35 C
Phnom Penh

ប្រធាន​ពន្ធនាគារ​ព្រៃ​ស​បដិសេធ​ថា មិន​មាន​ការដោះ​លែង​​អ្នករត់​ពន្ធ​គ្រឿង​ញៀន​មុន​ពេល​កំណត់​ឡើយ​

ដោយ ឌឹ ខេមបូឌា ដេលី

បទវិភាគ

កាលពី​ម្សិល​មិញ​ មន្ត្រី​ពន្ធនាគារ​ព្រៃ​ស​ បាន​បដិសេធ​ចំពោះ​សេចក្តី​រាយការណ៍​របស់​ប្រព័ន្ធផ្សព្វ​ផ្សាយ​ក្នុង​ស្រុក​មួយ​ ដែល​បាន​ចុះ​ផ្សាយ​ថា បុរស​ម្នាក់​ដែល កំពុង​ទទួល​ទោស​ជាប់​ពន្ធនាគារ​រយៈពេល​១០​ឆ្នាំ​​ពី​បទ​រត់​ពន្ធ​គ្រឿង​ញៀន​កាល​ពី​បួន​ឆ្នាំ​កន្លង​ទៅ​  ត្រូវ​បាន​ដោះ​លែង​មុន​ពេល​កំណត់​នោះ​។

លោក​ ស្រ៊ុន​ លាង​ ប្រធាន​ពន្ធនាគារ​ព្រៃ​ស​ ​​បាន​ឲ្យ​ដឹង​ថា​ អ្ន​ក​ទោស​ ថៃ​ ទីនី​ នៅ​តែ​ជាប់​ពន្ធ​នាគារ​នៅ​ឡើយ​ កាល​ពី​ម្សិល​មិញ​ បន្ទាប់​ពី​ត្រូ​វ​បាន​ឃុំ​ខ្លួនក្រោម​ការ​ចោទ​ប្រកាន់​​ពី​បទ​ចោទ​ទាក់​ទិននឹង​ការ​រត់​ពន្ធ​គ្រឿង​ញៀន​ទៅ​កាន់​ប្រ​ទេស​អូស្ត្រាលី​។

​លោក​ ស្រ៊ុន​ លាង​ បាន​មាន​ប្រសាសន៍​ថា “គ្មាន​ការ​ដោះ​លែង​បែប​នេះ​ទេ​។​ ខ្ញុំ​មិន​ដឹង​ថា តើ​កាសែត​នោះ​យក​ព័ត៌មាន​មក​ពី​ទី​ណា​នោះ​ឡើយ​។ អ្នក​ទោស​រូបនេះ​​នៅ​តែ​ជាប់​ពន្ធនាគារ​នៅ​ឡើយ​”។

យោង​តាម​សេចក្តី​រាយ​ការណ៍​បាន​ឲ្យ​ដឹង​ថា អ្ន​ក​ទោស​ ថៃ​ ទីនី​ ត្រូវ​បា​ន​ចាប់​ខ្លួនកាល​ពី​បួន​ឆ្នាំ​មុន​ពី​បទ​ប៉ុន​ប៉ង​នាំ​យក​គ្រឿង​ញៀន​ដែល​មិន​មាន​ការ​បញ្ជាក់ពី​​បរិមាណ​ច្បាស់​លាស់​ទៅ​កាន់​ប្រទេសអូស្ត្រាលី​ ​​ដោយ​នគរ​បាល​កម្ពុជា​ទទួល​បាន​ជំនួយ​ពី​មន្ត្រី​នគរបាល​អនុវត្ត​ន៍ច្បាប់​របស់​ប្រទេស​អូស្ត្រាលី​ ។

សេចក្តី​រាយ​ការណ៍ដែល​ដក​ស្រង់​ចេញ​​ពី​ប្រភព​អនា​មិក​មួយ​បាន​ឲ្យ​ដឹង​ថា អ្ន​ក​ទោស​​ ថៃ​ ទី​នី​ ត្រូវ​បាន​ដោះ​លែង​មុន​ការ​កំណត់​ដោយ​គ្មាន​ការ​ពន្យល់​។
នៅ​ពេល​ត្រូវ​បាន​សួរ​អំពី​ព័ត៌មាន​លម្អិត​ទាក់​ទិន​នឹង​ការ​ចាប់​ខ្លួន​ និង​ការបញ្ជូន​អ្នក​ទោស​ ថៃ​ ទី​នី​ ចូល​ពន្ធ​នាគារ​ លោក​ ស៊្រុន​ លាង​ បាន​បង្វែរ​សំណួរ​នេះ​ទៅ​កាន់​សាលា​ដំបូង​រាជ​ធានី​ភ្នំពេញ​វិញ។

លោក​ ជីវ​ កេង​ ប្រធាន​សាលា​ដំបូងរាជ​ធានី​ភ្នំពេញ​​​បាន​ឲ្យដឹង​ថា លោក​មិនដឹង​អំពី​ករណី​ដែល​ពាក់​ព័ន្ធ​​នឹង​ជន​រត់​ពន្ធ​គ្រឿង​ញៀន​​​​​ដែល​ត្រូវ​បាន​ផ្តន្ទាទោស​នេះ​ទេ​ តែ​ទោះ​ជា​យ៉ាង​ណា​  លោក​​​​​​បាន​បន្ថែម​ថា​ សម្រាប់​ជន​ជាប់​ចោទធ្ងន់​ធ្ងរ​​ពី​បទ​រត់​ពន្ធ​គ្រឿង​ញៀន​មិន​ដែល​ត្រូវ​បាន​ដោះ​លែង​មុន​ការ​កំណត់​នោះ​ទេ​។​លោក​បាន​ថ្លែង​ទៀត​ថា “ជា​ទូទៅ​​ឧក្រិដ្ឋ​ជន​​ដែល​មានពិរុទ្ធភាព​ពាក់​ព័ន្ធ​នឹង​បទ​ល្មើស​គ្រឿង​ញៀន​ គឺ​មិន​ដែល​ត្រូវ​បាន​ដោះ​លែង​​មុន​ការ​កំណត់​ឡើយ​”៕ ស៊ុយឈាង

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស