28 C
Phnom Penh

កម្មករ​​​ប្រមូល​​​សំរាម​​​ត្រឡប់​​​ចូល​​​ធ្វើ​​​ការ​​​វិញ​​​​​​ ក្រោយ​​​ពីដំឡើង​​​ប្រាក់​​​ខែ​​​

ដោយ ឌឹ ខេមបូឌា ដេលី

បទវិភាគ

កូដកម្ម​​​របស់​​​កម្មករ​​​ក្រុមហ៊ុន​​​ប្រមូល​​​សំរាម​​​​​​ស៊ីនទ្រី នៅ​​​ក្នុង​​​រាជធានីភ្នំពេញ​​​​​​បាន​​​បញ្ចប់​​​ហើយ​​​កាល​​​ពី​​​ម្សិលមិញ បន្ទាប់ពី​​​ក្រុម​​​ហ៊ុន​​​នេះ​​​ បាន​​​យល់​​​ព្រម​​​​​​តាម​​​ការ​​​ទាមទា​​​រ​​​របស់​​​កម្មករ​​​សុំ​​​ដំឡើង​​​ប្រាក់​​​ខែ​​​និង​​​លក្ខខណ្ឌ​​​ការងារ​​​ល្អ។

នគរបាល​បង្ក្រាប​បាតុកម្ម​ត្រូវ​បាន​បញ្ជូន​ទៅទី​តាំង​ចំណត​រថយន្ត​ប្រមូល​សំរាម​​របស់​ក្រុមហ៊ុនសីុនទ្រី ក្នុង​ខណ្ឌ​ដង្កោ​ កន្លែង​ដែល​កម្មករ​រាប់​រយនាក់​ធ្វើ​កូដកម្ម​ទាមទារ​លក្ខខណ្ឌការងារ​ល្អប្រសើរ​ និង​ទាម​ទារ​ដំឡើង​ប្រាក់​ខែ កាល​ពីម្សិលមិញ​​។ សីុវ  ចាន់​ណា​
នគរបាល​បង្ក្រាប​បាតុកម្ម​ត្រូវ​បាន​បញ្ជូន​ទៅទី​តាំង​ចំណត​រថយន្ត​ប្រមូល​សំរាម​​របស់​ក្រុមហ៊ុនស៊ីនទ្រី ក្នុង​ខណ្ឌ​ដង្កោ​ កន្លែង​ដែល​កម្មករ​រាប់​រយនាក់​ធ្វើ​កូដកម្ម​ទាមទារ​លក្ខខណ្ឌការងារ​ល្អប្រសើរ​ និង​ទាម​ទារ​ដំឡើង​ប្រាក់​ខែ កាល​ពីម្សិលមិញ​​។ ស៊ីវ  ចាន់​ណា​

មិន​​​យូរ​​​ប៉ុន្មាន​​​ បន្ទាប់​​​ពី​​​មាន​​​ការ​​​​​​ព្រម​​​ព្រៀង​​​​​​គ្នា​​​​​​ រថយន្ត​​​ប្រមូល​​​សំរាម​​​ពណ៌បៃតង​​​និង​​​កម្ម​​​ករ​​​​​​ស្លៀក​​​ពាក់​​​ឯកសណ្ឋាន​​​​​​ពណ៌​​​បៃតង​​​​​​របស់​​​ក្រុមហ៊ុន​​​ស៊ីនទ្រី​​​ បាន​​​ចាប់​​​​​​ផ្ដើម​​​មមាញឹក​​​ដុត​​​ដៃ​​​ដុត​​​ជើង​​​ប្រមូល​​​​​​សំរាម​​​ ដែល​​​មាន​​​ក្លិន​​​​​​ស្អុយ​​​អាក្រក់​​​នៅ​​​តាម​​​ផ្លូវ​​​នានា​​​​​​ក្នុង​​​រាជធានីភ្នំពេញ​​​​​​ដែល​​​បាន​​​គរ​​​ជា​​​គំនរ​​​ខ្ពស់​​​ៗ​​​ ចាប់​​​តាំង​​​ពី​​​កូដកម្ម​​​បាន​​​ចាប់​​​ផ្ដើម​​​កាល​​​ពី​​​ថ្ងៃ​​​អាទិត្យ​​​មក​​​។

