នគរបាលនិងកងរាជអាវុធហត្ថជាង២០នាក់នៅក្នុងខេត្តមណ្ឌលគិរី បានឡោមព័ទ្ធផ្ទះឧត្តមសេនីយ៍ត្រីមួយរូបក្នុងជួរកងយោធពលខេមរភូមិន្ទកាលពីថ្ងៃសៅរ៍ បន្ទាប់ពីទទួលបានព័ត៌មានថា លោកបានលាក់ឈើប្រណីតៗនៅក្នុងផ្ទះរបស់លោក។
លោក ញ៉ែម វណ្ណី ស្នងការនគរបាលខេត្តបានមានប្រសាសន៍ថា លោកបានបញ្ជាឲ្យនគរបាលទៅឡោមព័ទ្ធផ្ទះឧត្តមសេនីយ៍ត្រី ឈិត ម៉េងស្រេង មេបញ្ជាការកងយោធពលខេរភូមិន្ទខេត្តនេះ បន្ទាប់ពីអ្នកភូមិក្នុងមូលដ្ឋានរាយការណ៍ថា បានឃើញរថយន្តដឹកឈើប្រណីតៗខុសច្បាប់កាត់តាមចម្ការកៅស៊ូនៅក្រោយផ្ទះរបស់ឧត្តមសេនីយ៍ត្រីរូបនេះ។
លោក វណ្ណី បានមានប្រសាសន៍ថា “ខ្ញុំបានទាក់ទងតាមទូរស័ព្ទទៅសាលាដំបូងខេត្តភ្លាម ហើយបានស្នើសុំដីកា…ឆែកឆេរផ្ទះរបស់លោក ម៉េងស្រេង បន្ទាប់ពីអ្នកភូមិរាយការណ៍ប្រាប់កម្លាំងរបស់យើងថា ពួកគាត់បានឃើញរថយន្តជាច្រើនគ្រឿងដឹកឈើទៅផ្ទះរបស់លោក។ យោងតាមលោក វណ្ណី បានឲ្យដឹងថា អមដំណើរដោយលោក សូ សុវិជ្ជា ព្រះរាជអាជ្ញារងអមសាលាដំបូងខេត្ត នគរបាលបានរកឃើញឈើប្រណីតប្រាំពីរដុំនៅក្នុងផ្ទះរបស់លោក ម៉េងស្រេង ស្ថិតក្នុងឃុំស្រែខ្ទុំ ស្រុកកែវសីមា និងឈើប្រណីតពីរដុំទៀតនៅក្នុងរថយន្តរបស់លោក។
លោក វណ្ណី បានឲ្យដឹងទៀតថា នគរបាល និងកងរាជអាវុធហត្ថជាង៥០នាក់ទៀតត្រូវបានដាក់ពង្រាយកាលពីម្សិលមិញ ដើម្បីឆែកឆេររកឈើខុសច្បាប់បន្ថែមទៀតនៅក្នុងចម្ការកៅស៊ូរបស់លោក ម៉េងស្រេង ទំហំ៥ហិកតា ។
លោក ម៉ី អាន ស្នងការរងនគរបាលខេត្តបានមានប្រសាសន៍ថា នគរបាលបានរកឃើញឈើប្រណីត៤៨ដុំនៅក្នុងចម្ការកៅស៊ូនេះ ដោយលោកបន្ថែមថា ឈើដែលរឹបអូសបានទាំងនោះត្រូវបានយកទៅរក្សាទុកនៅការិយាល័យរដ្ឋបាលព្រៃឈើស្រុក។ លោក ម៉ី អាន មានប្រសាសន៍ថា “យើងមិនទាន់ដឹងនៅឡើយថា តើលោក ម៉េងស្រេង នឹងត្រូវប្រឈមនឹងការចាប់ខ្លួនដោយសារករណីនេះឬយ៉ាងណានៅឡើយទេ ពីព្រោះវាជាសមត្ថកិច្ចរបស់តុលាការ”។
លោក សុវិជ្ជា អះអាងថា ឈើប្រណីតដែលជាប្រភេទក្ដារបន្ទះមានមុខកាត់១៣សង់ទីម៉ែត្រ និងមានប្រវែង១,២ម៉ែត្រនោះ ត្រូវបានរកឃើញនៅក្នុងផ្ទះរបស់លោក ម៉េងស្រេង។ លោក សុវិជ្ជា មានប្រសាសន៍ថា “ម្ចាស់ផ្ទះ [លោក ម៉េងស្រេង] បានប្រាប់ពួកយើងថា ឈើនេះជារបស់ប្អូនប្រុសលោកទេដែលបានយកមកទុកនៅទីនោះរហូតដល់គាត់សាងសង់ផ្ទះថ្មី”។លោកបានបន្ថែមថា “យើងមិនទាន់មានផែនការចាប់ខ្លួនលោក ម៉េងស្រេង នៅឡើយទេ ពីព្រោះអ្នកជំនាញកំពុងស៊ើបអង្កេតករណីនេះ”។
លោក សុខ រដ្ឋា អ្នកសម្របសម្រួលអង្គការសិទ្ធិមនុស្សអាដហុកប្រចាំខេត្តមណ្ឌលគិរី បានមានប្រសាសន៍ថា ប្រសិនបើប្រតិបត្តិការនគរបាលពិតជាមានបំណងទប់ស្កាត់ការកាប់ឈើខុសច្បាប់មែន ត្រូវតែមានការចាប់ខ្លួនក្នុងករណីនេះ។ លោកមានប្រសាសន៍ថា “ខ្ញុំគិតថា អាជ្ញាធរកំពុងឃុបឃិតជាមួយអ្នកជំនួញ ពីព្រោះពួកគេបានរឹបអូសឈើមែន ប៉ុន្តែមិនទាន់ចាប់ខ្លួនម្ចាស់ឈើនៅឡើយទេ”៕ សារុន