លោកនាយករដ្ឋមន្ត្រី ហ៊ុន សែន បានចេញសារាចរណែនាំមួយឲ្យក្រសួងមុខងារសាធារណៈ និងក្រសួងសេដ្ឋកិច្ច និងហិរញ្ញវត្ថុ សហការជាមួយស្ថាប័នរដ្ឋនានា ដើម្បីធានាការបើកប្រាក់ខែឲ្យមន្ត្រីរាជការយ៉ាងយូរក្នុងសប្តាហ៍ទី៤នៃខែនីមួយៗ។
សារាចរណែនាំចុះហត្ថលេខាដោយលោក ហ៊ុន សែន និងចុះថ្ងៃទី២៩ ខែមករា នេះគឺជាសារាចរថ្មីបំផុតក្នុងកម្មវិធីកំណែទម្រង់សេវាកម្មមន្ត្រីរាជការ បើគិតចាប់តាំងពីពេលបោះឆ្នោតដ៏ចម្រូងចម្រាស កាលពីខែកក្កដា បូករួមទាំងផែនការបង្កើតក្រសួងមុខងារសាធារណៈដើម្បីធ្វើកំណែទម្រង់ និងផែនការមួយ និងផែនការបើកប្រាក់ខែតាមគណនីធនាគារ ក្នុងកិច្ចប្រឹងប្រែងមួយដើម្បីកាត់បន្ថយប្រាក់សគុណ និងអប្រសិទ្ធភាព។
សារាចរណែនាំនេះមានខ្លឹមសារថា “ក្រសួងសេដ្ឋកិច្ច និងហិរញ្ញវត្ថុ ត្រូវតែរៀបចំធ្វើអធិការកិច្ច និងត្រៀមខ្លួនក្នុងការផ្តល់ប្រាក់ខែដល់បណ្តាក្រសួង ស្ថាប័ន រាជធានី និងខេត្ត មិនឲ្យលើសពីសប្តាហ៍ទី៤រៀងរាល់ខែឡើយ”។ សារាចរណែនាំនេះបានបង្ហាញទៀតថា អភិបាលខេត្តអាចចាត់តាំងអភិបាលរងរបស់ខ្លួនឲ្យទទួលខុសត្រូវក្នុងការត្រួតពិនិត្យការបើកប្រាក់ខែរៀងរាល់ខែ។
សារាចរនេះក៏ស្នើឲ្យរដ្ឋអំណាចមូលដ្ឋានដាក់ជូនទម្រង់បែបបទសម្រាប់បើកប្រាក់ខែឲ្យមន្ត្រីរាជការនៅត្រឹមសប្តាហ៍ដំបូងរៀងរាល់ខែ ដើម្បីឲ្យក្រសួងមុខងារសាធារណៈពិនិត្យ។ គួរបញ្ជាក់ថា ក្រសួងនេះត្រូវតែបញ្ជូនទម្រង់បែបបទដែលត្រូវបានពិនិត្យ និងសម្រេចចុងក្រោយទៅក្រសួងសេដ្ឋកិច្ច និងហិរញ្ញវត្ថុ នៅត្រឹមសប្តាហ៍ទី២រៀងរាល់ខែ។
សារាចរណែនាំដដែលនេះមានខ្លឹមសារបន្តថា “ក្រសួង ស្ថាប័ន រាជធានី និងខេត្ត ព្រមទាំងអង្គភាពពាក់ព័ន្ធទាំងអស់់ត្រូវអនុវត្តសារាចរនេះឲ្យមានប្រសិទ្ធភាពប្រកបដោយស្មារតីទទួលខុសត្រូវខ្ពស់ បន្ទាប់ពីទទួលបានបទបញ្ជានេះ”។ លោក នូ សាខន អភិបាលរងខេត្តកណ្តាលបានលើកឡើងថា យន្តការសម្របសម្រួល ថ្មីនេះរួមជាមួយនឹងការបើកប្រាក់ខែតាមធនាគារ នឹងធានាថា “មន្ត្រីរាជការ នឹងទទួលបានប្រាក់ខែរបស់ខ្លួនលឿនជាងឆ្នាំមុនៗ”។
លោក ច័ន្ទ សាវ៉េត អនុប្រធានសង្កេតការណ៍អង្គការសិទ្ធិមនុស្សក្នុងស្រុក អាដហុកបានលើកឡើងថា ប្រសិនបើមានប្រសិទ្ធភាព គម្រោងថ្មីនេះ នឹងធ្វើឲ្យមានការផ្លាស់ប្តូរដ៏ល្អមួយសម្រាប់មន្ត្រីរដ្ឋាភិបាលដែលបានត្អូញត្អែរជាយូរមកហើយអំពីការបើកប្រាក់ខែយឺតយ៉ាវ និងមិនទៀងទាត់។ ទោះបីជាយ៉ាងណា លោក កែវ ពឿនប្រធានសមាគមមន្ត្រីរាជការស៊ីវិលឯករាជ្យកម្ពុជា បានមានប្រសាសន៍ថា កម្មវិធីកំណែទម្រង់ផ្នែករដ្ឋបាលទាំងនេះមិនឆ្លើយតបទៅនឹងបញ្ហាសំខាន់ គឺបញ្ហាប្រាក់ខែទាបនោះឡើយ។
លោក កែវ ពឿន បានមានប្រសាសន៍ថា “ រដ្ឋាភិបាលគ្រាន់តែធ្វើការកែទម្រង់ឲ្យល្អមើលប៉ុណ្ណោះ ក៏ប៉ុន្តែ វាគ្មានប្រយោជន៍ទេចំពោះមន្ត្រីរាជការស៊ីវិល ពីព្រោះការកែទម្រង់នេះ នឹងមិនធ្វើឲ្យស្ថានភាពរស់នៅរបស់ពួកគេបានប្រសើរឡើយ”។ លោកបានបន្ថែមថា “មន្ត្រីរាជការស៊ីវិលចង់ឃើញ រដ្ឋាភិបាលមានផែនការសកម្មភាពមួយ ដែលអាចឲ្យពួកគាត់ រស់នៅដោយថ្លៃថ្នូរក្នុងសង្គម”៕ ប៊ុននី