លោក​​​ ងួន​ ស៊ីផេង​​​ នាយក​​​ប្រតិបត្តិការ​​​​​​ក្រុម​​​ហ៊ុន​​​ស៊ី​​​នទ្រី​​​ ​​​បាន​​​មាន​​​ប្រសាសន៍​​​ថា “យើង​​​​​​បាន​​​ព្រម​​​ព្រៀង​​​​​​គ្នា​​​គ្រប់​​​ចំណុច​​​​​​នៅ​​​​​​ថ្ងៃ​​​នេះ ហើយ​​​កម្មករ​​​​​​ក៏​​​ត្រឡប់​​​ទៅ​​​ធ្វើ​​​ការ​​​វិញ​​​”។

ការ​​​ព្រម​​​ព្រៀង​​​ដំឡើង​​​ប្រាក់​​​ខែ​​​​​​និងការ​​​ផ្ដល់​​​​​​​​​លក្ខ​​​ខណ្ឌ​​​ការងារ​​​​​​ល្អ​​​ប្រសើ​​​រ​​​នេះ​​​​​​សម្រេច​​​​​​​​​បាន​​​​​​នៅ​​​ម៉ោង​​​២​​​រសៀ​​​ល​​​​​​ បន្ទាប់ពី​​​​​​ការ​​​ចរចា​​​អស់​​​រយៈ​​​ពេល​​​ជា​​​ច្រើន​​​ម៉ោង​​​ ហើយ​​​​​​កម្មករ​​​​​​ក៏​​​បាន​​​យល់​​​ព្រម​​​​​​ទទួល​​យក​​​ការ​​​ដំឡើង​​​ប្រាក់​​​ខែ​​​ពី​​​២០​​​ដុល្លារ​​​ទៅ​​​២៥​​​ដុល្លារ​​​ក្នុង​​​មួយ​​​ខែ​​​អាស្រ័យ​​​លើ​​​​​​ការងារ​​​របស់​​​ពួក​​​គេ​​​។

ជាមួយ​​​នឹ​​​ង​​​ការ​​​ដំឡើង​​​ប្រាក់​​​ខែ​​​​​​ចន្លោះ​​​ពី​​​២០​​​ដុល្លារ​​​​​​ទៅ២៥​​​ដុល្លារ​​​នេះ​​​ កម្មករ​​​ប្រមូល​​​សំរាម​​​​​​ដែល​​​ទទួល​​​បាន​​​ប្រាក់ខែ​​​៦៥​​​ដុល្លារ​​​ដែល​​​ជា​​​ប្រាក់ខែ​​​​​​ទាប​​​ជាង​​​គេ​​​​​​បំផុត​​​នៅ​​​ក្រុម​​​ហ៊ុន​​​ស៊ីនទ្រី​​​ នឹង​​​​​​ទទួល​​​បាន​​​​​​៩០​​​ដុល្លារ​​​​​​​​​នៅ​​​ដំណាច់​​​​​​ខែ​​​នេះ​​​។​

អ្នកបើក​​​រថយន្ត​​​ប្រមូល​​​សំរាម​​​ដែល​​​​​​ធ្វើ​​​ការ​​​​​​វេន​​​​​​យប់​​​នឹង​​​ទទួល​​​បាន​​​ការ​​​ដំឡើង​​​ប្រាក់​​​ខែ​​​​​​​​​ពី​​​១២០​​​ដុល្លារ​​​ដល់​​​១៤០​​​ដុល្លារ​​​។ ការ​​​ទាម​​​ទារ​​​ផ្សេង​​​ៗទៀត​​​​​​ក៏​​​មាន​​​ការ​​​ព្រម​​​ព្រៀង​​​គ្នា​​​ដែរ​​​ ក្នុង​​​នោះ​​​​​​រួម​​​មាន​​​ប្រាក់​​​បន្ថែម​​​ម៉ោង​​​សម្រាប់​​​ការ​​​ធ្វើការ​​​ថ្ងៃ​​​អាទិត្យ​​​និង​​​ទទួល​​​បាន​​​ឯកសណ្ឋាន​​​ឥត​​​គិត​​​ថ្លៃ​​​។

