិញ លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានបញ្ជាក់ពីភាពពិតនៃសេចក្ដីថ្លែងការណ៍ចេញដោយគណបក្សសង្គ្រោះជាតិ ពាក់ព័ន្ធនឹងការលើកឡើងកាលពីថ្ងៃសៅរ៍ថា កញ្ញា ធី សុវណ្ណថា អាយុ១៩ឆ្នាំ ដែលជាសកម្មជនហ៊ានរិះគន់មិនសំចៃមាត់របស់គណបក្សប្រឆាំងថា “មិនពាក់ព័ន្ធ” នឹងគណបក្សសង្គ្រោះជាតិនោះទេ។
លោក យឹម សុវណ្ណ បានលើកឡើងនៅក្នុងសេចក្ដីថ្លែងការណ៍មួយថា “គណបក្សសង្គ្រោះជាតិសូមបញ្ជាក់ថា លិខិតបដិសេធទាំងពីរដូចបានលើកឡើងខាងលើ គឺជាលិខិតផ្លូវការរបស់គណបក្ស”។
កាលពីថ្ងៃអាទិត្យ លោក យឹម សុវណ្ណ បានថ្លែងថា សេចក្ដីថ្លែងការណ៍ដែលបង្ហោះក្នុងទំព័រហ្វេសប៊ុករបស់ កញ្ញា កឹម មនោវិទ្យា អនុប្រធានកិច្ចការសាធារណៈនៃគណបក្សសង្គ្រោះជាតិ គឺក្លែងក្លាយ ទោះបីជាកញ្ញា កឹម មនោវិទ្យា អះអាងថា វាជាការពិតក៏ដោយ។ នៅក្នុងលិខិតនោះមានខ្លឹមសារដូច្នេះថា “ទស្សនផ្សេងគ្នាដែលត្រូវបានលើកឡើងនៅក្នុងរឿងនេះ គឺជាការយល់ច្រឡំផ្នែកទំនាក់ទំនង”។ កាលពីម្សិលមិញ លោក យឹម សុវណ្ណ បានមានប្រសាសន៍បដិសេធមិនឆ្លើយបំភ្លឺថា តើទំនាក់ទំនងច្រឡំនោះកើតឡើងដោយរបៀបណាទេ។
នៅក្នុងអ៊ីម៉េលមួយផ្ញើកាលពីយប់ថ្ងៃអាទិត្យ កញ្ញា កឹម មនោវិទ្យា បានប្រាប់អ្នកយកព័ត៌មានម្នាក់ថា “ប្រសិនបើអ្នកចង់ដឹងសាច់រឿងទាំងមូលពាក់ព័ន្ធ ធី សុវណ្ណថា ថាតើនាងជានរណាឲ្យប្រាកដនោះ សូមទំនាក់ទំនងទៅម្ចាស់ទំព័រ I Love Cambodia Hot News” អមជាមួយនឹងព័ត៌មានទំនាក់ទំនងទៅលោក អេង ពន្លក។
លោក អេង ពន្លក ដែលជាអ្នកបង្កើតទំព័រហ្វេសប៊ុក I Love Cambodia Hot News ដែលពេលនេះមានអ្នកគាំទ្រជាង២៨៣.០០០នាក់ បានលើកឡើងថា កញ្ញា ធី សុវណ្ណថា ដែលពីមុនធ្លាប់ជួយគ្រប់គ្រងទំព័រហ្វេសប៊ុកដ៏ពេញនិយមមួយនេះ លែងជាបុគ្គលគួរឲ្យជឿទុកចិត្តបានទៀតហើយ។
លោក អេង ពន្លក បានលើកឡើងបន្តទៀតថា “សុវណ្ណថា នៅក្មេងនៅឡើយ… [នាង] មិនទាន់រៀនចប់ថ្នាក់វិទ្យាល័យផងទេ ដូច្នេះខ្ញុំមានការព្រួយបារម្ភ។ ខ្ញុំសង្ស័យថា នាងជាចារកម្មរបស់គណបក្សប្រជាជនកម្ពុជា”។
ពេលសាកសួរថា តើលោកមានភ័ស្ដុតាងអ្វីដែលអាចបញ្ជាក់បានថា កញ្ញា ធី សុវណ្ណថា លួចធ្វើការជាសម្ងាត់ជាមួយគណបក្សប្រជាជនកម្ពុជានោះ លោក អេង ពន្លក បានគូសបញ្ជាក់ពីប្រជាប្រិយភាពយ៉ាងខ្លាំងនៃទំព័រហ្វេសប៊ុកផ្ទាល់ខ្លួនរបស់នាង ដែលត្រូវបានបង្កើតឡើងបន្ទាប់ពីនាងបានចាកចេញពីទំព័រ ហ្វេសប៊ុក I Love Cambodia Hot News កាលពីខែតុលា។
លោកថ្លែងថា “ត្រឹមតែរយៈពេលពីរខែនាងទទួលបាន Like (ចូលចិត្ត) ចំនួន២០០.០០០ ប្រសិនបើអ្នកទើបតែបង្កើតទំព័រហ្វេសប៊ុក អ្នកមិនអាចឈានដល់កម្រិតនោះទេ”។ លោកបានលើកឡើងបន្តទៀតថា លោកជឿថា នាងធ្វើការរួមគ្នាជាមួយ ផែ សុវណ្ណរិទ្ធ អតីតយុវជនគណបក្សប្រជាជនកម្ពុជា ដែលមានទំព័រហ្វេសប៊ុកដ៏ធំមួយក្រោយពីយុវជនរូបនេះបានប្រកាសចុះចូលជាមួយគណបក្សសង្គ្រោះជាតិជាសាធារណៈប៉ុន្មានខែក្រោយការបោះឆ្នោតជាតិកាលពីខែកក្កដា។
លោក អេង ពន្លក និយាយថា “ខ្ញុំមិនដឹងថា នៅពេលអនាគត [គណបក្សប្រជាជនកម្ពុជា] នឹងធ្វើអ្វីនោះទេពាក់ព័ន្ធនឹងប្រជាប្រិយភាពរបស់ សុវណ្ណថា ប៉ុន្តែសមាជិកគណបក្សសង្គ្រោះជាតិមួយចំនួនមានការព្រួយបារម្ភយ៉ាងខ្លាំង”។
លោកបានបន្តថា កញ្ញា កឹម មនោវិទ្យា ស្ថិតក្នុងចំណោមមេដឹកនាំគណបក្សសង្គ្រោះជាតិមួយក្រុមដែលជឿការលើកឡើងរបស់លោក ចំណែកឯលោក យឹម សុវណ្ណ អ្នកនាំពាក្យគណបក្សសង្គ្រោះជាតិនិងលោកស្រី មូរ សុខហួរ ប្រធានកិច្ចការសាធារណៈនៃគណបក្សនេះ “មិនជឿពួកយើងទេ”។
លោកស្រី មូរ សុខហួរ បានមានប្រសាសន៍កាលពីម្សិលមិញថា សេចក្ដីថ្លែងការណ៍របស់គណបក្សសង្គ្រោះជាតិ ដែលបញ្ចេញឈ្មោះកញ្ញា ធី សុវណ្ណថា គ្រាន់តែធ្វើឡើងក្នុងគោលបំណងចង់កែតម្រូវព័ត៌មានយល់ច្រឡំបង្ហោះនៅក្នុងទំព័រហ្វេសប៊ុក ដែលមានមនុស្សអានយ៉ាងច្រើនរបស់សកម្មជនវ័យក្មេងរូបនេះ ស្ដីពីផែនការរបស់គណបក្សសង្គ្រោះជាតិ ដាក់ពាក្យបណ្ដឹងទៅតុលាការឧក្រិដ្ឋកម្មអន្តរជាតិ (ICC) ប៉ុណ្ណោះ។
លោកស្រីបានមានប្រសាសន៍ទៀតថា “ប្រសិនបើយើងមានរបៀបវារៈផ្សេង ម៉្លេះយើងធ្វើវាយូរហើយ។ យើងមិនដែល និងគ្មានបំណងប្រាប់ [កញ្ញា សុវណ្ណថា] ឲ្យធ្វើអ្វីនោះទេ ប៉ុន្តែនៅពេលដែលនាងប្រើប្រាស់ឈ្មោះគណបក្សសង្គ្រោះជាតិ ជាពិសេសប្រធានរបស់យើង យើងចំាបាច់ត្រូវតែបង្ហាញការពិតប្រាប់ដល់សាធារណជន”។
កញ្ញា ធី សុវណ្ណថា មិនអាចទាក់ទងសុំការបំភ្លឺបានទេ កាលពីម្សិលមិញ ប៉ុន្តែនាងបានសរសេរបង្ហោះនៅលើទំព័រហ្វេសប៊ុករបស់នាងថា នាងនឹងបន្តប្រយុទ្ធដើម្បីគណបក្សប្រឆាំង ទោះបីជានាងទទួលរង “ការទះកំផ្លៀង” ពីគណបក្សសង្គ្រោះជាតិក៏ដោយ។ នាងបានសរសេរបង្ហោះក្នុងទំព័រហ្វេសប៊ុកថា “នៅពេលពួកគាត់ទះកំផ្លៀងខ្ញុំ ខ្ញុំឈឺណាស់ ប៉ុន្តែខ្ញុំអាចទ្រាំបាន។ ចង់សង្គ្រោះជាតិ [យើង] ត្រូវតែហ៊ានលះបង់ជាមួយនឹងភាពអំណត់នឹងសេចក្ដីក្លាហាន”៕ សុខុម