28 C
Phnom Penh

​ខ្មែរ​កម្ពុជាក្រោម​ដែល​គេច​ចេញ​ពី​ការ​ធ្វើ​ទុក្ខ​បុក​ម្នេញ​ស្វែង​រក​សិទ្ធិ​ជ្រក​កោន​​នៅ​ប្រទេសថៃ​

ដោយ ឌឹ ខេមបូឌា ដេលី

បទវិភាគ

អង្គការ​សិទ្ធិ​ជន​ជាតិ​ភាគតិច (MIRO) ​បាន​លើក​ឡើង​នៅ​ក្នុង​របាយការណ៍​ថ្មី​របស់​ខ្លួន​ថា​ ប្រជា​ជន​ខ្មែរ​កម្ពុជា​ក្រោម​ដែល​គេច​ចេញ​​ពី​ការ​ធ្វើ​ទុក្ខបុក​ម្នេ​ញ​នៅ​ក្នុង​ប្រទេស​វៀត​ណាម​ និង​​​ដែល​ពាក្យ​សុំ​សិទ្ធិ​ជ្រក​កោន​នៅក្នុង​ប្រទេស​​​ថៃ​របស់​ពួក​គេ​ត្រូវ​បាន​ច្រាន​ចោល​​ កំពុង​តែ​ត្រូវ​បាន​បញ្ជូន​​មក​ប្រទេស​កម្ពុជា​ ជា​ទី​ដែល​រដ្ឋាភិបាល​មិន​អាច​ធានា​បាន​ថា​សិទ្ធិរបស់​ពួក​គេ​​ត្រូវ​បាន​ការពារ​នោះឡើយ​​។

របាយ​ការណ៍​របស់​អង្គការ​នេះ​ដែល​មាន​ចំណង​ជើង​ថា​​ “ប្រជា​ជន​ដែល​គេ​បោះ​បង់​ចោលគឺ​ខ្មែរកម្ពុជា​​ក្រោម​កំពុង​ស្វែង​រក​សិទ្ធិ​ជ្រក​កោន​នៅ​ក្នុង​ប្រទេស​ថៃ” ​គឺ​ត្រូវ​បាន​ធ្វើ​ឡើង​​ដោយ​ផ្អែក​លើ​កិច្ច​សម្ភាស​ជាមួយ​អ្នក​ស្វែង​រក​សិទ្ធិជ្រក​កោន​ ជន​ភៀស​ខ្លួន​ និង​សកម្មជន​ខ្មែរ​កម្ពុជា​ក្រោម​ កាល​ពី​ខែ​វិចិ្ឆកា​។​

របាយ​ការណ៍នេះបាន​លើក​ឡើង​ថា “នៅ​ពេល​ព្យាយាម​សុំ​ឲ្យ​មាន​ការ​ទទួល​ស្គាល់​​​ស្រប​ច្បាប់​នៅ​ក្នុង​ប្រទេស​ថៃ​តាមរយៈ​ការ​ដាក់​ពាក្យ​សុំ​សិទ្ធិ​ជ្រក​កោន​នៅ​ [ឧត្ត​ម​ស្នង​ការ​​​អង្គការ​សហ​ប្រជា​ជាតទទួល​បន្ទុក​ជន​​ភៀស​​​ខ្លួន​] ​ខ្មែរកម្ពុជា​​ក្រោម​ភាគ​ច្រើន​ត្រូវ​បាន​ច្រាន​​​ចោល​ដោយ​មាន​ការ​​លើក​ឡើង​ពី​មូល​ហេតុ​ថា​ ពួកគេ​អាច​មក​រស់​នៅ​ដោយ​សុវត្ថិ​ភាព​នៅ​ក្នុង​ប្រទេស​កម្ពុជា​”។ តែ​ទោះ​ជា​យ៉ាង​​ណា​ របាយ​ការណ៍​​​នេះ​បាន​លើក​ឡើង​បន្ថែម​ថា​ “ការ​ពិត​ទៅ​រដ្ឋា​ភិ​បា​ល​ [កម្ពុជា​​មិន​​បាន​​ផ្តល់​ការ​ការពារ​សិទ្ធិ​ដល់​ប្រជា​ជន​ខ្មែរ​កម្ពុជា​ក្រោម​ទាំង​នោះ​ឡើយ​]”។

លោក​ អាង​ ចាន់រិទ្ធិ​ ប្រធាន​អង្គការ​សិទ្ធិ​ជន​ជាតិ​ភាគតិច​ បាន​មាន​ប្រសាសន៍​ថា “ឧត្តម​​​ស្នង​ការ​អង្គការ​សហ​ប្រជាជាតិ​​ទទួល​បន្ទុក​ជន​ភៀស​ខ្លួន​នៅ​ក្នុង​ទី​ក្រុង​បាង​កក​ ត្រូវ​តែ​ទទួល​ស្គាល់​ថា​ [រដ្ឋាភិបាល​] មិន​បាន​ផ្តល់​ការ​ការពារ​ពេញលេញ​សម្រាប់​សកម្មជន​មក​ពី​កម្ពុជា​ក្រោម​ឡើយ​”។