កាល​​​ពី​​​ដើម​​​សប្ដាហ៍​​​នេះ​​​ ក្រុមហ៊ុន​​​ស៊ីន​​​ទ្រី ដែល​​​ទទួល​​​បាន​​​​​​សិទ្ធិ​​​ផ្ដាច់​​​មុខ​​​ប្រមូល​​និង​​​កម្ចាត់​​​​​​សំរាម​​​​​​ក្នុង​​​រាជធានីភ្នំពេញ​​​ចាប់​​​តាំង​​​ពី​​​ឆ្នាំ​​​២០០២​​​មក​​​ បាន​​​លើក​​​ឡើង​​​ថា ការ​​​ឲ្យ​​​ប្រាក់​​​ខែ​​​លើស​​​ពី​​​៨០​​​ដុល្លារ​​​សម្រាប់​​​កម្មករ​​​ប្រមូល​​​សំរាម​​​នឹង​​​ធ្វើ​​​ឲ្យ​​​ប៉ះពាល់​​​ដល់​​​ក្រុមហ៊ុន​​​។ រហូត​​​​​​មក​​​ដល់​​​ពេល​​​បច្ចុប្បន្ន​​​នេះ​​​វា​​​មាន​​​រយៈ​​​ពេល​​​១០​​​ឆ្នាំ​​​ហើយ​​​ចាប់​​​តាំង​​​ពី​​​កម្មករ​​​​​​របស់​​​ក្រុមហ៊ុន​​​ស៊ីនទ្រី​​​​​​ទទួល​​​បាន​​​​​​ការ​​​ដំឡើង​​​ប្រាក់​​​ខែរបស់​​​ខ្លួន​​​​​​មក​​​។

លោក​​​ ម៉ី ផាន​​​ តំណាង​​​សហព័ន្ធ​​​សហជីព​​​​​​លើក​​តម្កើង​​​​​​ជីវភាព​​​កម្មករ​​​​​​និយោជិត​​​​​​ខ្មែរ​​​ នៅ​​​ក្រុមហ៊ុន​​​ស៊ីនទ្រី​​​ បាន​​​លើក​​​ឡើង​​​ថា “វា​​​ជា​​​ការ​​​ព្រម​​​ព្រៀង​​​គ្នា​​​ដ៏ល្អ ពីព្រោះ​​​យើង​​​ទទួល​​​បាន​​​​​​ប្រាក់​​​កម្រៃ​​​​​​បន្ថែម​​​ ហើយ​​​យើង​​​អាច​​​ត្រឡប់​​​ចូល​​​ធ្វើការ​​​វិញ​​​ ដូច្នេះ​​​វា​​​​​​ជា​​​រឿង​​​ល្អ​​​ដែរ​​​សម្រាប់​​​ក្រុមហ៊ុន​​​”។ គាត់​​​​​​បាន​​​លើក​​​ឡើង​​​បន្ថែម​​​ទៀត​​​ថា “ទោះ​​​បី​​​ជា​​​កម្មករ​​​​​​មួយ​​​ចំនួន​​​មិន​​​យល់​​​ព្រម​​​ក៏​​​ដោយ​​​​​​ ប៉ុន្តែ​​​​​​សម្រាប់​​​ពេល​​​នេះ​​​យើង​​​ត្រូវ​​​ការ​​​ដំណោះ​​​ស្រាយ​​​ នេះ​​​ជា​​​អ្វី​​​ដែល​​​​​​ក្រុមហ៊ុន​​​មាន​​​លទ្ធភាព​​​​​​ផ្ដល់​​​ឲ្យ​​​នៅ​​​ពេល​​​នេះ​​​ ហើយ​​​យើង​​​អាច​​​ពិភាក្សា​​​គ្នា​​​បន្ថែម​​​ទៀត​​​នៅ​​​​​​ពី​​​រ​​​បី​​​ខែ​​​ក្រោយ​​​”។

កម្មករ​​​ម្នាក់​​​ឈ្មោះ​​​ ប៉ុត ឆន អាយុ​​​៣៦ឆ្នាំ​​​ស្ថិត​​​ក្នុង​​​ចំណោម​​​កម្មករ​​​ក្រុមហ៊ុន​​​សីុនទ្រី​​​ ដែល​​​មិន​​​ពេញ​​​ចិត្ត​​​​​​នឹង​​​​​​ការ​​​ព្រម​​​ព្រៀង​​​គ្នា​​​នេះ។ គាត់​​​និយាយ​​​ថា “ខ្ញុំ​​​យល់​​​ស្រប​​​តាម​​​តំណាង​​​ [សហជីព] របស់​​​ខ្ញុំ​​​ដែល​លើក​​​ឡើង​​​ថា  ​​​​​យើង​​​ត្រូវ​​​ព្រម​​​ព្រៀង​​​គ្នា​​​នៅ​​​ពេល​​​នេះ​​​ ទោះ​​​បី​​​ជា​​​ខ្ញុំ​​​មិន​​​ទាន់​​​ពេញ​​​ចិត្ត​​​​​​នឹង​​​វា​​​ក៏​​​ដោយ​​​”។

