សមាជិកក្រុមគ្រួសារ ព្រមទាំងសមាជិកសភាគណបក្សសង្គ្រោះជាតិត្រូវបានបដិសេធមិនឲ្យចូលទៅសួរសុខទុក្ខសមាជិកសហជីពនិងអ្នកតវ៉ាសរុប២៣រូបដែលត្រូវបានចាប់ខ្លួនកាលពីដើមខែមករា អំឡុងការតវ៉ាទាមទារដំឡើងប្រាក់ខែគោលសម្រាប់កម្មកររោងចក្រកាត់ដេរ ដែលពេលនោះ កម្មករចំនួនប្រាំនាក់ត្រូវនគរបាលបាញ់សម្លាប់ទេ។
មនុស្សមួយក្រុមមានគ្នាប្រហែល៤០នាក់រាប់ទាំងសមាជិកក្រុមគ្រួសារអ្នកជាប់ឃុំទាំង២៣នាក់ សមាជិកព្រឹទ្ធសភាគណបក្សប្រឆាំងប្រាំមួយរូប និងសមា ជិកសភាជាប់ឆ្នោត១៤រូបទៀតរបស់គណបក្សនេះផង បានធ្វើដំណើរទៅមណ្ឌលអប់រំកែប្រែទី៣ក្នុងខេត្តកំពង់ចាមដើម្បីទៅសួរសុខទុក្ខអ្នកជាប់ឃុំទាំង២៣នាក់នេះ ប៉ុន្តែត្រូវបានរារាំងពុំឲ្យចូល ទៅក្នុងពន្ធនាគារឡើយ ហើយនៅខាងក្រៅពន្ធនាគារ មានកម្លាំងនគរបាលជាច្រើន។
លោកអាន ភិន អ្នកឃ្លាំមើលរបស់អង្គការសិទ្ធិមនុស្សអាដហុកប្រចាំខេត្តនេះបានមានប្រសាសន៍ថា “យើងបានឃើញកងកម្លាំងប្រហែល ២០០នាក់ រួមមាននគរបាលនិងនគរបាលបង្ក្រាបកុបកម្មប្រដាប់ដោយអាវុធ និងដំបង និងសន្តិសុខភូមិដែលស្លៀកឯកសណ្ឋានយោធាជាមួយដំបងក្នុងដៃ [ នៅខាងក្រៅពន្ធនាគារ]…។ ពួកគេដាក់កម្លាំងយ៉ាងច្រើននៅកន្លែងនោះដើម្បីបំភិតបំភ័យនិងគំរាម”។
លោក សុន ឆ័យ សមាជិកសភាជាប់ឆ្នោតរបស់គណបក្សប្រឆាំងបានមានប្រសាសន៍ថា អ្នកទៅសួរសុខទុក្ខគ្មានបំណងបង្កបញ្ហាទេ ហើយបានសម្តែងមន្ទិលចំពោះការដាក់កងកម្លាំងនេះ។ លោកបានថ្លែងថា“ ពួកគេពុំគួរប្រើប្រាស់កម្លាំងនិងអំណាចឡើយ”។ មន្ត្រីពន្ធនាគារម្នាក់បានអះអាងថា អ្នកជាប់ឃុំទាំង២៣នាក់នេះគឺមិនត្រូវបានអនុញ្ញាតឲ្យមានអ្នកមកសួរសុខទុក្ខទេ ពីព្រោះពួកគេកំពុងស្ថិតនៅក្រោមការសាកសួរនៅឡើយ និងដោយសារថា ដំណឹងស្តីពីវត្តមានរបស់គណបក្សសង្គ្រោះជាតិនៅទីនោះអាចនាំឲ្យមានការធ្វើ “កុបកម្ម” ក្នុងចំណោមអ្នកទោសដទៃទៀត។
លោក គា សុវណ្ណា ប្រធានមណ្ឌលអប់រំកែប្រែទី៣ក្នុងខេត្តកំពង់ចាមមានប្រសាសន៍ថា “យើងអនុវត្តតាមលិខិតរបស់តុលាការដែលពុំអនុញ្ញាតឲ្យគណប ក្សសង្គ្រោះជាតិចូលជួប [អ្នកជាប់ឃុំទាំង២៣នាក់] ព្រោះចៅក្រមកំពុងសាកសួរពួកគេនៅឡើយ”។
ដោយបដិសេធមិននិយាយលម្អិត លោកបានបន្ថែមថា “យើងក៏មានបញ្ហាមួយចំនួនពាក់ព័ន្ធនឹងអ្នកទោស១.៤០០នាក់ដែលបានព្យាយាមហែកគុកពេលពួកគេឮថា គណបក្សសង្គ្រោះជាតិមានគម្រោងមកសួរសុខទុក្ខពួកគេផងដែរ”។
អ្នកស្រី ប្រាក់ សុវណ្ណារី ប្រពន្ធរបស់លោក វ៉ន ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ និងជាអ្នកជាប់ឃុំម្នាក់ក្នុងចំណោមអ្នកជាប់ឃុំទាំង២៣នាក់នោះ បានឲ្យដឹងថា អ្នកស្រីនឹងព្យាយាមទៅសួរសុខទុក្ខប្តីរបស់អ្នកស្រីម្តងទៀតនៅចុងសប្តាហ៍នេះ។ អ្នកស្រីមានប្រសាសន៍ថា “ខ្ញុំអាក់អន់ចិត្តណាស់ ពីព្រោះអាជ្ញាធរមិនអនុញ្ញាតឲ្យខ្ញុំទៅសួរសុខទុក្ខប្តីរបស់ខ្ញុំទេ។ រដ្ឋាភិបាលរំលោភសិទ្ធិរបស់យើង និងក្បត់ ប្រជាពលរដ្ឋព្រោះពួកគេនិយាយថា គ្រួសារអ្នកជាប់ឃុំអាចទៅសួរសុខទុក្ខបាន”។ សាវនាការស្តីពីការដោះលែងអ្នកជាប់ឃុំទាំងនេះឲ្យនៅក្រៅឃុំបណ្តោះអាសន្ន គ្រោងធ្វើនៅថ្ងៃទី១១ខែកុម្ភៈ៕ សារុន