យោងតាមសេចក្តីប្រកាសព័ត៌មានរបស់ក្រសួងការបរទេសបានឲ្យដឹងថា លោកនាយករដ្ឋមន្ត្រី ហ៊ុន សែន បានចាកចេញពី រាជធានីភ្នំពេញកាលពីព្រឹកម្សិលមិញសម្រាប់ ដំណើរទស្សនកិច្ចរយៈពេលពីរថ្ងៃទៅកាន់ប្រទេសឡាវតបតាមការអញ្ជើញរបស់លោក ថងស៊ីង ថាមវង្ស នាយករដ្ឋមន្ត្រីឡាវ ដើម្បីចូលរួមកិច្ចពិភាក្សារបស់មន្ត្រីជាន់ខ្ពស់និងចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការនៅក្នុងវិស័យសុខាភិបាល ច្បាប់ វប្បធម៌ និងអប់រំ។
លោក ហ៊ុន សែន ត្រូវបានអមដំណើរដោយលោក សុខ អាន រដ្ឋមន្ត្រីទីស្តីការគណៈ រដ្ឋមន្ត្រី លោក ហោ ណាំហុង រដ្ឋមន្ត្រីក្រសួងការបរទេស លោក អង្គវង្សវឌ្ឍានា រដ្ឋមន្ត្រីក្រសួងយុត្តិធម៌ លោក ហង្ស ជួន ណារ៉ុន រដ្ឋមន្ត្រីក្រសួងអប់រំ លោក ម៉ម ប៊ុនហេង រដ្ឋមន្ត្រី ក្រសួងសុខាភិបាល និងមន្ត្រីមួយចំនួនទៀត។
លោក ស្រី ថាំរង្គ ជំនួយការផ្ទាល់របស់លោក ហ៊ុន សែន បានមានប្រសាសន៍ថា “នឹង មានការពិភាក្សារវាងមន្ត្រីជាន់ខ្ពស់នៃប្រទេស ទាំងពីរដើម្បីពង្រឹងមិត្តភាព ភាពជាបងប្អូន និង ភាពជាប្រទេសជិតខាងដើម្បីជំរុញកិច្ចសហប្រតិបត្តិការឲ្យឈានដល់កម្រិតបន្ទាប់ដើម្បីឲ្យប្រទេសទាំងពីរអាចសម្រេចបានសក្តានុពលរបស់ខ្លួន”។ លោកបន្ថែមថា ក្រុមមន្ត្រីក៏ពិភាក្សាផងដែរលើសំណើរបស់ប្រទេសឡាវ សុំបង្កើតស្ថានកុងស៊ុលនៅក្នុងក្រុងសៀមរាប ព្រមទាំងការចុះហត្ថលេខាលើកិច្ចព្រមព្រៀងសហប្រតិបត្តិការរវាងនគរបាលកម្ពុជានិង នគរបាលឡាវផងដែរ៕សារុន