ប្រជាពលរដ្ឋរាប់រយគ្រួសារដែលបាត់បង់ដី និងព្រៃសហគមន៍ដោយសារចម្ការកៅស៊ូរបស់វៀតណាមនៅភាគឦសានក្នុងប្រទេសកម្ពុជា នៅសប្តាហ៍នេះនឹងធ្វើពាក្យបណ្តឹងទៅសាជីវកម្មហិញ្ញវត្ថុអន្តរជាតិហៅកាត់ថា IFC ជុំវិញគម្រោងវិនិយោគរបស់ខ្លួននៅក្នុងក្រុមហ៊ុនដំណាំកៅស៊ូ។
លោក អៀង វុទ្ធី នាយកប្រតិបត្តិអង្គការសមធម៌កម្ពុជា ជាអង្គការក្រៅរដ្ឋាភិបាលមួយក្នុងចំណោមអង្គការក្រៅរដ្ឋាភិបាលមួយចំនួន ដែលធ្វើការជាមួយគ្រួសារប្រជាពលរដ្ឋដែលរងផលប៉ះពាល់ទាំងបានឲ្យដឹងថា ពាក្យបណ្តឹងនឹងត្រូវបានដាក់ជូនមន្ត្រីទីប្រឹក្សាផ្នែកអនុវត្តតាមគោលការណ៍របស់សារជីវកម្ម IFC នៅថ្ងៃនេះ ឬក៏ថ្ងៃស្អែក។
ផលប្រយោជន៍របស់សាជីវកម្ម IFC នៅក្នុងក្រុមហ៊ុន Hoing Anh Gia Lai (HAGL) ត្រូវបានលាតត្រដាងលើកដំបូងដោយអង្គការឃ្លាំមើលបរិស្ថានរបស់ចក្រភពអង់គ្លេសគឺអង្គការ ក្លូបល វីតណេស (Global Witness) កាលពីខែឧសភា នៅចុងបញ្ចប់ប្រតិបត្តិការស៊ើបអង្កេតរយៈពេលមួយខែ ដែលនាំឲ្យមានការសន្និដ្ឋានថា សកម្មភាពវិនិយោគរបស់សាជីវកម្ម IFC និងធនាគារ Deutsche Bank កំពុងជួយផ្តល់ហិរញ្ញវត្ថុដល់សកម្មភាពកាប់ឈើខុសច្បាប់ និងសកម្មភាពទន្ទ្រានយកដី ដែលធ្វើឡើងនៅចម្ការកៅស៊ូជាច្រើនរបស់ក្រុមហ៊ុននេះនៅទីនេះ។
យោងតាមអង្គការ ក្លូបលវីណេស ដដែល បានឲ្យដឹងថា សាជីវកម្ម IFC នៅពេលនេះមានប្រាក់ចំនួន១៥លានដុល្លារវិនិយោគក្នុងមូលនិធិវៀតណាមដែលមានចំណែកជិត៥ភាគរយនៅក្នុងក្រុមហ៊ុន HAGL។ គិតត្រឹមខែវិច្ឆិកា ធនាគារ Deutsche Bankបានបោះបង់ភាគហ៊ុនភាគច្រើនរបស់ខ្លួននៅក្នុងក្រុមហ៊ុន HAGL។ ក៏ប៉ុន្តែសាជីវកម្ម IFCមិនបានបោះបង់ឡើយ។
លោក វុទ្ធី បានឲ្យដឹងថា ពាក្យបណ្តឹងនេះមានសេចក្តីចោទប្រកាន់សាជីវកម្ម IFC ដែលជាសេនាធិការវិស័យឯកជនរបស់ធនាគារពិភពលោក(World Bank) ថា បានរំលោភគោលការណ៍របស់ខ្លួនដែលធានាថា សកម្មភាពវិនិយោគរបស់ខ្លួនត្រូវបានអនុវត្តប្រកបដោយក្រមសីលធម៌។ លោកបានមានប្រសាសន៍ថា “ផ្អែកតាមគោលការណ៍របស់សាជីវកម្ម IFC ពួកគេត្រូវពិនិត្យគោលនយោបាយរបស់ពួកគេ ហើយក្រុមហ៊ុន [ HAGL] ត្រូវតែអនុវត្តតាមគោលនយោបាយទាំងនេះ”។
ប៉ុន្តែក្រៅពីចង់ឃើញសាជីវកម្ម IFC ដកខ្លួនចេញពីដូចធនាគារ Deutsche Bank គ្រួសារប្រជាពលរដ្ឋចង់ឲ្យសាជីវកម្មនេះប្រើចំណែកហិរញ្ញវត្ថុរបស់ខ្លួននៅក្នុងក្រុមហ៊ុន HAGL ដើម្បីដាក់សម្ពាធលើក្រុមហ៊ុនចម្ការកៅស៊ូឲ្យប្រគល់ចម្ការដល់ពួកគាត់វិញ និងឈប់រានព្រៃ និងទន្ទ្រានយកដីទៀត។
លោក វុទ្ធី បានមានប្រសាសន៍ថា “យើងចង់ឲ្យពួកគេជួយបញ្ឈប់សកម្មភាពរានព្រៃនិងព្យាយាមសម្របសម្រួលកិច្ចចរចារវាងសហគមន៍ ក្រុមហ៊ុននិងសាជីវកម្ម IFC។ សហគមន៍ខ្លះនៅចំកណ្តាលចម្ការកៅស៊ូ ដូច្នេះស្ថានភាពពិតជាមិនល្អទេ”។
ភ្លាមៗបន្ទាប់ពីរបាយការណ៍ចេញពីអង្គការក្លូបលវីណេស សាជីវកម្ម IFCបានលើកឡើងក្នុងន័យការពារខ្លួនថា ខ្លួនពេញចិត្តបោះទុនវិនិយោគនៅក្នុងមូលនិធិនេះ ដូចទុនវិនិយោគនៅក្នុងក្រុមហ៊ុន HAGL ជាជាងក្រុមហ៊ុនឯកជន មួយផ្នែកដោយសារតែហានិភ័យនៅក្នុងមូលនិធិ មានភាពងាយស្រួលក្នុងការគ្រប់គ្រង។
សាជីវកម្ម IFC ក៏បានលើកឡើងផងដែរថា ខ្លួននឹងសិក្សារបាយការណ៍នេះ ដើម្បីពិនិត្យតាមដានបន្តមូលនិធិនេះ។ ក្រុមហ៊ុន HAGL បានបដិសេធថា ខ្លួនមិនបានធ្វើអ្វីខុសនៅក្នុងចំណែកនៃចម្ការកៅស៊ូរបស់ខ្លួននៅកម្ពុជាទេ៕ប៊ុននី