មជ្ឈមណ្ឌលកម្ចាត់មីនកម្ពុជា ហៅកាត់ថា CMAC បានឲ្យដឹងកាលពីម្សិលមិញថា ខ្លួន បានបញ្ចប់ប្រតិបត្តិការស៊ើបអង្កេតរបស់ខ្លួន លើករណីភ្លើងឆេះដែលកើតឡើងនៅរោងជាងជួសជុលបរិក្ខារក្នុងខេត្តបាត់ដំបង កាលពីថ្ងៃទី២៤ ខែមករា បណ្តាលឲ្យឧបរករណ៍បរិក្ខារ និងយានជំនិះដែលមានតម្លៃសរុបប្រហែលសរុប ៤០០.០០០ដុល្លារ ត្រូវបានបំផ្លិចបំផ្លាញ។
លោក ហេង រតនា អគ្គនាយកមជ្ឈមណ្ឌល CMAC បានឲ្យដឹងថា ហេតុការណ៍ភ្លើងឆេះនេះបង្កឡើងដោយទុសេខ្សែភ្លើង ហើយម៉ាស៊ីនកំុព្យូទ័រដែលមានឯកសារប្រតិបត្តិការ និងហិរញ្ញវត្ថុត្រូវបានភ្លើងឆេះអស់។
នៅថ្ងៃភ្លើងឆេះនោះ លោក រតនា បានឲ្យដឹងថា ភ្លើងឆេះអស់រយៈពេលជិតបីម៉ោងទើបរលត់ បន្ទាប់ពីបុគ្គលិកមជ្ឈមណ្ឌល CMAC បានព្យាយាមពន្លត់ភ្លើងដោយខ្លួនឯងមុនពេលហៅទូរស័ព្ទទៅភ្នាក់ងារពន្លត់អគ្គិភ័យក្នុងមូលដ្ឋាន។ កាលពីម្សិលមិញ លោក ហេង រតនា បានច្រានចោលការចោទប្រកាន់លោកពីសំណាក់អ្នកទម្លាយព័ត៌មានអនាមិកមួយរូបដែលបានអះអាងថា ខ្លួនជាបុគ្គលិកមជ្ឈមណ្ឌល CMAC ហើយបានលើកឡើងថា ហេតុការណ៍ភ្លើងឆេះនេះបានកើតឡើងតាមការគ្រោងទុកជាមុន។
អ្នកទម្លាយព័ត៌មានរូបនោះបានឲ្យដឹងទៀតថា លោក ហេង រតនា បានបង្កើតបណ្តាញពុករលួយមួយនៅជុំវិញគាត់ដែល ជាប្រធានមជ្ឈមណ្ឌល CMAC។
អ្នកទម្លាយព័ត៌មានដដែលនោះបានអះអាងថា ឧបករណ៍បរិក្ខារថ្មីៗដែលត្រូវចំណាយប្រាក់មួយលានដុល្លារ ត្រូវបានទិញដោយអ្នកគ្រប់គ្រងនៅរោងជាងនោះ មួយថ្ងៃមុនពេលហេតុការណ៍ភ្លើងឆេះនេះកើតឡើង ក៏ប៉ុន្តែ ប្រតិបត្តិការទិញឧបករណ៍បរិកា្ខរទាំងនេះមិនអាចត្រូវបានរៀបចំឲ្យមានឯកសារតទៅទៀតបានទេ ដោយសារតែឯកសារទាំងអស់ត្រូវបានភ្លើងឆេះ។
អ្នកទម្លាយព័ត៌មានរូបនោះបានសរសេរលិខិតមួយច្បាប់ផ្ញើឲ្យប្រព័ន្ធផ្សព្វផ្សាយដោយលើកឡើងថា “តើគ្រឿងបន្លាស់ទាំងនោះត្រូវភ្លើងឆេះមែនឬយ៉ាងណា? យើងខ្លាចតែគ្រឿងបន្លាស់ទាំងនោះត្រូវគេយកទៅលក់ទេ។ ឯកសារបញ្ជាក់ទាំងអស់របស់មជ្ឈមណ្ឌល CMAC ក៏បាត់អស់ផងដែរ។ ហេតុការណ៍ភ្លើងឆេះនេះកើតឡើងដោយខ្លួនឯងឬក៏ដោយសារតែនរណាម្នាក់?” ។
លិខិតនោះក៏បានបង្ហាញពីបណ្តាញធនធានដែលមានការគ្រប់គ្រង និងមានបក្ខពួកនិយម នៅរោងជាងរបស់មជ្ឈមណ្ឌល CMAC ក្នុងខេត្តបាត់ដំបង។
លិខិតដដែលមានខ្លឹមសារបន្តទៀតថា “នៅក្នុងរោងជាងកណ្តាលរបស់មជ្ឈមណ្ឌល CMAC មានសាច់ញាតិរបស់លោក រតនា ច្រើនណាស់”។ នៅក្នុងលិខិតនោះមានការអះអាងថា អ្នកគ្រប់គ្រងរោងជាង មន្ត្រីភ័ស្តុភា មន្ត្រីហិរញ្ញវត្ថុ និងជាងជាច្រើននាក់មានទំនាក់ទំនងជាមួយលោក រតនា។
លិខិតនេះមានខ្លឹមសារបន្ថែមទៀតថា “នៅក្បែរនោះមានដីស្រែទំហំជាង១.០០០ហិតា របស់លោក រតនា ហើយនៅលើដីស្រែនោះមានប្រេង អេស្កាវ៉ាទ័រ និងរថយន្ត របស់មជ្ឈមណ្ឌល CMAC ដែលកំពុងត្រូវបានប្រើប្រាស់”។ គួរបញ្ជាក់ថា លិខិតនេះមានរូបថតអេស្កាវ៉ាទ័រម៉ាក់ហ៊ីតាឈិ ដែលកំពុងត្រូវបានប្រើប្រាស់ក្នុងគម្រោងដោះមីន និងរូបថតរថយន្តរដ្ឋដែលទំនងជាត្រូវបានចតទុកនៅក្នុងលំនៅដ្ឋានឯកជន។
លោក ហេង រតនា បានសារភាពកាលពីម្សិលមិញថា សាច់ញាតិមួយចំនួនរបស់លោកធ្វើការនៅការិយាល័យប្រចាំខេត្តបាត់ដំបងរបស់មជ្ឈមណ្ឌលCMAC។ ក៏ប៉ុន្តែ លោកបានច្រានចោលករណីចោទប្រកាន់ផ្សេងៗទៀត ដោយបានមានប្រសាសន៍ថា “ពិតមែនហើយ បងប្អូនមួយចំនួនរបស់ខ្ញុំ ធ្វើការនៅមជ្ឈមណ្ឌល CMAC ក៏ប៉ុន្តែ ពួកគេភាគច្រើន បានលាឈប់ពីការងារនៅទីនេះហើយ កាលពីឆ្នាំមុន។
ទោះបីជាបងប្អូនខ្ញុំម្នាក់ពីរនាក់កំពុងធ្វើការ ងារនៅទីនេះក៏ដោយ ក៏ពួកគេធ្វើតេស្តជាប់ទើបអាចទទួលបានការងារនេះ មុនពេលខ្ញុំចូលធ្វើការនៅទីនេះ។ នៅពេលបងប្អូនថ្លៃរបស់ខ្ញុំចាប់ផ្តើមធ្វើការនៅទីនេះ ពួកគេមិនមែនជាសាច់ថ្លៃរបស់ខ្ញុំទេ ក៏ប៉ុន្តែ ពួកគេបានស្រឡាញ់ និងរៀបការជាមួយបងប្អូនខ្ញុំ”។ ទាក់ទងទៅនឹងដីស្រែដែលមានឧបករណ៍បរិក្ខាររបស់មជ្ឈមណ្ឌល CMAC និងកំពុងតែត្រូវបានប្រើប្រាស់នោះលោក រតនា បានមានប្រសាសន៍ថា “ទោះបីជាខ្ញុំកំពុងកែលម្អដីស្រែរបស់ខ្ញុំក៏ដោយ មិនមានសម្ភារឧបត្ថម្ភពីម្ចាស់ជំនួយ ត្រូវបានប្រើប្រាស់ទេ”។
លោក រតនា បានលើកឡើងថា សេចក្តីអះអាងទៅលើរូបលោកគឺជាទង្វើបរិហារកេរ្តិ៍លោក។ លោកបានមានប្រសាសន៍ថា “អ្នកដែលវាយប្រហារខ្ញុំគ្រាន់តែចង់ទម្លាក់កិត្តិយសខ្ញុំនៅមុខម្ចាស់ជំនួយប៉ុណ្ណោះ”។
ស្ថានទូតជប៉ុនបានបដិសេធមិនធ្វើអត្ថាធិប្បាយអំពីប្រតិបត្តិការស៊ើបអង្កេតរបស់មជ្ឈមណ្ឌល CMAC លើករណីភ្លើងឆេះដែលបំផ្លិចបំផ្លាញឧបករណ៍បរិក្ខារដែលត្រូវបានទិញដោយមានជំនួយពីសមភាគីជប៉ុននេះ។ មជ្ឈមណ្ឌល CMAC បានទទួលរងនូវការលាតត្រដាងព័ត៌មាន និងការចោទប្រកាន់ជុំវិញអំពើពុករលួយជាយូរមកហើយ។
កាលពីឆ្នាំ១៩៩៩ សេចក្តីរាយការណ៍មួយដែលរកឃើញថា មានការគ្រប់គ្រងហិរញ្ញវត្ថុមិនត្រឹមត្រូវ អំឡុងពេលមានការចោទប្រកាន់ពីអំពើលួចបន្លំ ការប្រើប្រាស់មូលនិធិបរទេស និងក្នុងស្រុកមិនត្រឹមត្រូវ និងបក្សពួកនិយម។ អគ្គនាយកមជ្ឈមណ្ឌល CMAC ត្រូវបានបញ្ឈប់ពីការងារតាំងពីពេលនោះ ម្ចាស់ជំនួយបានបង្កកមូលនិធិ ហើយបុគ្គលិកប្រហែល៩០ភាគរយត្រូវបានរំសាយ។
លោក រតនា ដែលកាលពីឆ្នាំ២០០៣ជានាយករងមជ្ឈមណ្ឌល CMAC ត្រូវបានចោទប្រកាន់ ជាមួយអ្នកគ្រប់គ្រងពីរនាក់ផ្សេងទៀតថា បានបំភ្លៃព័ត៌មានក្នុងរបាយការណ៍ចំណាយ និងស៊ីសំណូកជាការផ្លាស់ប្តូរនឹងការងារនៅអង្គភាពនេះ។ ប្រតិបត្តិការស៊ើបអង្កេតផ្ទៃក្នុងមួយដឹកនាំដោយលោក រតនា បានរកឃើញថា មិនមានកំហុសអ្វីទេ៕ សុធា