កាល​​​ពី​​​ម្សិលមិញ ខណៈ​​​ពេល​​​ដែល​​​កូដ​​​កម្ម​​​នេះ​​​​​​បាន​​​បញ្ចប់​​​ដោយ​​​ជោគ​​​ជ័យ​​​និង​​​ដោយ​​​​​​សន្ដិវិធី​​​​​​នោះ​​​វា​​​មាន​​​​​​ស្ថានភាព​​​តាន​​​តឹង​​​ខ្លះ​​​​​​នៅ​​​វេលា​​​ម៉ោង​​​៩​​​ព្រឹក​​​ នៅ​​​ពេល​​​កង​​​​​​រាជអាវុធ​​​ហត្ថ​​​​​នគរ​​​បាល​​​បង្ក្រាប​​​បាតុកម្ម​​​និង​​​​​​សន្ដិសុខ​​​​​​ស្លៀក​​​ពាក់​​​ស៊ីវិល​​​​​​ ត្រូវ​​​បាន​​​​​​ដាក់ពង្រាយ​​​​​​នៅ​​​​​​ច្រក​​​​​​ចូល​​​ទាំង​​​ពី​​​រ​​​​​​នៃ​​​ទីតាំង​​​ជួស​​​ជុល​​​​​​និង​​​​​​ថែទាំ​​​រថយន្ត​​​ដឹកសំរាម​​​របស់​​​ក្រុមហ៊ុន​​​ស៊ីន​​​ទ្រី​​​ នៅ​​​ក្នុង​​​ខណ្ឌ​​​ដង្កោ កន្លែង​​​ដែល​​​មាន​កម្មករ​​​​​​ធ្វើ​​​​​​កូដកម្ម​​​ប្រហែល​​​២០០​​​នាក់​​​។

កម្មករ​​​ប្រមូល​​​សំរាម​​​​​​ម្នាក់​​​ឈ្មោះ​​​ អាត សុផល អាយុ​​​២៨​​​ឆ្នាំ​​​ ដែល​​​បាន​​​បម្រើ​​​ការងារ​​​នៅ​​​ក្រុមហ៊ុន​​​ស៊ីនទ្រី​​​ អស់​​​រយៈ​​​ពេល​​​ប្រាំ​​​ឆ្នាំ​​​​​​ ក៏​​​ដូចជា​​​កម្មករ​​​​​​ជា​​​ច្រើន​​​ផ្សេង​​​ទៀត​​​​​​ បាន​​​ចោទ​​​សួរ​​​​​​ពី​​​វត្តមាន​​​​​​របស់​​​​​​កម្លាំង​​​នគរបាល​​​​​​​​​និង​​​កង​​​រាជ​​​អាវុធ​​​ហត្ថ​​​នៅ​​​​​​កន្លែង​​​ធ្វើ​​​កូដកម្ម​​​សន្ដិវិធី​​​ ជា​​​ទី​​​ដែល​​​​​​​​​ពួក​​​​​​កម្មករ​​​​​​បាន​​​​​​​​​ចាក់ធុង​​​បាស​​​​​​រាំលេង​​​និង​​​​​​ផឹក​​​ស្រា​​​បៀរ​​​យ៉ាង​​​សប្បាយ​​​ចាប់​​​តាំង​​​ពី​​​ថ្ងៃ​​​អាទិត្យ​​​​​​មក។​​​ កម្មករ​​​រូប​​​នេះ​​​​​​បាន​​​​​​ចោទ​​​សួរ​​​​​​ថា “ពួក​​​គេ​​​បង្ក​​​ការភ័យ​​​ខ្លាច​​​​​​ក្នុង​​​ចំណោម​​​ពួក​​​​​​យើង​​​ដែល​​​ជា​​​កម្មករ​​​​​​។ កូដកម្ម​​​របស់​​​ពួក​​​យើង​​​​​​ គឺ​​​ដោយ​​​សន្ដិវិធី​​​ ដូច្នេះ​​​​​​ហេតុអ្វី​​​បាន​​​ជា​​​ពួក​​​​​​គេ​​​​​​បញ្ជូន​​​កង​​​កម្លាំង​​​​​​ប្រដាប់​​​អាវុធ​​​មក​​​”។