ឧត្តម​ស្នង​ការ​អង្គការ​សហ​ប្រជា​ជាតិ​ទទួល​បន្ទុក​ជន​ភៀស​ខ្លួន​ប្រចាំ​ទី​ក្រុងបាង​កក​​ មិន​បានឆ្លើយ​តប​នឹង​សំណើ​សុំការ​ធ្វើ​អត្ថា​ធិប្បាយទេ​។ លោក​ស្រី​ ដេណីស​ ខូហ្វ​លែន (Denise Coghlan) នាយិកា​ទី​ភ្នាក់​ងារ​ជន​ភៀស​ខ្លួន​ Jesuit Refugee Service បាន​លើក​ឡើង​ថា ​មាន​ខ្មែរ​កម្ពុជា​ក្រោម​ជា​ច្រើន​ដែល​រស់​នៅ​ក្នុង​ប្រទេស​​កម្ពុជា​ជា​ច្រើន​ឆ្នាំ​មក​ហើយ​ ប៉ុន្តែ​ពួកគេ​មិន​ដែល​​​មាន​បញ្ហា​អ្វី​នោះ​ទេ​។

លោក​ស្រី​មាន​ប្រសាសន៍​ថា​ “ប៉ុន្តែ​ឥឡូវ​​​​​វា​ហាក់​បី​ដូច​ជា​មាន​បញ្ហា​ត្រង់​ថា​ មាន​ពល​រដ្ឋ​​ផ្សេង​ដែល​អះ​អាង​ពួក​គេ​ត្រូវ​ការ​ការពារ​ពី​ការ​ធ្វើ​ទុក្ខ​បុក​ម្នេញ​ពី​ប្រ​ទេ​ស​វៀត​ណាម​”។ លោក​ស្រី​បាន​បន្ថែម​ថា “មាន​អ្ន​ក​ខ្លះ​បាន​ទៅ​ប្រទេស​ថៃ​ ប៉ុន្តែ​ប្រសិន​បើ​ឧត្តម​ស្នង​ការ​អង្គការ​សហ​ប្រជា​ជាតិ​ទទួល​បន្ទុក​ជន​ភៀស​ខ្លួន​ ប​ដិ​​សេធ​ប្រជា​ជន​ដែលកំពុង​សុំ​សិទ្ធិជ្រក​កោន​នៅ​ក្នុង​ប្រទេស​ថៃ​ដោយ​សា​រ​តែ​ពួក​គេ​ជា​ជន​ជាតិ​កម្ពុជា​នោះ​ វា​ហាក់​បី​ដូច​ជា​អយុត្តិធម៌​ពេក​ហើយ”​។

លោក​ ផៃ​ ស៊ី​ផាន​ អ្នក​នាំ​ពាក្យ​ទី​ស្តី​ការ​គណៈ​រដ្ឋ​មន្ត្រី​បាន​ឲ្យ​ដឹង​ថា សិទ្ធិ​សុំ​សិទ្ធិ​ជ្រក​កោន​គួរ​តែ​ត្រូវ​បាន​ការ​ពារ​។ លោក​បាន​មាន​ប្រសាសន៍​ថា “ប្រសិន​បើ​ពួក​គាត់​​ស្វែង​រក​សិទ្ធិ​ជ្រក​កោន​ដោយ​គេច​ចេញ​ពី​ប្រទេស​វៀត​ណាម​ ដើម្បី​ទៅ​រក​ទី​កន្លែង​មួយ​ដែល​ពួគគាត់​​គិត​ថា សិទ្ធិ​មនុស្ស​ត្រូវ​បាន​ការ​ពារ​នោះ​ អ៊ីចឹង​ស្ថាប័ន​ដ៏​រឹង​មាំ​ដូច​អង្គការ​សហ​ប្រជា​ជាតិ​ជាដើម​គួរ​តែ​ការ​ពារ​​ពួក​គាត់”​។

លោក​បាន​មាន​ប្រសាសន៍​បន្ថែម​ទៀត​ថា “នៅ​ក្នុង​ករណី​នេះ ​បើ​យោង​តាម​រដ្ឋ​ធម្ម​នុញ្ញ​​របស់​យើង​ យើង​ចៀស​វាង​​ការ​ចូល​ជ្រៀត​ជ្រែក​នៅក្នុង​រឿង​នយោ​បា​យ​របស់​ប្រទេស​មួយ​ផ្សេង​ទៀត​ ហេតុ​ដូច្នេះ​ប្រសិន​បើ​ពួក​គាត់​​​មក​ប្រទេស​កម្ពុជាដើម្បី​ស្នើ​សុំ​សិទ្ធិ​ជ្រក​កោន​នៅ​ទីនេះដោយសារ​តែ​ពួក​គេ​ចង់​មក​រស់​នៅ​ក្នុ​ង​ប្រទេស​កម្ពុជា​នោះ​ រដ្ឋា​ភិ​បាល​តែង​តែ​ស្វាគមន៍​ពួកគាត់​​ជានិច្ច​។ ប៉ុន្តែ​យើង​​​មិន​ចង់​ឲ្យ​នរណា​ម្នាក់​ប្រើ​ប្រទេស​កម្ពុជា​ជា​ឈ្នាន់​ ដើម្បី​ផ្តួល​រំលំ​ឬ​ក៏​ប្រយុទ្ធ​ប្រឆាំង​នឹង​ប្រទេស​ជិត​ខាង​ឡើយ។​​ តែ​ទោះ​​​ជា​យ៉ាង​ណា​អ្នក​រស់​នៅ​ក្នុង​ប្រទេស​វៀត​ណាម​ ត្រូវ​តែ​គោរព​ច្បាប់​ក្នុង​ស្រុក​​​”៕ស៊ុយឈាង​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស