អ្នកភូមិប្រហែល២០០នាក់ដែលជាប់ពាក់ព័ន្ធក្នុងវិវាទដីធ្លីមួយជាមួយក្រុមហ៊ុនអភិវឌ្ឍន៍សហជីពរបស់ចិនហៅកាត់ថា UDG នៅក្នុងខេត្តកោះកុង បានឲ្យដឹងថា ពួកគេត្រូវបានគេព្រមានកាលពីថ្ងៃសុក្រថា ‘កងទាហានឆត្រយោង’ នឹងត្រូវបានដាក់បញ្ចូលក្នុងវិវាទនេះ ប្រសិនបើពួកគេនៅតែបន្តបិទផ្លូវមួយទៅទីស្នាក់ការក្រុមហ៊ុននេះដែលស្ថិតនៅក្នុងឧទ្យានជាតិបទុមសាគរទៀត។
ជម្លោះដីធ្លីរវាងអ្នកភូមិ និងក្រុមហ៊ុនចិន ដែលកំពុងសាងសង់រមណីយដ្ឋានដ៏ធំមួយនៅលើដីទំហំ៤៥.០០០ហិកតា បានផ្ទុះឡើងចាប់តាំងពីឆ្នាំ២០០៨មក។ ប៉ុន្តែជម្លោះនេះបានឈានដល់កម្រិតតានតឹងថ្មីមួយកាលពីថ្ងៃទី២១ ខែមករា នៅពេលដែលលំនៅដ្ឋានប្រហែល៤៥ខ្នងរបស់អ្នកភូមិ ត្រូវបានវាយកម្ទេចចោលដោយកងកម្លាំងសន្តិសុខ ដែលធ្វើការឲ្យក្រុមហ៊ុន UDG ។
កាលពីថ្ងៃពុធ អ្នកភូមិប្រមាណ១៤០នាក់បានចាប់ផ្តើមបិទផ្លូវមួយខ្សែទៅកាន់ការិយាល័យក្រុមហ៊ុន UDG ជាហេតុនាំឲ្យមានការប៉ះទង្គិចគ្នាមួយប្រ៉ាវរវាងក្រុមអ្នកតវ៉ានិងសន្តិសុខចំនួន៤០នាក់របស់ក្រុមហ៊ុន UDG និងទាហានចំនួនប្រាំមួយនាក់ប្រដាប់ដោយកាំភ្លើងអាកា-៤៧។ កាលពីថ្ងៃសុក្រ អ្នកភូមិប្រមាណ២០០នាក់ធ្វើសកម្មភាពដើម្បីបង្ហាញវត្តមានកាន់តែច្រើនរបស់ខ្លួននៅតាមផ្លូវដែលត្រូវបានបិទ ដោយបោះតង់ និងដាក់ដុំថ្មនៅតាមបណ្តោយផ្លូវភ្ជាប់ការិយាល័យUDGទៅកាន់ទីរួមខេត្តកោះកុង។
អ្នកស្រី ស៊ុន គឹម សឿន អាយុ៥៨ឆ្នាំ បានមានប្រសាសន៍ថា “យើងបានសម្រេចសង់តង់ដើម្បីរាំងផ្លូវ ដើម្បីរារាំងរថយន្តទាំងអស់របស់ក្រុមហ៊ុន និងអ្នកបើកបរផ្សេងទៀតមិនឲ្យឆ្លងកាត់ផ្លូវនេះ”។ គួរបញ្ជាក់ថា អ្នកតវ៉ារូបនេះបានអះអាងថា នគរបាលបានដាក់ខ្នោះខ្លួនអស់រយៈពេលបីម៉ោងកាលពីខែ មុន ខណៈដែលផួបណ្តោះអាសន្នប្រវែងទទឹងប្រាំម៉ែត្របណ្តោយប្រាំមួយម៉ែត្ររបស់ អ្នកស្រី ត្រូវបានដុតបំផ្លាញ។
