26 C
Phnom Penh

អ្នក​ភូមិ​ត្រូវ​បាន​ប្តឹង​ពីបទ​​បំផ្លាញទ្រព្យសម្បត្តិ​ពាក់​ព័ន្ធ​នឹង​វិវាទ​ដីធ្លីក្នុង​ខេត្ត​បន្ទាយ​មាន​ជ័យ

ដោយ ឌឹ ខេមបូឌា ដេលី

បទវិភាគ

អ្នក​ភូមិ​បួន​នាក់​ដែល​ជាប់​ពាក់​ព័ន្ធ​នឹង​វិវាទ​ដីធ្លី​ជាមួយ​ក្រុម​ហ៊ុន​ កសិ​ពាណិជ្ជ​កម្ម​មួយ​​នៅក្នុង​ខេត្ត​បន្ទាយ​មាន​ជ័យ​បានឲ្យ​ដឹង​កាល​ពីម្សិលមិញ​ថា ពួកគាត់​ត្រូវ​បាន​​សា​លា​ដំបូង​ខេត្ត​កោះ​ហៅ​ទៅ​​សាក​សួរ​ជុំ​វិញ​ពាក្យ​បណ្តឹង​ដែល​ក្រុម​ហ៊ុន​នេះ​បានដាក់​ពីបទ​បំផ្លាញ​ទ្រព្យ​សម្បត្តិ​។

តាមពិត​​ពាក្យ​បណ្តឹង​នេះ​ត្រូវ​បាន​​ដាក់​កាលពីឆ្នាំមុន ប៉ុន្តែ​អ្នក​ភូមិ​បា​នអះ​អាង​​​ថា ពួក​គាត់​មិន​បាន​ដឹង​​ទេរហូត​ដល់​ពេល​ទទួល​ដីកា​កោះ​កាល​ពី​​សប្តាហ៍​មុន គឺ​ភ្លាម​ៗ​បន្ទាប់​ពី​ពួក​គាត់​បា​ន​រឹប​អូស​យក​​គ្រឿង​ចក្រ​ពីកម្ម​ករ​ប្រាំមួយ​នាក់​ដែល​ធ្វើ​ការ​ឲ្យ​ក្រុម​ហ៊ុន​ លាង​ប៊ូ ដែល​ពួក​​គាត់​ សង្ស័យ​ថា ត្រៀម​រាន​ដី​​មាន​វិវាទ​នេះ​។

លោក ឯក វណ្ណា ​​​ប្រធាន​ភូមិ​ប្រាសាទ​ត្បែង​ ​​ក្នុង​ឃុំ​បន្ទាយ​ឆ្មាដែល​ស្ថិតក្នុង​ចំណោម​ចុង​ចោទទាំងនោះបាន​មាន​ប្រសាសន៍​ថា “ខ្ញុំ​ទើប​តែ​ដឹង​​កាល​ពីសប្តាហ៍​មុនពេល​​ខ្ញុំ​ទទួល​ដីកា​កោះថា ក្រុម​ហ៊ុន​នេះ​បាន​ប្តឹង​រូប​​ខ្ញុំ​។ នេះ​ជាការ​គំរាម​កំហែង​”។​

អ្នក​ភូមិ​ជាង​៥០០គ្រួសារ​មក​ពីភូមិ​ចំនួន​ពីរ​គឺ​ភូមិ​ប្រាសាទ​ត្បែង​ និង​ភូមិ​តាមាំង​ ​បាន​តវ៉ា​នឹង​ការ​អះអាង​សិទ្ធិ​កាន់​កាប់​​ដី​ជាង​១.៧០០ហិកតារបស់ក្រុម​ហ៊ុន​ លាង​ ប៊ូ ​នៅ​ក្នុង​​ស្រុក​ថ្មពួក ​ចាប់​តាំង​ពីឆ្នាំ​២០០៨មក គឺ​ពេល​ក្រុម​ហ៊ុន​នេះ​ទទួល​បាន​ដី​សម្បទាន​ដើម្បី​​ធ្វើ​ចម្ការ​លើ​ដី​ដែល​អ្នក​ភូមិ​អះ​អាង  ​ថា ខ្លួន​បាន​ធ្វើ​ស្រែ​ចម្ការ​ចាប់​តាំង​ពី​​ឆ្នាំ​២០០០​មក​។ លោក​ វណ្ណា បានមា​ន​ប្រសាសន៍ថា លោក  ទេស ណាត​ មេភូមិ​តាមាំង ក៏​ត្រូវ​បាន​កោះ​ហៅជាមួយ​តំណាង​អ្ន​ក​ភូមិ​ឈ្មោះ សូត្រ អ៊ឹម និង​ កែវ ធី​​  ដែរ​។

លោក ទូ ធានតឺ  តំណាង​ក្រុម​ហ៊ុននេះ​​បាន​បញ្ជាក់​ថា ក្រុម​ហ៊ុន​បាន​ដាក់​ពាក្យ​បណ្តឹង​ប្តឹង​លោក​​​ ឯក វណ្ណា និង​អ្នក​ភូមិ​បី​នាក់​ទៀត មែន​​ ប៉ុន្តែ ​​បា​ន​បដិសេធ​មិន​ធ្វើ​អត្ថា​​ធិប្បាយ​​បន្ថែ​ម​​​ទេ។

យោង​តាម​​នាម​ប័ណ្ណមួយ​សន្លឹក​​​របស់​លោក ធានតឺ ដែល​​បាន​ចែ​ក​ឲ្យ​អ្នក​​ភូមិ​​រស់​នៅលើ​ដី​​មាន​វិវាទនេះ​​កាល​ពីពេល​ថ្មី​ៗ​នេះ​លោក ធាន​តឺ ជា​ទី​ប្រឹក្សា​របស់​លោក​ឧប​នាយក​ រដ្ឋ​មន្ត្រី​ យឹម ឆៃលី និង​ជា​សមាជិក​កង​អង្គរក្ស ​របស់​លោក​នាយក​រដ្ឋ​មន្ត្រី​ ហ៊ុន​ សែន ។

លោក ធានតឺ បាន​អះ​អាង​កាល​ពី​ម្សិល​មិញ​ថា លោកធ្លាប់​​មាន​តួនាទី​ទាំង​​ពីរនេះ​​ក្នុង​ពេល​កន្លង​មក​មែន​​​ ប៉ុន្តែ​ ឥឡូវ​មិនមែន​ទេ​​។ លោក​បាន​ប​​ដិសេធមិន​ធ្វើ​​អត្ថាធិ​ប្បាយ​ទេ​នៅពេល​​ត្រូវ​បាន​សួរ​ពី​មូល​ហេតុ​​ដែល​ ​ខ្លួន​នៅតែ​ប្រើ​នាម​ប័ណ្ណ​ចាស់​​នេះ​។

ទោះ​យ៉ាង​ណា លោក ប៉ែន សុផុន តំណាង​ អ្នក​​ភូមិ​បាន​ឲ្យ​ដឹង​​ថា អ្នក​ភូមិ​ដែល​ត្រូវ​បាន​គេ​ឲ្យនាម​ប័ណ្ណនេះ​កំពុង​មាន​អារម្មណ៍​ភិត​ភ័យ​។លោក​បាន​និយាយ​ថា “ គាត់​ប្រើ​ប្រាស់​​ តួនាទី​របស់​គាត់​មក​បំភិត​បំភ័យ​ពួក​យើង​ ដើម្បី​ចាប់​យក​ដី​របស់​ពួក​យើង​។​ យើងជឿ​ថា ក្រុម​ហ៊ុន​​នេះ​មាន​ខ្នង​ក្រាស់​ មាន​ន័យ​ថា ពួក​គេ​​មាន​មន្ត្រី​ជាន់​ខ្ពស់​​​នៅ​ពី​ក្រោយ​​។ ស្តាប់​​ទៅ​គួរ​ឲ្យ​ខ្លាច​មែន​ ប៉ុន្តែ យើង​មិន​ញញើត​ក្នុង​ការ​​តស៊ូ​យក​ដី​របស់​យើ​ង​​មក​​វិញឡើយ​”។

លោក យឹម ឆៃលី ​ប្រធាន​ក្រុម​ប្រឹក្សា​អភិវឌ្ឍន៍​កសិកម្ម​ និង​ជន​បទ​មិន​អាច​ទាក់​ទង​សុំ​ការ​អត្ថាធិប្បាយ​បាន​ទេ​។

លោក ផ្លេក វ៉ារី អភិបាល​ស្រុក ​បានឲ្យ​ដឹង​​ថា រដ្ឋាភិបាល​បាន​បង្កើត​​គណៈ​កម្មការ​មួយកាល​ពីថ្ងៃ​ទី​៦ ខែ​មករា​ឲ្យ​ចុះ​ទៅ​វាស់​វែង​ដី​មាន​វិវាទនេះ​ និង​ដោះស្រាយ​បញ្ហា​នេះ​។លោកបាន​មាន​ប្រសាសន៍​ថា “នេះគឺ​ជាវិវាទ​ដីធ្លី​ដ៏​ក្តៅ​គគុក​រវាង​ក្រុម​ហ៊ុន​ និង​អ្នក​ភូមិ​ក្នុង​មូល​ដ្ឋាន”៕សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស