សហជីពកម្មកររោងចក្រកាត់ដេរចំនួនប្រាំមួយ និងសហជីពកម្មករទូទៅពីរទៀតបានឲ្យដឹងកាលពីម្សិលមិញថា ពួកគេនឹងដង្ហែក្បួននៅថ្ងៃច័ន្ទ តាមតីរវិថីព្រះស៊ីសុវត្ថិក្នុងទីក្រុងភ្នំពេញទៅកាន់ស្ថាន ទូតបរទេសដើម្បីតវ៉ានឹងការដែលរដ្ឋាភិបាលមិនចាត់វិធានការដោះស្រាយការទាមទាររបស់ខ្លួនសុំដំឡើងប្រាក់ខែគោលរបស់កម្មករ។
ការប្រកាសហែក្បួននេះធ្វើឡើងបន្ទាប់ពីគណៈកម្មាធិការជាន់ខ្ពស់របស់រដ្ឋាភិបាលមិនបានដោះ ស្រាយបញ្ហាប្រាក់ខែគោល ដោយបានលើកឡើងថា មិនមានផែនការដំឡើងប្រាក់ខែនៅពេលនេះឡើយ។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករបានមានប្រសាសន៍ថា “យើងបានសម្រេចកាលពីថ្ងៃច័ន្ទ ដើម្បីធ្វើការជួបជុំគ្នាមានអ្នកចូលរួមប្រហែលជាង៣០០នាក់មកពីសហជីព និងអង្គការក្រៅរដ្ឋាភិបាលផ្សេងៗដើម្បីហែក្បួនទៅព្រះអង្គដងកើនៅជិតមាត់ទន្លេ”។
លោក ស៊ីណា បានមានប្រសាសន៍ថា បន្ទាប់មកសហជីពទាំងនោះនឹងបញ្ជូនញត្តិមួយដែលមានប្រាំពីរចំណុចស្វែងរកការគាំទ្រពីស្ថានទូតបរទេស រួមទាំងស្ថានទូតអាមេរិក ចិន បារាំង និងអង់គ្លេសផងដែរ។ លោកបានមានប្រសាសន៍ថា “យើងនឹងមិនតវ៉ានៅថ្ងៃនោះទេ។ យើងគ្រាន់តែរៀបចំផែនការដាក់ញតិ្តជូនស្ថានទូតនានាស្នើសុំឲ្យស្ថានទូតទាំងនោះជួយឲ្យការទាមទាររបស់ខ្លួនបានសម្រេចប៉ុណ្ណោះ”។
ញត្តិនេះទាមទារប្រាក់ខែគោល១៦០ដុល្លារសម្រាប់កម្មករ ទាមទារឲ្យមានការដោះលែងអ្នកតវ៉ា២៣នាក់ ដែលត្រូវបានចាប់ដាក់ពន្ធនាគារកាលពីខែមុនអំឡុងពេលធ្វើកូដកម្មទាមទារដំឡើងប្រាក់ខែគោល ការផ្តន្ទាទោសកងកម្លាំងរបស់រដ្ឋាភិបាលដែលបានបាញ់សម្លាប់អ្នកតវ៉ាប្រាំនាក់ កាលពីថ្ងៃទី៣ ខែមករា ការបញ្ចប់បម្រាមរបស់រដ្ឋាភិបាលមិនឲ្យធ្វើបាតុកម្ម ការបញ្ចប់បណ្តឹងផ្លូវច្បាប់ទៅលើមេដឹកនាំសហជីពដែលបានដឹកនាំធ្វើកូដកម្មទូទាំងប្រទេសកាលពីខែធ្នូ និងការបើកប្រាក់ខែឲ្យកម្មករដែលបានចូលរួមធ្វើកូដកម្មនោះ។
គណៈកម្មការមួយដែលលោកនាយករដ្ឋមន្ត្រី ហ៊ុន សែន បានបង្កើតឡើងឲ្យសិក្សាអំពីប្រាក់ខែរបស់កម្មកររោងចក្រកាត់ដេរ ចំនួន៦០០.០០០នាក់នោះ បានជួបពិភាក្សា គ្នាជាលើកដំបូងកាលពីម្សិលមិញ ក៏ប៉ុន្តែ មន្ត្រីដែលចូលរួមកិច្ចប្រជុំនោះបានលើក ឡើងថា មិនមានការពិចារណាពីការកែប្រែសេចក្តីសម្រេចកាលពីថ្ងៃទី ៣១ ខែធ្នូរបស់ក្រសួងការងារ ដើម្បីដំឡើងប្រាក់ខែគោលឲ្យកម្មកររោងចក្រកាត់ដេរដល់១០០ដុល្លារក្នុងមួយខែនេះទេ។
លោក ហេង សួរ អ្នកនាំពាក្យក្រសួងការងារបានមានប្រសាសន៍ថា “នៅឯកិច្ចប្រជុំនៅថ្ងៃនេះមិនមានការពិភាក្សាអំពីប្រាក់ខែគោលថ្មីទេ”។ លោក ហេង សួរ បានមានប្រសាសន៍បន្ថែមថា “យើងនឹងមិនកែប្រែប្រាក់ខែគោលនេះទេ ពីព្រោះគណៈកម្មាធិការប្រឹក្សា ការងារបានធ្វើសេចក្តីសម្រេចរួចហើយ។កិច្ចប្រជុំនៅថ្ងៃនេះគ្រាន់តែចែករំលែកព័ត៌មានជាច្រើនទៀតជាមួយគណៈកម្មការថ្មីនេះតែប៉ុណ្ណោះ”។
ពេលថ្លែងសុន្ទរកថាបើកកិច្ចប្រជុំកាលពីម្សិលមិញ និងមុនពេលគេស្នើសុំឲ្យអ្នកកាសែតចាកចេញ លោក គាត ឈន់ ឧបនាយករដ្ឋមន្ត្រីបានមានប្រសាសន៍ថា រដ្ឋាភិបាល “នឹងដំឡើងប្រាក់ខែគោលសម្រាប់កម្មកររោងចក្រកាត់ដេរ និងកម្មកររោងចក្រដេរស្បែកជើងទាំងអស់ទៅតាមស្ថានភាពសេដ្ឋកិច្ចជារៀងរាល់ឆ្នាំ”។
លោក គង់ អាទិត្យ អនុប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានមានប្រសាសន៍ថា លទ្ធផលនៃកិច្ចប្រជុំដែលមានតែរដ្ឋាភិបាលម្នាក់ឯងនេះមិនអាចទទួលយកបានទេ ព្រោះមិនមានផែនការចរចាអំពីប្រាក់ខែគោលដូចដែលសហជីពបានទាមទារនោះទេ។ លោកបានមានប្រសាសន៍ថា “យើងមិនយល់ស្របចំពោះរឿងនេះទេ ហើយកម្មករនឹងរក្សាគោលជំហររបស់ខ្លួន និងបន្តធ្វើការតវ៉ាទៀត ប្រសិនបើរដ្ឋាភិបាលមិនរកដំណោះស្រាយដំឡើងប្រាក់ខែគោលដល់១៦០ដុល្លារទេនោះ”។ លោក អាទិត្យ បានមានប្រសាសន៍ថា “ប្រសិនបើរដ្ឋាភិបាលបង្កើតគណៈកម្មការ ថ្មី គ្រាន់តែដើ ម្បី សិក្សា និងស្រាវជ្រាវនោះ វាគ្មានប្រយោជន៍ទេ។ លោកគិតថា គណៈកម្មការនេះមិនអាចជួយកម្មករបានទេ”។
គណៈកម្មាធិការប្រឹក្សាការងារដែលមានតំណាងមកពីរដ្ឋាភិបាល ម្ចាស់រោងចក្រកាត់ដេរ និងសហជីពបានសម្រេចកាលពីខែធ្នូដំឡើងប្រាក់ខែគោលដល់៩៥ដុល្លារ ប៉ុន្តែ សហជីពចំនួនប្រាំមួយដែលអះអាងថាតំណាងឲ្យកម្មកររោងចក្រកាត់ដេរចំនួន៣០០.០០០នាក់បានបដិសេធចំពោះការដំឡើងប្រាក់ខែគោលនេះ។
បន្ទាប់ពីមានការតវ៉ារយៈពេលពីរថ្ងៃពីសំណាក់កម្មកររោងចក្រកាត់ដេររាប់ពាន់នាក់កាលពីខែធ្នូ ដែលបានបិទមហាវិថីសហព័ន្ធរុស្ស៊ី នៅខាងមុខក្រសួងការងារ រដ្ឋាភិបាលបានសម្រេចជាឯកច្ឆន្ទដំឡើងប្រាក់ខែគោល៥ដុល្លារទៀតដោយមិនមានការពិគ្រោះយោបល់ជាមួយគណៈកម្មាធិការប្រឹក្សាការងារឡើយ។
កូដកម្មនោះបានផ្ទុះឡើងនៅថ្ងៃទី២ និងថ្ងៃទី៣ ខែមករា ហើយនៅពេលនោះទាហាន និងកងរាជ អាវុធហត្ថបានបង្ក្រាបដោយហិង្សាលើការតវ៉ាដោយអហិង្សា ដែលបានបណ្តាលឲ្យស្លាប់កម្មករប្រាំនាក់ និងរងរបួសជាង៤០នាក់ ព្រមទាំងឃុំខ្លួនមនុស្ស២៣នាក់ទៀតនៅក្នុងពន្ធនាគារមួយដែលមានសន្តិសុខតឹងរ៉ឹង។
សមាគមរោងចក្រកាត់ដេរនៅកម្ពុជា បានប៉ាន់ប្រមាណថា ខ្លួនខាតបង់ប្រហែល២០០លានដុល្លារអំឡុងពេលធ្វើកូដកម្មកាលពីខែធ្នូ ប៉ុន្តែ ការនាំចេញសម្លៀកបំពាក់បានបន្តកើនឡើងកាលពីឆ្នាំមុនដល់៥,៥៣ ពាន់លាន ដុល្លារ គឺកើនលើសឆ្នាំ២០១២ចំនួន២០ភាគរយ។
មុនពេលគណៈកម្មាធិការប្រឹក្សាការងារកែប្រែប្រាក់ខែគោលថ្មីនេះ ក្រុមការងារមួយដែលគ្រប់គ្រងដោយរដ្ឋាភិបាលបានរកឃើញថា ប្រាក់ខែដែលធ្វើឲ្យកម្មកររោងចក្រកាត់ដេរអាចរស់បានសមរម្យគឺប្រហែល១៦០ដុល្លារក្នុងមួយខែ។ ប៉ុន្តែ ក្រសួងការងារបានលើកឡើងថា ការដំឡើងប្រាក់ខែគោលដ៏គំហុកបែបនេះនឹងធ្វើឲ្យបាត់បង់វិនិយោទុនបរទេសនៅក្នុងវិស័យនេះ៕គឹមហឿន