អ្នកស្រី គឹម សឿន បានមានប្រសាសន៍ក្នុងកិច្ចសម្ភាសតាមទូរស័ព្ទពីទីកន្លែងតវ៉ាថា “បុរសជនជាតិចិនពីរនាក់មកពីក្រុមហ៊ុន UDG ជាមួយអ្នកបកប្រែជនជាតិខ្មែរម្នាក់បានមកព្រមានពួកយើងថា ពួកគេនឹងប្រើទាហានឆត្រយោងដើម្បីបំបែកការរារាំងផ្លូវនេះ”។ អ្នកស្រី គឹម សឿន បានឲ្យដឹងទៀតថា “ខ្ញុំមិនខ្លាចការគំរាមកំហែងរបស់ពួកគេថា នឹងប្រើទាហានឆត្រយោងដើម្បីធ្វើបាបខ្ញុំ និងអ្នកតវ៉ាផ្សេងទៀតឲ្យចេញពីផ្លូវនេះទេ។ ប្រសិនបើយើងមិនតវ៉ាទេ យើងនឹងនៅតែស្លាប់ដដែលហ្នឹង។ ដូច្នេះ ខ្ញុំចាំបាច់ត្រូវតែរឹងមាំ ហើយទាមទារដី និងសំណងសម្រាប់ការបាត់បង់សម្បត្តិទាំងអស់របស់ខ្ញុំនៅក្នុងភ្លើង”។
លោក ឃឹម ច័ន្ទឌី អភិបាលស្រុកគិរីសាគរបានឲ្យដឹងកាលពីថ្ងៃសុក្រថា អាជ្ញារធនៅក្នុងស្រុករបស់លោក និងស្រុកបទុមសាគរបានបញ្ជាឲ្យប្រជាពលរដ្ឋចំនួន១០០គ្រួសារចេញពីដីរបស់ខ្លួនយ៉ាងយូរត្រឹមខែធ្នូ ដើម្បីបើកផ្លូវឲ្យក្រុមហ៊ុន UDG អនុវត្តគម្រោងសាងសង់រមណីយដ្ឋានសណ្ឋាគារ ទីលានលេងហ្គុលហ្វ៍ និងអាកាសយានដ្ឋានឯកជនមួយកន្លែង ដែលត្រូវចំណាយប្រាក់៣,៨ពាន់លានដុល្លារ។
លោកបានមានប្រសាសន៍ថា “ប្រជាជនជាច្រើនបដិសេធមិនព្រមចាកចេញ បើទោះជាពួកគេត្រូវបានផ្តល់ផ្ទះថ្មីនៅទីកន្លែងសង់លំនៅដ្ឋានថ្មីក៏ដោយ”។ លោកបានបន្ថែមថា “ដោយសារតែការកកស្ទះចរាចរខ្លាំង យើងមិនអាចអនុញ្ញាតឲ្យពួកគាត់បន្តបិទផ្លូវបានទេ”។ លោកឲ្យដឹងទៀតថា ការធ្វើដំណើរទៅដល់ឃុំកោះស្តេច បានជួបឧបសគ្គដោយសារតែសកម្មភាពបិទផ្លូវនេះ។
លោក ច័ន្ទឌី បានបដិសេធការចោទប្រកាន់របស់អ្នកភូមិដែលថា តំណាងរបស់ក្រុមហ៊ុន UDG បានគំរាមប្រើទាហានឆត្រយោងប្រឆាំងនឹងក្រុមអ្នកតវ៉ា ដោយបញ្ជាក់ថា ការតវ៉ានេះនឹងមិនបណ្តាលឲ្យមានអំពើហិង្សាទេ។ លោកបានមានប្រសាសន៍ថា “វាមិនមែន ជារឿងពិតទេ។ មនុស្សរបស់ខ្ញុំនៅទីកន្លែងតវ៉ានោះបានបញ្ជាក់ថា តំណាងរបស់ក្រុមហ៊ុនចិនគ្រាន់តែចុះទៅថតរូបសកម្មភាពតវ៉ា និងសកម្មភាពបិទផ្លូវប៉ុណ្ណោះ”។
ទោះជាយ៉ាងណា លោក នាង បូរ៉ាទីណូ អ្នកសម្របសម្រួលអង្គការសិទ្ធិមនុស្សអាដហុក នៅក្នុងខេត្តកោះកុង បានបញ្ជាក់ថា ការ គំរាមដាក់អង្គភាពយោធា ពិតជាបានកើតឡើង។ លោកបានមានប្រសាសន៍ថា “ដំបូង មានតំណាងម្នាក់របស់ក្រុមហ៊ុនចិននេះទៅថតរូបសកម្មភាពតវ៉ា ហើយក្រោយមកក្រុមទី២មានបុរសជនជាតិចិនពីរនាក់ស្លៀកពាក់ស៊ីវិលអមដោយអ្នកបកប្រែម្នាក់ដែលបានគំរាមប្រើទាហានឆត្រយោង សម្រាប់បំបែកសកម្មភាពតវ៉ានេះ”។ លោក បូរ៉ាទីណូ បានមានប្រសាសន៍បន្តថា “ បន្ទាប់ពីបានឮការបំភិតបំភ័យបែបនេះ ប្រជាជនយើងមានការព្រួយបារម្ភអំពីសន្តិសុខរបស់អ្នកតវ៉ា ដូច្នេះ យើងអំពាវនាវឲ្យអាជ្ញាធរប្រើវិធីអហិង្សាជាជាងប្រើកម្លាំងយោធាទៅបង្ក្រាប”។
កាលពីថ្ងៃទី២ ខែមករា ទាហានឆត្រយោងមកពីកងពលតូចលេខ៩១១បានវាយយ៉ាងព្រៃផ្សៃ និងឃាត់ខ្លួនមេដឹកនាំសហជីពព្រះសង្ឃ និងអ្នកតវ៉ារោងចក្រកាត់ដេរចំនួន១៥រូប ក្នុងពេលទាហានទាំងនោះត្រូវបានដាក់ពង្រាយដើម្បីការពាររោងចក្រកាត់ដេរកូរ៉េខាងត្បូងមួយ នៅក្នុងខណ្ឌពោធិ៍សែនជ័យ រាជធានីភ្នំពេញ។ រដ្ឋាភិបាលមិនអាចពន្យល់អំពីមូលហេតុដែលទាហានក្នុងកងកម្លាំងពិសេសទាំងនេះត្រូវបានដាក់ពង្រាយ ដើម្បីការពារក្រុមហ៊ុនបរទេសទេ។
លោក ច័ន្ទឌី បានមានប្រសាសន៍ថា លោកបានអំពាវនាវឲ្យអាជ្ញាធររៀបចំកិច្ចប្រជុំមួយ រវាងអភិបាលខេត្ត និងក្រុមហ៊ុនចិននេះ ដើម្បីពិភាក្សាគ្នារកដំណោះស្រាយទោះជាការផ្តល់សំណងមិនមែនជាសមត្ថកិច្ចរបស់លោកក៏ដោយ។ លោកបានបន្តថា “ចាប់ពីពេលនេះទៅ យើងសន្យាចំពោះអ្នកភូមិថាគ្មានការបណ្តេញចេញកើតឡើងទៀតឡើយ”។ លោកបានមានប្រសាសន៍បន្ថែមទៀតថា “ប្រសិនបើមានកម្លាំងសន្តិសុខណា ចុះទៅរុះរើលំនៅដ្ឋានរបស់អ្នកភូមិ ខ្ញុំនឹងបញ្ជូននគរបាលទៅជួយអ្នកភូមិ”៕ ប៊ុននី