ពេល​​​សាកសួរ​​​អំពី​​​ការ​​​ដាក់​​​ពង្រាយ​​​កម្លាំង​​​​នគរបាល​​​និង​​​កង​​​រាជអាវុធ​​​ហត្ថ​​​នេះ​​​ លោក​​​ ខេង​​​ ទីតូ អ្នក​​​នាំពាក្យ​​​​​​កង​​​រាជអាវុធ​​​ហត្ថ​​​លើ​​​ផ្ទៃ​​​ប្រទេស​​​បានមាន​ប្រ​សា​ស​​ន៍​​​ថា ពួក​​​គេ​​​​​​​​​ទៅ​​​ទីនោះ​​​ គ្រាន់តែ​​​​​​ដើម្បី​​​ការពារ​​​ទ្រព្យ​​​សម្បត្តិ​​​ប៉ុណ្ណោះ​​។ លោក​​​​​​បាន​​​មានប្រសាសន៍​​​ថា “កង​​​រាជ​​​អាវុធ​​​ហត្ថ​​​គ្រាន់តែ​​​ទៅ​​​ទីនោះ​​​​​ដើម្បី​​​ការពារ​​​ប្រជាពល​​​រដ្ឋ​​​ និង​​​​​​ទ្រព្យ​​​សម្បត្តិ​​​ប៉ុណ្ណោះ​​​”។

លោក​​​ ឃួន ស្រេង​​​ អភិបាល​​​រង​​​​​​រាជធានី​​​ភ្នំពេញ​​​​​​បាន​​​​​​និយាយ​​​ការពារ​​​​​​ការ​​​ប្រើប្រាស់​​​​​​កម្លាំង​​​កង​​​រាជអាវុធ​​​ហត្ថ​​​​​​នេះ​​​​​​ដោយ​​​​​​លើក​​​ឡើង​​​ថា រថយន្ត​​​ប្រមូល​​​សំរាម​​​​​​ត្រូវ​​​​​​​​​ត្រឡប់​​​ទៅ​​​​​​ប្រមូល​​​​​​គំនរ​​​សំរាម​​​នៅ​​​តាម​​​ផ្លូវ​​​នានា​​​ក្នុង​​​រាជធានីភ្នំពេញ ដែល​​​កំពុង​​​ធ្វើ​​​ឲ្យ​​​ប៉ះពាល់​​​ដល់​​​ការ​​​រស់​​​នៅ​​​របស់​​​ប្រជាពលរដ្ឋ​​​។ លោក​​​បាន​​​មានប្រសាសន៍​​​កាល​​​ពី​​​ម្សិល​​​មិញ​​​ថា “ប្រសិន​​​បើ​​​កម្មករ​​​​​​មិន​​​អនុញ្ញាត​​​ឲ្យ​​​​​​រថយន្ត​​​ចេញទេ​​​​​​ យើង​​​នឹ​​​ង​​​​​​ប្រើប្រាស់​​​កម្លាំង​​​”។

លោក​​​ ឃួន​​​ ស្រេង​​​ បាន​​​បញ្ជាក់​​​ថា លោក​​​នឹង​​​ធ្វើការងារ​​​នេះ​​​​​​ដោយ​​​ខ្លួន​​​ឯង​​​​​​ផ្ទាល់​​​ ប្រសិន​​​បើ​​​​​​កម្មករ​​​​​​មិន​​​ត្រឡប់​​​ទៅ​​​ធ្វើ​​​ការវិញ​​​កាល​​​ពី​​​ម្សិលមិញ​​​ទេ​​​នោះ​​​។ លោក​​​បាន​​​មាន​​​ប្រសាសន៍​​​បន្ថែម​​​ទៀត​​​ថា “នគរបាល​​​​​​កង​​​រាជអាវុធ​​​ហ​​​ត្ថ​​​និង​​​សន្ដិសុខ​​​​​​រួម​​​ទាំង​​​​​​ខ្លួន​​​ខ្ញុំ​​​ផង​​​នឹ​​​ង​​​ចេញ​​​​​​ទៅប្រមូល​​​សំរាម​​​ប្រសិន​​​បើ​​​​​​កម្ម​​​ករ​​​​​​មិន​​​ធ្វើ​​​ការ​​​ទេ​​​នោះ​​​”។

លោក​​​ ប្រាក់​​​ សុខា ដែល​​​ជា​​​តំណាង​​​របស់​​​កម្មករ​​​ធ្វើ​​​កូដកម្មទាំង​​​នេះ​​​​​​បាន​​​មាន​​​ប្រសាសន៍​​​កាល​​​ពី​​​យប់​​​មិញ​​​ថា កូដករ​​​ប្រហែល​​​៨០​​​ភាគ​​​រយ​​​បាន​​​ត្រឡប់​​​ចូល​​​ធ្វើការ​​​វិញ​​​ហើយ​​​ រី​​​ឯ​​​កម្ម​​​ក​​​រ​​​ផ្សេង​​​ៗទៀត​​​ គេ​​​រំពឹង​​​ថា នឹង​​​ចូល​​​ធ្វើ​​​ការ​​​វិញ​​​នៅ​​​ថ្ងៃ​​​នេះ៕ សុខុម​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស